nevertoosweet's Profile

成年無寫食評了，唔係我無再食好西，係我懶，我又返來了。 依排食左好多 harbour city 餐廳，全因為 harbour city dining coupons 太抵食，可以用到 coupons 嗌 set lunch 實在令人感動！328 for 2 courses少少偏貴但已經好夠飽，一嚟又有籃包任你食呢，balsamic vinegar and olive oil 點包都飽左一半先。Soup of the day 係南瓜，幾清甜都幾多蝦肉，唔錯。沙律啲汁都較得幾好，清新，但又唔會太淡，魷魚燒過都幾好食，唔韌。依個意粉普普通通啦，佢啲汁係正常紅汁味，魷魚唔夠爽口，不過不失。依碟意粉係令人失望的，難食又未至於，不過無咩味咁，angel hair 都彈牙的，不過都係無味，啲菇都係無味，總之就係成碟野都無味。嚟到個 cake 已經好飽了，但佢都做到個 cake 勁輕身，唔算太甜，所以都食得落，佢個 cream 只有奶味，一啲甜味都無，唔錯。買單用完 coupon 後每人 around 230蚊。總括嚟講，少少偏貴，唔係難食但食物對唔住依個價錢，無 coupons 應該唔會再嚟吧。…Read More

Eaton Hotel 翻新左之後我地都無黎過依間位於 basement 既自助餐餐廳，大概$370 食佢既自助午餐，價錢不算貴，但係黎到真係覺得物超所值。首先講講海鮮，因為香港人最鍾意食，同埋成日覺得食依啲貴價唔飽嘅嘢先至算值回票價，咁呢間自助餐真係OK 㗎，因為佢海鮮真係有好多選擇。佢嘅生蠔即刻開，一個人負責開，另一個人就即刻拎住啱啱新鮮開嘅生蠔去水喉度洗，法國既生蠔細細粒，相對比較鹹，但真係好少肉，我食左十粒先感到滿足。蟹腳蟹鉗小龍蝦青口全部都好有鮮味！魚生部選擇唔多，但有我至愛既鯛魚同希靈魚！好多漬物！我發現呢間餐廳好多細節位，譬如佢啲羊肉牛肉隔離會擺埋好多好多唔同嘅配料啦，唔係剩係得正常餐廳會有既 pepper and honey mustard ，會有埋啲夏威夷海鹽呀咁。唔太好嘅地方就係啲嘢食散修修，依度一個 counter，轉個彎又有另一個咁，煩煩地。佢仲有新鮮現炸天婦羅，不過佢 refill 既速度不夠快。雪糕是 Movenpick甜品都好多選擇，味道正常，呢個火龍果tart未見過有人整，幾特別。總括來講算係一個好多元化嘅自助餐，不錯。…Read More

同屋企人做節但係又唔想食中菜咁悶，所以嚟咗依間喜來登酒店2樓食自助餐下午茶，因為搵到匯豐卡有折，我哋四個大人都係1100蚊有找。雖然話係下午茶但係都幾多嘢食，我唔知道午餐或者晚餐係咪仲多啲嘢食但係依家都好夠。熟食都好多選擇，冬菇蒸雞蒸得好滑，除了Galette 太鹹了有少少嚇人，其他嘢食嘅質素都正正常常咁囉。佢嘅海鮮都不錯，蟹鉗啖啖肉，青口同蝦鮮甜，選擇唔算多，但係以下午茶呢個價錢來講都唔錯㗎。刺身只有三種，玉子其實不算是刺身，咁樣擺落嚟扮係刺身真係好搞笑。三文魚因為驚多蟲所以我唔會食㗎，主打就係呢隻鯛魚啦，好好好好味！食咗三碟，飽！生果都好多選擇，比較特別係有個木瓜，蟠桃，其他正路野譬如菠蘿同埋西瓜真係甜到爆，懷疑佢係咪浸左糖水。甜品都係好多選擇啊，真係花多眼亂，不過不失啦質素就，我鍾意佢好有聖誕氣氛，festive 既甜品好靚！總括來講，呢個價錢抵到爛啦，no complain! …Read More

個個都黎打卡，我地又黎下，講真影相出黎係幾靚既，但係間餐廳其實好細，仲要個位勁唔就腳，係一間好噏耷嘅酒店一樓。餐廳一眼望晒，每張枱都會擺啲好靚嘅杯同碟，似係土耳其個啲ceramics ，係靚的，但仔細睇好多崩花，最美中不足係間餐廳咁靚但係個廁所好似公廁咁，佢係乾淨企理的，之不過真係同出邊好大反差。食物方面，只能話係合格。黑松露意粉都係幾香既，但係唔知點解係甜味的，好古怪，帶子係新鮮彈牙的，但有少少唔夠熟。牛肝菌意大利飯不錯， risotto 有咬口得黎唔會太硬。森林和原野個擺盤好靚，隻 lady bug 好醜樣，整走左先影相會好啲。綠茶蛋糕唔係太好食，冇咩綠茶香味但係有嗰陣苦味，tiramisu 裡面係雪糕，咁雪糕冇理由唔好食嘅。潘多拉的盒子其實似水母，係敲碎左之後可以食嘅糖，不太甜，但好硬，驚咬崩牙。個 tart 都幾好食，好重士多啤梨味。依杯士多啤梨三重奏又係個樣好靚，但說穿了只是一杯士多啤梨奶昔，索價 88，為左影下靚相。總括來講，影相影一次就夠啦。…Read More

Yamm 不嬲大家都係去食佢個自助餐，a la carte 應該都好少人試過，食完之後我就知道點解啦，因為真係好鬼難食。意粉係正路嘅酒店價錢你話貴又唔係好貴嘅，$200差不多吧。隨午餐附送嘅包係好食過佢意粉本身好多，起碼係熱熱地，芝麻包都幾鬆軟咁。首先黎個 carbonara，意粉嘅質感都算係幾好食，味道還好啦，正正常常幾 creamy 咁，不過撈埋煙肉就肯定鹹少少架喇，carbonara 不嬲都係咁，尚可接受。恐怖既係依碟 seasonal vegetables，奉勸閣下如果唔想腎衰竭都唔好嗌，有病，鹹到離哂大譜，其實食著呢啲餐廳真係好煩，我真係唔會去換過第二碟囉，就算我好聲好氣咁樣要求我都會好驚啲人會 lur 口水攞碟嘢度，始終係我彈緊佢哋嘅味道有問題，所以焗住成碟食晒。嗰啲蔬菜仲鹹個意粉本身，真係低處未算低，佢附送嘅芝士又更加鹹。總括嚟講，鹹到嚇死你！咁既味道夠膽死煮出嚟俾人食真係口眼無恥！…Read More

閒閒地想食個下午茶，亂咁行入一條小巷，亂咁食咗依間餐廳，驚喜又說不上，不過都算穩打穩紮，係一間有香港特色嘅小店。滑蛋叉燒飯，香港打工仔應該冇邊個未食過。呢度賣得唔貴，50幾蚊中環價錢來講正常啦，叉燒可以多幾塊囉，但係佢碟野嘅份量係夠飽嘅，啲滑蛋唔算係最滑最香嗰隻，佢啲叉燒就幾好食，小小半肥瘦咁，我個人喜好係要肥多少少就最正喇。炸雞髀襯薯條其實冇可能難食嘅，佢隻雞髀嘅味道都醃得幾好，都做到外脆內軟嘅，啲肉仲好juicy添，30幾蚊夫復何求？佢啲雞皮冇乜粉，我自我感覺良好覺得食咗都唔會覺得好飽滯。我欣賞佢啲薯條夠 raw，唔會話加好多鹽加好多調味粉咁。雞髀同埋薯條都係即叫即炸非常新鮮熱辣辣。總括來講，都幾抵食嘅。…Read More

這是朋友的好介紹，佢已經儲印仔儲左好多個，佢話已經係佢既飯堂，因為太好食啦。今日一試，所言非虛，真係好有質素。有好多唔同嘅牛丼，啱晒食肉獸。依客火灸狂牛丼，啲肉味道較到啱啱好，好香蒜味，啲肉係七成熟，再撈埋啲蛋汁同醬汁同飯一齊食，不得了！再黎依個 menu 都好新穎，可以自選丼實在太好了！左口魚，蟹糕（張相影唔到，喺另一邊）同埋吞拿魚飯。海膽甜蝦。依兩個魚生飯都係有質素之選，新鮮，價錢合理，特別推介個蟹糕，超甜，我朋友話佢有呢個蟹糕之後佢再食唔落其他魚生飯，我明白的，係好正！左口魚極之肥美，油而不膩既感覺太令人感動了！隨餐附贈雪糕糯米糍同埋罐裝飲品，罐裝飲品我嗌左柚子蜜，不太好飲下次睇吓其他先。總括黎講，好啦，將你納入飯堂之一啦！…Read More

依家拉麵店嘅價錢好合理，好似我嗌嘅三田拉麵咁，$78咋，出邊閑閑哋都過百啦。佢嘅份量都OK幾大碗，夠飽，味道唔算太鹹，但係可能我哋食開嘅拉麵都係豬骨湯嘅拉麵多啲啦，咁呢個魚湯可能大家會覺得好似味道唔係太突出。依個沾麵都係幾大碗，味道不錯，鹹度適中，同拉麵一樣都好彈牙幾唔錯㗎，不過依隻面就會粗身少少。即場炸嘅小豬扒就真係令我有驚喜啦，真正做到外脆內軟，熱辣辣！正！呢個炸雞翼都係令到我依個平時唔食雞皮嘅人都食埋啲雞皮呀！佢寫住黑椒味我諗住仲會好重口味添，點知原來係甜甜地㗎我係鍾意食甜野既人黎架嘛，所以真係抗拒唔到。間餐廳嘅裝修就普普通通啦都係日式嘅風格，但係都幾寬敞囉，尤其是門口位兩張枱有位擺BB車真係一流！總括來講呢個價錢呢個質素，不錯。…Read More

最鍾意尋幽探秘搵小店，見依度食個早餐唔貴，所以黎試下！跟餐加$8 有杯 Cappuccino，超值，如果飲 black coffee 係跟餐送免費飲，不過我真係受唔到，唔想眼光光到天光。先黎個 to go croissant truffle，個牛角包好大個，都好多 truffle egg，個包焗到好脆，啲蛋可以鹹多少少 truffle 濃多少少就 perfect 了。嗰啲沙律菜好好食，因為我不嬲都鍾意沙律醋，呢隻沙律醋好甜好杰身，I like! 不過菜可以多啲既。Breeze Toast 好清新好健康，特別欣賞佢嘅蕃茄，超甜，同啱啱個牛角包一樣，啲沙律菜可以多啲就最好不過了。雖然我成日飲咖啡，但係我不算是咖啡專家，我覺得幾好飲嘅。總括黎講，價錢合理質素唔錯，可以再黎。…Read More

其實之前我已經食過灣仔嗰間，嗰陣時已經覺得好普通，但係見K11 Musea開咗，好多人排隊咁喎，咁咪又中伏多次囉。唔知係咪我揀咗BBQ醬，佢都幾多醬嘅，唔至於我要乾爭爭咁樣食個包，但係佢嘅醬汁唔係太惹味，牛肉都冇乜牛肉味，我真係諗極都諗唔明點解佢可以賣個包賣到咁貴，你值咩？Milkshake 係邪惡到不得了，講真係好好好好飲，自製口味，我加哂啲最肥既野落去，peanut butter, Oreo, Cream，所以唔會唔好飲嘅，飲完之後係有啲罪惡感咁啫。薯條先至不知所謂，佢喺個牆度大大隻字寫住話自己係意大利買咩薯仔過嚟，咁我幻想好有薯味啦，喂～淋嘅，我覺得似隔夜囉，唔脆好似擺咗好耐咁都算，大佬你使唔使整咁多調味粉落去，咁薯仔質素幾高都冇用啦，我見有好多薯皮好似好好食咁，我想食shake shake 粉就去 m 記啦，上次去灣仔我間我嗌咗完全走鹽走調味料，上次我記得個薯條係幾好食，今次個包又唔得薯條又唔得，真係最後一次！總括嚟講，不知所謂！！…Read More

見到佢話五點前半價又咁啱肚餓咪當食下一個好早嘅晚餐，半價後嘅性價比真係好高！佢嘅前菜花生好甜，其實諗緊下次係咪可以唔要。楊州炒飯都幾大碟，足料，有鑊氣。海鮮喇沙個湯底都幾有水準，同埋好多料。冇骨嘅魚肉好多肉好好食，大蝦都好彈牙好新鮮。依碗海鮮米線湯就會見到同海鮮喇沙差唔多嘅料，唔同嘅只係多咗啲豆腐同埋菇，我真係好欣賞啲魚塊！我覺得依間餐廳最好嘅地方係就算係半價嘅優惠時段，佢哋嘅食物質素同埋份量都係同正常一樣，因為其實之前我都有食過，嗰陣時未有半價優惠，我記得嗰陣時嘅海鮮喇沙同埋海鮮米線湯都係差唔多。買單嘅時候每款都係差唔多$50有找，茶餐廳價錢，食物質素又好過茶餐廳，夫復何求。其實我見到佢甜品都有半價優惠，不過食到好飽啦唔使再嗌啦。小菜嗰啲就冇優惠了。總括嚟講，呢度食下粥粉面飯同埋甜品半價真係一流！…Read More

而家越來越少人排隊啦，未食過嘅朋友可以食下，我見最多人嗰陣時都係等 40 分鐘，我好好彩等左四五個字就有得食。而家我喺日本食過，淨係食過原味，所以今次試下佢其他口味吧。奶茶味 pancake 好好食，同日本一樣，pancake 做到好香蛋味，好鬆軟，我鍾意佢嘅原因係因為佢啲 pancakes 唔算好甜，如果想要甜啲就自己點啲奶茶汁，上面啲穀物好脆好香，奶茶汁似 earl grey 味，好正。Tiramisu pancake 既 pancakes 一樣都係高水準，只不過我個人鍾意奶茶味香啲，呢個就甜甜控會鍾意多啲。佢啲cream亦都打得好幼滑。聽人食左咁耐happy pancake，都冇聽過人哋食鹹嗰隻，等我去試試佢先。本來覺得一定好唔掂，因為明明係甜品嚟㗎嘛，點樣可以襯落去芝士蘑菇度呢？點知，原來鹹 pancakes 係可以繼續無哂甜品既感覺，keep 住個蛋香，仲要加左啲好有咬口既穀物粒，好正！芝士蘑菇就普通啦，不過不失。總括嚟講，如果條隊唔係太長嘅話我覺得都可以排一排黎食下！…Read More

位置一流，位於銅鑼灣時代廣場羅素街對面上 5 樓，所以雖然係樓上鋪但都門庭若市，目測都 full house，有幾個人排隊咁。睇睇個餐牌～ 價錢親民合理， 50幾 60 蚊食野有野飲，銅鑼灣黎講真係不錯。想加 10 蚊跟湯，佢話個湯係凍的，依間是俄國菜嗎？做咩咁冷門整啲凍湯出黎？我唔係無飲過凍湯，但真係不算大眾化。我地 3 個朋友都係叫 3 號餐，一個就叫第二樣野，我地 3 個就出事了。我地有理由相信佢間野得一個細焗爐，每次只能焗一份意粉，我地 3 個份意粉次次都係上一個差不多食完先會收到新個份，唔知大家會唔會覺得咁樣好尷尬呢？我就會喇，明明大家叫既餐一樣，但大家讓黎讓去，食緊個個好唔安樂，見到另外兩個未有得食，未食個兩個又好肚餓咁眼巴巴望住人地食完，如果時間只係差少少都還好，但係連續兩次都係人哋食晒成碟先至有下一碟，搞到個 lunch 好漫長！我地問左幾次究竟幾時先有下一碟，可能 waitress 覺得得地問完第二碟又追第三碟好煩卦，自問我地都係好好禮貌咁問，但去到第 3碟佢燥左，勁大力 bam 碟意粉落枱面，俾到我港式茶餐廳既文化體驗 講返碟千呼萬喚始出來嘅意粉，普通啦，都幾多 cheese，問題係太多肉醬太少意粉，都痴痴地，好鹹呀啲肉醬又無意粉撈黎食，個味道如果多粉啲係會正常的，但就咁食肉醬，吃不消。總括黎講，無下次！…Read More

經過依間餐廳門口好吸引所以我哋入咗去，佢呢搞到好似酒吧咁，燈光又好迷幻，點知上到去餐廳成間muji咁。晏晝四點幾我哋包場，一個食客都冇。先來個黑松露薯條，黑松露醬好香好好食，我欣賞啲薯條有埋薯皮，好有薯味！同埋薯條唔算太鹹！Deluxe afternoon tea set 包兩杯野飲，但係係講緊凍檸茶熱檸水嗰啲飲品先至包，我哋嗌嘅依兩杯嘢飲只可以半價。cappuccino 同 latte，兩杯都有水準，好香咖啡味，老實講太足料啦所以夜晚我瞓唔着。Deluxe afternoon tea set 顏值極高，大家都食開幾層嘅afternoon tea，依家一層已經可以好靚好優雅。最搶眼嘅就梗係出晒煙嘅綠茶朱古力 mousse，蝦多士略嫌清淡，蝦味唔係好夠。榛子醬甜品好好食，配 scone 既 jam 同 cream 亦都不錯。總括黎講，打卡一流！…Read More

首先我要講下依間野嘅冷氣好唔掂，依家夏日炎炎，佢嘅落地玻璃曬到成間餐廳勁熱，但係個冷氣可能壞咗，我一路食一路覺得好焗好熱。間餐廳好窄好細，但裝修都幾清新。講返食物先。呢個雞髀雞有雞味，真係食得出佢冇乜點用調味料，因為依間餐廳係標榜冇味精，講真要健康就唔會好好食，只能講幾健康，雞肉係彈牙新鮮，意粉味道偏淡，蘿蔔同洋蔥就少少怪味，尚可入口。士多啤梨柚子沙律嘅士多啤梨唔算好甜，普普通通，個醬汁少左啲但都幾惹味既。個賣相好靚份量都幾多。龍蝦雞肉 pizza 目測龍蝦肉不多，但係啲龍蝦肉真係好新鮮好彈牙，有海水味，雞肉似係佢隻雞脾個種好似好organic 好新鮮嘅雞。又係醬汁唔夠多，食到餅皮附近就會覺得唔夠味。總括嚟講，健康之選。…Read More