bettyli0518's Profile

困得太耐要出來抖抖氣，跟家人到附近烚下烚下。現時人流會多，又有足夠距離，食得好放心。簡約既裝潢，樓底亦算高，感覺好舒適。未落order已送上甜絲絲的雪耳糖水，好正!炸酥肉味道帶點痳辣，口感鬆，作餐前小食都幾好!打邊爐點少得肥牛，肥廋均稱，賣相亦好靚，真心覺得好過好多火鍋店。鴨紅切到幾大塊下，咬落較豬紅爽，同時冇咁勒。三色丸質地幾彈牙，加上冇乜根位或雜質。至於係唔係手打，我地就冇走去深究，只要好食便可。豬腰片刨到好簿，不用烚太耐就食得，好爽口。…Read More

市政大樓的熟食市場，通常大極有限。保安道這裡可能是少數，轉角位還有一排枱。重要的是當日坐無虛設，如果唔係一早book左位，就肯定要等位。$208 海鮮火鍋放題，呢個價出面難找到。大大盤即劏海鮮，有還是活生生的鮑魚、原條去骨石班、超大隻扇貝、帶子...這裡的火鍋可謂一煲兩味，海鮮用來蒸，精華滴晒落下面的湯鍋，食晒拿走隔層，再打邊爐，夠晒完汁完味。除了海鮮，還有小牛排、肥牛、田雞及其他常見的火鍋配料。飲品方便，選擇略嫌少，只有啤酒及4款樽裝汽水。火鍋以外，辣味炒蟹也給我驚喜，大大隻多肉又惹味，仲要係無限任食。平時嚮街市買兩隻肉蟹分分鐘都過兩舊，怪不得平日也滿座。…Read More

這火鍋店，按牛肉的級數劃分幾個價位的放題，我地係「經濟」主義者，揀了$268美國進口牛肉。除肥牛外，還包任食鹿兒島頂級黑豚肉、雞肉、各式火鍋配料、日式串燒和炸物、甜品和飲品，類別都好豐富。薄切了的黑豚肉不用烚太耐，所以口感仍嫩，完全唔會靭。肥牛既油脂及牛肉比例一半一半好平均，因為咁，每一啖都好滑溜。火鍋放題正常要有的瓜菜丸腸，這裡亦一應俱全，較特別的是迷您紅蘿白、日本大豆芽、山葵、萵筍，並不是每間火鍋放題都有。燒物有鹽燒、汁燒及味噌燒三種風味揀。䓤段豚肉卷和露筍腩肉卷燒得香口之餘，又不會太乾身，我幾鐘意食。炸物的選擇較少但有我鐘意的日本蕃薯仔，順便揀多大眾化幾款每款一件「捧下場」，外層粉漿脆且薄 ，食落又不覺油膩。又烚又燒，一餐兩味，價錢算合理。…Read More

位處大角咀匯豐總行隔離，地點唔難搵。白色外牆，跟附近舖頭明顯不同，就算未黎過都容易找到。先來個小食併盤，有齊四種地道小吃，預先切開唔駛爭。春卷最正，皮脆又唔太油膩。飛天通菜是當日優惠之選，逢星期四都只係一蚊雞，而且係日日不同款的。食落有少少辣，又有類似豆鼓的東西，幾惹味的。咬落仲冇乜渣，絕對抵食。燒烏頭外面乾身，但魚肉仍是juicy，而且一點腥味也沒有。另外，口感係好滑的。泰式臘腸蝦醬蛋炒飯有著濃濃的蝦醬香味，飯底沒有中式炒飯那樣乾身。食時先將碟邊的豬肉鬆混和，味道好夾。番石榴及芒果沙冰兩者均清香好飲，就算不是大熱的日子，也一樣適合，一家大小也啱飲。…Read More

朋友話打邊爐，我就最怕攪到周身油煙味，我件外套仲要係新買不久。好彩這火鍋店有超高的樓底，超濶落的通道和超強力的冷氣，個心即刻放心晒。雞煲的份量及辛辣程度可按自己的口味和承受能力去選。雞件的份量比預期多，肉質亦頗為嫩滑。中辣也覺得有點兒辣左少少。對住個超大尺吋電視機，跟友人邊食邊吹邊睇劇，都咪話唔盞。串蝦肉質結實，仲有少少彈性，是我個人愛用來𨰹別海鮮是否新鮮的方法。帶子是我愛吃的，鐘意其肉諗，群邊則爽口，那種口感和鮮味，每次吃放題我一定會嗌。隔離有個大凍櫃，讓客人喜歡食乜就攞乜，自助模式放了很多貢丸、龍蝦丸、片頭角、芝士腸、枝竹、獅子狗...常見的食材都一應俱備。還有響鈴及炸魚皮都好搶手，特別是響玲，薄而脆。地方所限，飲品櫃及雪糕櫃都唔大，但還是能提供超過十款口味飲品及3款雪糕+雪條，都算係咁。最後當然係...「清倉」，全部食晒啦!…Read More

老公生日，一家人去食飯。坐底先嘆杯茶，relax一下。叫左個四人餐，經濟實惠又唔駛煩。期待的主角避風塘炒蟹出場，一上枱便見到這雙巨大的蟹鉗，啖啖肉的。最緊要是好滋味!蒜蓉粉絲蒸扇貝，另一味蒜香十足的菜式，扇貝肉粒又夠厚身有肉。豉椒炒蜆辣，肉質鮮味，事前處理得好，食唔到有沙，所以食得很暢快。京都骨酸酸甜甜，能增進食慾。食左咁多味濃的菜式，食番碟蒜蓉炒菜，清清地平衡一下。楊洲炒飯夠乾身，粒粒分明，鑊氣也足。…Read More

呢到既小炒，款式有好多，仲有火鍋供應添。既然以海鮮大排檔自居，咁梗係食魚蝦蟹啦，反正埋單都係share，這點我老實承認。避風塘軟殼蟹，平常食慣肉蟹，呢到用軟殼蟹，另一番滋味。明火仲要係猛火炒，將辣椒、乾蒜豆豉同埋菁蔥既味道，「逼」晒入蟹肉內，係好味好多，大排檔風味始終有其賣點。豉椒炒大蜆都幾大隻，隻隻有肉，冇咩「吉」殼。最緊要係冇沙之餘，仲feel到 「鮮」味。煮餸用咸旦黃做材料係會惹味好多，但同時會「漏」同「鹹」，這碟黃金魷魚則攞到平衡，師傅的手勢真不錯。頭抽煎海蝦肉質仍結實且有點彈性，感覺新鮮--食海產就係最緊要鮮。*…Read More

幾年前嚮銅鑼灣食過辣蟹，最近同事生日話想食辣蟹，要食得「豪」D。黎之前預左位位五至六舊，黎到睇到有套餐及promotion做緊，個心即刻定番晒。避風塘炒蟹，上枱見到隻蟹鉗好大隻，夾上手感覺「墜手」，未食已肯定係「啖啖肉」。加上䓤蒜爆得很香口惹味，好正！醉飽魚也有驚喜，好大隻好有肉，而且處理得好好，咬落好爽口。黃金蝦是原隻處理，外面的一層咸旦黃蓉，濃淡適中，越食越想食！豉椒炒蜆夠入味又冇沙，正！單是上面三款海鮮已值回票值，套餐還包括炒時菜及避風塘炒河，呢個價有咁既份量同質素，我覺得CP值爆燈。…Read More

而家做生意真難，既要有話題，又要留得住客。尖咀這火鍋店以宮廷做主調，裝潢、擺設、餐牌、店名、部份食材....都很一致地「貼題」，夠晒gimmick。湯底是花膠雞湯，夠晒養顏，啱晒同行的女同事。花膠既份量其實都幾多下，出手幾重!牛魔王拼名符其實，有齊安格斯牛肉粒加牛肉片、美國及本地肥牛、牛、牛舌...，切了片白色的是橫隔膜，好新鮮兼好豐富。肉丸拼盤賣相似是手打的，好彈牙!! 蓮藕、萵筍兩者都好爽口，萵筍還帶著點清新味。響鈴有兩種，我較喜歡加了咸蛋黃蓉的黃金響鈴，惹味好多。食飽仲換左件古裝衫影左張靚相留念，那張相當然是私密啦。…Read More

這食肆位處觀塘近牛頭角，算係好方便。加上開嚮工廠區，地方濶落好多； 擺左張桌球枱仍大把空間。星星吊飾配上柔和燈光，其實幾浪漫吓，尤其是臨近聖誕就更加有氣氛。蕎麥沙律咬落軟軟綿綿，口感似剛煲熟未收水既白米，但就健康得多，食多幾口也不怕。檸檬香草配海鱸魚雖然是煎魚，但肉質keep到唔乾身，仲有淡淡既香草味，唔錯！炭燒特級美國肉眼扒好大件好厚身，足足有12oz。五成熟就最適合我口味，肉質好滑又唔多根，未食都見到好juicy，攪到我流晒口水！牛肝菌配蛋闊麵條菇菌有其獨特既氣味，鐘意食會覺得好香。闊麵咬落有點煙煙靭靭，跟牛肝菌既味道好夾。食埋個甜品，今餐好滿足 ：)…Read More

食重慶火鍋唔食辣就不像樣，鴛鴦鍋就最好不過。加多杯帶有烏梅味既冰涼落神花茶，開胃又解辣。打邊爐非一定叫肥牛不可，這碟黑豚腩肉的油脂好豐富，所以入口滑 溜。鴨紅較豬紅的口感佳，滑很多且少了豬紅那種外層有層靭的口感，漸漸成為火鍋必備材料也是有因的。肉丸經手打至的起膠既效果，烚出來也會特別彈牙，機器打出來的是無得比。所以，我們另外orde一份蝦滑。迷你燕餃可一口幾隻，雖沒有水餃裡面既原隻中蝦，但餡料真心好食。䈑筍切片後再砌至靚靚既「花」樣，口感介乎「爽」與「淋」之間，有種清新既感覺。跟金菇一樣，都是疏菜以外的好選擇。我唔肯定香油能否護腸胃，但相信能滑腸及提升惹味情度。用糯米粉做嘅紅糖糍粑，軟軟冧冧又帶點煙煙綿綿，有點像韓式年糕，不同的是這是甜食。…Read More

這放題店近地鉄站夠方便、樓底高夠舒適、食材夠睇頭又夠新鮮，真心覺得幾好!兩位或以上，送每人半隻龍蝦。沒將價就貨，大大隻的，仲有好多龍蝦籽，好正!第一round不用點，餐廳會自動送上各式主打燒肉，包括肉眼、西冷、胸腹、七味拖羅、雞肉骨腸、手羽、豚肉...， 頗為豐富。用的牛用更是和牛級數!枱上有黑椒及海鹽，加少少嚮燒肉上會更加惹味。我們也點了其一口牛柳粒，同樣是很嫩，質素很高。我們是刺身控，四人份量的頭盤刺身，上左枱唔夠10分鐘已清光，這碟是我個人後加的。這裡還有天婦羅、炸物、鍋物、甜品、飲品供應。丸榴槤及芝士餅味道香濃，值得一食。雪櫃用的是Movenpick及Dryer's，都好揼本下，絕對是好事。 …Read More

朋友約嚮大角咀食飯，平時好少黎呢區，原來這裡幾方便--隔離就係匯豐大角咀總部，並設有巴士總站; 過條天橋又可駁到奧運站或奧海城，商場對開又有另一個巴士及小巴總站。小食併盤啱晒我呢類有選擇困難症既人士，四種小食，不用諗也不用煩。我較鐘意春卷，炸到非常脆口但又不覺油膩。燒魷筒金黃色的色澤很靚，燒工出色。圓形的擺法，跟慣常攤長的賣相不同，望落精美好多。燒牛肋骨這道main course亦俾到驚喜我，肉質細嫩，完全不覺得乾身，亦唔會有太多「筋」。飛天通菜星期五的優惠菜式，只需$1。天天轉款一樣是$1。葉嫩莖爽，因有辣椒既關係會有少少辣，但就係因為加左辣，先至咁惹味。…Read More

一坐低，待應即奉上暖暖的雪耳糖水，火喉十足，煲到好「膠」; 味道亦不會太甜。特級肥牛色澤紅潤，好新鮮。而且脂妨部份啱啱好，食落不會太油膩。生蠔大大隻的，好夠鮮味。朋友食慣生蠔，所以時間掌握得好好，經佢烚的係滑好多。豬腰有陣獨特的味道，用來打邊爐超正。以往嚮出面食的，通常是厚切，這裡則剛剛相反，但烚起的效果係超爽的，我好鐘意這種口感!細細隻的燕餃，餡料混和得好好，比甚麼水餃、魚皮餃都來得好食!我唔係好記得這碟的名稱是否鹵水腸。Anyway，咬落外面有點煙靭，裡面則軟淋淋，仲食到湯底的味道。臨走前，嚮近門口位飲啖水沖沖口，再食番粒薄荷糖refresh一下，這個安排嚮其他火鍋店少見，幾好!…Read More

這裡的四人套餐都好豐富，有3海鮮2肉1菜1飯，埋單一千有找，感覺有點意外驚喜。椒鹽炒龍蝦，用了很多乾蒜、辣椒去爆香，非常非常香口。薑蔥煀蟹煲，用的是大大隻的肉蟹，肉質結實，啖啖肉好滋味。花甲也是辣的，炒得很惹味，而且炒到入晒味。再者沒有食到半粒沙，簡直無得彈。平時食飯是主角的牛柳粒，今日變成配角，但一樣咁正，咬落還是好juicy的。鹵水鵝、金銀蛋及雙色炒飯則中規中矩，味道也合格有餘，明白蟹才是主角，接受的。整體而言，兩佰零蚊一位的價錢，可以食到這幾道菜，再算上質量及份量，個人覺得係好抵。…Read More