Loka仔的個人專頁

今日唔洗番工，就去最近新開嘅商場V Walk行吓街食吓嘢咁啦，咁今日又咁鬼熱，我就食D冇咁熱氣嘅lunch 啦。之前都喺其他地方食過呢間Bugis 㗎喇，味道好，lunch set性價比又唔錯，咁就再食啦。我今次食嘅lunch set係麻辣無骨海南雞飯套餐。海南雞一如既往咁滑溜、鮮嫩，皮肉分明，啖啖雞肉，份量都足夠中午食嘅。佢個麻辣汁真係起到畫龍點睛嘅作用，麻辣度洽到好處，配合鮮滑嘅無骨嫩雞，真係一啖一次新鮮感；一口一個海南島。再講吓個油飯，每粒米飯都沾滿油光，上枱時仲感受到飯氣蒸騰，呢一刻，我覺得有種家嘅感覺......…查看更多

今日同事提起話想食水煮牛肉，開吓胃咁喎，咁咪search吓公司附近有冇咩川菜館咁囉，結果係都唔洗搵，另一個同事就主動提議去一間叫“美味廚”嘅餐廳食。但我第一時間心諗：“美味廚呢個名咁似普通餐廳名嘅？係咪中式快餐嗰D friend 呀？D嘢食會唔會好hea㗎？”但我同事一再用TVB《十二傳說》女主角潘朵嘅名句強調：“隱藏嘅比顯露嘅更加重要，店主做咁多嘢只係想模糊視線，但我已經睇清楚佢嘅原點！”。好啦，既然佢講到咁肯定，我亦只好親身嚐試，搵出佢嘅美味原點！但去到店舖先知，原本佢哋係樓上舖，平時係主力做晚市火鍋，但其實午市都有好多好正嘅撚手小菜。下面我就逐一介紹吓佢哋嘅小菜啦~…查看更多

一直都鍾情於舊式香港冰室，嗰種屬於上一個時代香港人嘅年月感，係幾多廣告同marketing 都取代唔到。從一家人到冰室食早餐到兩口子落嚟飲杯甜蜜紅豆冰，又或者三點三約埋同事蛇王飲𠻪茶食件撻，太多太多嘅港人專屬回憶，都係嚟自呢D“一成不變”嘅冰室/茶記。有時候我會諗，伴隨經濟高速發展而消失嘅，除咗係買少見少嘅冰室，更有可能係存放住幾代人嘅回憶產地。而講番呢間有六十幾年歷史嘅豪華咖啡茶廳，從門面裝修就可以見到佢嘅年代感，每次嚟到都會俾人一種放慢節奏嘅錯覺。而佢嘅嘢食都一樣咁傳統同出色，我今次就食咗蛋牛治同凍奶茶，大熱天時最啱就緊係坐喺有冷氣嘅冰室，嘆番杯凍奶茶啦~…查看更多

上個禮拜落咗成個星期嘅雨，都冇機會行遠少少食lunch，咁見今日天氣咁好，風和日麗，就約埋D同事一齊出去食吓飯啦，咁三五成群嗰陣，最好就緊係去飲茶啦~ 於是我哋就去咗公司附近李公館試吓，幾年前都知呢間餐廳攞過米芝連，但嚟到先至發現原來別有洞天。小小嘅樓面卻非常骨子，地方唔大，但又唔會一味加枱或者收窄D通道，令到地方好細好逼；相反，足夠嘅空間反而令粵式飲茶體驗得到最好嘅詮釋，而喺呢個寸金尺土嘅土地上，留白係一件非常寶貴嘅事。講咗咁耐都未入重點添，我地一行四人，叫咗幾籠佢嘅拿手點心同埋一客籠仔蒸龍躉頭腩糯米飯，樣樣都好好味。但就個人嚟講，呢個籠仔飯真心正！皆因睇個樣唔覺得有幾勁，而真實嘅味道就200分，呢種冇期望之下所獲得嘅喜悅，用“好味”、“意外之作”呢D咁嘅形容詞都已經唔夠，簡直應該用“驚為天人”嚟表達我內心嘅嗰份意外感。龍躉頭腩經過土法蒸煮，鮮味得到充分嘅保留，同時因為用蒸煮嘅方式，魚油同食油喺每一粒糯米之間停留、吸收，令糯米軟糯醇厚嘅香味無縫揉合油甘之香，更令口腔內每一𠻪嘅體驗得到全方位嘅享受，而呢一種做法簡單、味感鮮活嘅用餐感受，令原來已經難得嘅鬧市飲茶體驗，得到更進一步嘅昇華，李公館，我下次絕對會再嚟試過！…查看更多

呢幾年因為成日都要出Trip , 所以多咗食國外唔同嘅美食，但講到每次離開香港最令我懷念嘅，始終都係微小但卻偉大嘅香港本土食物。沙嗲牛麵、厚多士同熱奶茶呢個組合，絕對係幾十年嚟不變嘅黃金搭配。作為香港人，無論食幾多次都唔會厭，因為冰室同茶記嘢食，係屬於我哋嘅集體回憶。講番呢間敏華冰廳先，由之前佢仲叫“文華冰室”嗰陣，我已經係忠實fans，就算改咗名又開咗咁多間分店，食物質素依然保持一貫嘅高水準，沙嗲牛麵香濃入味、牛肉新鮮嫩滑，厚多士烘得啱啱好、香脆可口，而多士表面淨低嘅餘溫，就令冰凍嘅牛油融化得恰到好處，令幼滑柔和嘅牛油觸感喺厚多士表面得到一種默契級嘅配合同提升，喺脆同軟、熱同冷之間，我已經被感動到無法言語。最後，唔可以唔提佢杯奶茶。茶香飽滿、奶味細滑、一口入魂、百轉千回。一路都覺得港式奶茶就係香港嘅文化符號，奶茶用料雖然簡單，都不過係紅茶同淡奶，而口感上醇厚絲滑的奧妙，就在於撞茶呢道工序。撞茶，講到底就係茶同水嘅撞擊，至於要撞擊幾多次先可以得到最順滑嘅質地，就有賴經驗豐富嘅師傅喇，而呢種唔怕苦、唔怕錯嘅精神，正正就係香港人最可貴嘅精彩財富。香港加油，香港人加油。…查看更多

之前去台灣就試過一芳，真心覺得佢哋嘅水果茶又新鮮又健康。喺香港都有耐唔耐飲吓，而家仲可以喺南昌V Walk 商場飲到，鋪頭仲要設計咁有古早味，而仙草茶同冬瓜茶仲特別解暑，真係適合我哋呢都市人，隨時感受台式嘅慢生活。…查看更多

一直都好鍾意漁釧嘅嘢食，選擇多之餘仲要價錢親民，從每晚門口條長龍就知有幾受歡迎。琴日因為打風所以早咗收工，咁就獎勵吓自己啦。於是去咗南昌站V Walk新開嘅漁釧，餐廳嘅裝修依然咁日系，木材用料同一排日式大燈籠都俾人有一種去咗日本古代嘅感覺，相當有意思。而我今日試嘅係佢哋性價比甚高嘅“特上刺身御膳”，大大份海膽加唔同嘅魚生連沙律、前菜、味噌湯加蒸蛋，午市套餐都係208蚊咋 ! 等我下次再嚟食埋其他嘢先。…查看更多