Chiricela's Profile

今日喺九龍灣同朋友有啲嘢傾、於是去咗德寶商場，見依間冰室入邊唔太多人就入咗去坐低、由於之前食咗lunch仍然好飽，所以只係叫咗奶油豬同埋凍檸茶、凍奶茶。個奶油豬做得好香口、脆身、有用心烤返熱嘅、牛油同煉奶都比得足、果然係招牌，至於杯凍奶茶同凍檸茶就唔夠茶味、要做返濃啲。印象中依間冰室係麥包開㗎、雜誌都介紹過，裝修都幾特別、玩懷舊屋村feel。見佢個餐牌都有好多唔同款式嘅飯餸、中西式都有，下次黎就試吓佢其他菜式啦！…Read More

🕒今曰好忙搞到成三點幾先食lunch, 好肚餓嘅情況下、求其有位坐得舒服就即入， 呢個時間就一定係食Tea Set, menu裏面其實最吸引我嘅係牛油果沙冰、因為好少餐廳有做丶加＄都要試試！Tea Set有包前菜丶主菜丶同嘢飲，前菜叫咗豬頸肉沙律同春卷，主菜就生牛肉粉、香茅豬扒飯、嘢飲就牛油果沙冰, 青檸梳打。春卷冇乜特別不過就勝在啱啱炸起熱辣辣、至於個豬頸肉沙律🥗就麻麻、肉冇燒過、沙律冇乜味, 啲青瓜🥒切得太大舊, 雖然個份量算多，不過唔好食比多都冇用、寧願用心做好啲、比少啲好過 個生牛肉粉🐮🍜唔錯喎、牛肉有味丶河粉都滑丶湯底都夠濃、配料亦算多、我自己就覺得食得過（比之前好食、佢哋應該有用心改良過)。 香茅豬扒飯🐖🍛都ok， 醃得都夠香茅味、加埋啲蔥油、醃蘿白、成碟飯清晒。至於杯牛油果沙冰🥑🍹、其實係奶昔多啲、做得比較厚身、飲得出冇加糖夠天然、帶有少少牛油果嘅清香味，味道特別、不過相信唔係人人鍾意，加$10試吓新嘢有無妨…Read More

今日朋友生日🎂所以專登book咗依間西餐食晚飯慶祝一下，去到都好快有位亦都可以安排到圓梳化位 （經OpenRice book 有88折）坐低之後睇吓個Menu一心想試12小時慢煮小牛排$388、好可惜佢哋話冇晒、其實想服務好啲佢哋比menu客人時順便可以交帶一聲有乜食物已經賣曬，唔使客人揀完一大餐之後先話冇。 冇小牛排唯有叫第二隻啦、咁就叫左貴兩倍幾嘅短骨斧頭扒$888🥩（話就話2-4人份量），塊扒足足等左一個鐘先黎、不過我哋冇介意因為期間都有叫其他野食，老實講塊扒嚟到係有失望、一啲都唔似32安士、根本冇可能2-4人份量、不過冇得講嘅佢可能意思指2-4位好細好細食嘅女仔囉！分量少唔緊要如果好食可以搭救嘅、但都係好可惜佢塊扒燒得完全過熟（叫既係七成）、依加變左九+成熟、大家知九成熟會有幾好食㗎啦三個字乾+鞋、其實塊扒係靚嘅食得出好有牛肉味、但可惜廚房燒得過曬火。配菜既香草合桃炒薯同埋牛油燒野菌做得唔錯、不過我著重塊$888既扒多啲囉、佢哋真係要落啲功夫改善下、唔係真係趕客😏。其實一坐低叫完嘢食、隔冇耐佢哋係有上一份麵包🥖比人客食住先、OK啦普通麵包冇乜特別！另外期間係有食瑞士傳統熱熔流心芝士🧀， 會係你面前撥啲熱熔芝士係啲薯仔、蘆筍、salami 面上, 份量唔大多、芝士亦都係微暖、味道冇特別、不過係得意嘅、因為係你面前撥啲流心芝士落嚟吖嘛, 成為＄178。 🍝意粉叫咗黑松露野菌手工闊條麵伴溫泉蛋$168，依個意粉個汁做得幾好、起碼有比足夠既黑松露醬、但個意粉嘅質地始終都係鞋口、如果能夠改用啲好啲嘅麵粉去做一定會更好。飲品就叫咗荔枝味嘅嘢飲$48經理介紹嘅、味道唔錯呀就好似荔枝汁溝左啲七起咁囉、有乾檸檬片同埋thyme做裝飾🍹、不過足足等左半個鐘以上囉。依間餐廳其實環境唔錯嘅、又係旺角地鉄站上超方便、三五知己吹水丶飲吓嘢丶食吓野係好好嘅, 如果冬天坐露天應該更好feel、不過價錢同食物水準唔成正比, 烹調技術亦需要改善、可能廚房太忙唔夠人手？希望下次再去會有好嘅驚喜啦！…Read More

松露芝士醬脆雞餐🐔，$41.5有杯汽水有個蘑菇飯🍄🍚有兩件雞仲有葡撻添，都好抵食！好難得食到家鄉雞新鮮炸出嚟既雞，真係可遇不可求，熱辣辣好好味，其實件脆雞同香辣脆雞差唔多、不過就加咗D乾香草碎係面，個松露芝士醬就係另外比一包既，我自己就唔鍾意包松露芝士醬丶松露味係有嘅不過啲芝士味好怪囉、細心睇吓包醬原來係中國製造🤭。蘑菇飯🍄🍚都係咁上下啦冇乜特別多汁就好食㗎啦! 葡撻唔係話熱辣辣但係都係好味嘅!想試吓依啲期間限定就快啲試吓啦、可能好快冇㗎啦…Read More

之前睇廣告介紹佢哋個酥皮湯🍲配牛朳鐵板餐🥩，個廣告就好吸引啦，所以決定去試下，去到坐滿晒丶排曬長龍😏、真係估都估唔到。叫咗帆立貝雜扒餐🐖🐓&西冷牛扒餐🥩，嘢飲就加＄叫咗楊枝甘露同埋蘋果特飲🍹，其實我食呢個餐最主要係想試個酥皮湯，個酥皮焗得幾靚，可惜個周打魚湯太太太杰啦、好似飲漿糊咁😖、又冇乜味😔。扒就冇乜寄望、因為依類型嘅牛扒大多都係用鬆肉粉那過、其他雜扒塊豬扒同雞扒都係咁上下冇乜特別，至於個帆立貝面上既卡邦尼汁就做得麻麻唔太好味囉，加錢飲果兩杯嘢飲都係麻麻，可飲可唔飲啦。其實依個大家樂酥皮湯鐵板餐、都係超值嘅＄70幾$80蚊、又有酥皮湯、又有鐵板餐算係咁㗎啦，都食得過嘅…Read More

Simplylife 長期排滿隊，所以都好耐冇食啦，咁啱今日11點幾去到九龍灣見餐廳唔使等位就決定食依間，環境裝修都同其他分店差唔多都舒服午餐餐牌有好多嘢食，印象當中好似冇乜點轉過餐牌有成10幾款俾你揀，都不外乎有all day breakfast，沙律、飯丶意粉同埋漢堡包，個餐係跟一杯野飲，你亦可以再選擇跟埋沙律或湯。今次我就試佢哋嘅burger，一個就跟湯一個就跟沙律，餐飲就跟西柚果茶🍹。首先講個2份前菜，🥗個沙律係好新鮮，細細份唔會嘥幾好啊，另外個湯係甘荀忌廉湯都做得唔錯，係淡左少少不過自己加返鹽就OK，兩份都會跟一件細細嘅麵包、新鮮軟熟。🍔車打芝士煙肉牛肉漢堡， 個包幾好、薯條就一流好惹味、厚厚嘅免治牛肉丶脆脆嘅煙肉🥓、睇個樣好似好掂，不過食落就好鞋口好乾😔， 塊免治牛做得唔好，佢哋真係要改善下，如果專登嚟食依個漢堡係一定會失望😞🐟🍔至於魚枊他他汁漢堡、可能有得比較啦，覺得依個包好好多、起碼唔會乾亦唔會鞋穩陣好多，咁炸雪藏魚柳當然唔可以話有乜嘢鮮魚味食到架啦，炸得脆口小油已經合格。如果下次黎食就唔會揀漢堡包類別啦😏，食返意粉嗰啲應該穩陣好多！…Read More

星期六去開旺角一個人唔知食乜，最終走咗去食一風堂由於星期六嘅關係估唔到要排咁耐20分鐘先到我，其實望入去，見到有好多單丁位，一個人去食丶點解無論幾多人枱都要輪住Number叫，咁樣只會浪費晒啲單丁空位、點解唔可以彈性啲呢、咁樣佢又可以快啲安排人客食丶又可以做多啲生意、真係唔明白！講返碗麵🍜，之前食過佢既赤丸新味丶黑、兩個都唔錯，今次黎開旺角分店就食佢嘅分店限定魚介醤油䐁骨， 個湯一樣濃郁、配埋個鹹味嘅柚子醬（我食唔出係柚子味），不過加埋落碗麵到又幾夾、令到碗面鹹鹹地又冇咁膩，裏面如常有紫菜、半隻蛋🥚丶兩塊肉🍖，面質偏硬、係我唔記得咗叫軟麵😐、不過佢又冇提我要乜野麵質🤔，最鍾意佢哋枱面有小瓶芽菜俾你自由配食。拉麵黎講依間算係咁㗎啦，價錢算合理又多選擇。…Read More

午餐去食咗依間要上樓既餐廳，環境係好嘅，坐得舒服又唔太多人，俾貴啲啲食個舒服午餐係值得，餐廳晏晝都有收加一，唔收會好啲囉。叫左牛筋腩河$58🍜，咖喱牛坑腩飯（限量）$78🍛， 呢個價錢係跟咗杯餐飲既！先講個牛筋腩河🍜、啲牛腩真係好淋好味丶冇痴牙㗎👍，但個河粉湯底略為淡，濃番D會更好。至於個咖喱牛坑腩飯🍛丶咖喱做得幾香濃惹味，牛腩一樣炆得淋、薯仔都做得唔錯、唔會話淋哂溶哂丶不過最衰佢比我嗰份咖喱牛坑腩比較碎😏，比普通咖喱牛腩飯貴$20 㗎🤨，下次會叫普通咖喱牛腩飯試吓丶相信應該都唔會差…Read More

今日去食出名腸粉，排咗10分鐘隊到，腸粉我就覺得唔係話好滑、一般貨色冇乜特別，但好就係佢比足夠嘅麻醬甜醬豉油嘅，所以你每一粒腸粉都有好多醬汁包住，食落自然就好味啦！所以如果你經過個肚又有D肚餓丶咁啱又唔太多人排隊丶咁不妨食下啦！…Read More

之前睇報道介紹過依一間專做芋圓嘅鋪頭、佢有得買未煮既芋圓走亦都有堂食，不過就得三張枱仔六個位，要堂食就要等位㗎啦！ 佢哋全部糖水都有三款唔同顔色嘅芋圓、紫色丶橙色丶白色丶其實都分唔出有乜分別、因為全部差唔多味道。我叫咗一碗凍既椰汁西米露，當然入邊都算多芋圓，啲芋圓偏大粒、加上佢煮得未夠耐，所以偏硬、但最可惜既係佢碗椰汁西米露係唔夠凍囉，大熱天時其實真係想食一個凍嘅糖水唔係室溫嘅糖水，有想過問佢地有冇冰等我可以加落去凍DD，不過見店主二人有啲拗撬、廢事阻住佢哋，快快食完走。…Read More

依間鋪頭名就聽咗好耐啦，但就未去過、今日同朋友就入咗去叫咗個炸魚皮$26 係跟一碗清湯比你點嚟食、魚皮好脆口，個清湯就清清地丶冇乜味！另外叫咗碗牛腩粉、牛腩米湯底味道剛剛好冇話偏鹹或者偏淡，牛腩炆得淋，味道都好鮮，係好味既，佢仲落咗好多蔥、啱晒我鍾意食葱嘅人、如果你唔食蔥就記住叫佢走蔥啦！ 不過有一樣野要講嘅係以$50一碗嘅價錢來講，我就希望佢唔好比D咁碎既河粉比人客，碎到筷子都唔使用啊，乾脆用匙羹食，唔好以為我食到尾先咁碎呀、一開波已經係咁啦…Read More