玉蝴蝶's Profile

一對戀人係浪漫的環境下享用過午餐後, 沿海傍慢慢漫漫過去海豚廣場, 回程返去酒店嘆酒店送的下午茶點.兩個被安排坐係寛敞的沙發椅上, 好自在好舒服, 而環境亦好清靜, 沒有好嘈雜的聲音. 最啱戀人蜜蜜細語及傾公事好快侍應就遞上精緻的甜點及二杯咖啡, 一排七件的甜點整體望落去好養眼, 但食落口味道無咩特別. 但相信對於我們黎講食物味道巳經係其次, 最重要的係望住眼前的情人, 雙方眼底那濃得化不開的愛意, 我覺得係咁既環境下與另一半慢慢享受, 的確係人生一大樂事.多謝你, 令我度過左一個甜蜜難忘的紀念日.…Read More

因為慶祝拍拖十個月而係黃金海岸度過左個浪漫之夜, 第二日還沉浸於甜蜜之中, 所以同男友沿住海傍一路行一路諗緊係邊度食之際, 見到呢間法國飯店室外環境幾好, 一於試試呢間餐廳, 繼續浪漫兩個人選擇左坐室外,可以有少少海風吹住, 又可以望下前面小道的街邊小檔, 兩個人選左二個午餐, 一個要豬柳, 一個要意粉.我的前菜要了芝麻三文魚, 而男友要了法式田螺, 我的三文魚擺設得幾靚, 而加上芝麻的配搭我都係第一次食, 竟然又幾夾喎, 而我最欣賞的是呢個汁小小酸酸甜甜咁, 好開胃, 作為前菜的確唔錯. 而男友的田螺中間有些黃椒, 加上特製的汁令我食到舔舔脷.我的主菜忌廉煙三文魚意粉, 味道唔錯, 令到我對今餐印象大增. 點知男友的豬柳一上枱, 就發覺豬柳點解成塊好厚的豬扒? 係一塊好硬又無味的雪藏豬扒, 好難食, 最後我分左一些意粉俾男友分甘同味.食飽坐係咁既環境慢慢嘆杯咖啡的確唔錯, 令到我地呢個慶祝活動加添多一點甜蜜回憶.…Read More

同男友為左慶祝我們拍拖十個月, 選左係黃金海岸度過一個浪漫之夜, 而晚餐我地見酒店有個卡寫住樓下新開的沙嗲軒住客有八折而且有野飲送, 一於試試啦.大堂入口右手邊就係沙嗲軒, 門口望入去好光猛好寬敞, 始終係新開又係酒店入面, 感覺好企理乾凈, 門口的沙發位好吸引呀, 可惜巳經被人坐晒, 唯有跟侍應走去最入的枱坐, 我地先後點左個肉骨茶(因上次去台灣男友無試到十全大補排骨湯而一直唸到現在), 就當對佢的少少補償吧, 另外叫左個炒通菜, 一個喇沙, 當然唔少得半打沙嗲串燒, 再加一客千層鬆餅.睇得出的侍應都好新, 好多野問佢, 佢都唔清楚要走去問個經理先覆我. 而我地同隔離枱客差唔多時間點完餐, 但好耐都無野食, 兩餐人坐係度都幾無聊, 因為等的時間實在太耐, 俾小小野我食左等都好d丫~等左好耐終於都陸續有野上枱啦, 喇沙令我好失望, 雖然食得出佢既湯底係用蝦頭煲出來既, 但味道實在太淡, 係我食得太濃味嗎? 半打沙嗲串燒通常係呢d店舖好少失手, 而佢點沙嗲的醬汁亦好香花生味好香, 炒通菜無咩特別, 不過五十幾元一碟會否貴左少少?肉骨茶藥味不太重, 因之前睇食評話有人食唔慣陣味而覺得唔好味都曾擔心自己接唔接受得到, 點知飲落又覺得無咩野, 祇係中間的幾條排骨似湯渣, 的肉好鞋, 由於未試過正宗的肉骨茶, 所以俾唔到意見, 祇可以講我地兩個都飲得到.而接近三十元的千層簿餅原來祇有兩塊仔, 雖然真係好鬆軟, 但係食完無咩感覺, 好似一陣風咁就落左肚.埋單八折後都差唔多三百元, 但無一樣食物令到我有返轉頭的念頭…Read More

2010年新的一年第一日第一餐, 可以同男友及我地既可可, 樂樂一齊, 好幸福 而我地就選左好耐無食的Pizza Hut, 一於試下現推廣的星芝批, 睇廣告個樣好似幾吸引.一去到門口, 有個帶位的侍應巳同我地講今天祇供應套餐, 我地當然無問題啦, 果陣係中午一點左右, 成間Pizza hut望落好大好舒服, 而我地就坐左係靠窗的卡位座, 二個人坐好闊落, 因為早餐無食野, 所以即時點左個二人星芝批餐, 有二個龍蝦湯, 一個大既帆立貝批, 一個意粉加二杯野飲.等左一陣, 龍蝦湯就登場, 中間還食到幾舊龍蝦肉, 而湯的味道亦好濃郁, 我覺得好好味.跟住出場的是我最愛的忌廉意粉, 呢道的味道亦唔錯, 但食完個意粉巳有少少飽, 等到大大個星芝批上場時就後悔頭先太落力食意粉, 而個星芝批每隻手指頭中間是腸仔, 令到個味道無咁單調, 而且無芝士咁漏, 中間的沙律令到成個味道提升唔少, 我覺得呢個星芝批幾好味, 但無論我地幾努力, 最後都祇係食左一半, 另外一半要打包走.反而跟餐的甜品: 木糠布甸令人好失望, 木糠一d都唔幼細, 而且的cream一d都唔滑唔夠凍.新年的第一日第一餐可以一家人一齊, 食咩都咁開心咁滿足啦, 係咪呀?…Read More

同男友一直係佐敦街頭搵理想的晚餐食堂, 後來經過對面街見到翠華招牌, 想起成日經過見到佢的招牌"奶油脆豬包仔", 於是暫時抛低對茶餐廳的偏見(因我出街唔去茶餐廳食野).好彩有卡位, 但佢的位擺得幾逼. 好似週圍都被人包圍住咁. 我一坐低巳被佢的"鐵板京川蝦兩面黃麵"廣告吸引左, 再加多個我一直想試的咖喱豬扒飯, 幫我寫餐的女侍應向我推介新出的野飲"粟米汁", 我本身好鍾意粟米的香味, 試下都無妨. 等左一陣, 咖喱豬扒就上枱了, 我將咖喱汁撈左小小飯試下, 好好味~~不愧佢寫上馳名咖喱, 夠咖喱香而且有少少辣味, 我好鍾意食, 而男友而認同我的講法, 認為呢個咖喱飯有水準, 當我們正向咖喱進攻時, 鐵板京川蝦兩面黃麵巳"吱吱吱"登場, 鐵板上令到成個麵等一陣食都保持熱辣辣, 麵炸得好脆好乾身, 麵上面有幾粒大大的蝦仁, 再加上特製的京川醬, 果然無擇錯反而杯粟米汁麻麻地, 有粟米味但味道味味地, 試一次就算. 男友就叫左杯汽水.夠晒穩陣.埋單一百四十幾元, 茶餐廳黎講算幾貴, 不過祇要味道好, 貴小小我都覺得抵. 下次有機會再來試, 愛上了咖喱豬扒飯.…Read More

今天同男友路經此地, 俾我見到呢間有芋冰呢樣甜品, 因為上次去台灣無機會試而一路心覺遺撼, 所以今次見到香港有點都要試下.14元一盒的九份芋圓冰, 有花生, 紅豆及腰豆任選一樣, 我選了紅豆, 後來廚房話我知無晒碎冰祇有大粒冰問我要唔要, 無都無辦法, 唯有要大粒冰囉, 我拿左呢盒野係街行左一陣返去準備慢慢品嚐, 點知一打開個盒, 我"o"晒嘴, 見到的冰溶到七七八八, 我見到的是一盒冰水面浮住幾粒沒溶的冰, 用匙係入面撈到二粒芋圓加小小紅豆放入口, 好甜味道怪怪地, 好失望~~成盒野我食左二匙就放棄, 男友見到盒野再聽到我的評語而試都唔試就成盒野倒晒去廁所.唉, 祇因為係台灣無試到正宗的芋圓冰而唔知正宗味道係點, 所以我都唔知呢盒野有咩唔妥, 但就一定唔係我杯茶~~…Read More

無意中發現呢間小店, 入面有我鍾意食的意大利飯及意粉, 價錢竟然祇是3x-4x之間, 抱住不防一試的心態同男友試了一個南瓜汁燒雞意大利飯餐, 另外一個忌廉汁闊麵, 有幾種唔同的餐選擇, 有主菜加餐飲, 另外有主菜加餐飲加小食再加甜品, 我們要了一個ab餐及一個abcd餐, 兩個餐飲都要芒果汁飲品, 一個南瓜湯, 甜品要了蛋糕, 另外加錢要了一個蒜茸包.呢間店似快餐形式, 客人可以入坐後慢慢選好食物跟住去收銀處俾錢落單, 會有個號碼牌俾你返位等, 侍應會跟據號碼牌把食物送到枱.南瓜汁好快就熱辣辣上枱, 但味道怪怪地, 唔同於自己煲的, 但怪係邊我又講唔出, 但又不至於差, 蒜茸包夠熱夠香, 加幾元抵食, 至於主菜, 不論賣相及味道, 意大利飯明顯比麵類出色, 南瓜汁燒雞意大利飯好好味, 入面還加上我鍾意的粟米粒, 感覺較清新及健康, 但個闊麵唔夠入味, 麵質好粉好厚, 好似係倒的汁落的煮滾的麵上, 完全係汁歸汁麵歸麵.結論: 一百元左右可以食到以上咁多食物, 我好滿意, 有機會一定會再來, 但相信我祇會order飯類.…Read More

工廠區午餐食來食去都係果幾間快餐, 有時真係覺得好厭悶, 又到中午食飯時間, 想來想去都想不到自己到底想食咩~ 有事外出的男友於電話中安撫我話由佢話事係外面買返午餐返來.我點都估唔到買返黎的竟然係西餐~ 因為呢個工廠區附近要搵間西餐廳都幾難, 我驚喜的發現有我最鍾意的南瓜汁, 今天的愛心午餐是南瓜汁雞扒焗紅米飯, 男友話佢經過無意間見到有我鍾意的食物, 所以買來俾我試試, 有個咁體貼細心的男友, 未食巳感心甜甜甜的南瓜汁配上煎過的雞扒出奇的配合, 再加上健康的紅米飯又沒有煮到太硬, 我同男友都好滿意, 後來見到or食評講此店的咖啡很出色, 下次我都要試下.就係為左杯咖啡, 今天我放假, 但特登外出找到呢間小店, 估唔到地點竟然係咁偏僻, 如果唔識真係唔識去, 但去到見到入面竟然滿坐店舖好細, 祇可以密密麻麻的坐十張2人枱到, 好彩我今天買外賣, 因為今天做外賣妹買愛心午餐俾返工的男友食, 午餐38-42元, 加3元要了杯焦糖咖啡, 因為是星期六, 所以還有杯細細既沙律. 此店證明了祇要用心去做, 好食既話地點唔係問題, 一定有有心人搵上門食, 希望繼續努力, 我會用行動去支持, 一於多d幫襯~…Read More

係荃灣等緊他的到來, 無意間見到呢間店舖, 呢排各式各樣的標鎊賣正宗台灣珍珠奶茶的店開到周街都係, 最初我地見到新店都會買黎試下, 但後來巳無了最初那種去試的衝動.企係度等待的期間, 見到店舖前都陸續有人幫襯, 反而隔離那間人影都無隻, 心想反正佢都沒來到, 不如買杯野等陣一齊飲, 我選了大杯的黑糖炭燒咖啡, 拿到手才記起唔記得要求少糖少冰, 我們隔了一段时間才飲, 的冰巳融晒, 我驚喜的發現味道沒有沖淡到, 飲落口有好濃的炭燒咖啡味, 好味呀~~ 而佢都讚同的表示下次可以再買唔好的是店舖太細, 入面連埋收銀都係得兩個人, 所以就算得幾個人買都要等一陣…Read More

冬天的星期六天氣因為有太陽不至於太凍, 所以令到個人懶洋洋咁, 食了一個星期快餐店的飯餐, 好在有個廿四孝靚仔外賣男友, 所以星期六的午餐可以隨意Order自己想食的.今次同男友order了最想飲的咖啡點子以及想食開胃小小既食物, 男友曾提及返工時路經此路見到有間米線店, 所以今日特登買黎俾我試下, 男友係店門口見到原來此店巳開業一段時間, 可以生存咁耐, 想來味道都不錯吧~今次捨棄米線要了薯粉, 餸料要了腩肉及木耳, 辣度要了中辣, 一打開外賣盒, 即時聞到香味, 精神為之一振, 食欲隨即提升, 試了一口薯粉, 好滑好彈牙又唔會太硬, 係我食過最理想的薯粉, 湯底的味道好正, 一入口時麻麻地, 跟住的辣味出來, 聞落去好香, 湯底又唔會太油, 至於餸菜的腩肉好入味, 木耳好爽, 好味到我一開始食就停唔到口, 竟然唔記得致電男友匯報番報道如何好味既野梗係希望佢一路生存落去啦, 所以我決定以行動來支持, 下星期就由我來做外賣妹, 等親親男友嚐一嚐.…Read More

今個星期六我們又再踏足梅窩, 因為諗住食完飯可以行沙灘, 所以今晚決定試下呢間德仔記.侍應熱情的招呼我們坐下坐路邊的四人座位, 經兩人一番研究後, 決定叫個二人餐, 而我因為太耐無食過乳鴿, 見到推介一欄有"生炸乳鴿皇", 所以決定再加多隻乳鴿.兩個人坐係開揚的飯店內, 吹住晚風望住下面馬路上踩單車的路人, 感覺到吸入的空氣都特別清新, 等了一陣椒盐溂尿蝦同豉椒炒蜆就陸續上枱, 兩碟餸堆頭都幾大, 唔想的餸吹凍左唔好食, 兩人即刻開動, 椒盐溂尿蝦雖然細細隻, 但都可以收貨, 豉椒炒蜆好入味, 而且蜆夠大隻又無沙, 果然係招牌餸, 後來的一大窩粟米雞粒湯兩個人好努力之下還是剩下小小. 二人餐其中的一個菜遠炒鮮魷由於我對鮮魷興趣不大, 所以改左西檸雞, 一大碟的西檸雞做得唔錯, 一碟都係雞肉好少骨而且唔夠粉, 食落口聞到好香的青檸味,反而我寄望好大的乳鴿並沒有帶來驚喜, 55元一隻不太花算, 其實個二人餐巳好夠兩個人食.最後結論: 抵食而且味道唔錯, 有機會都會再來光顧.…Read More

近期好似特別鍾意食意菜, 上or見到此店的意粉評語都唔錯, 所以今晚就選了此店為我們的晚餐地點.大約七點來到, 客人並不多, 侍應好殷勤的招呼入座. 並好快遷上兩杯暖水, 因睇到有食家提到意粉份量太少, 所以我們要了兩個mix套餐, 一個有碟迷你意粉加一個迷你薄餅, 另外一個有碟迷你意粉加個咖喱飯, 每個餐都有沙律及餐湯, 其中一個汤加十元轉了粟米湯.最先到的沙律如其它食家所言, 不如不送,張兩人枱本來巳好細, 擺係度阻位, 當天的餐湯麻麻地, 反而後上的粟米湯令我驚喜不巳, 好濃好香的栗米味, 飲得出唔係罐頭湯. 主菜陸續上枱, 令到張枱都擺唔晒, 以為的mini版而來一d都唔mini, 以我女仔食量一個意粉巳好飽, 所以當我見到第一碟意粉時, 巳心感不妙唉, 又俾個機會男友訓話, 話我太信其它食家所言, 但我為自己辦護:可能間餐廳見到其它食家投訴所以加大左份量蛋黃奶油忌廉煙肉意粉味道唔錯, 意粉軟硬適中, 再來的墨魚汁意粉要了辣味竟然比前者更好味, 我一試即刻叫男友嘗試, 好味既野第一時間希望他都可以一齊分享最後兩人都食到變左黑色的嘴咖喱飯是正常的日式咖喱, 味道還不錯但沒布驚喜, 但個mini pizza卻可以一試, 味道清新.另加的日式薄餅味道一般, 可以不試.最後, 本來剛話要減肥的兩人食到好飽 我同自己講: 下次來叫一個餐再加小食…Read More

幾次經過此食店都沒有去試過, 今天就俾次機會你啦~店舖好細, 幾張木枱木櫈擺得幾緊逼, 如果唔係講過幾次想試都沒試, 此店的格局實在吸引唔到我入來, 第一, 坐得唔舒服, 幾間快餐店絕對舒適過佢.同男友二人點了一個咖喱豬扒飯跟一杯台式飲品, 飲品要了一杯朱古力雪香, 一個晚餐焗香草忌廉煙三文魚意粉(跟餐湯及蒜蓉包,綠茶轉台式飲品加3元要了一杯荔枝玉茶, ), 加1蚊換左碟鹽酥雞, 一碟上湯蒜味娃娃菜.首先出場的是咖喱豬扒飯, 飯, 炸豬扒及咖喱汁分開上, 第一時間倒少少咖喱汁落飯到試一啖, 首先, 咖喱汁好稀, 顏色怪怪地, 食落口味道好淡, 完全無咖喱味, 好彩還食到少少辣味, 如果唔係都唔知呢碟係咩汁, 食左二啖就推左俾男友食, 男友話D飯好爛唔好食, 對咖喱的評價同我一樣, 佢又係食左兩啖就停左手.跟住黎的鹽酥雞剛剛炸起, 好熱好鬆脆, 反而呢碟加1蚊換的食物變左成餐唯一可以合格的.餐湯是忌廉湯, 完全是罐頭貨, 因為中間還有幾舊沒煮溶兩杯飲品味道都完全唔掂, 朱古力雪香無朱古力味, 還越飲越淡, 荔枝玉茶還離譜, 男友話都唔知係咪連椰果的糖水一齊沖的, 話晒台式餐廳, 兩杯野飲都可以唔合格, 真係失敗最後來的意粉更加不知所謂, 面頭那堆忌廉汁完全係罐頭貨, 好難食呢餐飯真係貼錢買難受, 一致認為呢間食店再也不想再來.…Read More

從不賭馬的我竟然入左馬場? 你沒聽錯, 而且, 一向唔鍾意賭馬的我竟然有個賭馬的男朋友, 意外吧? 因為他的關係, 我有日經過馬會見到馬場開鑼日的海報, 突然間心血來潮要佢帶我去見識一下, 當時的佢都愕左一然, 最後, 佢為左令我可以舒舒服服的看跑馬, 上網搵資料訂了呢個會駿廳的自助餐, 佢話要讓我在舒舒服服的環境下, 一路食野一路觀看, 因為傻貓咪最喜歡食了當天, 因為服裝方面限制, 佢逼不得巳放棄佢平日穿開的T-shirt及牛仔褲, 而佢的一身裝束亦令我多次忍俊不住發笑. 當我們去到會駿廳時, 入面巳坐滿人, 有些甚至巳食飽係度睇緊馬經, 我急不及待出去睇下有咩野食, 我祇可以說這是我食過咁多次自助餐最少野食的一次, 我行了一轉隻碟上祇有一件勉為其難夾的蒸魚, 唔見刺身壽司, 熟食祇有幾樣極平凡的炒飯麵, 菜, 牛(我唔食牛), 蒸魚及一兩樣炸的食物, 長腳蟹及煙三文魚被人鑼剩兩三條, 見到都唔想鑼, 反而煮麵的攤前排左幾個人, 甜品祇有幾樣平凡到極點的蛋糕, 真的令我好失望, 四百幾元就食呢d? 佢見到我隻碟巳心知不妙, 即刻出去再幫我, 最後鑼左一碟甜品返黎, 佢好抱歉的對住我說: 估唔到真係咁少野食, 你會唔會唔開心? 其實當我出去行左個圈睇晒所有野食時心情的確不太好, 但見到佢咁緊張的樣, 我反而沒有再計較食物多少與質素了, 好與醜都係咁食, 咪食少d囉, 其實都無咩大不了者, 所以當佢問我時, 我真的巳沒有不開心了, 最後佢多次出入幫我張羅食物, 自己反而無咩點食, 所以後來, 我索性去煮麵檔前排隧鑼左碗麵俾佢, 我覺得反而呢樣係全場最好味的食物, 當快開跑時, 我們會一齊走出廳係外面的觀眾席觀賽, 等比實完畢才再返黎去繼續食, 我唔知佢都選左咩馬, 所以每次都會先問佢買左邊隻, 然後緊張的睇住跑道留意住佢選的馬匹是否跑出, 佢還笑我比佢更緊張最後我們由一點一路坐到五點鐘, 雖然食物不太滿意, 但我巳覺好開心, 始終咁樣的形式相處都不是太多機會, 而好難得佢全程都一路照顧我所需, 祇是偶爾行出去買馬.希望再有機會陪你入馬場, 但下次不用再安排廳房了.…Read More

同男友幾次經過呢間麻辣米線店, 次次經過都聞到一陣好香的麻辣味, 但柰何次次都沒有機會入內嘗試, 次次都話下次一定來試食.今日一早知會來呢頭, 而且大家都不是太肚餓. 所以決定試試呢間米線店, 店仔細細, 密密麻麻擺滿枱櫈, 我地入去坐低, 我要了中辣的豬軟骨麻辣米線, 男友因為朝早胃不太舒服, 所以要了4級小辣的雲吞米線, 另外要了麻辣雞翼, 一碟生菜, 男友的米線先到, 試了一啖湯, 原來小辣的4級都幾麻辣, 擔心佢個胃頂唔頂得順呢, 我的中辣食落口第一啖都唔係太辣, 一路食的麻辣勁才慢慢滲出來, 豬軟骨好入味, 而且湯底本身巳有芽菜及腐竹, 雲吞係傳統上海厚皮雲吞, 兩個人食到流晒汗, 尤其係男友, 我一路同佢擦汗, 但的汗不停的流, 麻辣雞翼好入味, 可能我地既米線太麻辣, 所以相對雞翼祇食到少少麻香, 6元一碟的生菜無可挑剔.有時食野唔一定要去高級餐廳, 好似呢餐我就好滿意, 最欣賞個湯底夠香夠麻辣, 而且湯面沒有那陣令一見就生畏的紅油. 相信還有下次…Read More