jackywinwin's Profile

同太太路過紅磡加太賀附近，又唔係好想食日本嘢，突然記起有朋友介紹附近有間新開張幾個月嘅打邊爐，即刻去試吓店舖位置唔難搵嘅，就喺加太賀街行入去，入到店舖，見到新裝修，地方乾淨，大細枱大約有10張，枱同枱中間有屏風相隔，所以雖然唔係房間但都有一定嘅私隱度。坐低望望本Menu，設計到成本雜誌咁，食材同一般火鍋店相近，問問侍應有咩好推介？ 佢就介紹咗三樣嘢： 1）牛魔王拼盤 2）三色滑（蝦滑、墨魚滑、墨魚+蝦鴛鴦滑） 3）小食冰火脆魷魚。 好，就叫呢三樣，湯底就嚟一個鴛鴦鍋：沙嗲湯底配潮州湯底。揀潮州湯底，係因為未喺其他火鍋舖試過，就睇吓你有幾新奇。再嚟多咋陳皮檸檬汁飲吓先。首先飲品同小食魷魚先上枱有陳皮香味的檸檬汁，有開胃嘅功效冰火脆魷魚，最令我驚喜，魷魚新鮮脆口，冰在代表係冷盤，火代表醬汁有少許辣味，嗰種辣味就係我哋兒時車仔麵嗰種味道👍👍👍超正👍👍👍鴛鴦鍋湯底，同牛魔王拼盤一齊上枱沙嗲湯底，味道濃郁，入邊有芽菜同豆卜，可以吸晒沙嗲味潮州湯底，紫菜喺面蔥喺底，啲紫菜多到你唔信，味道就較清鴛鴦鍋一邊清一邊濃，是常識吧😂😂😂牛魔王拼盤：有牛柳粒，牛頸脊，牛脷，牛骨髓，牛心椗，牛柏葉同黑柏葉，全部都好新鮮最後唔可以唔講個三色滑，店家話自家制，落湯滾起，熱辣辣放落口，非常彈牙，好食到癲．大大力推介返食指數：一定返食，價錢嚟講唔算平，人頭$400左右，以食物質數嚟講，物有所值👍👍👍臨走先知原來店內有一個小舞台，有卡拉OK， 9:30後客人可即興上台唱歌😂😂😂😂 …Read More

不知不覺，唔講唔覺，太興杯冰鎮奶茶細杯咗？味道依舊，但係隻杯同支胡椒粉樽，同支鹽樽拍埋都係高少少，目測可能只係高咗2-3cm ……….果然係物價騰貴………………..…Read More

2024年1月20日上午11:45 ，我同朋友兩個人路過旺角，隨便搵間茶餐廳食嘢，入咗呢間新澳餐室坐低，店內大約有一半位置坐咗顧客，店內有三名侍應。坐低睇完餐牌打算叫餐，揚手示意，其中一個男侍應叫我等等，期間隔籬枱一名男顧客都有叫侍應，表示碟油菜未煮熟… 我心諗油菜都可以唔熟？過咗大約1分鐘，我再叫另一名女侍應落單，佢同樣叫我等等，呢個循環重複咗八次，冇錯係八次，我第八次叫人落單，佢都係叫我等等…. 過程大概10分鐘期間我一路有望到佢哋工作嘅情況，其實真係唔係好忙，茶餐廳嘅賣點其實就係快，落單叫八次，10分鐘都落唔到單，侍應後黑面冇水洗面，我梗係起身走啦，你估你係唔係米芝蓮茶餐廳咩？附近前後左右超過10間茶餐廳，我揀着你，都係我黑仔。唔好再詐型香港人北上消費食飯，可能侍應當左我係自由行，可以隨便黑面，不過如果你冇生意要執笠老闆就唔好問點解。…Read More

今日放假，路過見阿元來了冇乜人，所以就買個外賣返屋企試試，睇完餐牌就揀咗1.爆蛋雞肉飯，2.鹽酥雞，3.皇室奶茶微糖。我揀爆蛋雞肉飯，因為見到有食評話好食，所以試吓。返到屋企打開飯盒，內有飯、雞絲、蛋、酸菜，原來所謂爆蛋只不過是一隻煎蛋，放咗入外賣盒焗一焗，連蛋黃都熟埋，啲雞絲就乾到爆，十足t煲完湯嘅雞再折絲，完全唔好味。至於鹽酥雞，外表睇落就唔係好靚仔，識落還算OK只有杯皇室奶茶比較似樣，有茶味夠香濃。依個午餐以呢個質素收$117，應該唔會有下次。…Read More

宜安街多小炒飯店就街知巷聞，呢間就真係未試過，咁啱朋友約去呢間食，一於試吓佢。舖頭裝修舊，不過乾淨，枱與枱之間唔會好迫。望下菜牌，除咗一般小炒，都有啲特色餸，三個人叫個五個菜：1. 百花大腸2. 豉油王鴨舌3. 鹽焗花螺- 好入味，重加咗D炸蒜，非常野味喎4. 3D芥蘭5. 啫啫田雞食法好似生菜包，有一塊生菜包住芥蘭，炸咗嘅芥蘭葉絲，有辣椒嘅肉碎，的確幾好味，又有特色。食物好食，價錢唔貴，會下次再幫襯。…Read More

呢間店上手就係買炸雞髀🍗同羅宋湯出名嘅「愛群」快餐店，轉手大概有兩年，炸雞髀都做得返原店七至八成水準。今日咁啱途經上址，諗住食返個雞髀飯加羅宋湯，行埋去收銀機度落單，收銀姐姐同我講已經冇買羅宋湯，我個心都大咗一凸，咁照嗌炸雞髀飯加杯凍檸茶囉。嘢食攞到埋枱，炸雞髀見唔到以往揸到脆卜卜嘅雞皮，取而代之嘅就係一Pat炸漿。咬落去，雞皮唔脆，雞肉唔夠熱，有少少霉嘅感覺，咬咗兩啖已經食唔落，XYZ….好失望，無影到相，唔信可以自己去試吓，bye，無下次，無以後……Read More

莆田食過好多次，之前最出名嘅蟶子，不過今次時令食材係海蠣，即係𧐢仔，今晚同老婆行過路過，一於就試吓佢。總共有七款菜色，餐牌望落幾吸引，叫兩款收$209平少少，於是我就叫咗招牌福建特色海蠣煎 同 莆田漁民鹽清海蠣🦪先嚟鹽漬海蠣🦪 講真望落真係唔係幾開胃，遲啲𧐢仔浸住喺啲污糟水咁，不過食落就幾好味，好有咸鮮香味。第二度就係蠣煎，食落似屋企嘅𧐢仔蛋，家庭式菜式，同台式蚵仔煎、潮式煎𧐢餅完全唔同風格。之後再太多件黃金荷葉包，之前食過好多次，今次都保持水準，饅頭脆，洋蔥肉絲香，夾埋一齊食好夾味。要收茶芥加一，人均消費百幾，食品保持水準。…Read More

朋友介紹，一行9人第一次幫襯，坐低先食雞煲，有分大中小辣，試大丶小辣各一。雞煲上檯，待應教每兩分鐘揭蓋炒一次，要炒四次先食得，我試大辣，炒時辣椒很攻鼻，不過食落都ok，有麻有辣，唔會辣到食唔到，雞煲仲可以無限添食。之後就上蒸海鮮，一盤過上，「做型」能令人「哇」一聲，有鮑魚丶扇貝丶蟶子丶開邊蝦、蚌、龍躉肉，仲有烏冬薦底，新鮮好味。再嚟一個烏雞雪梨湯，先飲湯，清甜潤喉！繼續打邊爐，同一般任食火鍋差不多，丸、菜丶麵食等等，不過呢度嘅牛頸脊就係任食，無錯係牛頸脊，質素好有牛味，讚！飲品方面有幾款汽水丶茶類，但唔包酒，另外買。幫襯當日係閑日，每人$268加一，無其他收費。呢個價錢真係抵食！…Read More

網上好多人都介紹過位於觀塘工業區嘅蔥花蛋治，今日終於有機會試到。兩個人進入呢間位於工廠大廈地下嘅食堂食早餐，地方唔算大，坐滿大約可以容納20人，尚算乾淨。今日目標清晰，就是蔥花蛋治 烘底，另外多叫一份侍應推介的炸蝦條、牛腩煎米粉，再配上一杯熱奶茶，一杯熱檸水。蔥花蛋治送到枱，一碟總共分為三件，細心睇，原來一件蔥花蛋治係有四部份組成，抵免各有一塊搽上牛油嘅超薄多士，中間夾有一塊白方包，及主角蔥花炒蛋。一啖咬落蔥花味濃郁，喜愛食蔥嘅朋友一定唔可以錯過，另外多士夾嘅方包又是另一種有趣口感，要整一塊咁薄嘅多士真係唔容易㗎。之後到炒米粉上場，表面平平無奇，我咬落去充滿龍龍嘅蛋香，炸蝦條香又脆，牛腩用另外一隻碟仔上，有蘿蔔片墊底非常入微，牛腩面放有生蒜蓉及乾辣椒🌶️，很配合。牛腩單吃少少偏鹹，但撈上炒米粉食，的確係相得益彰。熱檸水又是另一個細心位，一般薄薄嘅檸檬片換業檸檬條，基本上唔使篤都已經出晒味。一份滿意早餐，老闆介紹下次可試吓飲「凍啡樂」之後同齋啡，加可樂，再加姜絲。…Read More

慶祝週年紀念日，決定揀西苑食中餐，目標係享負盛名嘅爵士湯和一哥叉燒。早一日電話訂位食晚飯，當日準時到達，被安排坐大廳，大廳大概有15張枱左右，枱與枱之間有足夠空位，唔會太擠迫。兩個人食飯，叫咗1.爵士湯半煲，2.例牌一哥叉燒，3.重慶雞煲（半隻雞），4.海鮮泡飯。-爵士湯：總共有四碗，湯渣有响螺，點豉油好味，老火湯夠味，好味，但飲唔出蜜瓜嘅甜味。-例牌一哥叉燒：有十二舊，每舊都有一定厚度，味香、肥瘦適中，蜜汁有甜味唔會太鹹，好！-重慶雞煲：香噴噴，少辣，煲內料頭多，有蓮藕薄片，爽口，唔會死咸。-海鮮泡飯：真係好好食，海鮮味夠清甜，加上脆米，口感一流，值得推介！另外，想提一提嘅就係員工嘅服務態度，睇其他報告講佢哋嘅服務態度好差，食完成餐飯我又唔係好覺，老食店老員工，態度重好親切添。總括來講，滿意嘅一餐晚飯，肯定會翻食。…Read More

廣告見到海雲天推出「蟹之約會」套餐，菜式包括：1.海雲三小碟、2.蟹肉燕窩羹、3.芝士焗蟹蓋、4.紅梅雪地鮮蟹拑、5.星洲黑胡椒蟹、6.雞油花雕蟹肉伊麵、7.蟹肉灌湯餃、8.蛋白杏仁茶，每位$698，買一送一，二話不說立即訂位！夜晚6點到達，全店只有不到10張窗邊枱，可能早到所以被安排錯咗其中一張可能早到所以被安排錯咗其中一張，由落地玻璃望住維港食飯，賺到了！由於訂位不接受揀枱，所以如果想坐窗邊枱，要早啲到啦。講返啲餸：1.海雲三小碟：齋-烤麩、手拍青瓜丶叉燒，正常冇特別。2.蟹肉燕窩羹：有一定份量嘅蟹肉同燕窩，都幾清潤，唔錯。3.芝士焗蟹蓋：新鮮出爐，芝士味香，香口惹味 👍👍4.紅梅雪地鮮蟹拑：其實係蟹鉗，濃湯蒸蛋，嫩滑唔錯。5.星洲黑胡椒蟹：正宗星洲風味，黑椒味超香，我覺得係全個餐最好食嘅一道餸，隻蟹夠新鮮，連伴菜嘅紫洋蔥🧅都充滿黑椒香味！但發覺隻蟹冇咗蟹鉗，原來用嚟做咗上一道菜：紅梅雪地鮮蟹拑.... 似乎孤寒咗少少。6.雞油花雕蟹肉伊麵：花雕味太重，完全掩蓋雞油香味，比較失望嘅一道餸。7.蟹肉灌湯餃：皮薄餡唔錯。8.蛋白杏仁茶：正正常常。整體來講，水準中上，已訂位下星期再食多一次！　另外店舖有兩款優惠，1.經某家網上團購，$698-$50。 2.利用WhatsApp聯絡海雲天訂位$698-$40，Download 埋店舖App，入座時甜品可轉為椰皇鮮奶燉燕窩。PS：另需要收茶芥及加一…Read More

Tea time時段，剛好身在美麗華廣場，見到店舖門口擺出一個招牌：「下午茶迷你漢堡餐$60」，唔想食咁飽，就決定試一試你!餐廳是採用自助去收銀機落單，侍應再將食物送到枱。　餐廳只有上述一個下午茶餐，包括有一個漢堡包（牛肉或炸魚）一份炸薯條，罐裝汽水話熱茶。(+$10可轉homemade iced tea {蜜桃🍑菠蘿🍍荔枝 }，+$15可轉iced coffee / fresh juice ，+$20-35可轉各類酒精飲品）。我哋兩個人分別叫咗一份牛肉漢堡及一份炸魚漢堡，漢堡包🍔外表精緻，牛肉唔會太乾，咬落去有肉汁，炸魚脆口，脆粉唔會太多，兩樣都唔錯。炸薯條🍟正正常常，冇乜特別。　飲品我哋都加咗錢轉左homemade iced tea 一杯菠蘿味🍍一杯荔枝味，其實係一杯冰茶，再加上生果味嘅糖漿，其實同飲汽水差唔多，幸好杯入邊有一塊薄荷葉，增加了一點清新嘅感覺。兩個餐，每個$60 ，各加$10轉左杯飲品，埋單總共$140。質素唔錯，有機會再試吓其他漢堡。…Read More

下晝三點半前往彩虹邨🌈朝拜打卡，路過一間舊冰室：「鑽石冰室」，之前從未聽過呢個名，但嚮往舊式餐室的我，二話不說就推門入去食個下午茶☕️。睇完個餐牌，並沒有任何特色嘅招牌食物。喺舊式餐室點餐，菠蘿油同熱茶走不能避免要試試。我一句：阿姐，唔該下午茶餐，菠蘿油丶熱茶走少甜，換來一句失望回覆：菠蘿包賣晒⋯⋯無辨法啦，只好聽阿姐介紹：沙爹牛肉包。幾分鐘後，食物上枱，熱辣辣麵包🥯夾住味道濃郁嘅沙爹牛，下姐冇介紹錯👍👍👍，試埋杯熱茶走，一般般咁，茶味唔多夠，不過好在叫做滾熱辣。埋單$22 ，係呢個市道來講都算係平。…Read More

想試路邊雞很耐，但每次約食飯都唔記得佢，咁啱今日朋友即興約食飯，地點正正係路邊雞，正好試試佢⋯夜晚7:00到達，被安排坐隔離細舖，係第一枱客人，先講環境，店舖屬舊式食飯店裝修，相信已有一定歴史，枱面鋪有多層枱布，整體尚算乾淨。我哋一枱四人，叫咗一隻蔥蒜雞+雞什丶蝦醬通菜丶黃金苦瓜丶豉油王炒麵。蔥蒜雞：雞什鋪面，上面再有蔥蒜，香而不油膩，不愧為店舖招牌菜。蝦醬通菜：新鮮，炒得乾身。黃金苦瓜：香濃咸蛋黃味，略嫌太多油，唔夠乾身，上枱時碟面重見到啲油。豉油王炒麵：正，乾身，夠香夠味！另加4枝玻璃樽裝汽水，1枝超冰凍大啤（樽面有冰雹，一開蓋，啤酒嘅二氧化碳湧出，遇到低溫，立即變冰，飲得超爽快！）四人食飯，埋單$685，抵食！菜牌寫有多款一人分量燉湯由＄35-$75，下次再試。…Read More

素漢堡又幾似真牛肉喎！豆漿溝味噌都幾好味！未來漢堡🍔:本地製作純素麵包、未來漢堡扒、新鮮番茄、生菜，另加入牛油果及拉絲純素Daiya 芝士 * 漢堡扒由豌豆、紅菜頭以及椰子油組成，百分百全植物製作，零膽固醇，無激素、無抗生素及非基因改造。白龍拉麵🍜：豆乳味噌湯底，甜而不膩。Lunch Set 百幾蚊一份，中環區來說不算高價錢，包是日餐湯或沙律，及飲品。#BeyondBurgerLab #WhiteDragonRamen…Read More