bbbbyn's Profile

早排見到有人喺社交平台問：「上水有冇啲有Live Band嘅餐廳？」結果街坊們好快就推介左鳳鳴居(笑)。#鳳鳴兒童合唱團不定時演出九成時間都要排隊既鳳鳴居，夏天想去幫趁記得帶風扇仔。⸻淨係計湯底都有13款口味，今次嗌咗2款人氣雞湯麵：1. 芫荽雞湯麵 ─日落荽山 $61芫荽多到成座山咁，成碗綠油油好似落咗森林咁。建議啲芫荽一上枱即刻撳落湯度浸，鍾意食軟身嘅會更啱口味。除咗視覺衝擊，味道都一樣咁荽利，推介俾芫荽控一試。2. 蟲草花雞湯麵 $64冇芫荽山咁誇張，但都鋪滿咗差唔多三分一碗，湯底偏甜。一年四季，每次唔知食乜就會叫佢。⸻鳳鳴雞既然叫鳳鳴居，點都要講下佢既雞。佢哋用嘅唔係一般我雞見到既黃油雞，色澤偏白，但雞味香濃。肉質視乎分到邊個部位，煮雞既時間大致上都控制得唔錯，除非係中咗雞胸就會偏柴啲。⸻檸檬茶鳳鳴居嘅檸檬茶好有誠意，茶底夠濃，檸檬片通常有三塊以上，飲落好夠味。不過冰就比較多。⸻1. 炸三兄弟魚片頭、花枝丸、醬爆肉丸組成嘅「兄弟組合」，雖然喺凍肉舖都買到，但鳳鳴居用炸嘅方式處理，炸得啱啱好。尤其係醬爆肉丸，每次咬開都有肉汁，好啱幾個人Share嚟食。2. 可口可樂飲落冇特別，不過張單會有啲小驚喜，想知乜嘢自己去試下啦！⸻建議：- 麵量幾大，細食或者當日冇咁肚餓，可以考慮叫少麵。- 排隊時間長，唔想排咁耐，建議早啲去或者避開繁忙時段。- 建議去多幾次，可以試晒咁多個湯底。⸻鳳鳴居係一間有個性、湯底選擇多又好味道嘅街坊小店，帶出雞味，唔只食物出色，氣氛都好有驚喜既鋪頭。…Read More

同屋企人去咗大埔藝術中心食晚飯，揀咗主打手工意粉嘅 PENTOLA。餐廳由舊校舍活化而成，氣氛好好，裝修有心思。不過整體嚟講，真係 環境贏食物。⸻環境：前身校舍活化，紅磚配木質風，打卡＋chill 住傾偈都啱一入到去就覺得成個地方好唔似平時喺香港食意粉嘅場景：紅磚牆、木板間格、金屬感五金框架、同系列布藝餐椅&梳化配搭質感枱面，空間感十足。由一間舊學校活化改建，感覺特別有層次，成個場景啱晒打卡影相。我最欣賞佢啲細節位做得幾用心，例如見到侍應準備餐紙時，將螢光藍、紅、橙、綠四色順序排列備用，擺枱時每張都會有唔同顏色，未開餐都睇得出餐廳對環境同形象有要求。⸻服務：I人最鍾意嘅型 — 安靜、有效率、不會太熱情PENTOLA 用 QR code 點餐，不過員工比例非常充足，有需要即刻有人幫到手。自己唔太鍾意 overly-friendly 嘅服務風格，呢度啲侍應唔走熱情路線，但有正常禮貌、做事快，會主動加水。對我呢種 I人嚟講，係加分位！一坐低，侍應就送上一碟麵包同黑醋，食住等落單，細節又加一分。⸻手工意粉 vs 安格斯牛扒：出乎意料之戰1. 焗蒜蓉牛油大海蝦意粉（意外地失望）叫呢個意粉因為佢係主打，以為穩陣，點知一食落去有啲失望。意粉麵體偏粗，中間芯位置比較硬、整體偏乾。我明白手工意粉未必會似港式 al dente，但呢個乾到咬落去有啲攰，加上個汁又偏鹹。旁邊隻大海蝦可能因為太大隻，火喉唔易控制，有啲燒焦位置食落帶苦澀。屋企人食咗一半就放低，我呢個「清枱大師」最後幫手收尾。2. 炭燒安格斯封門柳配燒汁薯條（意外地驚喜）反而冇乜期望嘅牛扒，竟然好出色：「有肉汁、有肉香、冇韌筋」。揀咗五成熟，除咗頭尾兩件全熟之外，中間都係靚靚五成熟，食落滿意。（佢預設五成熟，如有喜好可以註明）頭尾兩塊熟啲嘅我分咗俾唔食見紅嘅屋企人，兩個人都啱晒口味，估唔到。薯條係粗身、外脆內軟，熱辣辣上枱，唔係「倒幾條就算」嗰種，配埋沙律菜唔會太膩，整體平衡得好好。⸻總結：下次會再嚟，不過可能只會叫返牛扒，加 Pizza 或者多啲人 share 幾道菜。呢間餐廳屬於 環境氣氛 > 牛扒 > 手工意粉 嘅類型。如果你去開大埔超級城附近，可以順路試下。無論係情侶、朋友、定屋企人，想慢慢 chill 住食餐飯、影下相、傾下偈，都係個唔錯嘅選擇。但…唔建議叫意粉，留返肚比其他菜式可能會開心啲。…Read More

無限時任飲任食，只需$150！森港最大賣點就係：唔限時＋任食＋任飲，只需$150。連酒精飲品都包括在內，打爆CP值。⸻首試「濃湯花膠雞煲」：雞件嫩滑有雞油香我哋今次試咗佢哋主打嘅「濃湯花膠雞煲」，雞件大約有20零件，細細件、嫩滑、有啲肥美，食落口感正，帶濃郁雞油香。至於花膠，人頭$150，同你講會漿口食到啖啖骨膠原你都唔信啦，但都係正正常常有啲咬口既花膠仔黎，個煲整體黎講都係正ge。除左濃湯花膠雞煲，仲有養身雞煲、椰子雲吞雞煲、豬肚雞煲、紅咖喱雞煲、火焰芝士雞煲等等，選擇眾多，絕對無揸流攤。而我地已經決定左下次試下卜卜蜆煲。⸻自助配料區超齊全：竟然連海鮮都任食！海鮮竟然都係任食！？我哋去嗰日員工主動推介叫我地記得食聖子，另外仲有常駐既蠔、青口、沙白、螺等，全部都夠新鮮，肉厚唔霉，真係好驚喜。Bonus！有次出去拎料，遇到位NPC店員主動問我哋要唔要蝦，之後佢直接入廚房拎咗碟二人份蝦（6隻）出嚟俾我哋，唔係蝦仔，隻隻都好似我咁大隻，啖啖肉！基本打邊爐配料應有盡有：肥牛、雞肉、羊肉、栢葉、水魷、魚片、丸類、響鈴、公仔麵、烏冬…樣樣齊！⸻飲品任拎：汽水、茶類、甚至酒精飲品都有！飲品種類黎講，基本汽水、茶類都有，連酒精飲品都任飲，適合一班朋友開心chill住飲飲食食一晚。⸻熟食中心冷氣排檔：行到最篤篤就見到由於森港喺街市2樓最尾嗰間，店員老遠已經會熱情揮手YO我地行過去。我哋大約六點去到，都坐左幾枱客，仲有好多位ge，到七點左右已經全場爆滿，冇限時＝早D去開餐喇！現場環境嘈雜，自在大聲吹水大中細枱都有，麻甩情侶、三五知己共聚、一大班friend 或者(大人)家庭聚腳都好適合；但始終大排檔環境，XYZ都會滿天飛，而且因為自助模式大家都會出出入入去拎野食，如果有小朋友就自行斟酌一下！⸻總結：真心抵食！平價任食雞煲控必試之選以$150無限時任食任飲計，有質有量有心機，唔論係雞煲邊爐愛好者、慳家族、定係一班朋友聚會，都會大滿足！住係大西北咁耐，聽完男朋友同中同介紹森港，都係hea左係嗰張「下次去食」名單度，到早排睇MM話熟食中心黎緊會裝修一年，即刻黎試一試呢間聽左好耐既陀地雞煲！聞名不如見面！大家都襯熟食中心仲未開始裝修，快D去幫襯下啦！各款雞煲都係$150，淨邊爐$138，仲有學生價$128，記得行到最最最尾，先搵到森港ahhhhh！ #森港客家菜 #陀地 #雞煲推薦 #打邊爐 #任食放題 #聯和墟美食 #聯和墟熟食中心…Read More