ttlsk063a32's Profile

平日放工同朋友去咗旺角牛魔試下燒肉，點咗兩份 A13 日本A4和牛西冷＋牛板腱套餐，其中一份再升級成 牛魔蘭王蛋鵝肝炒飯，而飲品就揀咗凍奶茶同菠蘿梳打特飲，各有特色，成餐都有驚喜 😋。和牛雪花靚得嚟好平均，上烤爐好快就聞到油香，輕輕烤到微焦就已經入口即化，油脂甜香，非常滿足；牛板腱就肉味濃啲、有咬口但唔乾，兩款肉一嫩一實，味道層次好豐富，幾抵食！升級嘅鵝肝炒飯好出色，飯粒乾爽、蛋香濃郁，鵝肝有微微焦香，混埋炒飯真係好香口，食到好滿足。最值得一讚係佢哋嘅抽風，一落肉煙就即刻抽走，成間店都唔覺得焗或油煙味，食完件衫完全無「燒烤味」掛住，超加分 👍。以呢個價錢可以食到高質和牛、足料升級炒飯、加埋舒服無油煙環境，呢個套餐真係值得一試～🥰…Read More

今日難得早放，於是去咗附近一間cafe食lunch。我點咗虎蝦蟹肉蟹膏濃蝦汁意大利飯同一杯開心果Cafe latte。好特別嘅係，佢哋用咗米型粉代替傳統意大利飯，口感滑溜得嚟，仲好吸味。第一口食落去，成碟米型粉有着濃郁蝦汁味道同蟹膏嘅鮮香，令我一啖接一啖好快就食晒。飲品方面，我點咗杯開心果Cafe latte，咖啡嘅苦味配上開心果香氣，飲完即刻覺得心情好到飛起。總括而言，呢間咖啡店真係做到有心思，無論係主食定係飲品，都令人感受到廚師嘅用心。食完之後，我已經開始期待下次再嚟，真係好想再試多啲佢哋嘅創意菜式！…Read More

諗住買個蛋糕慶祝吓冬至，然後就俾我見到呢一個玄米茶開心果麻糬戚風蛋糕✨見佢賣相咁吸引，於是買一個嚟試吓，結果令我喜出望外🤩玄米茶同開心果嘅味道好夾，成個蛋糕除咗夠鬆軟之外，每一層不同味道的忌廉(包括朱古力、開心果同埋玄米茶）和麻糬嘅配搭更豐富了整個蛋糕的口感💚不得不提係面頭嘅開心果酥皮絲，佢質感細膩酥脆，更帶有濃郁嘅開心果香氣，進一步提升左整體蛋糕嘅口感🥰 我決定下一次一定會再試吓呢間蛋糕店嘅其他蛋糕👀…Read More

入到嚟發現呢間餐廳幾有氣氛，播住唔同嘅廣東歌，令到成個環境都充滿懷舊感👀👀招牌脆皮豬腩肉配酸椰菜及黃芥末 $98脆皮豬腩肉外皮香脆，肉質軟嫩，配埋酸椰菜同埋黃芥末，味道好豐富✨黑松露安格斯煙肉煎蛋芝士漢堡 $188漢堡肉汁豐富，不得不讚個薯條有驚喜，令個套餐錦上添花🍔香煎鯛魚柳配蕃茄莎莎青檸汁 $178鯛魚柳煎得剛剛好，魚肉嫩滑，配上酸酸甜甜嘅青檸汁，真係好開胃整體而言，侍應態度良好有善，服務都唔錯，令我哋食得更加舒服。呢間餐廳幾適合平日或者星期五放工同朋友過嚟飲杯酒放鬆吓，享受一下輕鬆嘅夜晚🥂✨…Read More

經過咗忙碌嘅一個星期，終於到咗星期五，又係時候放工去中環HH🥂飲完一round覺得又未夠飽，身邊嘅朋友就講附近有間好味又多pizza款式揀嘅Uncle Pizza, Pasta & Grill🍕🍝呢間食肆位置唔算就腳，唔係喺電梯附近嗰幾間舖頭，上完電梯之後仲要大約行5分鐘就會到啦😉餐廳面積唔算特別大，但係坐落去座位都算係寬敞舒服☺️由於我哋唔係特別肚餓嘅關係，我哋決定只係叫一個Pizza🍕同一個pasta🍝最後我地叫咗一個叫Uncle Wong嘅🍕同Spaghetti Surf & Turf Herbs Chicken Breast & Cuttle Fish with Black Ink Sauce🍝Uncle Wong🍕- 其實係一款Carbonara嘅pizza，上面有Para ham，wild mushroom 同埋smoked egg，味道偏濃，推薦鍾意食濃味Pizza嘅朋友可以試吓👍🏼Spaghetti Surf & Turf Herbs Chicken Breast & Cuttle Fish with Black Ink Sauce - 呢款傳統嘅意大利麵加埋雞胸肉同魷魚圈，再配上ink sauce，味道非常夾😋雞肉鮮嫩，醬汁香濃唔會太濃，味道非常恰到好處…Read More

平日夜晚收工，同朋友去附近一間台灣餐廳食飯，冇諗過有驚喜😋 我地叫咗一份蜜汁滷排骨滷肉飯同埋一份淡水無骨豬手滷肉飯，再加埋一份花蓮小食拼盤。小食拼盤包括有好多款，有鹽酥雞、甜不辣、櫻花蝦餅、雞卷、滷蛋、香腸、詐地瓜條、炸花枝丸同埋麻辣鴨血。嘢飲就分別叫咗一杯黑糖珍珠奶茶同埋自家製芋泥鮮奶。我最鍾意嘅當然係滷肉飯啦！蜜汁滷排骨滷肉飯嘅排骨好滑好嫩，加埋蜜汁甜味，好好味！淡水無骨豬手滷肉飯嘅豬手都滷得好入味，同埋米飯個口感都好好，啖啖食都好飽足。花蓮小食拼盤份量唔多，但款式好多，全部都好好味！我最鍾意嘅係鹽酥雞同埋炸花枝丸，外脆內嫩，再配上店家嘅特製醬汁，真係好開胃！嘢飲方面，黑糖珍珠奶茶好香濃，珍珠Q彈有口感，仲有自家製芋泥鮮奶，芋泥好濃郁，同鮮奶混合落去，好好味！…Read More

Happy Friday諗住同男朋友去飲嘢🍻於是去咗附近呢間串燒店諗住食啲嘢再出發。舖頭唔算大，但係啲嘢食都幾好，所以我諗我哋下次如果口痕嘅話，都會嚟返呢間叫外賣返屋企食😚我哋叫咗錫紙肥牛、雞軟骨、雞皮、厚切牛舌心、一口牛、五花腩同埋一罐可樂。特別推介呢度嘅雞軟骨同埋厚切牛舌心，兩樣嘢食落都好有驚喜🤩整體黎講，呢間串燒店嘅食物性價比真係唔錯！如果你放工或者屋企喺附近又口痕想食吓串燒嘅話，可以過嚟呢間試試佢😉…Read More

樓上鋪一直都係我想試嘅餐廳，因為唔容易俾街外嘅情況騷擾，而今次就試咗一間樓上鋪居酒屋🇯🇵先講講環境，成間居酒屋嘅氛圍非常舒適，而且環境寬敞，店員都好有善，我哋一早book定位，即使早咗少少到店員都好快安排到座位俾我哋。🍢京蔥雞肉串 - 雞肉非常嫩口滑，蔥味香濃🍢蒲燒鰻魚 - 性價比非常高🍢厚切燒牛舌 - 牛舌味偏濃，同隻串燒汁味道好夾🍢燒雞泡魚乾 - 唔係飲開酒嘅我第一次食，好有驚喜！送酒一流🥃🍢椒鹽粟米 - 味道偏辣，辣得好過癮，鍾意食辣嘅冇得輸🍢燒雞翼串 - 雞翼外面個層皮燒到好脆口🍢雞軟骨 - 係我最鍾意嘅菜式，份量非常足夠，雞軟骨非常爽口🍢芝士年糕 - 燒芝士年糕外脆內軟，芝士味道好濃🍢燒杏鮑菇 - 一咬落去啲汁爆曬出嚟🤩…Read More

近排聽講藍田開咗間九頭鳥，特登嚟呢間米線試吓！睇佢個餐牌，都有唔少選擇可以揀。最後我叫咗一個雞肉墨魚頭雲南酸辣（三小辣）米線再加杯凍華田。個米線等咗大概10分鐘到就有，算係幾快手。至於姐姐嘅服務態度，本身都冇咩大期望，但係我只係想要杯水，佢就咁用手指指一指示意要自己出去斟就擰頭走。。。其實態度真係可以好翻少少。。。講番碗米線先，個湯底略嫌有啲太淡，冇乜酸辣味。。。比較好嘅係，佢又加返個芫荽令到個湯底有返啲味，但係個花生如果可以再香口啲嘅話會更加好。至於個米線，我個人就覺得太淋啦。。。而餸嘅份量我就覺得啱啱好，幾足料。總括而言，我覺得譚仔或者譚仔三哥好味過九頭鳥，試過一次就夠😅…Read More

Durian ice cream is available again and I finally got the chance to buy one this weekend🥹 I just added one scoop of durian and the flavour is already very rich🤩 In general, the ice cream is so good that I will definitely try it again!!!…Read More

又到每個月嘅紀念日，於是嚟到呢間鐵板燒同男朋友慶祝開心吓😚羽衣甘藍配無花果沙律🥗無花果配羽衣甘藍再加甜甜酸酸嘅黑醋，係一個好開胃嘅配搭🤩日本白粟米配玉子燒🌽個粟米好有驚喜，係生嘅粟米但食落去竟然有一種好清甜嘅感覺😮玉子燒就正常發揮，好味😚🌟18層海膽杯🌟‼️大力推介呢個海膽杯‼️成個海膽杯好足料，鮮味十足🤩問返師傅，原來呢個海膽杯用咗足足18款食材，唔怪得知味道咁豐富，咁有驚喜🤤🌟火焰海膽甲羅燒🦀‼️大大力推介呢個火焰海膽甲羅燒‼️呢個菜式上枱方式好特別，師傅點火燒走外面包着甲羅燒嘅紙🔥成個甲羅燒用料十足，有魚子醬，又有三文魚子，又有海膽，仲有滿滿嘅蟹肉蟹膏🦀 活龍蝦兩食(海膽醬芝士焗、海膽牛油蝦膏煮)🦞呢個龍蝦不得了🥹望住師傅整嘅時候已經聞到好香好香，期間已經急不及待想食😆兩款煮法都好好味，其中我更加鍾意海膽牛油蝦膏煮嘅方式，醬汁超濃厚，超級惹味🥰A5 石垣和牛(沖繩縣)🐮和牛正常發揮，上面呢爆爆珠令到成件事冇咁油膩，有畫龍點睛嘅作用😋五色燒野菜炒飯配蘭王蛋特色紙包花膠蜆湯總括而言，成餐飯都食得好開心，好滿足☺️呢間絕對係一間我會再嚟試多次嘅鐵板燒🥳…Read More

Happy Friday嚟到希慎廣場呢間Green Waffle，叫咗兩個Dinner Special Set嚟試吓，因為咁樣叫真係好抵食😚見到佢Menu都有唔少選擇，而當中發現好特別嘅係，佢呢度嘅所有材料都講明係新鮮自製，咁對佢嘅食材控制同埋所用嘅原材料都可以放心啦🤤 另外我仲見到佢有提供低卡路里餐單同埋生酮飲食，甚至連pancake都設有「無麵粉」種類 ，可以cater到唔同人嘅 eating styles😉蒜蓉薯仔湯（頭盤）炸薯粒同埋有皮薯條（伴菜）八安士紐西蘭牛柳配自家製薯蓉及燒汁（主食）香煎六安士三文魚牛油果意大利飯（主食）士多啤梨大黃醬窩夫配自選雪糕（甜品）凍蝶豆花鮮奶咖啡及凍蝶豆花梳打特飲（Set Drink）…Read More

平時成日行過經過都見到呢間樂園魚蛋粉，今日見做facial 前有啲時間，於是諗住入去食個快飯。入邊原來除咗粉面之外，仲有得揀食飯😲我就叫咗個崩沙腩拼牛筋河粉，再加錢叫咗一碟生菜同埋一支豆漿。我落咗order都唔夠10分鐘，所有嘢食就已經到晒😆崩沙腩拼牛筋河粉 ($66) + 凍豆漿($8)個湯河份量十足，無論係牛筋定係崩沙腩嘅份量都好足夠，另外佢將啲蔥同炸蒜擺喺匙羹到另上，方便大家依照自己嘅口味想加幾多就幾多👍🏻蠔油生菜 ($10)不得不提呢度嘅菜係冇落油，非常健康👍🏻另外我亦都有特別要求佢將蠔油擺喺側邊，方便我控制份量，大家有需要都可以咁樣要求！總括而言，成餐飯飯嘅性價比好高，完全係快、靚、正 ！…Read More

星期日拍拖經過嚟到附近，突然好想食泰國菜而又見到呢間餐廳，於是就入咗去試吓啦👀佢呢度個裝修都幾特別，相信係以木船做主題來佈置，好有特色。我同男朋友分別叫咗一個冬陰功肥牛金邊粉同埋一個泰式汁燒招牌黑豚肩飯。估唔到兩樣嘢都好大份，我哋兩個都食到好滿足咁走。冬陰功肥牛金邊粉 (跟餐有個小食拼盤:單骨雞翼、炸雞軟骨、炸春卷）個冬陰功湯底甜、酸、辣都有，非常惹味🥴除咗配料例如洋蔥同埋菇嘅份量十足外，佢肥牛個份量都好多🤤 十分足料！另外佢跟餐有個小食拼盤，其中我最鍾意嘅係佢嘅雞翼，香脆可口！而男朋友就表示，個炸雞軟骨好合佢口味🤩泰式汁燒招牌黑豚肩飯呢個黑豚肩飯原來係即叫即燒，所以要等15至20分鐘先至有。上到枱嘅時候，已經聞到一陣撲鼻而來嘅燒肉味， 十分開胃🤤燒肉上面放咗青木瓜沙律，解膩一流。呢個飯好特別嘅係，原來佢喺個飯到加咗隻鵪鶉蛋😲…Read More

放工去到尖沙咀之後，見仲有一個鐘頭到先做treatment，然後咁岩又想食burger🍔於是就入咗嚟呢間Burgeroom試試佢！如果唔係經條長樓梯上嚟，我都唔知原來呢個位開咗Burgeroom🫣佢呢度個裝修風格好特別，係行型格路線，重咗好多🛞嚟做”飾物”，幾得意。坐低咗之後，發現呢度啲burger 同埋sides 嘅款式都有好多。作為鵝肝愛好者嘅我，當然就掙扎緊究竟揀就咁鵝肝牛肉漢堡定係雙鵝肝牛肉漢堡。最後，因為我呢排實在食得太多肥嘢，我揀咗就咁鵝肝牛肉漢堡同埋一個田園沙律。田園沙律個田園沙律有少驚喜😲好鍾意佢個salad dressing係柚子醋汁(?)，而唔係caesar 嗰種沙律醬。上面嘅蕃茄同埋紫洋蔥都好甜，有畫龍點睛嘅作用，非常開胃🤩鵝肝牛肉漢堡成個漢堡嘅主角——鵝肝，果然冇令到我失望🥹個鵝肝煎得啱啱好，突出到鵝肝應有嘅香味同埋油脂味，昇華咗成個漢堡嘅味道🤩如果唔係怕肥嘅話，絕對會揀雙鵝肝牛肉漢堡🤤🤤🤤榛子朱古力（熱）好唔爭氣地，見到人哋飲朱古力，我又忍唔住口都叫咗杯熱嘅榛子朱古力嚟飲😗佢個榛子味唔係好重，但係整體而言味道都足夠嘅，作為成餐嘅完結又幾唔錯🥴最後一個人都食咗成$300 🙈不過間唔中奢侈下都幾好呀🤣😚☺️…Read More