happy_animal_lab's Profile

依家老撾餐廳bookmark左好耐，雖然之前喺中環返工，但總係冇機會去食，到依家離開左又想返去試下。成世人未去過老撾，都唔知老撾係食乜，咁老撾都係東南亞地方，食既野應該同泰國、越南果啲差唔多。個餐牌有超多素食揀，貪心既我就揀左個素盤菜，貪佢乜都有啲。素盤菜唔係我地平時食開一大盆乜都倒哂落去既盆菜，而係有好多小盤子裝住唔同既菜式。成個set有七個小菜、飯同甜品，兩個人食會飽到上心口。香芒米紙卷係點花生醬食，出乎意料之外咁夾。香脆素雞粒係將杏鮑菇切粒拎去炸，整到好似炸雞粒咁，幾好食。茄子醬個樣成個魚香茄子咁，但原來佢個味係偏酸酸甜咁，都幾得意。另外仲有青木瓜沙律、手打素魚餅、老撾蒸粉卷同素肉碎包生茶，全部都色香味俱全，值得encore。甜品個名叫露楚甜品，露楚可能係老撾既詞彙，其實係斑蘭糕同芝麻糕。個糕上面有啲豆蓉花做點綴，好睇又好食。不得不提依個素雞翼，我地order果陣個哥哥仔都提左個雞翼其實係油炸鬼，但係我就係想知油炸鬼點整做雞翼。結果原來真係油炸鬼，味道冇乜特別，但叫做係滿足左求知慾啦。椰汁紅豆冰就冇乜特別，可以試下其他更有特色既飲品。喺唔知老撾菜係食乜既情況下黎試，結果都幾有驚喜，亦令我想繼續發掘冷門菜系既素食。…Read More

朋友介紹新餐廳有好多vegan options，於是成班素食朋友仔一齊去試，結果係一個超級大既伏。因為menu冇相，所以唔知啲食物係咩樣，但個cheese board上到黎成個樣好唔對路。食過vegan cheese既都知vegan cheese同dairy cheese係唔同樣，我地見碟野咁似dairy cheese，就問下個waitress啦。佢毫不思考就話係vegan，於是我地叫佢再問廚房，先知佢真係比左碟dairy cheese我地！擾攘一輪終於食到vegan cheese，味道唔算impressive，同埋硬係仍住佢地都仲係比左dairy cheese我地食。跟住waiter上左一碟好似魚既dish我地，當我地仲好amazed點解外形可以做到同魚一模一樣，同枱朋友醒起我地冇叫過任何素魚菜式。於是又叫waiter過黎，果然佢地拎左碟真魚比我地。去到依度已經唔想再喺度食，但無奈已經order哂，騎虎難下。依個Butter Jack Chick唔知邊一忽似雞，份量又勁少，唔知自己食左啲乜。依個Banana Blossom Eggplant Stack又係垃圾一樣，只係將一堆野堆埋，賣相唔得，味道又係唔知食乜咁。依個Vegan Beet Wellington更係極品！求其拎塊急凍酥皮包住兩片烚紅菜頭，咁樣就夠膽收$290，加埋一要over $300！完全垃圾級別！其實唔識煮素食唔好夾硬整，令人覺得素食就係咁難食，影響大眾對素食觀感。另外就份量同味道黎講都係嚴重overpriced，唔明IG點解咁多正評，希望大家唔好中伏。…Read More

母親大人生日唔想出街食，於是搵左「楓素齋」到會。買夠$800可免運費，不過我地訂得唔多唔夠$800，要自己去拎。自取地點喺火炭既工業邨，有啲隔涉，如果唔想騰黎騰去建議都係比多少少錢運人送上門。叫左3個熱食同一個冷盤，佢地好貼心咁分開左兩袋比我地拎，熱食仲用左保溫袋，拎到返屋企都仲溫笠笠。太史素蛇羹落左好多唔同種類既菇同埋木耳，用黎扮蛇肉。個羹有少少甘味，同啲香草夾得好好，仲有啲炸到脆卜卜既雲吞皮，絕對係有畫龍點睛既效果。甜酸雞肶仔係鮮腐竹包住枝雪條棍，面頭再包一層腐皮，造型同雞槌都幾似架。甜酸醬做到好杰身，每隻雞肶仔都比濃濃既醬汁包裹住。腐竹有啲煙煙韌韌咁，都幾有咬口。素燒賣既質素相對一般，賣相方面如果喺面加返少少蘿蔔碎會像真啲。唔知個餡係用新豬肉定其他素肉，整體口感比較粉，冇juicy既感覺。一路以為依啲菇係叫迷你雞肶菇，原來佢係叫珍珠菇。凍食既感覺都幾特別，啲鹵水好入味，個菇又維持到爽脆既口感，唔會好稔，越食越想食。整體質素都唔錯，會推介比有興趣到會既人。…Read More

北區既素食餐廳唔多，大概就只有以下四間：蓬瀛仙館雲泉仙館普陀素食聯和一起素頭三間都係中式素食，想食啲冇咁油膩既中式齋，就要去聯和一起素。聯和一起素既前身係聯和素食，之前去親都必食佢地既純素牛油果多士，估唔到依家會冇左，有啲失望。但好彩依家既食物都唔錯，可以彌補返個失落感。見到個純素擔擔麵好吸引，仲可以配餃子。個湯底超濃郁，有沾麵既效果，好重花生味，花生控一定會鐘意。另外仲有啲海帶芽同配菜吊下味。餃子皮薄餡靚，脹卜卜好飽滿。本來以為素蠔仔會用草菇扮，原來佢地係用豆腐同紫菜撈埋再搓到一粒粒咁。冇乜特別蠔既口感，但當小食咁都唔錯。就咁食有少少乾，如果可以配個醬會更好。仲有好多菜式未試，佢地用饅頭做Burger既做法都幾得意。喺北區依個素食沙漠，聯和一起素就好似個綠洲咁，令到素食者都有啖好食。…Read More

2016年去倫敦旅行，以前成日聽日講話英國既食物麻麻地，但作為vegan既我就唔係好認同。外國對food allergy/ special diet好alert，佢地除左會喺menu清楚標記菜式含有既致敏成份，亦都會考慮唔同人既需要，所以基本上是但走入一間餐廳都可以有vegan options，講緊唔係fruit salad同薯條，而係真係一個個dish。黎到The Globe，簡直好似去到倫敦咁，入面成個vibe都好正。可能因為晏晝去，又唔係睇波既時間，所以入面冇乜人，如果夜晚黎氣氛一定更好！啲座位好闊好舒服，無論係三五知己定係一大班朋友黎都係好好既選擇。黎到酒吧當然要飲下酒，對酒冇乜研究既我地是但叫左兩杯apple cider，之後就馬上落單叫野食。先黎既係Crispy Cauliflower，切到bite size既椰菜花蘸左啲炸漿，炸到非常酥脆，唔會好硬，配埋甜甜地既醬幾夾，係個唔錯既Appetizer。跟住黎到第一個主菜Butternut Squash Laksa，雖然多汁會好肥，但依個啲汁似乎少左啲，唔係好夠撈哂啲飯食。喇沙都算香，不過唔係好夠熱，飯都係熱辣辣好食啲！最後上場既係我期待已久既vegan pie！由細細個䏲魔女宅急便見到Kiki送既批，就對批依種食物產生好強烈既興趣。個vegan pie一送到上黎即刻驚艷到我，完全係我心目中既批該有既樣子，條邊扭成一條小辮子，個批焗到金黃色，仲有陣陣香味，急不及待想試佢喇。用隻匙羹一督落去，嘩不得了呀，個批皮厚薄適中一督就穿左，入面啲餡係咁湧出黎！個餡勁creamy，入面有啲切碎左既蔬菜，連埋個皮一齊食真係好正呀，估唔到vegan pie都可以整得咁好味。配菜有大大碌既粗薯條，另外可以揀baked bean或者青豆，我諗大部分人都唔會揀青豆吧。依一餐真係好滿足，但如果有埋vegan甜品就更加錦上添花喇。…Read More

半山科達中心3樓好似係預左做素食咁，先係心齋，然後係尚齋，到依家既天一閣。心齋係香港精緻中式素食餐廳既先驅者，打破中式就係要食肥淋淋齋滷味既刻板印象，而佢地最令人難以忘懷既一定係冬天專享既打邊爐，無論湯底定食材都一樣咁正。尚齋既點心令人讚不絕口，雪山叉燒包係必食既，唔落奶但又能做出奶香，仲要非常酥脆，可惜佢地只經營左好短時間。丟空左一陣子既科達中心3樓終於又有新素食餐廳進駐。天一閣既菜式同尖沙咀緻素坊好似，後來得知原來天一閣既班底就係來自緻素坊，咁唔知質素係咪都一樣呢？送到上枱，果然真係同緻素坊一樣喎！蘿蔔糕外脆內軟，啲千島醬中和左啲油膩感，食多幾舊都冇問題。片皮鴨用炸到脆卜卜既腐皮黎做塊皮，猴頭菇就係鴨肉，而用哈密瓜做配菜更加係神來之筆，非常清甜，成個組合都好夾。水煮魚用料足，除左用黎扮魚肉既薄切杏鮑菇，仲有馬蹄、炸腐竹等，亦當然唔少得薯粉打底，一次過品嚐多個口感，湯都非常惹味，但又唔會太辣。胡椒豬肚煲喺緻素坊食過一次，真係食到嘩嘩聲，直情懷疑佢真係掉左個豬肚落去！天一閣做到相同水準，同樣美味。平日晚市客人唔多，餐廳好妳啃請左我地食芒果布甸，估唔到冇蛋冇奶既布甸可以做得咁出色，非常滑溜，唔講都唔知佢係vegan。見到有人post天一閣既午市點心，睇落同緻素坊唔係幾同，好想快啲去試下，亦希望佢地可以研發多啲新既晚市菜式，擺脫緻素坊既影子。…Read More

又一間素食餐廳要執笠喇⋯敬一既前身係喺大角咀，個名已經唔記得左，只記得佢地好短時間就已經執左，當得知敬一開張真係好興奮！佢地做既係素川菜，香港真係冇乜地方食到，果種惹味同鑊氣真係好吸引。佢地10月就要執笠，喺10月之前食得一次得一次。辣子雞係我最愛，猴頭菇化身為雞粒，外脆內軟。雖然有好多辣椒，但又唔會好辣，啲辣椒可以食埋落肚，就好似食薯片咁，仲有啲花生同芹菜都好點睛，一個人都可以食哂成碟！水煮三國係我第二最愛，炸到香脆既杏鮑菇，整齊咁排喺辣湯上面，唔會浸到淋哂，配埋極富彈性既薯粉，超正！酸菜魚啱唔食辣既人，啲素魚炸到金黃酥脆，湯有大量酸菜、豆腐、仲有粉絲，啲粉絲索哂啲湯，每一啖都好juicy。素叉燒喺好多素食餐廳都有得食，敬一就加左啲紫菜腐皮卷令佢更有自己特色。啲叉燒好鬆唔死實，外面脆卜卜仲有啲燶邊，係上等既素叉燒。紫菜腐皮卷都好脆好好味，絕對唔係個普通配角。素食好似淨係食菜，但真素食者就知其實唔係，所以都要特登點返一個菜黎食下。椰菜花炒得夠乾身又唔會好油，食落爽口，即使只係一碟菜都一絲不苟。最後依味係餐牌上冇，樓面遮遮私心推介，但已經唔記得佢叫咩名嚕。有別於其他主打辣既菜式，依味係走酸甜路線。平時食開既猴頭菇都係一舊舊，但依味既猴頭菇就係切片既，呈現出不同既口感，好特別。咁高質既食物真心百吃不厭，希望敬一快啲搵到新鋪位，等我地可以繼續嘆佢地既出品啦。…Read More

「土生花」都開左一段時間，一直都好想去但又遲遲都未去，一來就係價錢比較貴啦，二來就係見啲comment都幾唔同，有讚有彈，所以都十五十六。之後有屋企人試完，話超級好味喎，所以都係決定黎試下。「土生花」既menu都幾多選擇，如果唔想揀既話，就可以直接order tasting menu，另外佢地仲有afternoon tea set，鐘意high tea既話都可以黎試下。餐廳既環境唔錯，啲座位好闊落，枱同枱之間都有啲距離，唔會覺得逼，每枱客都有返一定既私穩度，都係fine dining既格局。送上每一碟菜式既時候職員都會做簡單介紹，等客人可以了解下每道菜式。上菜既時間都安排得好好，會按返次序上菜，唔會話上左飯都未上前菜。先黎既係紅菜頭蘋果沙律 Apple & Beetroot Salad，顏色非常豐富，視覺享受唔錯。蘋果同紅菜頭都好清新同鮮甜，係一道好適合既開胃菜。接住落黎係其中一道我最鐘意既菜式 - 酥炸韓式豆腐三文治 Deep Fried Tofu Sandwich。豆腐外層炸到脆卜卜，入面就維持濕潤嫩滑。豆腐夾住啲菇，真係成件三文治咁既樣，好得意。依個成Fish & Chips咁既樣其實係人蔘天婦羅 Ginseng Tempura。食落去唔會太重蔘味，就算唔鐘意食人蔘既都可以淺嚐一下。香煎韓國沙蔘 Grilled Deo Deok個樣勁似韓國既燒五花腩，但依個就健康好多，仲唔洗傷害啲豬添！雜菜辣炒年糕 Teok Bok Ki本來係街頭少食，喺土生花賣到二百幾蚊一碟，期望當然係異常咁高啦。平時既辣年糕主要得年糕、泡菜同魚膏，咁土生花依個辣年糕既配菜就多好多，營養更加豐富。個汁唔算好辣，一般香港人都食到。雖然味道同賣相都唔錯，不過用二百幾蚊食一兜辣年糕都係有啲肉赤。另一樣要試既係韓國人成日食既炸醬麵 Jajangmyeon。餐廳用左啲蘿蔔同薯仔等既蔬菜黎取代原先炸醬入面既肉，口感爭左啲啲，如果用啲豆乾之類扮返肉醬可能會更好。黑蚊蚊既醬睇落好似好濃味，但實際上有ok喎！食完炸醬麵，又點少得蔬菜拌飯 Bibimbap呢。飯撈左啲薑黃粉，啲顏色睇落好靚，另外仲有勁多芽菜，如果係石鍋拌飯有埋飯焦就perfect喇。最後一道、亦係我最最最鐘意既一道菜就係泡菜炒飯 Kimchi Fried Rice。睇落好似好簡單，但真係好食到唔識形容！估唔到加左啲紫菜同麻油係可以令味道有幾何級數既提升。之後返屋企有試過整，但始終整唔到佢果種味，唔知有啲咩秘方呢。總括黎講成餐既體驗都唔錯，計返人頭每人$400左右，個個食到個肚漲卜卜，都算係咁啦！食完依餐令我記起喺首爾食既寺院素食，同樣都係好吸引。喺可以去旅行之前，要試韓國素食，全港就只此一家喇。…Read More

本身對印度菜冇乜特別興趣，不過見到尖沙咀有咁多印度素食餐廳，其中Woodland更加有vegan menu，好值得去支持下。平時食親印度野都唔係好知menu上面既係咩食物，但依度個menu係有埋中文，唔洗等到食物送左上黎先知自己叫左啲乜，都算唔錯。因為都幾肯定印度菜唔係我地杯茶，為免浪費食物，我地只叫左兩個小食同一個主食。先送上既係薯仔絲炸米餅 Sev Puri，冇諗過係凍既，有少少shocked。食落酸酸甜甜咁，又脆脆地咁，味道同口感都唔錯，如果係熱既會更好。咖喱角 Samosa係食印度野時必食既小食，如果冇記錯好似要$70一碟，即係$35一件，諗返都覺得有啲貴。個皮幾酥脆，有少少偏辣，加埋個青豆蓉醬食可以中和下，另外熱辣辣同個薯仔絲炸米餅形成強烈對比。南印度套餐睇落好吸引，可惜佢唔喺vegan menu上面，最後揀左北印度套餐 North Indian Thali。個餐有幾塊印度餅、菜、鷹咀豆同埋幾碟唔知係湯定醬汁既野。原來北印度套餐本身都唔係vegan，應該有一兜仔野係有奶，所以vegan version係少左一兜野的。Anyway因為對印度餐冇乜認識，所以都唔係好識comment，反正啲野就好濃味，偶爾食一次就OK果種。…Read More

距離上一次黎Ma已經有差唔多一年喇！一直都好想再黎，但始終fine dining既定價都比較高，總唔可以當依度係飯堂既。趁住生日，就比個籍口自己黎食下好野。Lunch Set可以揀2-course、3-course或者4-course，2-course係前菜加主菜，3-course可以揀多一個前菜或者是日甜品或者是日cheeze，4-course就係兩個前菜加主菜加甜品或者cheese。我地採取中庸之道叫左兩個3-course set，一個set配cheeze另一個配甜品，咁就可以試哂啲野喇。黎得Ma當然要試下raw dishes啦，lunch既starter同main都有raw同cooked既菜式揀，當然我地都係乜都試下咁啦！先黎既頭盤係Beetroot ravioli, feta cheeze and fresh herb sauce (紅菜頭意大利雲吞配純素菲達芝士和新鮮香草醬)，超薄切既紅菜頭用左黎做雲吞皮，包住香濃既feta cheeze，新鮮香草掩蓋左我平時唔多鐘意果陣紅菜頭味，配合得好好。啲plating一如既往既出色，同藝術品一樣，完全係視覺同味覺既享受。另一個頭盤係Pizza, almond and cauliflower crust, pesto, sundried tomato confit, rocket, cheeze sauce (薄餅，杏仁及椰菜花批底、香蒜及乾蕃茄醬、火箭䒩和芝士醬)，依款係全raw既。有別於之前食過既raw pizza會用全果仁做批底，依個係用打碎左既杏仁同椰菜花做批底，食落冇咁滯。面頭鋪左多款蔬果，仲有啲好靚既食用花，色香味俱全。主菜Portobello burger, cashew truffle sauce (大啡菇漢堡配腰果松露醬)都係全raw既，個大啡菇唔係用黎扮patty，而係用左黎replace麵包。中間夾住塊自家製vegan patty，厚實得黎唔會一切就散開，味道方面雖然話係raw，但一啲都唔覺得佢好生，未試過raw food既話可以先試依個burger，比較易接受。成個burger都幾厚，所以都係分開逐層食比較合適。接住另一個main係今餐既亮點，Preserved lemon risotto, roasted green asparagus (醃檸檬意大利飯配烤露荀)真係超好食呀！飯既texture做得恰到好處，唔會太稔又唔會太硬，保留到一粒粒飯既形狀但又夠濕潤。味道都好濃，有一陣鹹香味。上面果幾條烤露荀更加係畫龍點睛，加左孜然粉去烤，香氣撲鼻，真係超正。午餐既尾聲以甜品同cheeze作結。Daily dessert係Coconut cheezecake (椰子純素芝士蛋糕)，份量比想像中細好多，加依個course要$38，依個份量相對唔多抵，可能另外單點一個甜品更好。份量雖少，但味道都唔錯，個cheezecake非常滑溜，唔會太凍或者太冰。今日既Daily cheeze係Sans-Goat (仿羊奶純素芝士)，有一陣濃濃既鹹香，食落仲有少少似腸仔，同香草都幾夾，不過我就鐘意食配黑椒既Sans-Goat多啲，個口感好好多。Ma喺K11 Musea開左間純素芝士專賣店，下次去買一條黑椒Sans-Goat自私食先得！總括今餐都十分滿意，不論係食物定服務都係一種享受。餐廳空間闊落，坐得夠舒服，有大大既玻璃窗可以感受到午間既陽光，就算喺中環依個石屎森林入面都有種舒坦既感覺，作為一個偶爾獎勵自己既地方都唔錯呀。…Read More

 尖沙咀既素食店已經食得七七八八，唔想重覆食黎食去都係果啲，就要搵下有提供素食既一般餐廳。碌完一輪openrice之後，最後揀左喺美麗華既HABITU table。佢地個website有menu，啲菜式有註明邊啲係vegetarian，邊啲係vegan，十分清晰，唔洗驚中伏。餐廳喺美麗華既地庫，12點左右去到都唔算多人，枱與枱之間都有足夠空間，唔會坐得好逼，有返少少私人空間，都幾舒服。Menu上面有vegan dishes基本上都比我地叫哂，另外仲veganise左個nachos。飲品方面可以揀植物奶，可惜當日冇哂oat milk，只可以轉soy milk。先送上既係羽衣甘藍藜麥沙律 Tahini Kale Salad，用黎配搭既蔬果好清新，用中東芝麻醬Tahini做沙律醬原來都幾好味架喎。之前買左樽Tahini用黎整hummus，下次可以試下自己整依個沙律。芒果牛油果醬墨西哥脆片 Mago Guacamole Nachos本身有芝士唔係vegan的，我地叫店員幫我地走芝士。個芒果牛油果salsa醬用黎配nachos好夾，可惜醬既份量比較少，食到一半就己經冇哂啲醬。意大利青瓜麵 Zucchini Noodle送到上黎時有啲唔認得佢，紅蘿蔔既份量比起主菜青瓜仲要多，可能叫蘿蔔麵會更適合！食落幾清爽，個醬酸酸甜甜咁，都幾開胃。青大樹菠蘿薄餅 Vegan Pullpork Pizza用左大樹菠蘿黎扮豬肉絲，個口感都有少少似。雖然冇芝士，但個pizza一啲都唔失色，啲醬好夠味，而且亦令個pizza冇咁乾。Caffe Brulee幾得意，上面有一片焦糖咁，不過就比較甜左少少，如果淡返啲會好啲。最初以為份量少會食唔飽，點知最後飽到食唔哂，有時真係唔可以高估自己既食量，以免造成浪費。最近再睇返佢地個menu發現vegan options少左，希望遲啲又會有新既vegan菜式啦。…Read More

對新界居民黎講，西營盤真係一個好遙遠既地方。但作為一個為食既人，絕對可以克服千山萬水，搭個幾鐘車黎到Vibes the place。依度唔係素食餐廳，但都有好多素食選擇，仲要係gluten free同keto，適合有不同飲食需要既人。估唔到一間細細既cafe都可以咁全面，值得一讚。叫得Vibes the place，一定好講究vibes。入到餐廳未有人，店員安排左我地坐喺門口隔離既矮枱，對住落地大玻璃，有陽光照到入黎，令人覺得好舒服。一邊食野一邊望住出面啲人喺度放狗，個感覺好chill，有少少去左外國既feel。All Day Vibes係keto同vegan-friendly，有keto focaccia、chiaviar、almond ricotta、no goat cheese、水果杯同鮮榨薑茶汁。Keto focaccia應該係gluten free，口感好得意，有少少稔但又有少少彈牙咁。Almond ricotta好軟滑，同個focaccia好夾。Chaiviar係由奇亞籽扮魚子醬，似唔似就見仁見智啦，我冇食過魚子醬comment唔到，當佢係奇亞籽咁食都幾得意，鹹鹹地咁。No goat cheese食落好香，有少少似腸仔咁既味，又有種似層相識既感覺，先賣個關子，文末開估。我地仲叫左兩個Vibes the High-Tea Set，每個set有一件raw cake、一個pudding同一杯野飲。Raw cake一共有五款，都幾花多眼亂架。先黎既係Passion fruit cake配Rice pudding，簡單既擺盤哂上少少燕麥已經夠哂吸睛。Raw cake個底係nuts打成既，中間就用腰果，食落都creamy冇粒粒，同cheesecake咁。酸酸地既passion fruit可以減輕膩感，同時有種清新既感覺。Rice pudding真係食到一粒粒飯咁，唔知個奶係咪都用左米奶，有少少偏淡。另一set係Lychee rose cake配Chia pudding。荔枝味唔算好出，但粉紅色既外表加埋陣甜甜地既香味，絕對可以激發少女心，所有少女必定比佢迷倒。Chia pudding我冇試到，不過應該都係平時食開啲奇亞籽咁。咖啡可以配植物奶，熱飲既杯都好大隻，好夠份量，重有個小小既拉花。每樣食物都令人感受到用心去整，整間餐廳都係滿滿既good vibes。後來同朋友提到Vibes the place既vegan cheese好出色，比得上中環Ma... and the seeds of life既出品。然後朋友講返原來依度既cheese等等都係由Ma供應，實在好surprise！大家如果想淺嚐Ma既出品，都可以黎Vibes the place試下，順便嘆埋依個咁舒服既環境。…Read More

好幾間中式既素食餐廳相繼結束營業，包括心齋、尚齋同觀自在，接連冇左三間可以飲茶食點心既餐廳，少左幾個素食朋友既聚腳地，令人覺得好惋惜。可幸既係期間都有好多新既素食餐廳開業，包括位於尖沙咀既緻素坊。聽朋友講緻素坊老闆係以前觀塘尚素既老闆，以前我地都好鐘意去尚素，知道佢地再開業真係好開心，所以即刻去幫襯以示支持。點心紙有好多選擇，蒸點有包同餃，炸點有鹹水角等，腸粉就唔少得啦，仲有多款小食、焗點同甜品，相信要黎多幾次先試得哂！人多好辦事，我地就有咁多叫咁多！先黎既係雪山叉燒包，面頭果層墨西哥酥皮好令人懷念呀！鬆脆得黎夠哂香酥，即使冇奶油都做到果種奶酥味，好有驚喜。入面既素叉燒都好濕潤，可以同真叉燒包一較高下。金邊帝苗餃有一條閃令令既金邊，貴氣十足。皮薄餡靚，冇乜可以挑剔。黑松露野菌餃都係皮薄餡靚，落足黑松露，夠哂香，黑松露控必點。香菇燒賣食落同真燒賣係一樣架！啲肉質同真肉好似，食下食下覺得陣味有啲熟，莫非係用Beyond Meat整既！如果係既話真係好揼本呀，比用普通素肉出色得太多。四款腸粉之中我地揀左靈芝素菇腸同叉燒香菇腸，整體黎講不過不失，冇乜特別。紅油抄手係喺大menu揀的，辣度適中，十分惹味。椒鹽豆腐既份量超多，粒粒都炸得金黃香脆，椒鹽調味適中唔會話太鹹，幾出色。蘿蔔糕食得多，煎既同蒸既就成日食，脆皮蘿蔔糕真係第一次食，個combination都幾得意喎！加埋自家製既千島醬，夠哂心思。除左點心我地仲order左啲粉麵飯，不過由於點既食物太多，場面混亂，所以影唔哂啲食物。另外值得一提依度啲服務都好好，餐廳知道我地有bb喺度，馬上安排左bb凳，張凳仲要係全新未開既，佢地係即場拆比我地用，十分窩心呢。…Read More

上次黎Mayse試唔到pizza，因為咁啱佢地要焗麵包，不過亦都因為咁我地試左超好味既panini，都算塞翁失馬，焉知非福。不過始終想一試pizza，所以又再黎多次。我地揀左Hot Hawaii Pizza，用sourdough做批真心正呀。個批薄得黎脆，脆得黎又好有咬口，係厚批同薄批既混合體。新鮮既菇同菠蘿配埋basil好fresh，加埋辣椒辣辣地咁好刺激，仲有勁generous既vegan cheese，靚料配靚批，好味到不得了。今次再encore左panini，其實兩款都好想食，最後都係決定要Truffle Melt。啲vegan cheese一如既往咁有爆漿既效果，黑松露味夠哂香，非常滿意。打完個食評又好想去再食喇，可想而知有幾咁好味。…Read More

moono仲喺深水埗既時候食過幾次，每次必食卷蛋，另外啲tart都幾出色。依家搬左去k11 musea，以前啲signature冇左，變左幾款更high class既甜品，價錢亦都相應調整左啲，兩件蛋糕要百幾蚊，諗返都有少少肉赤。粉紅色既Madame以紅桑子為主調，除左有新鮮既紅桑子，底既脆米同埋macaron都係紅桑子味既。一個甜品入面有多種口感，軟滑既cream，卜卜脆既脆米，鬆軟既macaron。偏甜既macaron加埋紅桑子既酸令到成件事甜而不膩。Spectra係熱帶水果既組合，有芒果同熱情果，底層既蛋糕同側邊既朱古力都係開心果味。相對起Madame，Spectra就比較甜膩左少少，食左兩啖就開始覺得漏。相對依啲好多cream同好fancy造型既甜品，我更鐘意以前卷蛋簡簡單單果陣感覺，而深水埗店既感覺亦比k11 musea店既感覺平實。依家想重溫卷蛋既味道就只能原條訂喇，而鋪頭入面既平實感，就變成往事只能回味了。…Read More