conluk's Profile

人氣屯門市廣場Food Court食肆！見到好多人都幫襯呢間餐廳，主打錫紙鍋花甲，非常保溫，都幾特別，價錢都相宜。無骨魚片花甲粉絲$65- 套餐包埋飲品，有紙包或者樽裝飲品選擇。打開錫紙，香味撲鼻而至。可惜粉絲份量偏少。豬骨湯底好重蒜頭香味，見到湯入面有大量蒜蓉，不過都幾多油同埋幾鹹，所以要飲返多啲水解渴。花甲同魚片唔腥，爽滑彈牙，唔會食到有沙，唔錯。下次有機會可以試吓米線睇吓會唔會飽啲。…Read More

小清新飲料店！呢間舖頭主打水果加希臘乳酪或者鮮奶，感覺清新得來又有營養。用電話落單就繁複咗啲，冇得就咁打電話落單，要用佢電話頭像QR code上網落單，點知原來珍寶藍莓賣晒，結果店員都係要打電話俾我改單。飲品定價都幾高，不過有限時優惠所以一大班朋友一齊飲就抵啲。濃滑木瓜奶奶$38- 木瓜味道幾香甜，奶味唔重，唔係太濃厚嘅鮮奶。飲低少少會食到一絲絲木瓜果肉，都飽肚。完熟芒果果酪$38- 芒果果酪清新一啲，酸酸地，如果芒果味可以再重啲就更加好。…Read More

假日雅都商場好多食肆都要排隊！於是喺度買個外賣食，呢度嘅青咖哩同我想像中嘅有少少出入，下次再去會試吓其他菜式。泰式青咖喱豬頸肉飯$48- 無可否認，豬頸肉嘅份量超級多，食極都仲有，肉質爽口彈牙，不過醃得唔夠入味。咖哩配菜有薯仔、洋蔥同紅蘿蔔，但都係掛唔到咖哩汁。白飯有好多，兩個人食都夠飽，可惜問題出喺青咖哩汁度。青咖哩汁實在有太多油，唔可以用嚟撈飯食，而且味道同一般咖哩汁都唔同，冇咖哩香料味冇椰汁味，有啲失望。…Read More

隔涉車仔麵黃店！從來未嚟過華都商場，想搵呢間黃店都花咗唔少時間，平日下午時間比較冷清。姓膠煮麵$45- 加$3要一杯平時凍飲size嘅熱檸水，都幾抵。我揀招牌番茄湯配生菜、雞翼。一上菜見到有好多菜同烏冬，雞翼就有兩隻，有啲雪藏味道。個人覺得番茄湯偏淡味，再多啲新鮮番茄提鮮會更加好，宜家冇酸酸甜甜開胃嘅感覺。朋友食米線配豆腐、雞肉都係超級大碗，差啲食唔晒，性價比其實都唔錯！…Read More

日本過江龍天婦羅！餐牌上嘅選擇唔多，專注做天婦羅。平事日式餐廳係俾綠茶、烏龍茶，呢度用黑豆茶，感覺消滯解膩，唔錯。定價都幾高，試一次就夠了。上天丼$118- 入面有赤甘鯛、海老、小柱魷魚天婦羅餅、溫泉蛋、海苔、莢豌豆，醬汁分開上，可以自行調整鹹淡程度。白飯薄薄一層，起初以為會唔夠飽，但係因為天婦羅多油比較滯，最後都飽。湯一啲味都冇，好似飲緊水。- 我覺得天婦羅當中最好食嘅係溫泉蛋，而家仲係覺得好驚嘆點解可以炸溫泉蛋唔會爆，或者個蛋黃唔會過熟，蛋黃汁撈醬油飯好好味。赤甘鯛好厚肉，冇腥味。小柱魷魚天婦羅餅彈牙，好鮮甜。其他就普普通通，炸粉都幾油。牡蠣車海老天丼- 最近做promotion，follow IG/FB減$30！抵咗少少，不過由點餐到上菜，都等咗幾耐。…Read More

星期六夜晚大排長龍！估唔到夜晚八點幾九點都仲有好多人食乳酪雪糕，呢度都有幾多配料揀，落單大概5-10分鐘就有得拎。Frozen Greek Yogurt in Cup $58- 有得自選3 toppings+ 1 sauce，本來想揀芒果，可惜芒果售罊，於是我哋揀藍莓。另外兩款就揀檸檬芝士蛋糕同海鹽焦糖脆脆，加熱情果汁。揀完先發覺原來我哋都揀咗十大我最喜愛配料。- $58嚟講定價幾高，同朋友一齊share食少少都okay。海鹽焦糖脆脆好香好甜，冇乜鹹味，同酸酸地嘅熱情果汁乳酪雪糕好夾，推介！檸檬芝士蛋糕細細舊得一粒，所以我冇試到。藍莓大大粒都唔錯。整體嚟講呢杯FroYo用嚟打卡喺西貢chill下都唔錯嘅。…Read More

任食吉列牛脷！雖然係任食，不過吉列牛脷相比起厚切牛脷芯冇咁好味，始終都係噱頭嘢。餐廳環境有啲狹窄，好重油煙味，枱櫈上面都見到油漬，衛生一般般。石燒板受熱唔均勻，難啲控制燒肉嘅時間。店員語氣、態度都有進步嘅空間。厚切牛脷芯牛市定食$116- 個人比較鍾意厚切牛脷芯，口感好爽口彈牙，份量都還好。燒牛脷芯要用耐啲時間，佢比較厚，難啲熟。加上紫菜月見飯一齊食，好滿足。值得一讚嘅係紫菜非常多，個飯就咁食都好好味。推介！吉列牛脷午市定食$126- 吉列牛脷一碟有好多塊，炸粉都幾薄，不過唔熱，就咁點黑松露沙律醬都幾好食。家人就鍾意放上石燒熱返啲先食。吉列牛脷同厚切牛脷芯食落完全唔同感覺，吉列牛脷好薄好淋，似煲完湯嘅肉，冇牛味，都唔似食緊牛脷。不過有沙律醬點就提升咗味道，食完一碟牛脷都幾滯，食返沙律同飲啖冷泡茶解膩就啱啱好。…Read More

多款意大利粉/烏冬！被呢度嘅餐牌吸引，有好多唔同款式嘅意粉、烏冬、飯同小食，今次試吓蕃茄意粉先，下次再試烏冬。外賣要加$1，大概等幾分鐘就有得拎，熱辣辣、大大份，好抵食！鮮茄牛脷燴意粉$41- 基本上都係茄汁撈意粉，不過面頭有幾粒新鮮蕃茄，所以感覺都新鮮嘅。牛脷嘅份量都唔錯，幾爽口，意粉超級多，一定夠飽，不過口感淋咗啲，推介。香濃鮮茄豬扒意粉$41- 朋友叫豬扒意粉，豬扒仲多過牛脷好多，十分抵食！…Read More

一直都好想試呢間犀牛犀牛台式小食店！而家喺唔同地區都有呢間分店，想食都好方便！今次想食個卷餅當做午餐，喺葵廣有咁多平價美食小店林立嘅地方，呢間嘢捲餅定價都幾高，雖然都算大份，不過可能當午餐食又未必足夠。莎莎炸雞捲餅$49- 捲餅質地唔算好油膩，唔似印度薄餅嗰種油酥。入面仲有層煎蛋，豐富咗口感。炸雞俾莎莎醬整淋咗啲，食唔出香脆嘅感覺。不過我都鍾意佢嘅味道，加埋辣辣地嘅莎莎醬同埋沙律菜爽脆嘅口感，感覺幾清新，唔錯。…Read More

$28 Openrice 外賣自取優惠！之前有promotion抵食啲，宜家變返正價唔太開心。坦白講，如果唔係因為有折扣，我哋未必會幫襯。整體來講，呢間嘅餃子都唔係話好特別、好好食。湯素餃$28- 素菜餡料比較重麻油味，食咗幾隻之後都有啲膩，而且感覺好多味精、調味，本身以為素餃會清新啲，但係結果相反。水餃皮比起韭菜同西洋菜餃子厚好多。骨膠鮮魚湯西洋菜鮮豬肉餃$28- 西洋菜味淡淡地，魚湯好重味精同偏鹹，餃子皮似雲吞皮嘅質地，薄身偏滑。骨膠鮮魚湯韮菜鮮豬肉餃$28- 韮菜味道突出，相比起西洋菜餃子我會鍾意韭菜味道多啲。呢度嘅餃子菜同肉嘅比例大概一半一半，豬肉好滑，應該都落咗唔少肥膏。…Read More

葵廣炸雞！葵廣有好多間炸雞，一直都冇試過繼光香香雞，咁岩喺佢對面舖頭買完個捲餅，又想食多少少嘢食，結果就去幫襯買返袋炸雞。點知比完錢，店員先同我講要等10分鐘以上先攞得，因為要即炸炸雞，結果又要等耐啲先可以食lunch。香香炸雞$30- 即炸嘅炸雞非常香脆同埋熱辣辣，覺得要等10分鐘都值得嘅。台式炸雞好重香料味，我叫咗微辣，覺得啱啱好，入面仲有少少肉汁。當然如果分量再多番少少就好喇。…Read More

尼泊爾特色菜黃店！呢間餐廳門面裝修好有異地色彩，原來係食尼泊爾餃子，入面有兩張細枱，如果多人想食嘅話就要買外賣喇。個人認為薯仔波波同餃子係必食嘅！爆汁薯仔香脆波波8個(凍)$40- 香脆波波入面釀入薯仔香料，然後店員會比一支凍湯俾我哋，自己吱入去波波入面，然後一口食個波波。薯仔波波感覺好清新，加埋香脆嘅口感，會一個接一個咁不停食。推介！乳酪紅石榴薯仔波波8個(凍)$40- 呢款紅石榴就增加咗薯仔波波嘅口感同味道，偏酸甜多啲。我都好鍾意食呢款！撈麵沙律$25- 起初我以為撈麵會係煮熟咗嘅公仔麵碎，但係原來係媽咪面嘅感覺，我覺得好乾，同埋沙律入面有好多生洋蔥，個人覺得麻麻地，可以揀薯仔波波食好啲。香煎/蒸饃饃餃子(雞肉/豬肉)5隻$30/ 8隻$48- 豬肉餃子外型好似小籠包，入面都充滿肉汁。點上蕃茄香辣汁同芝麻花生汁，十分提味！- 雞肉餃子外型大隻啲，肉質實淨啲，都好好味！我會偏愛蒸豬肉餃子同煎雞肉餃子，煎餃子外皮焦香，不過會油膩少少。高度推介饃饃餃子！黃金牛奶$30- 呢杯牛奶細細杯，用陶瓷杯都幾有質感。牛奶暖暖哋，好重肉桂同薑黃味道，唔錯。…Read More

炸雞快餐！有時候行葵廣，唔知買乜嘢小食掃街，都會有衝動想就咁買個快餐食就算。第一次試呢間快餐店，感覺都Okay。肉醬意粉配一件樂脆雞$45- 肉醬意粉嘅醬汁偏甜，冇新鮮蕃茄，好似食緊茄汁撈意粉咁，面頭灑上好多芝士，非常邪惡。平時食嘅肉醬意粉會係免治豬肉加牛肉，呢度用腸仔代替，變咗茄汁腸仔意粉。如果分量再多少少會更好。- 炸雞鎚入面都有肉汁，點上燒肉汁更加惹味，食咗少少炸粉雞皮，口感都好脆，唔錯嘅！…Read More

快捷方便之選！雅都商場food court有各式各樣嘅美食，今次試吓韓國菜，有一般韓國餐廳都有嘅拌飯、冷麵、飯卷等。點完單之後店員立即喺蒸籠攞出一直keep warm嘅拌飯，即刻就有得拎，好高效率！韓式拌飯(豬肉)$52- 拌飯配料都幾多，有香菇、泡菜、翠玉瓜、大白芽菜、紫菜同蛋絲，當然唔少得辣豬肉啦。因為冇韓式辣醬一齊拌，我覺得味道差少少，同埋辣豬肉都好多油，食到底有浸油浸住啲飯，比較油膩。如果下次有機會可能會試吓佢啲飯卷。…Read More

抵食芋圓甜品！本身唔係比芋圓吸引，而係如果叫呢個系列嘅甜品會跟埋椰子雪糕，我本身都幾鍾意椰子味嘅甜品，所以想試吓。結果每樣配料都出乎意料幾好食，唔錯！芋圓芋泥仙草$26- 椰子雪糕另外放，就咁食又得，倒落去同芋泥仙草一齊食都得，非常方便。芋圓口感幾煙韌，不過冇乜芋頭味道。芋泥口感幼滑，偏甜咗少少，不過同淡淡地又滑捋捋嘅仙草一齊食都好夾。幾樣材料加埋一齊都好大碗，性價比幾高，推介！…Read More