我本來對車仔麵興趣不大，但室友喜歡食，身邊啲朋友都話呢間車仔麵好食，而且諗住順便去新開間759買八折凍肉，所以同佢行過嚟大角咀食。地點唔難找，成間舖有三個姐姐主理，人手唔係好夠，連排隊都係自便。大約晚上八點到，排咗二十分鐘就有位，而條隊就一直都咁長。排隊時就八八卦卦望下佢牆上貼咗幾張紙寫乜，就發現佢話自己係小食店，唔係主賣車仔麵。其實有麝自然香，又何須介意？更何況佢個車仔麵又唔係差。兩個人食咗百二蚊，唔使搭枱（俾咁嘅錢都好應該），地方都企理，乾淨，真係有別於一般車仔麵檔。樓面個姐姐好殷勤，都認得有尐街坊好耐無嚟食！坐低咗就開始睇有咩食，有三張點餐紙，一張係車仔麵，一張係小食，一張係飲品。車仔麵餸款式唔多，價錢偏貴，八蚊九蚊係普通腸仔蘿蔔類，牛腩要十幾蚊。張點菜紙寫明最少要兩餸一麵，所以入嚟食碗車仔麵就一定夠十四蚊最低消費。平時食車仔麵都係叫三四餸都係三十以內，所以見到價錢就只係點兩餢。點了蘿蔔芝士腸配河粉。見Menu寫蘿蔔無渣，就想叫嚟食！咖哩汁要了小辣不加腩汁，今次先試咖哩，再有機會先再試加腩汁。由入座點菜後開始計，差唔多等咗半小時才有食物上枱。有尐尐慢，但見佢得三個人在店內，所以都只係可以等，催佢都應該無咩效果！等咗差唔到十幾分鐘，樓面個姐姐先話啱啱煮到我個碗無晒河粉，轉了米粉，亦都知到咗佢地真係一碗一碗慢慢煮。咖哩好香，小辣係真係少少辣，個湯底同個米粉好夾，下次應該可以試中辣。蘿蔔真係無渣，好甜好入味。芝士腸都唔係一般佳宝貨色，收呢個價錢算係誠意之作！米粉量都好足夠，唔會好似食其他車仔麵咁要加底。我室友點了勁辣魚蛋，我覺得呢個魚蛋係同個辣字一丁點關係都拉唔上關係！既然佢堅稱自己唔係車仔麵檔，係賣小食，咁當然要試小食啦。叫了魚肉碗仔翅同招牌魯肉餃。個魚肉碗仔翅，要分開魚肉同碗仔翅講，個魚肉係絕對令人失望，係用唔辣魚蛋剪開就當魚肉！不過見佢係由22蚊淨翅變24蚊有兩粒剪開咗嘅魚蛋，就算啦。至於個翅，有別於街邊車仔檔嗰尐好似食粉漿咁，呢度個翅唔會太稠，有好多肉絲同木耳絲，口感好好，木耳絲好爽脆，加上肉絲，有啲似食蛇湯羹咁。佢用咗粉絲，而唔係用素翅都好有口感，值得推介，但係唔會再加魚蛋。魯肉餃44蚊八粒，26蚊兩粒，其實係覺得有啲貴，所以只叫四粒試下。嚟到就知佢收咁嘅價錢係咩原因，面頭撒上都幾多蝦籽，都有幾條西生菜在底下，賣相幾吸引！餃皮有尐厚，又唔係死實實嗰種隔夜餃，係有啲似北方餃咁，好有質感。一入口就有濃濃嘅蝦籽味，蝦籽亦都太霸道，完全蓋過魯肉嘅味道。令隻餃失色少少，基本上蝦籽味道咁濃，隻餃只要係好普通嘅肉餃就會係一樣。飲品，都好似有幾款特式飲品供應，今次試咗柑桔雪碧。冰底同支裝雪碧分開上，店家自稱冰塊係Bonaqua嘅。杯內已經有幾粒柑桔，都好似好足料！味道中規中矩。店內還有其他特色小食，但係都未有機會試到。一來唔食麵驚唔夠飽，二來碗麵真係幾足料，所以都無咩空間叫其他小食！排隊要等，食物要等，價錢如果係食車仔麵真係貴貴地，如果食其他小食都尚算合理。…Read More
先嚟係Anchovies Assorted Veggie Pizza，無咩驚喜，Pizza個底唔係自己搓，但味道中規中矩，因為Anchovies無分得好平均，所以六件Pizza唔係件件都有。雜菜切到好絲，除咗紅甘筍係好肯定咁咬到，其他都係太碎。
第二樣係芝士火鍋，叫咗三文魚帶子，先上咗啲配料，一見到就係成碟凍肉舖貨，三文魚本來以為係煙三文魚，結果係三文魚扒切角，三隻帶子係連裙邊已經熟咗翻熱就食得嗰啲凍肉帶子，有兩隻吉列蝦，都係凍肉舖賣嗰啲，返屋企用微波爐叮熱嗰啲。蟹棒三條，都係凍肉舖五十蚊有三四十條嗰啲魚肉即食蟹棒。其他還有四嚿煮到過軟嘅西蘭花，星星型魚蛋，炸薯粒，魷魚，蘋果，菠蘿，麵包粒。除咗蘋果我可以肯定係新鮮嘢，其他都係疑似凍肉舖貨式！再上係個芝士，因為第一次食，唔敢講個味好唔好味，但感覺好淡唔香唔濃。第一嚿就試麵包，覺得個芝士好稀，唔係好上到個麵包。仲有一口粉嘅感覺，應該係開粉嘅，而唔係用芝士煮熔出嚟。收咁嘅價錢食凍肉舖嘢，連芝士都係開粉，咩都係ready made！
