為食狂徒's Profile

今日同朋友去左深水埗行街買電話卡，朋友之後帶咗我去食一間上海嘢，因為真係堅好食，所以想同大家分享下。餐廳坐落西九龍中心附近，環境裝修都唔錯，有啲似高級版嘅茶記feel， 一啲都唔焗促，朋友應該係熟客仔，未去到都已經一路同我講要食啲乜食啲乜，咁我當然要俾個機會佢，等佢發板啦！ 先嚟嘅係凍奶茶， 應該算係其中一個鎮店之寶，樽裝上冇冰，有啲似冰鎮奶茶嘅原理。至於味道方面真係冇得彈，奶味茶味調得啱啱好，濃郁得呢不太甜，讚！到嘢食嚟啦，先嚟個豬軟骨湯麵， 豬軟骨份量十足，醬汁煮得夠入味之餘， 豬軟骨 亦很有咬口，配上海麵，超滿足。另一招牌菜上海菜餃，我哋今次叫咗西洋菜餃同韭菜餃， 睇圖就知係皮薄餡靚果隻，未食都知係正嘢嚟啦， 我見佢除咗堂食之外， 都見到有街坊專登嚟買啲包咗嘅返屋企煮，可見是信心之選。 而鍾意食啲辣嘅朋友，我要介紹你試下佢嘅自家製菜脯醬，食完包你沉船，我自己就鍾意再加埋醋一齊食，貪佢有一種酸辣嘅感覺。 不得不提，水餃同豬軟骨湯麵一樣， 都用咗魚湯做湯底，當屋企湯咁飲就perfect啦， 啱曬我哋呢啲無飯一族。雖然好飽，但都叫多咗個煎餃子同朋友開心share，因為見到隔離枱都食得津津有味咁嘅樣，簡單嚟講，就係一個熱辣辣而且香口嘅小食，同水餃一樣嘅水準。 雖然仲見到其他嘢都好想試下，不過實在太飽了， 唯有下次再叫朋友同我一齊嚟依度開餐啦。…Read More

琴日同成大班大學同學聚舊，有同學訂左依間叫梅花邨小館嘅餐廳開大餐。餐廳位置方便，長沙灣落地鐵行一陣就到。依度主打潮州菜，同學之前食過話正，所以由佢發板。先黎個大大拼盤，主要有鵝肝，鵝片，腎同豆腐。潮式鵝肝平時少食，依間水準真係唔錯，味道香濃，鵝片係我鍾意果種，唔太肥亦唔太瘦，肉味同滷水汁既味道啱啱好。第二道係黃金豆腐，超香口嘅小食，整得外脆內軟，用黎送酒一流。(頭兩個餸掛住同朋友傾計，唔記得影相 )之後係依道嘅招牌菜之一，竹笙蟹肉雪燕窩，因為係招牌菜，所以依一刻終於記得揸住部相機影底，哈！ 竹笙吸哂啲湯同蟹肉嘅精華，當然，雪燕應該係主角啦，想補一補嘅朋友可以嚟試下依個菜。再嚟係一餸兩食嘅骨香倉魚，原條上，老細叫我哋先食左魚塊先，食完剩骨部份幫我地攞入去再炸，又變左一碟佐酒小食。忍唔住問老細，平時潮州嘢都好少有咁煮法，老細解釋先知原來依家都係傾向有唔同嘅 fusion 做法，咁先至叫做有特色。食到依度其實都飽飽地，點知原來仲有兩個主菜未上，一個係川椒雞，另一個係梅花骨。川椒雞唔係辣果隻，不過炒得好香口好入味，啱我依個濃味控，梅花骨係令一種香，食落有種好柚子味嘅感覺，甜中帶少少酸果種，好特別。終於食哂主菜，再嚟係甜品，因為太過飽，所以只有位再試兩款，一個係糖醋麵，另一個滾地糖藕，前者煎得薄身帶脆，糖醋分上，隨個人喜好，多人分享比較容易KO，藕條熱辣辣，滾上砂糖入口，有種暖心嘅感覺，個人覺得依個攞嚟送酒先至係最正。整餐飯質素高之餘，老板特別招呼周到，希望好快有機會同其他朋友再嚟幫襯。…Read More

重慶大廈嘅正宗咖哩王今日係小弟第一次跟朋友去重慶大廈食咖哩, 未去之前都有睇過下啲食評, 見到好多都讚係印度人主理, 口味正宗, 所以就約埋朋友去試一試。去之前建議大家book定枱, 因為都見到唔只香港人會去, 有好多外國遊客都識得黎依度搵食。 我同朋友跟左openrice食評提示, 入到重慶大廈直行會見到詢問處, 同看更伯伯講廣東話問5e咖哩王, 佢就會識得同企左係隔離嘅餐廳員工講, 由佢帶我地去餐廳, 絕對唔會盪失路。餐廳裝修不算亮眼, 但入到去你會覺得自己真係去左印度咁, 餐廳職員全都係印度人, 溝通以英文為主, 不過佢地都識聽廣東話嘅, 落單同介紹菜單都零難度。我地冇idea叫乜, 所以由職員推介發板, 先黎個印度脆薄餅, 依個我平時食buffet都好鍾意食嘅, 不過黎依度先知原來係配薄荷醬汁食, 有少少似nachos 果類嘅開胃菜, 薄脆之餘, 個醬汁都好夾,令人食落唔覺太乾。跟住嘅小食係牛肉咖哩角, 朋友話聽人講幾好食架, 所以試試, 我覺得依個咖哩角幾抵食下, 整到漲卜卜, 饀料足之餘, 皮亦炸得恰到好處, 食落冇太油嘅感覺。到上主菜, 燒烤拼盤, 入面主要有魚, 羊同雞, 雞有兩個口味, 我比較鍾意tandoori味, 即橙色果隻雞, 香料醃得好入味, 燒烤得黎肉唔會太燶, 好香口好juicy, 正! 魚塊都好有水準, 羊就唔係我嘅favorite黎, 所以朋友都唔客氣咁幫我ok左佢, 佢最鍾意食羊。 另一個主菜係咖哩牛肉, 依個特別用黎送印度薄餅或者飯, 咖哩牛肉整得好淋, 食落唔算太辣, 好易入口。 印度薄餅我地就揀左最傳統果隻, 超大塊, 軟熟得黎熱辣辣, 我未點咖哩黎食都忍唔住食左半塊, 一盤餅大概夠三個人分, 咖喱一煲就大概可以夠配兩盤餅咁上下啦, 可惜我地得兩個人, 唔係我地應該可以再試下唔同味嘅薄餅, 好似芝士, 薯仔同牛油味都有, 大家可以黎試下。成個晚餐食得飽飽, 最後侍應介紹左我地飲一杯比較milky 嘅乳酸飲品, 幾正下架, 甜品就真係食唔落啦, 唯有下次有機會黎再食過啦！…Read More

自問平時食開火鍋放題, 無論係日式, 台式或中式都唔算少, 不過今次有位朋友就帶左我去一間食串串嘅火鍋放題店食飯, 都真係幾特別吓！先講餐廳位置, 位於大街地鋪, 地鐵站上黎行一陣就到, 好易搵。餐牌有分散叫同任食兩款, 我建議揀放題, 咁先至食得痛快啲架嘛！餐廳細心位係佢已經準備左一次性圍裙, 包唔會整污槽你啲靚衫。打咭位係佢包濕紙巾, 當你見到個包裝同上面寫嘅字, 你就會知點解架啦, 依個等各位自己發掘一下 由於本人唔食得太辣, 朋友特登就我揀左兩個都唔辣嘅湯底, 其中蕃茄味果個我比較鍾意。嘢食就大部分放哂係餐廳較入嘅一個大冷櫃上面, 見款式都真係幾多下, 主要有串串, 較上位置有一盤盤已經分好嘅菜盤, 仲有不同種類嘅麵, 有啲我都係第一次見。不過最要留意嘅係最下層, 有好多唔同嘅海鮮, 好似蜆, 蝦同魚之類, 同我覺得最值回票價嘅雪花牛, 睇啲紋就知係靚嘢啦！由於我第一次食, 侍應都有介紹下一啲特別嘅嘢等我地試下, 例如係可以當餐前小食嘅串王酥肉, 好入味, 有啲似台式炸豬扒。火鍋料我就專攻串串, 同兩種牛, 除左雪花牛超好味外, 另一隻牛都唔錯, 串串嘅種類就真係太多, 不能盡錄, 我比較鍾意佢嘅泡菜牛同金菇肥牛卷, 用串串嘅好處係直接用手落同用手攞果種快感, 加上一兩啖又一串, 容易入口, 傾下傾下就可以KO左好多串, 我同朋友啲戰績都唔錯, 你地睇相就知啦！哈! 如果各位想一路食下嘢, 一路同朋友傾下計嘅話, 我想依間串串火鍋都應該係一個唔錯嘅選擇。…Read More

今日同朋友行旺角, 朋友介紹我試左一間用羅漢果汁整嘅涼拌滷味店, 聽聞依間細細嘅小食店係元朗同荃灣都好出名吓, 我更係唔執輸要試食一吓啦！朋友發板, 幫我點左個乜都有啲嘅拼盤, 眼見有紅腸, 生腸, 牛柏葉同扎肉, 醬汁有甜醬, 辣醬同芥辣醬, 生腸同牛柏葉食落超爽口, 我覺得其特別之處正就係羅漢果汁, 味道十分清新, 比起平時食開以豉油汁同甜醬撈嘅口味有所不同。鍾意街頭小食, 或對滷味有興趣嘅朋友, 一定要黎試下啦！包你冇介紹錯! …Read More

今日朋友帶我去食拉麵, 地點係銅鑼灣一處比較少人行經的地方, 原來那裡有一間隱世般的拉麵店, 叫拉麵jo。這裡有比較傳統的拉麵bar檯同普通四人檯可以揀, 餐單主要有兩種類的拉麵可以選擇, 有傳統的湯拉麵同沾麵兩種, 我選了木魚豚骨沾麵, 朋友就選了豚骨拉麵, 另外再加了小食章魚小丸子。沾麵湯底很濃, 特別之處, 是食之前有個溫馨提示牌, 圖文並茂, 教你怎樣食法。由於選擇了沾面, 面是另外分開上的, 說真的, 面份量很大, 一個人食完已經飽了, 所以雖然小丸子很好味, 我最後只食了兩粒。整體上味道很好, 之後聽朋友講在圓方亦有一間, 如果住九龍的朋友可以選擇去另一間會比較方便。…Read More

好耐都冇食個打冷啦, 今日趁人多, 朋友帶咗我地去灣仔打冷。餐廳係傳統茶記格局, 價錢算大眾化, 我地有成六個人, 所以叫咗好多嘢食。先黎潮式烏頭, 係凍食嘅一道菜, 魚食落鮮甜, 配埋酸汁食一流。 之後係鹵水拼盤, 眼見都起碼有六七樣嘢, 墨魚, 紅腸, 大腸, 鵝片等等, 老板仲教我地點少少辣汁食會更加野味, 一個字正!由於在坐好多人鍾意食鵝片, 所以我地另外亦叫左一碟剩鵝片, 啖啖肉之餘, 鹵水醃得啱啱好, 唔會話太鹹果隻, 唔夠幾分鐘就俾我地班食貨KO左。再黎有牛腩同韭菜豬紅, 兩樣嘢都係大大份, 啱哂幾個人分, 牛腩食落口感同味道都very good, 屬水準之作。 韭菜豬紅同樣出色, 難得韭菜唔老, 所以我地中間再加多左碟剩韭菜開心share。至於送啤酒嘅小食, 當然唔少得椒鹽魷魚啦, 今次叫左個椒鹽魷魚同九肚魚雙拼, 同樣大大份, 兩樣嘢都炸到金黃甘香。食到依度, 其實都飽左大半, 不過冇飯同冇麵不歡嘅朋友, 亦自動波咁叫左個揚洲炒飯同星洲炒河, 兩碟小炒都鑊氣十足, 不過可能真係叫得太多嘢, 所以最後都食唔曬, 個個都捧住個肚走人, 所以下次再嚟要再節制下啦。…Read More

上個禮拜老友帶左我去一間好有特色嘅樓上cafe 食飯, cafe 用左懷舊玩具做主題, 一入到去已經覺得自己去左間玩具博物館咁, 老板嘅珍藏真係好多, 我本身都係玩具迷一名, 依個地方對我黎講絕對係個天堂。未夠時間細心欣賞老板珍藏, 我嘅老友已經要施展招魂術招我返黎點菜。依度有幾多一人同多人餐可以揀, 餐通常已經包左沙律, 蒜蓉包, 主菜, 甜品及餐飲, 係銅鑼灣地區, 百鬆啲有咁嘅份量算係好抵食。我同老友各叫左個一人餐, 首先係沙律同包, 沙律個醬唔錯, 撈得幾好, 不過個包仲正! 有哂芝士同蒜蓉係面, 勁好味, 如果可以再大塊啲就perfect 啦！ 而主菜就有兩個, 分別係蕃茄蘑菇煙肉意粉, 同燒豬仔骨拼薯條, 前者蕃茄味濃, 睇得 見有好多片新鮮蕃茄混在其中, 感覺健康之餘, 意粉亦煮得唔錯, 唔會話太淋果種, 抵讚! 豬仔骨都煮得好入味, 唔太難切, 加埋有燒烤醬嘅薯條, 無得彈! 甜品就有雪糕泡芙, 細細粒容易食, 我地一口就KO左佢lu。整體黎講, 全個餐份量十足, 如果有幾個人一齊share, 可以試多啲唔同嘅嘢咁就最好啦!以為咁就埋單走人? 咪住先! 我同朋友都見到cafe 放左部街機係度俾客人任玩, 我哋更係要玩番兩手, 搵番啲兒時回憶返黎啦! 其實依間cafe仲有其他寶藏架, 有興趣既朋友, 不妨黎發掘一下,包你有意外收獲! …Read More

有好朋友喺外地返嚟度假, 當然要聚一聚啦, 朋友係半個鬼佬, 之前同佢去食中餐佢好似冇乜興趣咁, 所以今次特登揀咗間喺尖沙咀海旁嘅西班牙餐廳佢試試, 希望啱佢口味。餐廳屬西方酒吧格局, 分室內同室外位置, 由於夏天天氣比較熱, 所以我哋都揀咗係室內坐。聽侍應講廚師係西班牙人, 啲餸比較地道, 我哋先叫咗兩杯mocktails, 之後再點咗其他嘢食。順帶提一提餐牌真係冇中文架, 只有西班牙文同英文, 以我有限嘅英文水平, 只可以講係勉強都睇得明果隻啦！😄先黎介紹下mocktails, 我果杯叫Tu Sonrisa, 入面有芒果, 橙, 青檸汁同薄荷mix埋一齊, 開胃得黎清甜可口! 朋友果杯就唔記得左個名堂係乜, 不過見到有隻辣椒放係上面, 都幾得意吓！(朋友都好想知道有咩用途, 不過最後都冇問到侍應, 所以只能成為依餐唯一嘅迷團)。到嘢食黎啦, 唔好問我地兩個人點食得哂咁多嘢, 總之今餐真係幾豐富下。先黎係tomato cream striplion carpaccio, 面頭係半生牛肉, 配上以蕃茄為主嘅醬汁, 下面批底係酥皮餅乾, 食落似係食緊pizza咁款, 用黎送酒一流。 第二味, bikini, 其實即係芝士火腿飛碟, 多士燶燶地超好味, 加埋芝士同火腿黎食, 減緊肥嘅朋友真係要控制一下。接住係魷魚奄列, 同樣係蕃茄醬, 配奄列食口感唔錯, 特別一讚係魷魚經過略炸之後, 非常香口, 我地兩個人share一份, 份量啱啱好。之後有duck cigar, 個名同賣相都幾得意吓, 實質係鴨肉春卷, 鴨肉食落新鮮, 味道都幾濃吓, 不過個精髓其實係個白色醬果度, 超好味! 主菜叫左個白汁鴨肉西班牙飯, 唔駛講嘢, 剩係睇幅相已經知道有幾creamy吓, 朋友特別鍾情個白汁, 我就比較欣賞啲磨菇多啲。 基本上食到依度都已經包哂, 只不過要食嘅嘢仲未食完, 我朋友仲想叫埋甜品試試, 佢點左個almond cake, 都算係依度嘅特色嘢, 賣相好似個漏斗咁, 食落就係平時食開嘅muffin果種質地, 甜甜地唔算太漏果隻。整體餐飲體驗值五星, 無論環境, 氣氛同食物都好有水準, 值得一試。…Read More

上星期同朋友去左形點果間極上大瀛喜食放題, 我地揀左9點後嘅特價時段食, 以為唔駛等, 點知原來夜啲都係咁多人等, 好彩朋友早到, 所以等左一陣就入得。同平時食開既放題唔同, 依度個setting係有一部分自助, 一部分係落order叫嘢食嘅。自助部分有小食bar, 甜品櫃, 雪糕櫃同飲品櫃, 落order就同其他一般放題一樣, 有大大本order 紙俾你落單。我地快速咁落左order之後就出左去自助小食bar 睇下有咩好食, 小食bar 都幾多嘢下, 除左平時見到嘅螺肉同中華沙律果啲之外, 仲有比較小見嘅嘢食, 好似韓式泡菜, 涼拌青瓜, 乾徧四季豆等等。既放便又唔駛等, 當前菜食一流。開左個胃, 其他放題嘢都一路黎啦, 先上刺身, 主攻三文魚, 大蝦同帶子。三文魚同帶子都係厚切, 口感滿分。 大蝦睇相就知唔你平時嘅甜蝦size, 剩係依三樣嘢都值得encore, 屬回本首選。 壽司就試左佢幾隻手握創作壽司, 特別推介有鵝肝同黑松露配料果兩款, 超好味之餘, 細細粒易入口, 唔會太哂位食其他嘢, 至於蔥吞拿同芥末八爪魚軍艦依兩隻都係我每次放題必點嘅, 同樣冇令人失望, 只可惜要留肚食其他嘢, 所以今次叫左一round就要收工。黎到熱食, 首推花膠, 你冇聽錯, 係我估唔到會有仲整得幾鬼好食嘅一道餸, 花膠煮得好淋好入味, 朋友讚不絕口。之後有大路嘢, 清酒煮大蜆, 一口牛, 天婦羅蝦, 焗芝士蠔, 雞軟骨串同翠玉瓜。。。等等, 每樣都整得唔錯, 我依家剩係寫返出黎都有一種好飽嘅感覺。不過飽還飽, 甜品都係要食嘅, 依度嘅甜品櫃都好大好多選擇下, 而我係冇乜戰鬥力嘅情況低下, 只可以選擇性地試左個牛乳布丁同雪糕, 下次再黎食放題嘅時候, 要留多啲戰鬥力俾甜品先得!…Read More

上個禮拜同老豆做節, 老豆發板話要去佐敦嘅順德公食, 原先以為只係一間普通酒家, 不過試完先知係好嘢! 先講餐廳格局, 依度一入黎已經俾我一種懷舊嘅菜館feel, 聽老豆講間嘢好有歷史, 係佢個年代已經好出名咁話。我地唔係咁識叫嘢, 所以就問左侍應, 睇佢有咩介紹, 佢最後幫我地發板, 寫左四樣嘢, 我當時即刻問, 我地有三個人會唔會唔夠食, 佢就笑笑口話驚我地食唔哂就真。果然, 啲嘢食一黎, 我就知連白飯都可以唔駛叫啦。四樣嘢除左一樣係正常size之外, 其餘真係好大件頭! 第一道菜係煎釀三太公, 三太公包括有魚丸, 魚肉釀蓮藕同釀青椒, 每樣都煮得好香口, 好好味, 特別係藕餅, 簡直冇得彈! 第二道菜係西蘭花帶子皇, 剩係睇帶子嘅份量同size都知和味啦, 每人至少分到兩三隻, 道菜煮得火喉十足, 帶子炒到有少少金黃色, 勁野味! 之後再黎嘅係秘製骨, 成個大鍋上, 上枱嘅時候有果種好似食緊鐵板餐嘅咋咋聲, 骨食落好入味, 熱辣辣且有少少食甜骨嘅感覺, 其他配菜亦都因為吸左啲醬汁, 所以特別好味。。。正當我地努力將枱上面嘅嘢食清得七七八八嘅時候, 最嚇人嘅時刻來臨啦, 侍應同我地講主菜到, 佢幫我地打開左中間個爐頭, 之後另一位同事就端上一大鍋嘢食上枱, 這個有名堂嘅餸叫翅湯枱面蒸野生鯇魚, 真係超巨型。佢係一餸兩食, 甚至三食都得嘅餸, 一食魚, 二當魚湯飲, 三當打邊爐湯底, 非常特別。大廚親自出黎同我地介紹依味餸, 佢話依個係淡水魚嘅極品, 當然一啲都冇花假啦, 魚夾起一望有透明感, 係新鮮魚先會有, 而食落就清甜可口, 同平時蒸魚係兩回事。湯要趁熱飲, 濃味到難以形容, 我地一路話飽, 一路將啲湯差唔多飲哂咁滯, 好可惜係我地試唔到第三食打邊爐啦, 大廚講過用黎送米線同肥牛好正咁話, 無奈戰鬥力有限, 依一個任務可能要留反下次再黎先可以完成啦。不過見到阿爸同阿媽都食得好開心咁嘅樣, 依餐父親節餐應該交足差啦！…Read More

今曰同朋友踩單車入大埔, 晒左成朝, 朋友話都係時候食吓嘢, 抖一抖啦, 咁就揀左依間叫深仔記嘅餐廳開餐。可能啱啱做完運動比較肚餓啦, 我哋兩個人都叫左幾多嘢吓, 先黎牛腩撈同雲吞撈, 然後整個肉丸粥同炸油條, 再加兩碟油菜。朋友唔食牛, 所以牛腩撈我一個人KO哂。牛腩炆得好淋, 好夠味, 如果唔係朋友唔食得, 我一定會叫埋牛筋試試。撈麵都唔錯, 特別係加左腩汁, 唔太乾之餘, 用黎送牛腩一流。至於雲吞, 鮮蝦味十足, 大大粒, 一啖食完最痛快。再黎試個肉丸粥, 豬肉丸算唔太濃味果隻, 食落單牙, 粥底食落清甜, 如果想食得清啲嘅話, 依個粥啱哂, 另外, 油條幫你切埋上枱, 方便share, 可能因為好耐冇食過油條, 我哋竟然仲叫多一客嚟食, 勁!最後食埋油菜, 有生菜同通菜兩種。個靈魂係蠔油同腐乳, 加埋少少辣椒醬食, 真係冇得輸! 我諗依餐可以算得上係粥粉麵大餐! …Read More

今日約左朋友出旺角食放題, 朋友揀左依間叫神戶屋嘅餐廳, 話之前食過ok, 特別係刺身, 咁我當然要試一試啦！咁啱我地做嘢嘅地方離依度唔遠, 所以我地趕得切食頭場, 可以揀佢嘅特價時段食!上到餐廳, 侍應就安排我地坐左係近門口窗邊既卡位。 見一切準備就緒, 係時候開始戰鬥了!快速剔完第一疊點餐紙之後, 我地就飲下嘢吹下水咁等, 唔駛五分鐘, 頭盤刺身就上場啦！ 先講三文魚, 真係必食之選, 厚切且見得到係魚腩位, 直情係睇見都流口水果隻! 跟住試帶子, 大大粒, 食落鮮甜肥美。蝦就真係有好多款揀, 不過我個人就鍾情甜蝦多啲, 因為又好食又方便。 其他刺身都唔錯, 我同朋友都有再追加。仲有要提一提係依度食係有海膽刺身送架,  所以記得落order呀!食完刺身, 再轉戰壽司, 當然火灸三文魚係必食之選, 好juicy。另外我哋點左蔥吞拿同芥末八爪魚壽司, 兩隻都好好食, 如果唔係要留肚食其他嘢, 我真係會再追加都似。之後都有叫左其他回本嘢, 包括焗芝士大蝦, 炸天婦羅蝦, 兩隻都係邪惡之物, 女士食之前要諗下。覺得太滯嘅話, 可以試下有泰菜feel嘅飛天通菜, 另外有茶碗蒸蛋同冷麵都係唔錯嘅選擇。朋友未夠喉, 所以再叫左個火鍋同鰻魚飯, 至於個火鍋我就冇參與啦,真係冇哂quota, 不過見到可以揀嘅配料都幾多下, 要試嘅話可能要等下次連埋食唔到嘅蟹粥一 次過試啦！…Read More

今日約咗朋友喺形點睇戲, 見仲未開場, 所以就同朋友搵下睇下有乜好嘢食下, 咁啱喺戲院對出附近見到一間叫做金田家的拉麵鋪, 再睇下menu, 都好似幾吸引下, 所以就決定試一試。雖然未到七點, 但係餐廳都差唔多full哂咁滯, 唔知嘢食等得耐唔耐, 所以我同朋友都快速咁揀咗兩個黑豚拉麵, 另外, 我比較大食, 所以我地再加多個剩叉燒同一個北寄貝沙律一齊share嚟食。同朋友等左五分鐘度, 啲嘢食就黎到啦！拉麵份量適中, 軟硬度我揀左軟, 比較易入口同吸湯, 叉燒真係同餐牌show出嚟嘅完全一樣, 多到可以鋪滿外圍一圈, 所以我哋都開始後悔加左個剩叉燒俾自己, 而唐心蛋係另外加嘅, 超好味! 拉麵嘅湯比較濃味, 我覺得鍾意食拉麵嘅人一定會好滿意。仲有不得不提嘅係喺枱側邊有一個細壺, 入面裝左啲醃過嘅辣辣菜乾, 鍾意食辣嘅人一定要試下撈埋啲拉麵嚟食, 可以一次過食到兩種唔同味道。差啲唔記得咗個沙律, 小食嚟講份量都算大, 蔬菜同北寄貝都好新鮮, 北寄貝食落爽口, 食拉麵之餘搭埋依個小食就一流啦! 未去過嘅拉麵迷值得一試!…Read More

今日同朋友去左一間叫Happyland嘅樓上cafe聚一聚。餐廳位置係尖沙咀，由地鐵站行上黎唔駛兩分鐘就到，超方便。由於我同朋友都放早，所以六點鐘已經到左餐廳，侍應帶我哋坐低之後，隨即細心介紹依度嘅餐牌同特色嘢食俾我哋揀，朋友見到有美少女戰士做主題嘅甜品，已經講要留定肚咁話。見朋友好快落完order，就急不及待咁搵左依度兩位鎮店之寶影相！鎮店之寶講緊係依度嘅兩隻貓！一隻白色，處於長期冬眠之中，另一隻黑灰色，肥嘟嘟超得意！玩左一陣，嘢食黎啦！先黎係小食，我哋點左個明太子泡菜釀雞翼、吉列炸蠔同焗芝士大傘菇。雞翼味道好特別，我真係未試過用明太子同泡菜一齊整嘅餸，原來依兩樣嘢夾埋都真係幾好味吓，我誠意推介。炸蠔，顏色金黃，屬邪惡之物，我明明喉嚨唔太舒服都冇埋咁多，食左先算，因為唔食我仲後悔，炸粉唔算太厚，入面蠔肉蠔汁熱辣辣，兩樣夾埋一軟一脆，掂！芝士大菇，係我嘅至愛，唔係咁多地方有得食，唔好問我有幾好食，我唔識形容俾你聽，總之嚟到就點啦！我冇老點你架！唔好食搵我！哈！食到依度我哋有少少後悔，因為已經飽左大半，好彩我哋剩係點左一個主菜，香煎牛柳粒飯，兩個人share已經好夠，牛柳粒幾好食，唔老，配黑椒汁飯，正！食哂熱盤，係時間試下個甜品啦，侍應幫我哋揀左兩個美少女主題甜品，一個係蜂蜜窩夫士多啤梨雪糕，一個係綠茶蛋糕拼藍莓雪糕。窩夫鬆脆且份量較多，連埋雪糕食都好肥仔吓！綠茶蛋糕都幾ok，不過我比較欣賞個藍莓雪糕。其間我哋仲見到隔離枱叫左個勁嘢，叫怪獸雪糕，超大個，依個真係唔駛叫其他嘢食，佢本身都可以當係一個可以share 嘅主菜黎食，最啱影相呃like 人士，希望第二次再黎嘅時候我可以點依個就好啦！…Read More