Kiki Au's Profile

今日同朋友嚟灣仔呢間西班牙餐食晚飯，我哋嘅座位喺一樓要行樓梯上去，餐廳裝修有花心思，枱之間距離足夠，私隱度好高。侍應都係外國人，坐低之後會同你解釋吓餐牌，都幾熱情，成餐飯都會主動加水問吓你食物嘅質素，服務態度值得一讚。麵包：麵包上菜嗰陣唔暖，半碟有兩種醬汁，一款係蒜蓉醬，另一款唔係好食得出，好似係蔬菜醬，呢兩隻醬好開胃，越食越肚餓吞拿魚他他：醬油半吞拿魚他他，表面加左少少魚子，吞拿魚下面有牛油果蓉，再用半圓形嘅脆脆裝住。成道菜層次好豐富，有吞拿魚嘅鹹味，又有牛油果蓉嘅獨特香味，再加上外層嘅脆脆。西班牙香腸加麵包粒：呢道菜其貌不揚，成碟黑媽媽，點知一放入口完全改觀，香腸十分之好食有西班牙嘅味道，加上麵包粒唔會覺得味道太單一。蒜片辣大蝦：大蝦雖然帶殻但已經開邊挑腸，令到蝦肉可以充分吸收醬汁，辣辣地加上蒜頭嘅味道，好惹味青口：青口係新鮮嘅，爽口無沙，醬汁應該係番茄醬為基礎，整道菜都唔錯焗雞伴薯菜：雞一般，份量好多可惜雞肉煮得過老。薯菜反而幾好食，不過食咗咁多tapas，去到呢度已經食唔落🙈牛扒：牛扒質素唔算頂級，幸好廚師嘅功力好好，牛扒煮到恰到好處，伴碟嘅烤雜菜亦都無馬虎，呢度主菜我哋就清晒Brownie: 朱古力味好濃郁，混入左合桃碎，加上雲呢拿雪糕，為呢個晚餐畫上完美嘅句號…Read More

今日嚟到海港城呢間專門食松露嘅餐廳食午餐，預先訂咗枱唔駛等即刻有得入，我哋坐低嗰時唔算多人，揀咗個weekday set lunch。麵包：麵包上枱嗰陣唔係暖嘅，伴碟有兩款牛油，一款松露、一款海鹽。松露龍蝦湯：個湯十分濃厚，好重龍蝦味，入面有幾舊龍蝦肉，松露反而比龍蝦味掩蓋左煎鴨肝：煮得好出色，雖然唔係鵝肝，但係煎得恰到好處，伴碟仲有蘋果，酸酸地中和返油膩感松露意大利飯：呢個意大利飯亦都好出色，飯粒軟硬程度煮得啱啱好，每一粒飯都比松露汁包圍，松露同菇類嘅份量毫不吝嗇和牛牛柳：牛柳本身肉質上盛，師傅亦都好好掌握火候冇煮得過火，伴碟嘅蔬菜亦都冇忽略調味，可惜嘅係份量比較少，作為主菜男人食就未必夠🙈松露焦糖燉蛋：焦糖燉蛋表面有兩塊松露，雖然松露嘅味道唔太突出，不過焦糖燉蛋做得好出色，中間仲有一小塊焗過嘅合桃，平衡返焦糖燉蛋嘅口感，豐富左成個層次松露奶凍：呢個甜品可以算係成餐飯入邊松露味最突出，一放入口齒頰留香，可能係因為奶本身冇乜味道。不過甜品係松露味個人覺得有啲奇怪😂…Read More

今日同朋友嚟深水埗食晚飯，深水埗出咗名多好嘢食，其中一間好出名嘅餐廳就係蘇媽蘇媽。我哋今日早到唔使等，店面都比較迫，坐得幾密。砂煲老鼠粉用砂煲上菜熱辣辣，有隻生雞蛋、豬肉碎、切碎晒嘅配料，下面鋪住老鼠粉。食落好惹味，不過比較多油，建議同朋友仔分享。椰香咖央多士同坊間食嘅唔同，冇咗嗰層牛油，層咖央都幾厚，多士焗得好脆，甜甜地，當飯前小食一流魚仔醬蘿蔔糕蘿蔔糕切成一口大細，煎香左再鋪魚仔醬，小小辣，一舊接一舊停唔到口玻璃魷魚配通菜魷魚份量好多，亦都夠爽脆，唔會好硬。呢碟菜都比較辣，唔食得辣嘅朋友就唔好叫啦…Read More

今晚約左舊同事食生日飯，壽星話想食韓國菜。係Openrice見到呢一間評價唔錯，仲可以訂位，決定食呢一間。 餐廳唔大，一眼睇曬，門口好多人等位，好彩有訂位。餐廳裝修富現代感，窗邊一排卡位，坐得都幾舒服。 淑女炒年糕用韓式鍋上，有年糕、炸過ge紫菜包飯，上面加左大量芝士碎，非常邪惡。年糕分量多，夠稔身，D汁惹味又夠辣。紫菜包飯ge炸漿一D都唔厚，食落脆脆地，不過個飯係無餡料。 岩漿芝士雞一上菜即刻要影，正中有個空心ge麵包裝住融化左ge芝士，外圍有大量炸鷄圍住，仲有幾塊多士。可能因爲麵包唔保暖，芝士硬得比較快，想有拉絲效果要快D食。多士又薄又脆，點芝士好正。炸鷄本身無太多調味，應該係預左點芝士，個人覺得點年糕個辣汁更加好味。…Read More

之前已經想同同事食呢間餐廳，不過要6人以上先可以訂，今日決定試下walk-in，好好彩有最後一張枱。餐廳唔算大，一入到去仿佛返左老香港，墻身地磗都有八九十年代感覺。 湯出乎意料地在西式咖啡廳會上中湯，仲要用公雞碗。個湯清清淡淡，有幾塊薄切青紅蘿蔔。 火腿芝士窩夫等左差不多20分鐘，不過係值得。兩塊窩夫夾住火腿、芝士、生菜，窩夫仲熱，令到D芝士融化曬，配合得天衣無縫。 慢煮豬軟骨飯一上菜俾個分量嚇親，豬軟骨原條上，白飯放得滿滿之餘上面仲有隻蛋，一個大男人都未必食得曬。雖然豬軟骨原條，但非常軟身，輕易咬開，軟骨同肉多入曬味，撈飯一流。 卡邦尼意粉意粉比較多汁，同事話食落有蛋黃醬味。個人覺得都幾heavy，我地就三個人share，一個人食可能會好膩。 甜品套餐送一人一個雪葩，食落應該係莓味，同事話好酸，個人覺得幾好味，係莓味好重，有D人造feel。…Read More

呢一間餐廳係深水埗好出名，每次日頭經過都係排長龍，今日同朋友夜晚10點左右黎食，唔洗等就入得。 美味酸齋：酸齋可以係車仔面配料，因爲我地太中意食，所以另外單點一碟。酸齋酸甜比例剛好，十分開胃，加落車仔面，麵根吸曬湯ge精華，必點！牛孖筋、豬腩肉、魚角米粉（腩汁小辣）：牛孖筋十分稔，食得到D骨膠原；豬腩肉見到一層厚肥肉，夠曬肥，豬肉厚度剛好，唔會好膩；魚角正正常常。 牛肚、通菜河粉（清湯沙爹汁）：牛肚分量超多，起碼有7、8件，牛肚最怕好難趙，呢到完全無呢個問題；通菜分量都好多，不過有D鞋口。 黎呢到食車仔面，識食一定會加辣蘿蔔，味蕾大刺激，食完身水身汗，嗜辣ge朋友必定要試。…Read More

今日同同事食lunch，揀咗呢間餐廳，雖然個名叫嫲嫲雲吞雞，其實午市係食小菜。係呢頭都算受歡迎，要等一陣先有位。麻婆豆腐：豆腐同肉碎嘅份量都好足夠，好嘢味有少少麻辣，送飯一流。菠蘿咕嚕肉：肉好鬆化，份量亦都好多，配料例如青椒洋蔥都有鑊氣，睇得出係一齊炒唔係之後撈埋。野生椒炒牛柳絲：呢個調味好好，可惜係牛柳絲太少，配菜份量比較多。家鄉酸菜炒豬頸肉：豬頸肉炒得好腍，可惜係簿左少少。加埋酸菜好開胃，又係送飯之選。總括而言呢間餐廳性價比好高，份量唔少之餘仲要跟白飯同埋送嘢飲，打工仔食晏之選。…Read More

今日成班同事一齊食lunch ，揀呢間餐廳貪佢食物選擇多，有大枱，仲有得訂位。墨西哥粟米湯：稠稠地，都幾飽肚。調味好濃郁，好似食緊墨西哥脆片咁。豬肋骨漢堡:將豬肋骨啲肉拆咗出嚟，整咗做漢堡，啲肉好鬆化，燒烤醬好惹味，個包有烘過，唔錯。蒜香忌廉汁雞肉闊面：忌廉汁好濃郁，亦都足夠每一條意粉都有汁。雞肉都大塊，係稍為薄左少少。煙肉生菜蕃茄薄餅：呢個麻麻，冇乜醬係薄餅表面，得四篇番茄同一堆生菜，睇落冇乜誠意，下次唔會再叫。…Read More

同朋友喺太子打完泰拳，行入附近啲橫街搵食，見到呢間餐廳個餐牌幾吸引，入去試吓。雖然個名係越南菜，但係餐牌大部份都係泰國菜，兩個人帶咗幾樣菜式share試吓。海蜇芝麻雞沙律：諗住係沙律，份量意外地多，好好味，雞好入味，海蜇做到好爽脆。唯一係用得太多油，食到底有一小碟油，下次可以叫佢小油。咖喱（豬）：亦都係好大鍋，另外叫咗碗白飯送。豬肉係薄切，份量唔少。不過啲咖喱唔夠稠，掛唔到上豬肉。芒果糯米飯：芒果好甜。糯米飯熱辣辣，可惜係啲飯煮得太耐，腍左，冇咗糯米飯獨有嘅煙銀口感。有啲可惜。…Read More

今日同同事食lunch ，佢哋定左公司附近嘅一間餐廳，咁岩我又未食過。好彩佢哋訂咗位，如果唔係就要等。餐牌上面中、西、日食嘅食物都有，好難選擇，最後我哋每個人點一樣唔同嘅菜式交換試。咖喱牛肋肉飯：諗住係日式咖喱，點知都幾辣，唔食得辣嘅朋友點其他菜式會好啲。牛肋肉煮得好冧好入味，好推薦！雞肉檸檬青醬忌廉意粉：雞肉嘅份量唔算太多，檸檬嘅味道蓋過咗青醬，值得一讚嘅係整得好creamy。川式宮保雞丁飯：餐牌上面唯一一樣中菜，雞嘅份量多到食唔晒，煮得好入味，真係有少少麻嘅感覺，但係又唔會太辣，十分之推薦！…Read More

今日陪朋友嚟APM Apple Store拎iPhone ，順便食個下午茶，行過見到呢間餐廳裝修得幾靚，又好闊落，就坐低試吓。沙嗲牛肉麵：牛肉係肥牛，份量都幾多。沙嗲味道出色，個湯都有。唯獨係啲面腍左少少，唔知係咪我掛住影相😂菠蘿包+炒蛋：菠蘿包表面層脆皮稍為薄咗啲，厚身啲會更加好食。炒蛋就正正常常。流心吉列奶黃西多：炸得好脆，就好似吉列豬扒咁。入面個流心做得好好，一切就流晒出嚟。建議同朋友分享，因為實在太邪惡😈見到餐廳入面好多台客人都點一個三層下午茶set，下次再食都想試吓。…Read More

星期五晚同朋友嚟APM食飯，周圍都人山人海，咁岩行過呢間餐廳，做緊墨西哥菜活動，好好彩又有位，決定一試。Super Hero：辛苦左成個星期梗係要飲返杯。杯cocktail 顏色好靚，飲落口gin味都幾重，唔知係咪我飲慣酒🙈。青蘋果沙律：一上菜好驚訝，一條菜都見唔到，剩係得個青蘋果。點知放落口又幾好味，佢個汁好好食，雖然食唔出係乜嘢😂。辣肉腸牛肉薄餅：上菜嗰陣熱辣辣，啲芝士好重手，做到拉絲嘅效果，食多幾塊有少少膩，建議多啲人先點。墨西哥牛肉捲餅：呢道菜用鐵板上，又係熱辣辣，配料同埋芝士都好足夠，每一啖都食到餡料，值得推薦！…Read More

早排聽同事講，公司附近開咗間新餐廳，仲要排隊，決定今日星期五去試吓有幾好食。肥叉燒丼飯：同事點嘅，試咗一舊叉燒，真係好好食，唔會好似出邊啲肥叉，見到一舊脂肪，而係均勻分布係啲肉入面，咬落去又香又腍，早知我都叫呢款😂。叉燒滑蛋丼飯：唔叫肥叉，就得普通叉燒，切得都幾薄，睇落去乾乾地，其實食落都好腍，當然比唔上肥叉。啲蛋炒得好滑，鋪滿成碗飯表面，啲飯仲有落豉油，帶出啲鮮味。建議想食嘅朋友，要有定心理準備排隊。同埋一定要點肥叉燒丼飯！…Read More

同朋友係尖沙咀食完晚飯，口痕想再食甜品，行過the one見到呢間蛋糕店竟然有西瓜蛋糕賣，之前想試好耐，就入去試吓。鋪頭唔大，但係裝修得好靚，坐得都好舒服。招牌草莓西瓜蛋糕：西瓜同個蛋糕好夾，小小爽加埋軟林林嘅海綿蛋糕，表面仲有玫瑰啫喱，玫瑰味好出，啖啖花香。星際花匠：朋友想食嘅無花果蛋糕，入邊有好大粒無花果，每一啖都食到。無花果唔係太甜，夾埋忌廉同蛋糕啱啱好。靜岡茶園：一放入口好香焙茶味，中間有一層香蕉，估唔到又幾夾。總括黎講，呢間餐廳無論裝修以致食物都係打卡一流，最適合一班姊妹黎high tea食甜品，建議想晏晝嚟嘅朋友可以訂定枱先。…Read More

今晚同朋友食晚飯，一時興起想食墨西哥菜，選擇咗呢間係諾士佛台嘅餐廳。餐廳好闊落，佔據晒全層，位同之間隔得好遠，好有私隱。墨西哥脆片：每次食墨西哥菜都一定要點。唔似出邊某啲餐廳直接用薯片，呢間餐廳真係用粟米片，值得一讚。上菜嗰陣熱辣辣，啲芝士仲係半溶，牛油果醬都俾得好多，唔會食幾塊就冇晒，好滿足。牛肉餡餅：其實啲配料同墨西哥脆片嗰啲差唔多，唔同係佢焗左，餡料入面有牛肉，都係熱辣辣，牛肉好冧，超級惹味。…Read More