mattmattso's Profile

秀茂坪不嬲都係劣食之地，選擇少之又少，唔係連鎖集團，就係少量街市入面嘅小店。但自從發現咗呢間開咗一年都唔夠嘅小店Snow’s 之後，突然發覺秀茂坪呢個隱世地方都可以有美食。  外表平平無奇，左右係水準麻麻嘅車仔麵檔/腸粉，唯獨呢間Snow’s 做意粉炒飯小食炸雞，原本都無乜期望，估唔到係對飲食有heart嘅小店，結果每個星期最少食咗兩三日。  Menu 唔花巧(唔記得影相，偷住佢地fb 啲相用住先)，價錢對得住質素，炒意粉炒飯都係即刻炒，連炸物都係即炸，可惜宜家人手不足有部份野煮唔到。  首推已經食過好多次嘅韓式炸雞，$55 / 12件，雞球係即刻炸完用韓式辣醬撈，最有心思係面頭加咗芝麻同葱碎，更加韓式。外賣雖然少咗一層即食嘅脆，但經過十分鐘路程都仲食得出脆口，建議可以自己打開少少蓋唔洗焗晒水氣。味道方面真係無得彈，非常夠韓式，唔太辣但又有甜味，而且係無骨雞塊，所以啖啖肉，超級推介。佢地嘅炒飯同炒意粉都好好味，最鍾意食香草腸茄汁炒飯，香茜雞胸螺絲粉同酸辣肉醬螺絲粉。炒得味道都剛好，茄汁炒飯用香草腸，酸辣肉醬用辣腸，配合都係啱啱好，尤其炒飯份量夠大，女仔可以分兩餐食都夠。其他最常食嘅有沙律，有heart 在沙律唔係剩係得羅馬生菜，而係有其他紫色椰菜絲同另一種菜嘅，而且會落足調味料同醬汁，比好多西餐廳更有heart。係秀茂坪搵到呢個級數嘅意粉炒飯同炸物真係要大推，希望佢地可以繼續可以係秀茂坪呢個劣食之地做得起。…Read More

加咗人工要食餐好嘅，黎到呢間位於佐敦嘅樓上舖，搭𨋢上到去都唔覺佢係火鍋舖，入到去原來有大約十張枱左右， 而且仲有個細魚缸。 Menu選擇都非常多， 除咗火鍋好多湯底可以揀，海鮮好多種類可以揀，肉類、雲吞、丸、其他食材都好多種類。 原本想食辣但係見到佢啲湯底好似好鮮味咁，就叫咗兩個同菇菇有關嘅湯，一個係三高茶什菌湯，三高茶即係減三高果啲，都好似第一次見要黎做湯底，另外一邊係姬松茸冬瓜湯，店員建議我地一開始飲咗個湯先，本身都好鍾意食姬松茸，加埋冬瓜同瘦肉粒落去煲唔洗打邊爐，就咁飲都已經好好味。 火鍋料方面第一次黎食點啲穩陣野，雖然係穩陣但質素比想像中嘅好，值得一戰。 先黎係四寶丸同雙拼餃。 四寶丸係蝦墨豬牛各兩粒，各個丸都食到爽口彈牙同各自嘅鮮味，尤其以墨丸同蝦丸最食得出好味道。 雙拼餃要咗一半鮮蝦雲吞，一半香菇餃，似乎地係自己包嘅餃，皮唔太厚太薄剛剛好，而且用料豐滿，非常唔錯。 跟住跟住就梗係打邊爐唔少得嘅牛啦，要咗本地手切牛同，手切short rib，兩者各有特色，各有口感，各有好味。 差啲唔記得講埋個響鈴，其實一開始已經上咗，新鮮炸出黎我地連湯都未滾就已經清晒，超香脆。 另外佢地嘅服務好好，會幫你畢走火鍋上啲浮泡，聽講啲浮泡就係令尿酸高嘅物質，咁樣食都健康啲。 值得再黎，見原來多人點海鮮，下次搵多兩個朋友黎試埋啲海鮮同串燒。…Read More

對於食蛇，大部份人都仲留係深水埗蛇舖舖食蛇羹加糯米飯嘅傳統印象，四季芬芳就將呢個印象打破，將佢由蛇王芬搖身一變，剩睇門口都見到，保留傳統之餘加多幾分貴氣。 幾欣賞本menu 係有設計過，用字型同相都精緻，而且有寫春夏秋冬，似乎唔同季節會有唔同menu。 食蛇王芬梗係要食蛇羹先，未落料先攪一攪，滿滿嘅肉絲，加埋木耳絲，用料好足，當然唔少得食蛇常落嘅檸檬葉同薄脆，果然蛇羹能登大雅之堂。 再黎啫啫雙腸芥蘭煲，概括用兩個字形容，惹味。而且芥蘭全用上菜框無用菜葉，識食芥蘭一定係咁食。 鍾意食濃味野嘅梗係要試埋子薑咕嚕肉，出面一般嘅咕嚕肉都係配菠蘿，有啲會配埋蕎頭，而佢地用子薑，個酸味比較特別，而且子薑本身都好味，唔錯。 仲點咗兩粒濃湯竹絲雞百花丸。睇食評都見到多人點呢個，都真係幾得意。外層係炸面包粒，入面包住蝦肉，再入面包住有湯嘅竹絲雞，口感豐富。 最後點咗加咗個排骨白鱔煲仔飯，有微微飯焦底架，唔太濃亦都唔太油，配甜豉油食唔錯，原本想試下火焰甜豉油，不過侍應哥哥話白鱔唔太夾火焰，下次可以試其他夾嘅。 整體上兩個人食都非常夠飽，味道都唔錯，值得提下嘅係佢地嘅茶係用鐵鑄壺，保溫能力好，茶都係清香嘅，唔會濃到飲完夜晚訓唔到濃度。…Read More

有一段時間無出過街食野，以前食過呢間嘅前身，即係宜家同名木船嘅位置，以前野食唔錯，開咗新店就梗係要再試下。menu 同以前一樣有教泰文，有啲泰文仲好搞笑，野食都係同之前一樣好多選擇，同埋好多出面嘅泰國舖頭無得食嘅野。唔太肚餓所以無點到好多野食，點咗2個小食，1個菜同1個炒飯。小食好快就到咗啦，分別係墨魚醴豆卜同月亮墨魚餅豆卜未食落口己經見到香脆咬落果下索索聲真係香口點埋個泰式醬加返啲甜味一流然後個月亮墨魚餅，有啲粟米粒係度，幾彈牙有啲咬口，都唔錯再黎炒椰菜苗，去泰菜舖食必點嘅，平時出面食啲椰細苗一碟好細兜，呢度啲椰菜苗都幾大份，唔錯最尾就係芒果蟹肉炒飯除咗碗飯之後仲有一邊芒果，其實炒飯本身都有芒果係入面，成個炒飯都有啲芒果香甜味，而且真係有一梳梳嘅蟹肉係度，鍾意食蟹嘅係個唔錯嘅選擇體上黎講3百幾蚊好唔錯呀，而且出面就係停車場可以泊車，不過位置就要搵搵，晚市都多人泊…Read More

以前黎食過，覺得好食，中午再黎食，原來轉咗menu，平啲，但望落舖面就比較冷清，各位記得要多多支持呀。 我而家會形容佢係特色牆。 Menu 方面，午餐大約係$50-$60 左右，而壽司刺身呢啲當然會貴啲，但都係講緊$78 / $108，加埋一都係算抵食嘅午餐。 野食方面，會跟沙律同面豉湯，而且會有茶，所以本身唔點飲品問題不大，不過為咗支持小店，都會點個茶碗蒸呀，炸豬肉餅。 至於主食本身，係好食嘅，分別食過咖哩吉列炸雞丼同火炙雜錦丼。 咖哩味香，炸雞份量都唔少，一個正常男人唔特別點追加都夠飽。 火炙雜錦丼，一送到黎嘅時間好香，因為佢地仲會加芝士係上面，特別想提嘅，係佢地嘅wasabi 唔係用粉或者牙膏wasabi，係有一粒粒細粒嘅wasabi，刺身方面，除咗三文魚，蟹柳絲，左口魚，估唔到嘅係呢個價錢嘅火炙丼都會用上凡立貝，食材唔錯唔錯。 講返室內裝修，呢度會掛滿日本特別嘅旗，有一角放咗日本漫畫，而播緊嘅歌都係日本動漫嘅歌黎，相信店主本身係個好鍾意日本動漫嘅人黎。 整體上用餐感覺非常唔錯，而且侍應態度非常好，食晏會多啲黎呢度食，支持下。另外佢地都有做學生優惠，好似3人同行就有7折。 …Read More

宜家因為工作關係食飯都主要係大埔，大埔中心就係一個好多野食嘅地方。今日黎到呢間WM Café，主要都係食西餐嘅，係門口望餐牌，價錢唔貴呀，即管試一試啦。 Menu都算幾豐富嘅，主要都係晚餐套餐比較優惠，一丁友雖然想食小食，但再加主食就一定食唔落啦，所以都係叫個餐就算，唔想食牛，就點個豬扒試試。 一黎就當然上湯先啦，係忌廉龍蝦湯，賣相同味道都唔錯嘅，聞得出係真材實料嘅。 再黎就係主菜啦，擺盤其實唔錯啦，上面有啲青蘋果，中間隱藏住帶子，再下面就係黑豚豬扒同薯蓉，當然仲有少少沙律菜，比較特別係有俾咗少少黑椒蒜鹽。 帶子半生熟無煮到老晒，唔錯。黑豚豬扒有咬口，食得出有肉味唔係滿口脂肪嘅豬黎。上面嘅青蘋果絲一邊食下，一邊食下肉，開胃之餘有帶點清爽感。 最後整咗杯雪糕忌廉梳打，成杯野白雪雪好搞笑。上面嘅雪糕似乎唔係雲呢拿味，帶少少椰子味，個人幾鍾意。 整得上$138 加飲品加1 ，大約$200，呢個價錢算唔錯啦，求其一間茶記食個好啲嘅豬扒飯都講緊$88啦。 …Read More

疫情之下想出街食飯都要深思熟慮，去細間啲啲嘅舖頭可以減少啲接觸其他人。收咗工就黎呢間之前坐到好迫嘅人氣日本餐廳。  雖然係疫情之下比較少人，但都係要留電話等位。 入去前當然要度體溫同同雙手消毒，而且因為疫情關係加咗膠板隔開，食野除咗食物環境，安全都好重要。  呢度出名嘅就係食丼飯，一定唔可以錯過。因為收工比較肚嘅關係，所以加多份鰻魚壽司同八爪魚刺身  上菜啦，豐盛滿滿嘅一碗，以一個魚生丼飯黎計真係好過份，啲餸多得咁誇張，仲好高。而佢地嘅wasabi 係用磨蓉嘅，唔係一般用膏狀嘅，有芥辣嘅辛辣味。 個丼嘅食材多我要攞個碗放起晒啲吞拿魚蓉同三文魚生先有位攞啲飯出黎，而啲魚生係好新鮮嘅。值得一食。 舖頭有提供飯素可以拌飯，不過其實魚生拌飯都已經非常夠，口痕嘅可以試一下嘅。 至於八爪魚刺身都OK嘅，唔會係擦子膠八爪魚，加埋少少wasabi 唔錯。 炙燒鰻魚壽司比我想像中嘅好，佢嘅飯唔會太散或者太硬，而鰻魚本身汁煮嘅時間都夠，最後加上炙燒，香味唔錯，而且size 都好足。 舖頭只可以坐4/5枱客，不過都見到晚市都要等位，可見呢度都多fans，而佢食物質素同份量都確實不錯。 …Read More

近排都係鍾意去小店食嘢，嚟到嵐屋就完全感受到日式小店嘅氣氛。嵐屋喺慈雲山一條唔算多人行嘅小巷轉角，位置不算太起眼。室內亦都唔算大，5張枱大約坐到廿個客人，但入面嘅裝修都好重日式味道，而且有好多酒包裝。因為已經過咗午飯嘅平日接近落場時間，舖頭比較少人，可以聽下舖頭播嘅日文歌。午飯時間有定食set 提供，52蚊一個set 價錢合理。咖喱吉列豬排定食上菜，同相片唯一不同嘅係咖喱分開上，唔會令咖喱浸淋吉列豬排，賣樣亦非常討好。吉列豬排有5大塊，咬落香脆唔油膩，而豬排鬆軟帶少許油脂香，雞蛋裡挑骨頭的話只係外層略唔夠鬆化，但整體吉列豬扒非常高質。咖喱汁唔係用粉或者磚開嘅普通貨式，而係有落埋其他材料嘅，沾上豬排唔會濃到搶咗豬排嘅香。抗疫時期小店都唔鬆懈，提供酒精搓手液同消毒濕紙巾，俾客人食飯前後同戴口罩用作為良心小店，宣傳品不會缺少。舖內黑板有寫上新鮮食材，想食咩好嘢就望下先。有好多酒包裝。估唔到特登走上嚟慈雲山食嘢會搵到間好嘢，而店員亦都非常有禮貌，真係「黃藍是政見，好食是良知」，呢間絕對係一間有良知嘅小店，值得多多支持。…Read More

又走到太和工作，搵到呢間好評酒吧餐廳，啱晒口味可以食晏又飲嘆返杯。酒吧有好多酒可以選擇，仲有波睇，如果夜晚時間黎應該都幾好氣氛。食飯果陣都過咗lunch hour，而餐廳位於住宿區樓下，所以唔算多人，可以慢慢嘆下。 佢地tea time 有brunch menu，不過實在太想食牛扒，所以直接點咗份安格斯西冷5成熟，加杯1664，配啤酒又想食炸野，所以點多份雞翼三重奏。Menu 亦有好多選擇，頭盤沙律主菜小食都有，酒同飲品一樣選擇繁多，總有一樣啱。 Drinks menu:牛扒一送到好香，比我想像中大份(應該都係12oz)，而且有粗炸薯條，配1664一流，而且有煎三色椒、翠玉瓜同蘆筍，店員會俾埋鹽同黑椒，俾自己額外調味。切開見到無乜血水流出黎，rest 得剛剛好，咬落去肉質都唔錯，同我期望嘅生熟度同味道差不多，對得住個價錢。 而雞翼三重奏分別係有水牛、牛油、honey mustard，再配上有加到醋汁嘅沙律菜。雞翼本身已經大隻，再加炸粉，長過我隻手指，就咁食嘅味道會偏濃，但如果一啖啤酒一啖雞翼就好正，因為又脆又非常夠香濃惹味。 見到其他人食嘅brunch set 都唔錯，都大份同包飲品，下次唔食牛扒可以再試下。 另外，一坐低店員就會俾消毒抹手紙我地抹手，疫情之下值得加分。 …Read More

葱仔越南包，大概係我每次喺大角咀附近都必食嘅食肆，舖仔細細好似唔太起眼，但門口有個好顯眼嘅白底葱仔招牌舖頭內座位唔多，但裝修清新簡約舖頭專心做好一樣野，就係越南包，原個同半個包，散叫同單點都有，喜歡嘅甚至可以剩係買個包攞走，而另外有湯同菜配搭，價錢都非常親民
呢度係菜兩份，每次黎都有唔同選擇，通常都會有西蘭花同有出面比較少有嘅秋葵，而且好新鮮，加上XO醬添上一份香氣
湯品有粟米南瓜湯同磨菇湯，兩樣都係誠意之作，磨菇湯有菇蓉加上菇粒，好足料，而南瓜湯嘅南瓜係足料南瓜煮出黎
食葱仔始終係越南包先係主角，呢度係半個包，好細心咁用袋袋好唔怕啲汁滴到周圍係
個包真係好足料，多到唔記得有無數漏，有烤肉、芫茜、蔥、肝醬、醃甘筍絲、醃蘿蔔絲、蛋黃醬、辣椒、豬肉鬆，最底有扎肉加起黎嘅味道就係豐富嘅層次感同足料嘅咬感，但又唔會因為過多嘅餡料而甩到周圍係，而個包都唔會太大太乾太硬，成個越南包都好平衡好出色
之前黎有檸檬水可以自己斟，今次黎有好似羅漢果味嘅茶，有心意
葱仔越南包呢度舖仔細細但的確成間舖頭做得所有野都好出色，而另外值得一提嘅係顧客通常都會主動幫手清返乾淨自己張枱同放返個盤係出餐位，同埋顧客係自行找續，減少老闆要掂到唔乾淨錢嘅機會
臨走果陣睇返舖外，叫得葱仔，會講吓葱有咩好處，仲有阿媽話，食葱聰明添呀
舖外出面放咗啲泥係度，唔係以為係煙灰缸，原本舖頭有自己種葱，不過可能因為宜家疫情關係無自己種…Read More

疫情之下，係香港想搵間安全啲又好食嘅餐廳都有啲唔易，為咗避開人流特登揀過咗lunch hour 嘅時間，係相對人流唔算多嘅愉景新城食，亦都因為見到呢間有半開放式座位，雖然都係室內，但空間相對開揚。 入舖頭前職員都會要求同客人量度體溫，雖然都有機會帶病毒，起碼叫有做到野先。 坐低咗係對商場嘅一面，空間更開揚，而且座位同座位間都有足夠距離，除低口罩都安心啲。 野食方面主要食西式，聽聞burger 唔錯但因為想減少雙手接觸食物所以就點咗一份西冷同一份egg benedict，有餐湯同沙律，以lunch黎計算幾抵食。見佢地飲品有鴛鴦同偽鴛鴦幾特別，但驚飲完太飽所以只係點咗檸水濕濕喉嚨。 先嚟嘅係沙律連埋湯，沙律係有藜麥嘅，沙律菜都幾新鮮， 而且仲有個牛角包。 跟住就係egg Benedict，分量同出面嘅都差唔多，的確做到流心蛋嘅效果， 有薯餅，仲有沙律菜，成件事幾健康，女士食嘅話可能有啲多。 至於牛扒，除咗牛扒之外仲有蕃薯同蘆筍，牛扒唔會煎得太韌，有牛扒香味，估計大約都有8安士左右，食牛扒都係逆紋切好食啲，番薯同蘆筍嘅份量都幾多，以呢個價錢嚟計真係算唔錯。 檸水嚟講，佢哋啲檸檬唔會澀，有時係其他餐廳會飲到啲有澀味嘅檸水，果啲就真係不了。 Overall 黎講呢間係環境開揚，都對疫情黎講算安全嘅餐廳，價錢對得住食物質素，差啲唔認得講佢地食lunch 可以儲印仔，夠10個可以換個餐。 …Read More

之前有食過幾次嘉寶嘅葵興本店，今次出去尖沙咀就去試分店，特登等佢未開舖就去等，點知原來已經有更多人比我地早到，等咗半個鐘左右終於有得入坐啦，一開門就己經全舖滿座，原本好味嘅舖頭加上係良心小店，更多人會黎懲罰。 呢度嘅menu 大致同葵興店嘅一樣，重點係少咗薯粒(雖然我好鍾意食佢個薯粒)，包少咗一兩個option。 最後兩個人叫咗2個包，一個係黑松露芝士牛堡加生洋蔥，另一個係烤菇芝士牛堡加生洋蔥，1個加餐，再追加2隻雞翼。 等咗一陣就有得食啦，正～ 個包面同底都係焗過嘅，少少脆得黎帶啲鬆軟，咬落又唔會成個包散晒，餡料方面都係滿滿嘅，熔咗嘅芝士，加慢煮牛漢堡，仲有烤菇，仲有熟洋蔥，生菜，番茄， 成日都話食burger 都要加生洋蔥，因為係真係好夾架。 有啲人見到有支籤拮住包就會拎走佢先，但呢個烤菇牛堡實在太高，所以留返支籤係度做固定黎食會比較易食啲，而成個包非常juicy，烤菇同番茄都多汁，加上嘉寶最特別嘅慢煮牛漢堡扒，唔會煮到塊扒好乾身，咬落有好香嘅肉味同豐富嘅肉汁，記得搵野承住個底，因為實在好juicy。 至於黑松露芝士牛堡，松露醬嘅香味一攞就己經聞到，由於無咗烤菇，黑松露牛堡相對無咁多汁，易啲攞住黎食，同樣都加咗2蚊生洋蔥，配合牛肉嘅味道都係一流。 薯格炸得香脆唔油唔乾，雞翼原本點咗BBQ味，點知店員落錯咗單做原味，唔緊要啦好少事，炸完出黎都係脆口同唔乾身，唔錯。 臨走果陣先見到佢地真係用低溫慢煮住啲牛堡，咁樣先可以保持到肉汁唔乾，而且漢堡扒入面有加到麥皮鎖住啲肉汁唔會太水。嘉寶嘅漢堡真係一流，先到六十蚊左右有個餐，比起連鎖金拱門質素高出得多，值得持續支持。 …Read More

沙田大圍唔去大型商場去食小店都幾方便，今次黎到呢度試下出名嘅人氣小店和氣食堂。因為佢地本menu 車在太厚太多選擇，所以後生嘅都會用QR code 落單，年紀大啲嘅伯伯婆婆都可以就咁叫職員寫單。食物種類實在太多，沙律、前菜、刺身、壽司、卷物、魚生丼、丼飯、炸物、鍋物、泡飯、烏冬、串燒，唔知仲有無數漏，估計成3百款食物都有，選擇障礙嘅我決定叫多啲嘢食。叫咗電擊雞翼、呢度嘅名物脆脆燒三文魚皮、五點刺身盛、黑松露鵝肝帆立貝卷、另一樣名物鯛魚湯泡飯。 電擊雞翼好快就上枱，佢係凍食嘅，只係炸完再沾糖漿再雪冰返，所以一咬落去就會好似咬嚿冰沙嘅刺擊感覺，口感都幾得意。 脆脆三文魚皮就係夾住三文魚皮黎燒，三文魚皮本身都幾香脆，唔似港式炸魚片咁卷起同帶油，配埋椰菜嚟食，送酒一流。  跟住就係五點刺身，分別有甜蝦、三文魚、油甘魚、帆立貝同章紅魚薄切，帆立貝好大隻同都幾鮮甜，甜蝦都係有蝦味同爽甜，三文魚油甘魚都好肥美，章紅就有𡁻口，整體咁多樣都好味，而佢地用嘅wasabi 都唔太攻鼻刺激。 黑松露鵝肝帆立貝卷，一上枱已經好香黑松露味，咬落除咗黑松露味仲有陣陣鵝肝味，重口味嘅人好啱食。 最後就係鯛魚湯泡飯，上嘅時候個爐係熱嘅，所以要襯佢熱嘅時間加湯落去，魚湯係超級香，加晒落去之後就要攪勻，過咗一陣飯就會吸收晒魚湯嘅味道，個人感覺如果魚肉唔泡咁耐嘅唔會overcook。食落啖啖魚香味真係好食嘅。 加埋兩杯野飲，草莓番石榴熱情果梳打比較特別嘅，唔太甜，佢用嘅亦都係貴啲嘅lemonade，幾好飲。 埋單走果陣見到好在我地今日好早黎，到食飯時間已經好多人等位，而真係overall 幾抵食又好食，選擇又超多，值得黎試下。 …Read More

平時都鍾意係工廈區搵食，總會搵到啲價錢唔貴，或者食物質素比係大型商場連鎖食肆好嘅餐廳，今日呢間都唔例外，而且都幾出名食pizza 同burger 仲有黑毛豬。 Menu 好多選擇，pizza 都有成15款，main course 都有幾款選擇，而且有set 2人都只係$378，另外睇openrice都知有個終極burger，同埋有新鮮手打意粉，好有heart。  今日天氣比較凍最好叫個pizza 食下，呢度好嘅就好在pizza 唔一定要成個一樣味，可以分開一半一半，可以俾我呢啲一丁友又選擇困難症嘅人揀多樣野。口痕想食肉又唔食得牛，點多份signature 嘅水牛雞翼。 點咗Pizza 一半係芝士四重奏加一半Parma ham，睇落真係唔錯，好香芝士味，唔太識分4種芝士單獨嘅味，但混埋咗之後反而食到有幾種唔同嘅芝士味，而parma ham 果邊就有ham，而上面有水牛mozzarella芝士，又係另一種香味。另外種得一讚嘅係佢地嘅餅底做得唔錯，薄底而且帶點脆口。 水牛雞翼都幾大隻，滿滿嘅醬汁舖滿咗成隻雞翼，食落香口之後滿口辣味但又不至於辣到要飲水解辣，而雞肉都無煮乾仲好嫩滑。(我最鍾意食雞中翼果陣咬開頭尾嘅骨，然後夠嫩滑嘅雞翼就可以拉出兩條長骨，啖啖肉咁食，正呀) 食完主菜個胃仲有少少位又想要甜野，見佢地放咗啲cake 係入門口位咁吸引，一於整件new york cheese cake 添，配埋杯Caramel Latte 就滿足晒。Cheese Cake 入口都係好香濃嘅芝士味，味道唔錯。 下次可以叫多啲朋友一齊黎食套餐會仲抵食，又可以食多幾款pizza 試下唔同味道。…Read More

平時去開葵芳運動場跑完步都會過葵涌廣場搵野食，今次經過呢間應該新開無幾耐嘅小店就試下。睇佢地menu 都幾多選擇，試下個魚蛋同講到好足料嘅碗仔翅睇下點先。魚蛋食得辣嘅一定要加埋辣汁，魚蛋本身係細粒嘅陳皮魚蛋已經好好食，加上佢地獨特辣汁真係好好味，忍唔住食完再買多10蚊足料碗仔翅真係好足料，絕對同連鎖小食店嘅質素係兩個層次黎，高出好多果隻，啖啖都有木耳絲粉絲菇絲雞肉絲，都係真心推介黎。香港要有多啲呢啲有心又好食嘅舖頭呀，要多多支持。…Read More