VVAITINGG's Profile

同朋友聚會大家想食泰國菜，然後有人推薦食依間韓國街附近新開嘅泰國餐廳，話食過性價比高，所以我哋就去咗試一下。•🔸泰式生蝦刺身 $118食泰菜必定會叫泰式生蝦，呢到既生蝦夠大隻，口感爽口彈牙。鍾意食生蝦嘅人必定要試吓。•🔸泰式無骨鳳爪 $78無骨鳳爪數量都幾多隻，三個人食完全唔使爭。如果本身重想嗌埋沙律開胃但又驚食唔晒嘅朋友可以揀呢個，因為呢一碟嘅配菜同其他舖頭比較相對較多而且好新鮮，滿足咗細胃口但想食鳳爪又想食沙律嘅願望，係一個幾好嘅前菜選擇。(🤭小提示🌶️如果好怕辣嘅朋友可以同店員查詢返可唔可以減少少辣椒，因為佢哋味道都真係幾正宗，唔係得幾塊辣椒碎裝飾個種。)•🔸冬陰功海鮮湯(小辣)$198冬陰功湯可以自己揀辣度，唔會過酸過辣，而且有青口，魷魚同蝦，滿滿嘅海鮮，非常抵食。我飲冬陰功首要條件一定要熱辣辣，呢間餐廳最好嘅係湯會同火爐一齊上，一路㷫住，唔使趕住趁熱飲晒佢，或者有壓力驚凍咗唔好飲。•🔸泰式蝦餅拼春卷 $88我每次食泰菜都會掙扎叫蝦餅定春卷，但全部都叫又會怕食唔曬，呢度啱啱好可以滿足我兩個願望可以兩樣都食到。蝦餅外層好脆內裏好彈牙，春卷係網狀個隻，炸到金黃色好吸引，脆得黎有層次感而且有滿滿既餡好正。醬汁方面除咗平時每間都有嘅泰式甜酸醬，仲多一個帶有香料味比較酸嘅特色醬汁，同其他餐廳唔同可以換吓口味。最重要炸物放咗一陣都唔會即刻變到出油或者淋咗，重係脆既非常抵讚。•🔸芒果魚 一上枱大家見到覺得超有驚喜，原條魚份量好足，好多肉，加上有滿滿既青芒果絲，擺盤好靚好適合打卡。魚既表面炸到脆卜卜，但肉依然保留到嫩滑既質感，加上經過調味酸酸辣辣嘅青芒果絲，成個菜都好醒胃唔會因為炸左而覺得漏。(小tips: 呢道菜係無喺menu入面，想食嘅話可以預約時問一下。)———————————————💬總結，服務好細心，侍應哥哥除咗會先了解你食既辣度再比你建議之餘，重會成日留意大家枱面情況會唔會唔夠水，同埋都盡量收咗枱面唔用嘅嘢等我地坐得舒服啲。食物上你會睇到廚師嘅心思，我哋嗰日叫嘅每樣嘢都係好食同有水準，而且份量唔會少，性價比高。整體地方都好乾淨，枱同枱之間位置好寬敞好適合一家人或者聚會去。唯一係地點唔係地舖所以大家要多留意一下大廈名。下次想食泰國菜一定要去試埋其他菜式先得🤭亦都會推薦我啲朋友去試下👍🏻👍🏻👍🏻…Read More

朋友介紹下去左圓方既一間韓國餐廳食晚飯，餐廳內部裝修以黑色、雲石同木紋為主加上昏暗既燈光，整體環境好有格調。•🔸醬油帶子 $98帶子本身已經用醬油醃製過唔洗再調味，幾有新意，不過略嫌有啲遮蓋左帶子原有既鮮甜味，有比較下相對鍾意原味嘅帶子。🔸辣雞腳豬皮 $88雞腳完全無骨食起黎超方便。食豬皮前見到佢好厚，都驚佢會好油膩好似扣肉咁，咁我就會唔想食，但原來同想像中唔同，完全唔會有油膩感，口感好有彈性完全feel到係食緊啲骨膠原，加上韓國嘅辣醬煮埋一齊好惹味，有驚喜！🔸辣八爪魚拌麵🐙$98呢個係我最中意既菜式，八爪魚好柔軟唔會韌，麵底過咗冷河咁好有彈性，吸收晒啲甜辣甜辣既醬汁，夾埋啲爽口嘅伴菜，非常之開胃👍🏻🔸紅辣醬五花肉🐷$118五花肉肥瘦分明，加左秘製辣醬一齊煮，再用鐵板熱辣辣咁上枱，非常惹味同香口，而且出奇地唔會覺得脂肪位置好淋好油膩，讚。🔸韓牛牛胸🐮$660好驚喜原來呢個菜係會有專人喺你面前煮🔥，將牛胸肉同其他蔬菜、醃菜等配料喺你面前一齊煮熟，再排列整齊，外貌已經非常吸引，加上直接聽到煎肉嘅”炸炸”聲，配合埋啲牛肉飄出黎嘅香味，不得了🤤未食已經流口水，當然韓牛嘅牛味真係好香好食。—————————💬總結服務好細心，除左會幫你烹調之外，有需要嘅話侍應都會好簡單咁講解啲菜式嘅做法比你了解。菜式上都係有驚喜嘅，大部份都係喺出面嘅韓國餐廳食唔到，而且食材處理方面都剛好。加上有氣氛嘅裝修，整體嘅體驗係好好。唯一係價錢上有少少貴💸，如果有預算嘅話可以試下。…Read More

餐廳剛開既時候食過一次記憶中係幾好食，見佢長期佔據OpenRice旺角區頭幾位，同幾個朋友聚會就約去依間到食。去到門口真係好爆場，如果有興趣嘅朋友真係要早啲攞位。🔹香炸雞腎拼無骨雞爪 $108雞腎同雞爪本人爽口有口感，但無咩味道，加上炸皮都無調到味同埋幾厚，主要要靠旁邊嘅茄汁提味，唔太推薦。🔹韓式海鮮煎餅 $118海鮮煎餅，賣相幾好，但同其他店舖比較海鮮太少同埋唔夠脆，口感比較似茶樓嘅薄罉，有啲失望。🔹半半炸雞(蜜味芝士粉，原味) $178兩種炸雞調味都唔錯，但係唔似韓式炸雞咁，唔會有一層脆卜卜既炸衣，比較似快餐店生炸雞髀嘅外皮，如果想食韓式好脆身既炸雞就可能選擇第二間比較好。🔹醬油魚介湯鍋 $208整體嘅味道同材料同韓國路邊攤嘅差不多，都OK，清清地可以減輕食左咁多炸物嘅油膩感。🔹藍莓乳酪沙冰、綠茶沙冰 $58藍莓乳酪沙冰同綠茶沙冰都好夠味，唔會好似平時出面個啲咁飲到底無味，外貌幾靚，份量都大杯👍🏻—————————💬整體嚟講環境都闊落多位，不過地板有少少跣，同埋夜晚人手好似唔係好夠。食物方面水準好似冇之前咁好食，加上因為長期見佢係openrice旺角區頭幾位餐廳，同想像中落差比較大，或者剛好唔太啱我地口味😅。因為都係較早前食嘅，而家好似轉左新Menu有部份食物唔同左，希望有新既變化啦💪🏻。…Read More

每次去又一城睇戲都會見到呢間日式炸豬扒餐廳門口都係排緊長龍，想試好耐，剛好朋友同我食生日飯就拉埋佢陪我排一次😝好彩可能因為係平日關係，七點鬆啲去到前面都係得兩枱就到我地，大約等左半個鐘就有位。入面座位都闊落，整體環境整潔。•🔸上級吉列豬扒，豬柳，深海大蝦定食(二人餐)🐷🦐 $518由於我樣樣都想試所以叫咗個有大蝦、豬扒同豬柳既二人餐。二人餐包括左漬物、蜆肉麵豉湯、炸物、白飯、沙律菜同埋生果，好豐富。漬物、白飯同生果都不過不失。蜆肉麵豉湯，麵豉香味唔突出主要得鹹味，試過一兩啖就算😅畢竟唔係主角。重點炸物方面整體炸皮薄身得黎非常酥脆，炸得好好而且保留到入面部份嘅肉汁，有加分。🦐炸蝦好大隻肉質有彈性，好食！🐷炸豬扒味道肉味較濃，但係有啲筋，部份位置比較難咬。炸豬柳肉質柔軟好易咬，雖然肉味冇咁濃，但比起豬扒我更鍾意豬柳個質感。而最有驚喜嘅竟然係椰菜⭐️，出奇地非常之清甜爽口同之前食過其他店完全唔同，淋上佢地提供嘅兩種沙律汁(紫菜汁、柚子汁)，非常開胃，同時平衡到咋物既熱氣。紫菜汁帶昆布少少咸既味，柚子汁就酸酸甜甜咁，連平時唔係特別中意食椰菜既我都同朋友refill左4-5次。🔸巨峰梳打🍇 $42味道唔算太甜少少乳酸味幾好飲。—————————💬整體餐廳環境同服務都唔錯，食物都係中上嘅水準，但性價比唔算最高，同埋聽朋友講佢地原來有收茶錢$9一位，而且大部份時間都要排隊，不過食炸豬炸蝦黎講都係會回頭嘅店黎😆 …Read More

朋友推薦下去咗食呢間新嘅炸雞店。嗰日星期五我大約6:30左右到，可能未放晒工都仲有好多位 (⚠️大約七點半開始出面就排長龍所以大家要留意下)。環境上都幾乾淨企理。入面大部份都係韓國店員嚟，用英文溝通就可以。用餐時間大約70分鐘。🔸半半炸雞🍗 $198+$30+$30(青陽辣椒MAYO炸雞🌶️+ CORN-SO AMAZING炸雞🌽)我哋叫咗最好賣嘅兩款炸雞試。佢哋嘅炸雞其實比較似係我鍾意嗰種烤焗雞，外層香口之餘，重keep到入面雞肉質感好嫩滑。🌶️如果食得辣嘅朋友絕對要試青陽辣椒MAYO醬汁口味。本身青陽辣椒特別辣而且有帶一陣獨特清新嘅辣椒味，配上偏甜嘅沙律醬，甜辣得黎比一般嘅紅醬甜辣炸雞香同清爽，冇咁易膩。🌽CORN-SO AMAZING炸雞係喺炸雞上面落大量嘅粟米湯味嘅shake shake粉咁好香，旁邊嘅燒粟米都好有牛油香。🔸芝士雞蛋卷🧀🥚 $128芝士蛋卷份量好大，一夾起蛋卷就有拉絲芝士效果，本來係相當吸引，但蛋捲太老，好明顯食到一層層嘅蛋，唔夠軟熟，同柔軟嘅芝士口感太衝突，唔推薦。🔸墨魚圈🦑(爆粟口味) $70本來想像呢個墨魚圈會有一粒粒墨魚喺入邊煙煙韌韌嘅口感，原來餐廳係將d墨魚打漿再搓成圈狀再炸，外皮脆簿加上粟米湯味粉係幾香口，可惜個質感真係爭少少，如果入面會有啲墨魚粒就更好。🔸檸檬梳打🍹&復活節金雞蛋🥚復活節期間食<炸雞同蛋卷組合>會送檸檬梳打同金蛋。🍹檸檬梳打就正常發揮唔會甜。食完其他嘢想開隻金蛋🥚嘅時候，一攞上手感覺上係蛋殼嚟😂menu冇講係咩嚟，連英文都無形容到，所以問吓個韓國侍應，佢話pudding？! 一開係粒嘢係半透明狀態嘅啫喱入面好似有隻蛋黃，聞到少少似生蛋味😵‍💫但覺得送得俾人冇理由咁奇怪，好奇心驅使下咬左少少條邊，ar ⋯⋯個質感好似擦子膠，無味既，大家唔使試😂—————————💬店員整體都有禮貌，坐得都舒服。食物上兩款炸雞都幾特別，味道唔錯，特別推薦青陽辣椒嗰款，雖然小食就比較不似預期，但下次有機會都會想嚟試吓其他炸雞。…Read More

係V Walk沿住扶手電梯上一樓期間聞到一陣陣好香嘅爆谷味好吸引人，記憶中戲院唔係呢個位置，原來電梯口新開左180 popcorn爆谷店🍿。好耐之前已經喺葵芳買過，性價比高。佢哋啱啱出左期間限定<夕張哈蜜瓜>口味嘅爆谷🍿見到綠色咁特別同埋未見過其他舖頭出呢隻味，忍唔住買嚟試吓。味道上哈蜜瓜味唔係好出，整體感覺好似糖味咁，不過唔會難食。質感同平時買朱古味同焦糖一樣咁正，外層有脆糖漿完全包住成粒爆谷，粒粒都平均唔會有啲係無味嘅。不過再食既話應該都係會揀朱古力味🍫🤭…Read More

同朋友喺佐敦見面，見到呢一間點心舖食評幾好就去試一試，我地1點半左右到，剛好食飯時間裏面已經滿咗，前面大約有兩組人，好好彩唔使排太耐，10分鐘左右就有位啦🤩.入面嘅環境比較迫，同隔籬枱好近。枱上面會有一啲透明膠嘅擋板等大家安心啲，但望到板上面有好多食物嘅汁跡，令我對佢地衛生清潔印象唔太好🫣。.金沙脆皮銀蘿腸 $28開頭睇到相會以為係炸兩黎，但原來係腸粉皮包住白蘿蔔絲春卷。黎到重係熱辣辣，裏面嘅春卷皮冇俾腸粉嘅蒸氣整到淋咗，依然脆卜卜，內涵好足料有滿滿嘅白蘿蔔餡，味道清甜。三重口感意外地夾，下次嚟都會再叫。原隻蝦燒賣(2粒) $15燒賣好大粒，上面有原隻飽滿嘅蝦🍤，賣相比平時嘅酒樓燒賣已經吸引得多。🦐蝦爽口唔霉，🐖豬肉唔會彈牙唔硬。最好既係有分兩粒同埋四粒選擇，兩個人嚟食剛剛好。燒汁釀虎皮椒 $24虎皮椒煎得啱啱好，有少少焦香味好食。不過唔太食得辣嘅朋友要留意，有機會抽中好辣既😂上海小籠包＄24 小籠包好扁外貌已經唔係好吸引😅 外皮質感唔會太厚，內陷肉味唔錯，但接近冇湯汁，唔推介。卡通流心芋蓉包 $22芋蓉包好cute, 外貌100分，芋蓉味好香，不過唔覺有流心效果🤔小失望。鮮蝦腐皮卷🦐 $28外層腐皮炸到好酥脆，入面蝦肉飽滿彈牙，正。懷舊鵪鶉蛋燒賣🥚$26好味道同口感正常不過不失，不過依一樣舊式嘅點心喺茶樓買少見少，嚟到不妨要一個試吓。—————————💬食物款式選擇比普遍嘅茶樓多，同埋幾欣賞佢有一啲懷舊款式之除又有新派嘅，容易迎合唔同人嘅口味，大部份嘅食物都唔錯。不過唔知係咪期間限定，嗰日Menu無糯米控我🧏🏻‍♀️期待已久嘅懷舊嘅糯米包，有啲失望。另外整潔度上都有好大嘅進步空間。.📍點心到 (佐敦)佐敦廟街286-298號華志大廈地下6-8號舖…Read More

之前朋友推薦過嘅蛋糕店最近開咗間🧸主題cafe，就心郁郁同咗幾個朋友一齊去試下。餐廳環境乾淨企理，裝修好夢幻，粉色調風格，有花園同鳥籠嘅設計，熊仔主題嘅牆身，加上唔同位置都放設一兩隻熊仔公仔🧸，每個角落都真係打卡able✨🫧🔸明太子忌廉大蜆意大利粉 $112大蜆好新鮮每一隻都脹卜卜啖啖肉，仲要數量多，三個人食都唔使爭，意粉汁方面明太子味香，而且加埋脆卜卜嘅蟹籽，更有口感。🔸美國肩胛牛小排配薯菜 $158🥩牛小排外層煎得啱啱好帶有少少香烤味，入面肉質柔軟又juicy，伴菜都唔錯，薯角脆口🥔翠玉瓜多汁🥒🔸椒鹽墨魚咀 $62鍾意食🦑嘅我就order左個椒鹽墨魚咀，肉質柔軟唔靭而且炸皮脆薄又香口。🔸白酒牛油煮蜆 $78一放低已經聞到好濃牛油香味，湯汁酒味唔重好易入口，雖然呢個用嘅係細蜆但隻隻都好飽滿，好抵食。🔸自家製巴斯克芝士蛋糕 $50芝士味香濃🧀，半熟口感棉滑，甜度都控制得幾好，好食。.🔸士多啤梨睡眠熊窩夫 $128黎到熊仔主題cafe點可以唔叫signature既睡眠熊窩夫，眼瞓既熊仔真係好可愛有啲唔捨得切開佢🥹食左一啖發現原來唔係朱古力mousse黎係忌廉芝士味，口感細滑，加埋啱啱出爐既熱窩夫撞出另一種口感✨🔸初戀 (士多啤梨、牛奶、熊仔冰) $68好多人好評嘅士多啤梨奶昔，本身以為大家都係因為有粉紅色嘅熊仔好靚而推薦，但原來真係好香濃唔會太甜，攢。.🔸千語星晨 (蝶豆花熊仔冰、橙汁、菠蘿) $68藍色嘅熊仔冰加埋紫色同橙色嘅分層真係好靚，外貌真係一百分，非常適合打卡 。酸酸甜甜嘅橙汁同菠蘿汁正好叫黎配合芝士味嘅甜品解膩。.🔸夢幻 (蜜桃、檸檬、藍桔、梳打) $62 一睇個顏色已經好清新好透心涼，加上少少酸甜味好適合夏天飲。💬: 總結食物唔錯之餘會感覺到店主選材上既心思，加上餐點造型同環境嘅設計，大家都影到好多靚相🧸，同行朋友都好滿足😊另外餐廳另一邊嘅座位係可以比大家同主子一齊坐嫁，好貼心。…Read More

因為朋友推介一直都想試依間鐵板燒，剛好同屋企人夾個時間就去試吓。入面環境乾淨，有幾間私人房，我哋今次四個人去剛好可以有一個獨立嘅六人房俾我哋，私隱度足夠。前菜、沙律前菜係飛魚籽沙律，口感脆卜卜同希靈魚相似，有驚喜。雜菜沙律新鮮爽脆加上酸酸甜甜嘅沙律汁好開胃。.剌身三款 (白魚，帶子，螢光魷魚)套餐嘅刺身係會根據當日師傅推薦而選定嘅，嗰日嘅白魚同帶子唔太有光澤味道比較平淡略嫌失色。反而螢光魷魚同平日食嘅魷魚印象唔同，好鮮甜，第一次食螢光魷魚嘅我好有驚喜。(不過網上了解過螢光魷魚嘅捕魚季節大約得三個月，我諗下次嚟未必食到🥹)南非鮑魚鮑魚黎到仲係新鮮嘅，廚師直接煎熟切薄片，口感有彈性但唔會靭，無咁有牙力既媽咪都食到好滋味。味道方面雖然無特別調味，保留左鮑魚原有嘅鮮甜味依然好食。.鐵板燒活龍蝦龍蝦新鮮肉質彈牙，加上廚師煎香調味後會再用蝦膏特製個醬汁烹煮一下，蝦膏醬汁香濃包住肥美嘅新鮮龍蝦肉，成菜式再加左好多分，忍唔住一口接一口。十分推薦。本日海鮮-咖哩汁配鐵板燒大蝦🍤大蝦都好正肉質拍得住龍蝦，伴碟有小青椒同多士，剛好為食左咁多海鮮中間增添其他味道同口感，但咖喱汁比較辣配蝦嘅時候有啲搶咗原生食材嘅味道，配多士就剛好。❗️如果唔食得辣嘅朋友都唔使怕，廚師係烹調前會問你食唔食得辣，可以改做唔辣嘅醬汁，好貼心。同行嘅長輩話唔辣嘅醬汁都好好食。季節野菜之後上嘅野菜帶有少量湯汁配合埋櫻花蝦，味道清清甜甜，剛好中和返之前食濃味食物嘅味道。.麵豉湯麵豉湯方面，用左龍蝦頭烹煮，但感覺上味道好淡比較普通，唔太食到龍蝦味。美國牛肉薄燒牛肉方面，我哋揀咗美國薄切牛肉，呢一款菜式廚師先煎香左牛肉片再包裹埋炸蒜片同蔥一件件咁放喺麵包上面，麵包有吸油嘅作用，等牛肉就唔會太肥膩。雖然平時我係唔鍾意食蔥既，但出奇地覺得依款菜式唔錯，可能因為牛肉味同蒜片嘅味道都好突出，完全唔覺有濃烈嘅蔥味，好似多咗啲蔬菜咁幫牛肉減輕左油膩感，加埋脆蒜片同埋軟林林嘅牛肉，幾樣嘢一齊食口感唔錯。炒飯炒飯味道好淡唔夠香，加上米方面感覺唔似用日本米唔夠單牙。因為之前聽朋友講大部份鐵板燒嘅炒飯都係精彩嘅結尾，但不似預期有啲美中不足。甜品/咖啡甜品方便每人都必定會有師傅即場整既阪神砂糖吐司，甜甜地脆卜卜好好食。另外會比客人揀雪糕泡芙或者咖啡，唔知係咪因為已經食咗好多嘢，所以最後比既雪糕泡芙比較細粒，味道唔算特別出面超時會買到，反而咖啡都幾香濃，建議大家揀咖啡作結。💰：價錢方面我哋叫嘅係午市商務套餐二人前，原價$1180兩個人，逢星期一至五，13:45後會有8折，另外+1，都好抵食。(❗️要提前book位).💬：環境舒適私隱度高，無論店員或廚師方面都好細心講解同埋有禮貌。食物方面各樣主食都新鮮同好有水準，啖啖肉絕對唔會肚餓，唯獨係炒飯同少部份魚生有改善嘅空間，今次嘅鐵板燒體驗都好滿足，有機會下次都會想再試下其他時令嘅本日海鮮，希望可以試到雪魚啦，聽朋友講唔錯。.📍: 觀塘駿業街43號地下…Read More

幾個姊妹都好鐘意食疏乎厘班戟，試過咁多間，Flipper’s真係食過回頭最多既店。嗰日係銅鑼食完飯想轉場食甜品，去到Hysan店先發現原來轉左新地址去利園。本身以為係商場入面，搵咗一輪先知原來係利園後面外圍嘅地舖。入面整體坐位少左，但都係幾光猛同埋闊落。.我地8點左右去到既時候剛好得番單邊位，店員見我地三位都禮貌問我地介唔介意坐旁邊會快啲有位比到我哋，不過因為我哋係同另外一個朋友慶祝會比較想坐埋一齊，見到我哋可能想等四人枱店員都即刻幫我哋睇吓其他客人用餐情況預計我哋大約需要等幾耐，呢個舉動幾貼心😊我地等左大約十分鐘都有位。.因為我哋都有啲飽，所以叫左一個士多啤梨藍莓香蕉班戟($129)share，佢地既班戟咁深得我地心係因為佢哋做到有空氣感得黎食落軟綿綿既口感，最重要蛋香味好足，真係加咗好多分，配合埋新鮮嘅水果同好濃奶香味嘅忌廉，無論口感同香味都配合得好好。💬總結食物方面，絕對keep到一貫嘅水準，真係會每隔一排就掛住個班戟，而且呢間新店嘅員工特別有禮貌，座位都闊落，唯一缺點係店舖地點上冇之前咁方便，不過我哋都會再黎幫襯，重會想試埋佢地既檸檬芝士脆糖班戟同熔岩朱古力斑戟🤭…Read More

同朋友係Time Square睇戲之前要食個快飯想要搵間快餐店，剛好朋友未食過Shake Shack就嗱嗱臨坐低開餐。兩個朋友一個揀左最Classic嘅牛肉漢堡 ShackBurger ($58)嚟試吓，另外一個鍾意食辣既朋友就極力推薦Hot Chicken ($59)，而我一直都想試大啡菇Shroom Burger ($67)，今次就trytry佢先。整體黎講，幾款麵包內層都好香同麵包邊有小小脆口，應該有加牛油烤過。ShackBurger方面牛肉味濃，加上肉邊都有煎香到，的確唔錯。HotChicken可以揀炸雞胸肉或者雞腿肉，我哋揀既雞腿肉肉質好嫩，外脆內軟好Juice，連同醃青瓜同辣粉呢幾種好強烈嘅味道加埋一齊好特別，出奇地有令人一口接一口魔力。Shroom Burger平時都好多人推薦，真係期待咗好耐，佢係一個素食嘅burger，主要嘅材料係爆芝士既炸大啡菇扒。咬第一啖啲芝士已經湧出來，配合埋好多汁嘅大啡菇味道剛好中和返唔會太鹹，口感一流。Bacon Cheese Fries $43波浪紋薯條愛好者嘅我覺得佢哋嘅薯條做得好好，雖然係快餐店，但係都冇粗製濫造，每一條都冇咋燶顏色金黃外脆內軟，而且薯仔味都好香，加上煙肉同芝士醬調味，成個配搭都非常香口。.Classic Shakes (Vanilla/Strawberry) $45兩個奶昔味道正常水準，唔會太死甜，口感都順滑，唔錯但唔算太大驚喜。以$45嚟講性價比唔算高。.💬 總結整體味道嚟講都係中上，唔錯，但以呢個較為貴價嘅快餐價錢黎講，會建議食相對有驚喜嘅HotChicken 同Shroom burger。如果有多幾個朋友一齊share，都推薦叫埋Bacon Cheese Fries，因為本身薯條份量都大，同埋芝士醬會有啲漏，一齊食就剛好。…Read More

Musea新開既時候都有睇到啲網上評論提及到有間牛油果主題專門店，大部份食物都加入牛油果，感覺上好有新鮮感，都bookmark左好耐。到最近剛好約咗個好鍾意食牛油果嘅朋友，終於有機會一齊去試下。餐廳入面裝修都幾精緻，好多打卡位，不過燈光上有少少昏暗。入到去職員帶咗我哋去到個二人枱，我哋睇到個枱面比較細，應該都放唔落兩三樣嘢，見係平日三四點冇乜人客，所以想睇吓可唔可以轉大小小嘅位置，可惜調唔到。咁我哋就開始點餐，因為都係下午茶時間，我哋就冇叫太多，叫咗一個主食一個小食同兩杯嘢飲。.三文魚牛油果牛角酥🥑 $138牛角酥方面有牛油香但質感偏淋，牛油果方面味道超淡完全唔夠香軟，煙三文魚正常發揮，但已經係全個包入面最有味道嘅食物，反而旁邊嘅沙律菜最有驚喜，新鮮得來全部都可以均勻沾到醬汁。烤焗卡真番薯條，配山葵蛋黄醬 🍠 $48 番薯條比較罕有，所以每次見到都會嗌。見佢係烤焗做法，諗住應該會係外脆內軟，點知一咬落去，成個都係軟腍腍，唯一嘅好處係個番薯係甜既😅煥然一新牛油果奶昔🥑 $80奶昔係由香蕉，綠茶，芒果，菠蘿，菠菜同牛油果打成，唔太飲到牛油果味香蕉同芒果味最突出，口感比較杰好飽肚。💬：總結呢幾樣食物都係不似預期，最失望嘅係牛油果主題餐廳嘅牛油果真係一啲香味都無⋯⋯自己係超級市場買嘅反而可能更好食😭，應該都唔會再去。…Read More

之前每次行過置地廣場都會被依間走美式風格裝修嘅甜品店吸引到，成個設計真係好適合打卡。可惜置地廣場店無座位，冇得同朋友舒舒服服咁坐喺度傾偈同食蛋糕，所以一直都無試到。咁啱今日喺K11 Musea行街既時候見到呢到有間新既分店，而且有好多座位忍唔住要試一試✨Carrot cake $100一直都未食過carrot cake，見到好多人都推薦呢款蛋糕好奇要試吓。原來實際上只係加入一啲啲切碎嘅紅蘿蔔粒，唔會食到好濃烈嘅紅蘿蔔味道，而係帶有淡淡嘅甜味，蛋糕口感比較鬆軟濕潤唔會乾，加上奶油芝士霜嘅鹹味平衡返，味道更有層次。Apple pie ($90+$20 ice cream) (大推🍎)蘋果批嘅造型完全係我最中意美式家庭風厚身嘅蘋果批咁，每一口都係一粒粒好有口感嘅蘋果，而唔係一片片嘅。店員會問你需晤需要幫你加熱食(🪄一定要加熱呀，會更香更吸引嫁)，蘋果餡大粒又密好足料，批邊鬆脆。我地重加左球雲呢拿雪糕係面，外冷內熱真係無得輸😍諗起都想再去食！💬：總結同樣係美式蛋糕店Butter比起Cheesecake factory無咁甜，適合想食美式蛋糕但又好怕太甜既朋友仔。雖然價錢上都真係唔平，但佢既蘋果批真係心得我心，食完好有滿足感🍎，而且佢既份量都可以兩個人一齊share，無咁肉赤，推薦👍🏻.📍 尖沙咀梳士巴利道18號Victoria Dockside K11 Musea 1樓LA106號舖…Read More

記得第一次食素年係喺深水埗店開左無一年既時候，一來因為素食可以做到咁精緻，二來味道唔錯，當時已經好多人講，所以好快就成為排隊熱店。嗰日咁啱同屋企人行過黃埔店唔使排隊，就帶佢地試下新派素食，改變一下兩老對素食既印象。.香茅白咖喱吉列豬扒定食 $128一講到白咖喱豬扒飯大家一定會聯想到沙嗲x，所以都好期待係咪可以做到同嗰個一樣嘅白咖喱汁咁無敵。試過醬汁之後發現真係好唔同，會比較似黃咖喱汁嘅唔辣版本，味道唔錯不過多一啲香料味應該層次會更好。齋吉列豬扒方面都做到幾脆口但味道唔算太有驚喜，而三碟醃菜都好食，整體配搭都唔差。印尼巴東味黃金豆腐拼盤配白飯 $118成個餐有好多種蔬菜做伴碟幾靚，但全部都好似無調味咁😅巴東醬汁同豆腐方面，豆腐有炸過口感唔錯，但巴東醬汁香料味道不足同平時食印尼菜個種有差異，味道較淡。聽屋企人講無論蔬菜木薯片同白飯都係比較無味道，要依靠醬汁去點綴，而相片中睇到嘅醬汁份量確實太少，所以成個餐食到唔夠一半無汁就會變得冇咩味道。黑松露蛋黃醬薯條 $68 因為嗰日無平時食開既番薯條所以試一試呢個。薯條方面口感好粉質，黑松露蛋黃醬味道好淡，食唔出黑松露味，唔推介。京都宇治玄米茶(熱) / 斯里蘭卡伯爵茶（凍）每份主食都會附送其中一款茶飲，而我哋當日兩款都有飲到，茶味足幾香。💬：環境方面都好乾淨，侍應有禮貌，但對食物整體味道方面確實有啲失望。另一方面薯條好遲出，同其他食物同一時間落單但直至我哋各人都食完自己嗰套餐都未出，我諗最少都有半個鐘，大家都已經飽左大半，而最後味道口感都不似預期，所以失望咗。.📍 紅磡黃埔天地百寶坊(第3期)地下G27號舖…Read More

天氣凍凍地剛好朋友話食過麻辣風雲唔錯，加上之前都聽過其他朋友講過正，想試好耐，就起行去試下😆·銅鑼灣分店入坐位置唔算多，外場整體環境都乾淨。但係廁所有少少跣🤔希望會留意一下。·炸饅頭 $58 (大推❣️)站時係我喺食過數一數二既炸饅頭，明正言順既外脆內軟，而且咬落去唔會有油膩感，加上menu上其他菜式九成都係辣嘅，剛好可以緩衝口入面既辣味。麻辣雞腎 $58雞腎口感爽口，每一舊都會佔有辣椒碎同少許辣椒籽，辣味比起其他菜式都出(我食十小辣既朋友立即棄權😂🏳️)酸菜魚$268 酸菜魚我地叫左少辣，食開五少辣既朋友絕對可以食到。三人食嘅話魚既份量好足夠，魚肉滑無腥味，同埋對我黎講最重要無骨(唔識挑骨朋友嘅福音😂)。同埋入面會有埋寬薯粉同萵筍片，寬薯粉煙韌彈牙，萵筍片好入味。不過個人覺得整體如果麻香味再多啲會更加吸引。老干媽炒年糕 $98年糕有厚度，口感柔軟，會有椰菜肉絲同辣椒粒做配料，辣味夠，不過略嫌少少油膩。手撕包菜 $98包菜炒得好爽口唔會老，雖然有一隻隻辣椒係到，不過因為無切開嘅唔會好辣，小小辣都幾惹味。黑糖脆炸糍粑 $58外面炸到非常脆入面軟糯，配埋黑糖醬同黃豆粉好香口，作為最後既甜品剛好中和辣味。💬: 整體嘅嘢食都唔錯，款式多，連我食十少辣嘅朋友都可以有唔少選擇(特別酸菜魚🐟同炸饅頭都係必食既item👍🏻)。服務方面都抵讚👍🏻，嗰日就算我哋剛好撞正就嚟落場時間，侍應都好有禮貌，同埋出菜時間都快手。🤫聽同行朋友講旺角店嘅裝修比較靚同闊落，下次要我都要去試下先。·📍銅鑼灣駱克道491-499號京都廣場5樓…Read More