arilau907's Profile

其實已經幫襯過幾次，但最後一次嘅用餐體驗實在太差😢牛肉飯配菜完全冇味，好似白灼咁，汁又少；加錢叫嘅奶蓋茶先係最伏，明明奶蓋嘅意思係上面奶泡，下面係茶，點知佢哋嗰杯係溝埋一齊，未飲過咁難飲嘅奶蓋茶😢…Read More

早排冇堂食晚市，所以偶然都會用外賣app叫晚餐送上門，因為之前食過呢間餐廳一次，記得點心味道唔錯，所以就揀咗呢間，見到晚市推出咗「抗疫餐」，咁啱想食清淡啲，就叫咗一個菜遠排骨飯，點知食完真係大失所望個飯勁多汁而且偏鹹，排骨有雪藏味，食咗一半都冇就食唔到落去，附送嘅紫菜湯亦鹹到飲唔到！仲好意思話抗疫餐，如果食晒成個餐分分鐘要洗腎呀餐廳嘅點心唔錯，但碟頭飯真係唔得，唔知係外賣問題定係點，但都唔會再幫襯嚕！…Read More

第一次嚟呢間菜館食，但實在令人大失所望🤯🤯🤯本身訂咗位，但去到都要等15分鐘先有枱，唔知訂位有咩用🤣跟住就點餸啦，但係等咗好耐都未嚟，又不停嚟錯餸，隔離枱遲過我哋嚟都已經上晒菜🤷🏻‍♀️追咗幾次終於嚟到，不過碗飯係凍嘅🌚我叫咗魚香茄子，味道同出面食嘅好唔同，用四川辣豆瓣醬煮好難食🤪而我嘅同事食食吓，仲發現佢碟餸有發泡膠粒😵雖然呢餐唔貴，平均每人$65，但體驗實在太差，以後都唔會嚟食👋🏻👋🏻👋🏻…Read More

冇食過一間西餐係食到咁趕夜晚只有6-8pm同8-10pm呢2個time slot，雖然2個鐘其實都夠食，但我哋呢次係打算同朋友慶生，事前已經打電話book咗，剩返半個鐘我哋都未食完正餐，就問個侍應可唔可以遲少少先上個甜品，侍應木無表情話我哋8點就會清場，你哋未食完搭9都會上甜品。好啦，勁趕食完正餐又勁趕食埋個甜品，8點未到就全場走晒，廁所都唔敢去就急急腳走人，重點呢度嘅嘢食唔算好食，係甜品做得唔錯，奉勸想坐耐啲嘅朋友就要考慮清楚啦…Read More

星期五晚，有朋自遠方來，當然要帶佢試試港式飲茶、點心，突然諗起呢間新興點心餐廳，於是就嚟試吓由餐具開始已經睇得出別有用心，碟上面雕咗一條金魚，好可愛唔同一般茶樓，除咗中國茶，呢度仲可以揀綠茶。我哋揀咗2個點心，一個係「睇住流奶」，同一般流沙奶皇包冇分別；一個係「鴿吞鳳梨」，可愛嘅外形配鳳梨酥嘅味道。另外仲點咗櫻花蝦炒飯、口水雞、咕嚕肉等等，味道不過不失，但外國朋友覺得點心好精緻可愛，所以一直影相。雖然點心比一般茶樓貴，但5個朋友share，埋單每人都係120左右，唔算貴，食得過…Read More

早上有啲事去長沙灣，11點幾完成後就揾吓附近有咩食，無意發現到呢間以「柚子」為主題嘅cafe，雖然店舖好細，但因為開店冇耐，唔洗等就可以坐低食。店舖走日式風格，所以杯碟都好靚（個人對細節都好重視，食具靚都好加分）食物基本以「柚子」為主，我同朋友叫咗一碟柚子雞翼、柚子雜菌黑椒意粉share食，除咗黑椒落重手咗令到碟意粉重口味咗少少外，其他都好好味。食完仲叫多個甜品，係馬騮造型嘅夾餅，好可愛！P.S 值得加分嘅係侍應服務態度好好，唔該前唔該後，下次再經過長沙灣可以Encore…Read More

放假約咗朋友去咖啡弄High Tea，雖然唔係繁忙時間但都要排15分鐘先有得入，今次係第三次食咖啡弄，隔咗一段時間冇食，今次有新嘢出即刻試吓新產品叫「繽紛莓果熱蛋糕」，賣相超靚超有少女味！唔止外面舖滿雜莓，裡面都有藍莓饀，不過唔小心倒多咗蜜糖令成個cake甜到漏，其實就算唔倒蜜糖本身都已經夠甜其他仲叫咗北極蝦沙拉吐司佐馬鈴薯同鹽味蕉糖冰淇淋鬆餅，次次嚟都有食鬆餅，但次次都食唔晒，如果少一塊份量就啱啱好唔使嘥嘢！最低消費係每人一杯飲品，我叫咗都係新出品嘅「玫瑰歐蕾」，淡淡花香味滲入香濃咖啡，中和返鬆餅嘅甜味。本來諗住同朋友傾多陣，但侍應行過嚟同我哋講仲有人等位所以就走嚕，埋單每人都要100蚊多啲，雖然下午茶嚟講貴咗啲，但啲嘢食又真係好好味同份量夠多，所以下次都會再嚟…Read More

每次經過沙田間Simplylife都係大排長龍，無論係午飯定晚餐時段，有幾次想食都因為太多人而放棄前兩日晏晝3點幾同朋友行街行到餓，經過見到冇人排隊即刻入去食返個Tea先！下午茶時段$55包嘢飲，可以揀薄餅、農夫包、蛋糕等等，我叫咗個蘑菇菠菜芝士農夫包，朋友叫咗個雞肉薄餅，味道都唔錯，不過如果薯條嘅份量多啲就好勒是日冰茶係香橙檸檬，比一般檸檬茶再甜啲啲，好好味！埋單加埋1都係每人60幾，抵食過平時嘅Lunch Set同Dinner，正呀…Read More

平日放工後約咗屋企人食飯，由於兩老偏愛中菜，左揀右揀最後揀咗呢間「北京樓」。我哋嗌咗三個餸一個炒飯，啲嘢食味道唔錯，但服務員態度一般我哋6點45分去到，帶位嗰個問我哋有冇訂枱，我哋話冇，佢就話要等7點至7點半，但明明見到裡面勁多吉位，而且排我哋前2個個男人都係冇訂位都入咗去，跟住我哋話咁等一陣囉，好快到7點啫，個帶位又突然話入得去，真係吹脹！…Read More

星期六晚約咗朋友喺「古朴年代咖啡·酒館」食飯慶祝生日，雖然地方唔算大，但店內嘅環境同氣氛都好好。我哋5個人點咗小食、沙律、意粉、Pizza，份量唔多，不過味道屬中上。食完主菜後，我哋點咗個心太軟甜品，因為有朋友就嚟生日，所以問職員可唔可以喺碟上面寫「Happy Birthday」，職員亦好nice即刻答應餐廳逢星期五、六或日晚都會有音樂會，當晚8點9左右就見到有隊本地band到場準備，9點準時獻唱，不過我哋聽咗一首歌就趕時間離開咗餐廳，鍾意音樂嘅朋友不妨揀假日嚟一邊食飯一邊聽聽音樂，度過一個愉快嘅晚上…Read More

位於觀塘區工廈嘅「小時光」其實有啲難揾，第一次去仲要問人先揾到正門喺邊（滴汗）由於我同朋友差唔多3點先去到，所以等咗唔係好耐就有位餐廳裝潢走台灣懷舊校園風，枱凳都係以前課室用嘅木枱木凳，四周圍仲有一個個書架裝滿漫畫，客人可以隨便拎嚟睇講返嘢食，主要都係賣台式嘅香酥雞、魯肉飯、滷水拼盤等等。我點咗「夜市香酥雞便當」同「黑糖奶茶」，朋友點咗「台式魯肉便當」同「荔枝梳打」，全部都係水準之作，香酥雞炸得啱啱好，滷水拼盤又夠入味！加上呢度環境氣氛都唔錯，啱晒同三五知己嚟食飯傾偈兼懷舊…Read More

一直都好鍾意食雞蛋仔，特別最近愈出愈多新口味，芝士、開心果、鳳梨酥乜乜乜，總之就創意無限！今日咁啱經過太子，見到呢間摩芽雞蛋仔，即刻畀蜜糖星星嘅雞蛋仔外形吸引，梗係要買底試吓！咁啱做緊promote，於是買咗雞蛋仔同花茶嘅套餐。西柚味嘅花茶幾好飲，紅配紫嘅外形又好吸引（經常畀外形吸引而消費嘅女人）；而名為「紫星」嘅雞蛋仔香芋味唔夠濃，有少少失望，但勝在外形特別，拎嚟影相呃Like都唔錯…Read More