koeicat's Profile

如果唔係朋友帶路，真係唔知大圍田心村入面收埋咗間泰菜店。位置有啲隱世，唔係行街會撞到嗰種，無人帶路真係未必知點搵，但其實好方便。🍛 青咖喱豬頸肉咖喱汁香濃微辣，唔會太鹹，又夠香。豬頸肉燒得香口，咬落有係乾柴，食極都有，配蒜蓉包啱晒。🍝 香葉肉碎炒河炒得夠火氣，唔太乾油香重，香葉味唔算重，肉碎唔鹹，河粉唔會碎到斷哂。🥬 泰式炒通菜蒜香夠，豆醬香口惹味，通菜爽口，冇水冇鞋，係穩陣發揮。🥖 即焗蒜蓉包出爐即食，外脆內鬆，蒜蓉唔霸道，size仲幾大塊，唔係細細塊嗰種，係法包斜切嗰重。🦐 生蝦刺身原本話賣晒，有啲失望，好彩店員話仲有兩隻即刻要咗。蝦肉爽甜，醬汁酸辣夠味，蝦頭炸到卜卜脆，雖然得兩隻，但都唔失望。🥭 芒果紫糯米芒果好新鮮，唔係浸糖水嗰種罐頭貨，椰汁同糯米做得好，煙韌唔黐牙。開頭可能喺村屋位置，無左嗰種人來人往好吵鬧咁感覺，有啲位做得細心，唔造作，走嘅時候發現同其他食客同路行去搭車，佢地原來唔係街坊黎，係特登黎食🤣。📝泰中意📍地址：大圍田心村254號地舖…Read More

原本只係想搵個地方坐低吹水，點知變咗一場蟹香燒鵝配紅酒嘅盛宴。地點係觀塘，裝修華麗，仲有舞台同包廂，啱晒公司聚餐、擺酒、家庭聚會。今晚食左：🦀 白胡椒蟹焗飯隻蟹夠鮮，胡椒香滲入蟹肉同飯粒，飯底仲有飯焦，啖啖都係鑊氣。叫左支紅酒🍷，意式浪漫即刻升級🦆 脆皮燒鵝皇皮脆肉厚，鵝味濃郁，唔使點醬都夠味。紅酒果香同鵝油香互相拉扯，唔會搶戲，反而更顯層次🥬 泰式安格斯牛肉生菜包牛肉炒得香，配生菜清爽唔膩，啱晒夏天食，食完燒鵝再嚟一包，口腔即刻reset 😌🐟 杜阮涼瓜炒海斑球又係好啱夏天食，涼瓜唔苦，海斑球炒得夠鑊氣，同時做涼瓜要夠熟但唔爛，熟行啱啱好🍷 Yara Rosso Molise見佢做緊推廣。Molise出世，Montepulciano釀成，色深香濃，酒體均衡，入口夠穩陣。仲要只係$128一支，唔使諗，配胡椒蟹、燒鵝都啱key，拉高整場味覺層次。門口見到中秋早鳥優惠，套餐最多減千蚊，另有仲有中秋盆菜外賣、自取。由味道到場地，難怪連TVB Weekly都推介做星級婚宴場地，唔係講笑。🎉📝星海 (觀塘) LS Club @the.starview 📍觀塘開源道79號鱷魚恤中心2樓 #晚飯 #婚宴 #酒樓 #酒樓擺酒 #中菜 #香港粵菜 #香港聚會 #TVBWeekly星級婚宴場地 #公司聚餐 #婚宴場地 #香港必食 #香港美食 #聚會 #香港必食 #香港美食 #東周刊香港服務大獎之婚宴食府2025 #假期好去處 #中秋節套餐 ＃中秋盆菜…Read More

喺銅鑼灣搵食又點少得去登龍街？見達濠仔由西營盤開到過嚟銅鑼灣梗係要試下佢。店內環境簡潔乾淨，裝修樸實無花巧。其中一個Menu有晒相，相信都係佢哋嘅招牌菜。一於就試下先，今次就簡左：🍜 招牌達濠仔米線 - 湯底：應該係用咗老火煲嘅骨湯，好想知有咩配料，因為入口清甜帶鮮- 米線：唔鬆散，夾上嚟唔易斷，無發漲到淋哂- 配料：牛筋丸／牛雜／魚丸／魚餃，丸類彈牙有嚼勁，成碗大大碗，份量紮實🦪 特式潮汕蠔仔粥 - 蠔仔：粒粒大大粒又飽滿，無腥味，鮮甜 Juicy，成碗都冇死蠔- 粥底：介乎稠與流之間，無爛到似糊仔，勁鮮甜，又有鹹香- 配料：食到仲有蝦米，豬肉，仲發現到有鹹魚，真係落足料去煮🌯 特式潮汕腸粉 - 粉皮：薄身帶微煙韌，但又唔係成餅野- 餡料：加咗蛋同生菜，配埋甜豉油，估唔到有幾特別 同場加映：佢哋嘅辣椒醬🌶️，辣得來又夠香，後勁十足，食得好過癮。唔食得辣嘅朋友一次過真係唔好加咁多銅鑼灣登龍街，人來人往，冇人會特別留意d小店。但其實佢地一直去好努力，坐低食完一碗米線、一碗粥、一條腸粉，會發現到佢地用心製作嘅驚喜，份量足價錢實惠上菜快夠鮮味。📝達濠仔 📍地址：銅鑼灣登龍街31–35號玉山大廈地下A舖 …Read More

上環搵地方食飯，突然諗起有間日式餐廳好耐無，即刻走過去食下先。佢哋店舖唔算好大，但係都唔算好迫。今次食熟食比較多，生野淨係叫咗帆立貝壽司，厚切唔係嗰啲薄身貨色，夠鮮，咬落有少少黏口感，飯唔多，比例啱啱好。鯛魚湯拉麵湯底幾濃，飲落有魚鮮但唔腥，麵條係偏硬口感，唔係港式滑溜嗰種，反而幾有咬口。鐵板醬汁豚肉炒麵就重口味啲，豚肉帶焦香，帶少少油香，配上醬汁同蔥花，幾惹味，好有食大阪燒嘅感覺。和牛西冷鐵板燒係成餐最正嗰道，肉質唔錯，油脂分布平均，煎到五成熟，唔會太老，入口啱啱好，墊底芽菜有d肉汁沾黎食，幾有滿足感。整體出品一如既往保持水準，價錢以上環區嚟講算好合理。坐喺包bar枱望住師傅整，其實都幾治癒。逢星期五仲開到凌晨兩點，夜鬼們有著落了。…Read More

尖沙咀行街，天氣涼涼地唔打邊爐都搵啖熱湯野食下，最後揀咗呢間主打九州烏冬嘅店。叫咗櫻花蝦味噌烏冬，湯底偏濃，櫻花蝦落得都算多，配味噌湯底幾夾。博多天下三槍烏冬就係三條炸牛蒡天婦羅直插碗面，賣相幾有氣勢。原來「三槍」係源自福岡老字號「博多槍烏冬」，1967年創立時就已經係招牌，炸牛蒡長達三十幾厘米，炸完直放落湯烏冬上，似三支長槍咁，夠晒霸氣。牛蒡炸得乾身，脆中帶韌，食落幾有咬口。小食方面，忌廉蟹肉餅外脆內滑，蟹味唔算重；吉列蠔炸得靚，蠔唔細隻但冇腥味。丸天、明太子天婦羅都炸得乾身，唔算油膩，明太子都突出。整體出品穩陣，三槍有霸氣，但勝在唔算有好多，出餐快，坐得舒服，附近番工嘅話食佢都方便。📝博多槍烏冬📍尖沙咀彌敦道132號美麗華廣場1期2樓228號舖#尖沙咀美食 #烏冬日常 #炸物時間 #博多三槍 #牛蒡天婦羅 #烏冬 #日本老字號…Read More

將軍澳小區有間café，環境靜靜地，坐落坑口村，感覺同市中心嘅咖啡店唔同，少咗喧鬧，多咗慢活。今次同朋友去食晚餐，幾款菜式都有驚喜。🥑 牛油果蟹肉脆餅入口清爽，蟹肉鮮甜，牛油果滑身，底層脆餅帶少少焦香，食落有層次，做前菜好啱。🍝 卡邦尼意粉醬汁濃郁但唔會過膩，煙肉鹹香同蛋液融合得幾好，麵條煮得啱啱好，掛汁力強，又唔會過硬過淋，有水準。🥩 意大利牛肉他他配鵪鶉蛋多士牛肉切得細緻，入口滑，鵪鶉蛋令味道更圓潤，配上香脆多士，口感對比鮮明，係成餐最有驚喜嘅一款。🍞 麵包布甸配雲呢拿雪糕布甸焗到外脆內軟，帶微微焦糖香，配雪糕一冷一熱，甜度平衡得好，收尾舒服。整體出品唔浮誇，食材新鮮，擺盤有心思，價錢合理。坐喺小區 café，食住有水準嘅西餐，感覺幾寫意。…Read More

觀塘搵到間性價比極高嘅omakase，$980食到好多道菜，坐足兩粒鐘都唔覺悶，師傅親切健談，仲會逐件介紹食材背景，成個體驗好有溫度。🥢 開場係醋漬水雲配帆立貝，酸香開胃；前菜有水果蕃茄、雞泡魚皮配鯊魚軟骨、豆腐，清爽得嚟有層次。🐟 正式開始後，鱈魚白子配柚子沙律汁＋冰菜好驚喜，白子滑得嚟冇腥味，柚子汁提鮮得嚟唔搶戲。鰤魚配三色漬，油脂豐富，師傅話係油甘魚大個版，真係幾厚肉。吉列安康魚配烏魚子粉外脆內嫩，鹹香夠晒惹味。澳洲黑邊鮑配肝醬壽司飯係我心水之一，壽司飯微溫，配肝香幾夾。🦀 主菜我揀咗香箱蟹，蟹膏蟹籽蟹肉滿滿；朋友揀咗拖羅＋赤身煙燻配沙甸魚乾，煙燻香氣幾突出。🍣 壽司環節有時令白身魚生、馬糞海膽手卷，鮮甜滿足；最後吞拿魚蓉手卷係師傅火灸背鮨油脂再撈埋一齊，香到不得了。🍜 中間有梅子素麵清新解膩，尾聲鯛魚魚湯冇腥味成碗奶白色。甜品有自家製玉子燒、抹茶蕨餅、紅豆即燒年糕收尾，甜度啱啱好。整體節奏好、出品穩陣，唔浮誇但有心思，係會想再encore嘅一餐。見佢另一邊場有鐵板燒，望下menu唔算貴，下次可以一戰！📝菊月町📍觀塘鴻圖道23號利登中心地下1號舖#觀塘Omakase #焰月 #白子 #香箱蟹 #馬糞海膽 #吞拿魚蓉手卷 #omakasehk #觀塘搵食…Read More

夜晚上到旺角高層，望住街景慢慢食，兩個人慶祝生日，氣氛舒服、食物又唔錯，仲好打卡able，又係一間畫碟高手，夠晒滿足。🦐 西班牙蒜油大蝦配酸種麵包蝦夠大隻，蒜香唔霸道，麵包點黎食，吸晒油香，個麵包幾好食。🐌 寶雲酥法式田螺配薯蓉田螺唔腥，薯蓉滑得嚟有牛油香，係討好嘅配搭。🍝 金沙蟹黃蟹肉QQ捲捲意粉蟹味夠濃，好有蟹鮮味，唔會太creamy，食落有啲似港式fusion。🍕 松露牛肝菌雞肉芝士薄餅芝士拉絲，牛肝菌香而唔搶戲，雞肉唔乾，兩個人share爭d食唔哂。🧃 熱蜂蜜柚子茶＋青檸話梅梳打一暖一清新，飲完唔膩。🍰 Tiramisu千層蛋糕畫碟係預約嘅，見佢個雪櫃放左d畫好嘅碟，非常大癲，畫得超靚。仲有即影即有相架送，寫低心意字句，儀式感滿分，影完即刻放入袋。整體出品穩陣，環境舒服，唔嘈唔迫，啱晒想靜靜地食餐好或者幫人慶生。畫碟＋相架記得預早講，唔係walk-in就有。📝Homeland📍旺角彌敦道726號19樓…Read More

天氣開始轉涼，即刻Call人去打邊爐。用左幾秒時間就諗到去邊食好，好彩佢觀塘區都有分店，個場更大更闊，勁多卡位。一樣揀番120分鐘日本A4黑毛和牛火鍋放題。🍲 湯底揀咗養生菇菌燉雞鍋同牛骨湯，前者菌香甘醇，仲有半隻雞喺入面請；牛骨湯就濃厚少少。🥩 A4黑毛和牛油脂分布靚，輕輕一灼已經夠香；送嘅澳洲M9和牛牛丸彈牙有肉味，幾有驚喜。海鮮拼盤有蝦、蜆、魷魚，唔算豪華但新鮮度有交代。🍞 蝦蝦霸霸脆多士係邪惡位，蝦膠厚身，外脆內彈；日本和牛橘梨伴豆腐清新解膩，橘香幾突出。🍜 阿嬷豆乾魚蓉麵用咗永樂粉麵廠出品，麵質煙韌，豆乾吸晒湯汁幾入味，係成餐最驚喜之一。🍢 小食仲有夜市雞皮卷、海苔鹽酥雞、烏金墨汁腸等，幾有台灣夜市feel。🍹 飲咗芒檸蜜西米爽，酸甜解膩；想飲酒可以加$68任飲港式檸檬茶18+。🍑 甜品有蜜桃愛玉冰，桃味唔假，愛玉滑身，唔會太甜。撞啱大閘蟹季節🦀，我叫嘅餐仲有一人一隻大閘蟹送，唔欺場，好多膏。無記錯好似去到2/12！成晚食得好滿足，食完全身暖哂！📝牛大人📍觀塘開源道79號鱷魚恤中心5樓…Read More

將軍澳LOHAS商場人流唔少，行到四樓見到一間裝修幾多人等位嘅中菜館，啱晒一家大細慢慢食返餐。今次試咗佢哋幾款點心，出品穩陣。🥟 野菌鮮蝦菜苗餃皮薄餡靚，蝦爽菜香，唔會太油🍤 蝦餃皇拼潮州粉粿就中規中矩，粉粿餡料夠實淨。🦐 蟹籽鮮蝦燒賣皇上面鋪滿蟹籽，咬落有啲爆珠感，蝦肉彈牙。🥢 和風長春卷炸得乾身，入面係沙律醬＋蟹柳，都長過我筷子一半，幾特別。🌺 春風得意紅米腸係甜口路線，紅米腸煙韌，幾有層次。🍖 薑蜜叉燒係意外驚喜，蜜味唔會太膩，肉質唔乾，薑味輕輕滲出。🍲 養顏花膠灌湯餃湯底夠熱，夠哂大粒，配料都唔少。🍮 養顏紅棗糕收尾，唔會太甜，紅棗味清香，啱晒唔想太heavy 嘅甜品控。餐廳有唔同菜單選擇，無論係彌月、做節、春茗都啱用，場地夠闊落，氣氛又得體，幾適合一家人聚餐。…Read More

銅鑼灣謝斐道上面三樓，燒肉＋火鍋放題，120分鐘任食，燒肉火鍋雙線開打，食材選擇夠多，和牛、飲品、雪糕、雪條任食，啱晒想食得盡情嘅日子。今次揀咗黃金粟米湯拼豚骨湯做鴛鴦鍋，粟米湯帶甜，要加$58都要試，打邊爐唔洗點醬都夠味。燒肉方面，澳洲和牛油脂分布唔錯，燒得啱火候好食。+$88升級咗刺身，日本生蠔新鮮度有交代，香煎鵝肝蝦片係重口味位，鵝肝厚切，蝦片脆口；和牛他他切得夠細，好特別。兩位以上送原條鰻魚壽司，飯底迷你得嚟唔會食到飽左，鰻魚厚身。甜品有芝士蛋糕＋畫碟，好有心機。最後仲有大粒棉花糖燒，自己燒到微焦，外脆內溶，幾療癒。整體唔係走高級路線，但勝在選擇夠多、時間夠彈性，以呢個價位嚟講，食得飽、食得開心，已經交到功課。📝 熊本燒肉📍銅鑼灣謝斐道477-481號3樓#熊本燒肉 #燒肉 #日式燒肉 #火鍋 #牛肉控 #任食和牛 #日本和牛 #放題 #無限時 #銅鑼灣美食 #香港美食 #抵食#yakinikukumamoto #allyoucaneat #wagyu…Read More

中環夜晚唔算靜，但有啲角落位依然可以慢慢嘆慢慢食、飲返杯。兜兜轉轉最後揀返佢，開放式廚房一邊燒一邊飄香，坐得舒服，氣氛輕鬆，唔趕人。🍍 黑糖燒菠蘿係今次最大驚喜，燒完糖香焦脆，果肉仲保持到多汁，甜得嚟唔膩。🍆 麻辣茄子軟熟入味，辣勁滲得均勻，好juicy幾惹味。🧀 芝士年糕唔係拉絲嗰種，但煙韌度夠，熱辣辣上枱，點埋芝士汁，咬落去有啲療癒感。🍢 串物方面，紫蘇雞皮蝦、鵪鶉蛋卷、汁燒年糕卷、牛油果卷都係細細件但有心思，紫蘇香、雞皮脆、蝦彈，層次分明。🥓 豬肋肉燒得香口，豬大腸冇羶味，手切牛胸爽有咬口，厚切牛舌拖羅油脂分布靚，入口即化。🍏 焦糖青蘋果鵝肝多士重口味之選，鵝肝厚切，配焦糖蘋果幾夾；芝士黑醋無花果酸甜中帶鹹香，幾開胃。🍢 免治雞肉棒配蛋黃，邪惡得嚟幾滿足；汁燒三黃雞氣管煙韌唔韌口，幾少見。🍵 飲咗百香果烏龍茶同青檸梳打，清爽解膩，收尾啱啱好。第二次食燒烤堂，唔同分店但水準一樣穩，幾款串燒真係食完會記得，好高質。但食兩次都唔係好滿足，應該要每月一次。📝燒烤堂📍中環安慶臺1號安慶大廈地下A號舖#燒烤堂 #串燒 #foodie #高質 #香港美食 #抵食 #燒菠蘿 #香港串燒 #人氣 #串燒店 #中環 #中環美食…Read More

銅鑼灣有間甜品舖，主打70年代懷舊香港主題，一入門就見到瓷磚牆身、老香港海報、木櫈吊扇，氣氛做到足，唔係行貨復古。仲一路播緊香港人都耳熟能詳嘅歌，未食已經有少少穿越感。🍧 黑芝麻芒果冰酥係驚喜，芝麻香濃得嚟唔會搶晒芒果位，冰酥口感似刨冰再綿啲，唔會一食就溶晒，好大份好滿足。🍫 茅台朱古力布丁有啲玩味，入口先係朱古力滑香，之後茅台酒味慢慢滲出，唔會太烈，幾有記憶點。🍨 大四喜係雪燕、桃膠、芋圓、芒果、仙草、椰汁雪泥，啱晒選擇困難症。🌺 桃膠洛神花沙冰酸酸地幾開胃，桃膠份量唔少，食落有啲養生感。🥭 多芒脆脆芝士椰奶凍芒果夠甜，芝士味唔重手，底層椰奶凍滑，面頭加咗脆脆，口感幾豐富。成間舖主打傳統＋中式fusion甜品，唔係淨係靠裝修，甜品本身都有心思。學生證仲有半價優惠，抵食得嚟又有氣氛，幾啱放學hea一陣。📝蘇三甜蜜📍銅鑼灣加路連山道15號地舖#蘇三甜蜜 #飯後甜品 #銅鑼灣 #銅鑼灣美食 #銅鑼灣甜品 #甜品控 #香港美食…Read More

搵地方慶生，諗住由銅鑼灣行去灣仔，途中見到呢一間就撞左入去，坐低之後發現唔止食物有驚喜，氣氛都幾唔錯。🍢 串燒叫咗幾款：燒秋葵、金菇肥牛卷、鰻魚串、山葵牛橫隔肌、豚肉青蔥卷，全部都係自家製，火喉控制得好，唔會乾柴，橫隔肌同鰻魚特別出色。🦑 鹽燒鮮魷魚仔夠鮮，唔腥；炸蝦餅外脆內彈；芝士蝦多士一咬爆餡，幾邪惡。🌶️ 麻辣酒煮鴨血韭菜夠惹味，酸菜辣肉炒魔芋粉絲酸辣開胃；桂花蜂蜜小蕃茄清新解膩。🌽 椒鹽脆香粟米條係意外驚喜，炸得乾身，又有粟米香。🦪 最矚目都係高壓鍋乳山蠔厚肉多汁，唔使點醬已經夠鮮。🍻 仲飲咗柚子highball同柚子生啤，好有清新感覺，十點後有買一送一，唔止野飲野食正價餐牌仲有八折，串燒$10起，抵食。成晚staff都會同每枱客傾兩句，唔會煩，但夠有人情味。佢地得知我朋友生日，佢哋仲即興整咗個sake bomb，成場拍手，氣氛推到高位。開到凌晨兩點，啱晒朋友聚會吹水飲返杯慶生。雖然無好打卡able嘅慶祝，但好有人情味好地道仲warm!📝川燒 @chuanshaoshop @media.vas 📍灣仔駱克道399號地舖#川燒 #hkfood #foodie #高質 #香港美食 #佐敦 #渡船角 #串燒店 #銅鑼灣 #燒海鮮 #夜市 #消夜 #川燒串燒酒埸 #川燒 #駱克道…Read More

每逢年尾特別多慶祝活動，北角海旁一帶最近幾熱鬧，呢間餐廳本身係寵物友善，上星期行過見到有枱鋪到靚靚地，知道佢地預訂可以有Table Service於是就book左，好少女心打卡位加晒分。坐得舒服，望海景又唔焗促，今次試咗佢哋新Menu，幾有驚喜。🦞 蒜香麻椒巴黎牛油汁燒龍蝦尾：龍蝦肉彈，牛油汁香得嚟唔膩，麻椒味唔重手，啱啱好。🦐 大閘蟹膏意大利飯配刺身紅蝦：蟹膏味濃，飯煮得creamy，紅蝦鮮甜，唔係得個樣。🥐 土耳其無花果香橙雜莓醬骰子牛角酥：牛角酥酥脆，果醬酸甜平衡，無花果有啲煙韌感，幾有層次。🍫 可可米蘇：朱古力味濃，唔會太甜，飲落唔會膩。最後外賣咗日本香印提子骰子牛角酥焦糖脆脆，拎去東岸板道坐低慢慢食繼續吹下水，吹住海風＋甜品＝完美收尾。餐廳除咗堂食，外賣都照顧到打卡位，幾貼心。📝活📍北角北角邨里1號北角匯一期地下G01&G32號舖#litmcafe #北角匯 #海邊餐廳 #竉物友善餐廳 #西餐 #香港美食…Read More