afoody15's Profile

1️⃣炸豬扒喇沙 $50雖說係炸豬扒，但唔知點解睇落比較似煎豬扒。不過唔影響味道，有少少鹹但肉質都嫩。喇沙湯底味道唔算好重蝦味，比較重椰汁味，食落都ok。而配菜有半隻烚蛋同豆卜，少咗一般會見到嘅芽菜/豆芽，覺得有少少可惜，因為整體食落口感好單一，如果食麵嘅時候食到少少芽菜/豆芽，口感上會更豐富，而碗喇沙望落都冇咁空虛。✴️整體而言，今次食到嘅只係普普通通嘅喇沙，又未去到其他人講到咁濃郁，或者期望太大，不過都希望有機會再食下其他麵/飯。…Read More

1️⃣大勝自選丼每個丼飯要揀最少三款刺身，我就揀咗炙燒左口魚、三文魚同帆立貝；飯底就揀咗白醋飯。成個飯正正常常，刺身食落都冇雪味或者霉霉爛爛。2️⃣火炙狂牛丼 $108呢個真係超推薦！！蒜香味好出，帶少少辣，調味啱啱好，中間仲有隻溫泉蛋，撈埋啲飯同蒜片一齊食真係超滿足。而火炙牛一啲都唔柴，食落口感啱啱好又嫩，份量都幾多👍🏻呢個水準我會覺得係對得住個價錢，以後去食都一定會再嗌！✴️整體而言，個人真係好推薦火炙狂牛丼。但當然～去兩次都見到大部分人係食緊刺生丼，刺生丼有得隨意配搭，而且厚切大大塊。不過講緊有時唔想食生嘢，都可以去食熟食丼飯。另外補充返，每個丼飯都有跟麵豉湯同甜品，而店舖全日都係免加一。不過想食嘅朋友記得要預時間，因為平日晚市7點開始都好多人等位。…Read More

眷村紅燒牛肉湯麵 $65 紅燒牛肉湯麵有4塊厚厚嘅牛肉，肉質軟嫩唔會柴👍🏻湯底調味啱啱好，唔會太鹹或者太甜；事後上網睇一睇咩叫眷村牛肉麵，原來係喺湯底加入豆瓣醬調味，都幾特別，有別於一般好濃藥材味嘅牛肉湯麵。而麵嘅份量好多，麵質彈牙唔會淋晒👍🏻最驚喜係蘿蔔，甜得嚟又夠軟，仲要吸晒湯底嘅味道。整體而言，如果喺附近諗唔到食咩嘅都會再回頭。當日除咗牛肉湯麵，仲有試到超濃芋泥蛋餅！佢係比較脆口嘅餅皮，而內餡除咗超香嘅芋泥之外，仲有芝士同肉鬆，所以食落真係超滿足👍🏻餐廳裝修好有台灣嘅感覺，光猛闊落，而且環境乾淨，坐得都幾舒服。另外，佢除咗牛肉湯麵之外，仲有台式便當。但供應時間並非all day，而係11:30至14:30同18:00至21:00，所以想食就要留意返啦。…Read More

香煎蓮藕餅豬扒飯 $50 飯除咗蓮藕餅同豬扒之外，仲有跟蔥油同酸菜。香煎蓮藕餅係軟淋淋冇咁實，味道方面正正常常；豬扒就睇過介紹係用人手揼嘅，好薄好薄所以口感偏淋，食落都有啲油膩。另外蔥油同酸菜，個人覺得有蔥油配住食都足夠，因為酸菜陣味同啲食物唔太夾，有少少浪費咗。整體而言，成個飯嘅味道中規中矩。唔知係咪因為唔落味精所以怕食物唔夠味，調味都偏鹹咗啲，再加埋嗰飯都淋咗幾多豉油落去。同埋自己睇太多網上食評，所以都抱住好大期望去食，食完反而覺得只係似普通碟頭飯，冇咩特別驚喜。不過老火湯真係幾好飲👍🏻而當日嘅員工即使好多客人都keep住有禮貌。…Read More

那個滷排骨便當 $66上到嚟真係大大塊嘅滷排骨，幾乎遮晒成個便當。滷排骨炸漿薄，肉又厚實，食落係好滿足啖啖肉。但滷汁味道偏甜，食到最後會有啲滯同單調，比起炸物便當嚟講，可能冇咁香口惹味。另外滷排骨係原塊上，只有略略剪開啲肉，要咬幾啖排骨再揭起食啲飯，有啲唔方便🙁而便當除咗飯，會包含五款配菜（每日唔同），而當日係炒粉絲、素麻婆豆腐、炒雜菜、玉子燒同涼菜。而呢啲配菜唔係求其白恰，每款都好唔錯👍🏻 另外仲會送一杯凍/熱嘅無糖茶，或者是日養生湯，我就揀咗高原黑蕎茶，無糖之餘又有陣麥茶味，解膩一流。✴️整體而言，呢個價位食到咁豐富嘅台式便當都幾抵食，味道正常又大大份，有機會回頭會試下滷肉便當。餐廳環境都幾舒服，坐落又唔會好逼，但燈光有啲暗😂另外想食嘅朋友記住要留返啲時間等位，因為長期都好多人排隊。…Read More

便當系列有包三款配菜、一隻滷蛋同一杯紅/綠/烏龍茶。1️⃣百芳豬扒便當 $61 豬扒熱辣辣又大大份，味道有啲似鹽酥雞嘅調味，少少鹹香。雖說係煎炸但唔會太油膩，配埋飯同配菜一齊食啱啱好👍🏻好滿足嘅一個台式便當2️⃣滷肉飯便當 $55 滷肉份量比較少，出到嚟就只有面頭幾塊😢同埋佢嘅滷汁再加埋配菜嘅汁，令到下面嘅飯濕晒，食落成個便當口感單調。都幾矛盾，份量想多返少少但又會整濕嗰飯😢不過，不得不說滷肉好有台灣食到嘅味道，唔係其他台式餐廳嗰種好統一又鹹又甜嘅滷肉👍🏻✴️整體而言，食物味道唔錯，份量多又夠晒飽肚，仲有熱/凍嘅茶飲，係一間會再回頭嘅台式餐廳。餐牌選擇又多，唔食便當都可以嗌湯麵/拌麵！仲有啲經典台式小食(皮蛋豆腐...)，其他飲品(奶蓋茶/黑糖珍珠飲品...)又可以另外加錢嗌，鍾意台灣食物嘅不妨試一試👍🏻不過餐廳地方唔大但都幾多人去食，所以要預返啲時間等位。THANKS FOR WATCHING❤️…Read More

1️⃣蟹籽吞拿魚手抓餅 $25 2️⃣蟹柳肉鬆手抓餅 $24✴️每份手抓餅都係即叫即整，所以唔會怕手抓餅有嗰種擺耐咗嘅油膱味。老細落餡料真係好闊綽，兩款嘅手抓餅啲餡料多到食到最後一啖餅都仲有。除咗啲餡之外，每個手抓餅都仲有配生菜同蕃茄，所以食嘅時候可以中和下，冇咁油膩。但兩款口味對比之下，比較鍾意食肉鬆嗰款，因為吞拿魚沙律真係勁多😂食到最後一啖都仲有剩好多，所以相比之下蟹柳肉鬆食落冇咁濟。雖然葵廣食嘢唔太方便，推薦大家買完之後拎走返屋企食。…Read More

午市自選魚生飯（5款配料）$69 選擇夠多，分量都夠晒飽，跟碗味噌湯，仲可以免費加飯。40幾款嘅配料任揀5樣，除咗普通嘅白飯同壽司飯底，仲可以另外加$5轉其他飯底（我係嗌普通嘅壽司飯，覺得已經好夠味）配料方面，碎蔥吞拿魚撈埋壽司飯再加啲薑係幾好食，俾我感覺啲魚生都幾新鮮；而鰻魚係厚肉又唔會一夾就爛，食落有油脂感，鍾意食鰻魚嘅唔好錯過啦🤣不過其他配料就正正常常，冇話特別鍾意。✴️整體嚟講，午市呢個價位食到自己任揀5款配料嘅魚生飯，都可以話幾抵食！但如果講緊晚市嗰價位，我就覺得有啲唔值啦🤣…Read More

真係飲咗茶芝味好多年，每次都嗌奶蓋同茶底嘢飲；以下呢三杯都係嗌咗無糖。1️⃣茶芝味桂花烏龍茶 $28可能因為無糖，所以桂花糖漿都落得少啲(?)，變相烏龍茶味就蓋過咗桂花味，下次可能嗌返微糖，中和返烏龍茶嘅茶澀。2️⃣茶芝味宇治抹茶 $32呢杯真係大推!! 嗌過微糖都嗌過無糖，個人覺得無糖可以飲到更濃抹茶味，配埋芝士奶蓋飲真係好滿足。3️⃣茶芝味高山綠茶 $28高山綠茶飲落就比烏龍茶清純啲，綠茶香氣比茶澀出，所以變相飲落唔會太苦澀，夏天飲都幾唔錯。✴️整體而言，最推薦抹茶茶底。而佢哋嘅芝士奶蓋可以話咁多年嚟都維持到水準，又厚又濃稠，一啲都唔稀，所以唔怕啲冰或者飲品溝淡咗奶蓋，次次飲到最後都要用飲管撩嚟食。奶蓋係鹹味比甜味突出，芝士味濃厚，可以話真係好出色，同埋平時啲連鎖店都少有嘅芝士奶蓋。…Read More

1️⃣泡砌生豬肉 $68煎蛋泡菜燒汁黑毛豬飯：顧名思義，有白飯、煎蛋、少量泡菜同三片黑毛豬肉。但因為每樣嘢嘅調味都係淡，加埋一齊食冇咩驚喜，所有嘢都係普通。就算有燒汁配埋都係只有燒汁嘅鹹同甜味，所以整體味道略嫌單調；而且黑毛豬肉食落有啲柴，唔太推薦。2️⃣煙壓瘋 $60香蒜煙鴨胸炒意粉：食得出蒜香味，唔係燶咗嘅蒜；意粉口感啱啱好同埋炒得夠乾身，食落都唔錯。3️⃣什菌黑松露扁意粉 $60 意粉口感啱啱好，份量正常；黑松露醬汁好creamy又有濃濃嘅黑松露味道，加埋醬汁勁多，可以啖啖都有黑松露味，所以鍾意菇菌類嘅一定唔可以錯過。唯獨佢醬汁勁多，所以食到最尾會好飽同埋有啲濟，不過都好出色。✴️整體而言，幾推薦黑松露意粉，係食咁多次入面最出色嘅一樣食物。店舖環境比較細，經常有好多人等位，要食嘅建議大家買外賣👍🏻…Read More

1️⃣酸菜魚(生魚) $98份量都幾多，兩個人都夠晒飽。生魚片味道正常但唔算嫩滑，勝在少骨可以啖啖肉；配料有酸菜、酸蘿蔔同薯粉；整體味道正正常常，仲可以自己揀辣度。2️⃣酸菜炒豬腸 $50 份量多到要帶返屋企，唯獨是酸菜炒唔夠惹味，所以仲食到啲啲豬腸味，下次會選擇嗌啲辣嘅炒豬腸。3️⃣麻婆豆腐 $38 又一個份量多到要帶返屋企⋯夠晒麻又夠晒辣，呢個價錢咁大碗，餸飯真係一流。✴️整體而言，全部食物都好大份，幾乎碟碟都要帶返屋企😂呢個價位嚟講冇咩好挑剔啦，都幾啱一大班人嚟食，因為餐牌好多選擇，食物又大大碟，多人就可以每樣都試下。…Read More

1️⃣章魚大阪燒 $35一切開睇到真係好足料好有誠意嘅大阪燒，食落口感好豐富，唔會剩係食到麵漿但冇料咁；味道嚟講都幾特別，第一次食到大阪燒係有芥末味！平時食開都係沙律醬加燒汁，食落會好濟；但呢個有芥末味嘅沙律醬中和咗嗰種油膩感👌🏻整體都夠晒飽2️⃣芝士奶蓋桂花烏龍茶 $28 一攞上手都幾大杯，飲完真係好飽好飽。無糖都唔會苦澀嘅烏龍茶，飲得出烏龍茶嘅茶香👍🏻但相反桂花味就偏淡；芝士奶蓋係甜味比鹹味出，比較稀啲啲同埋好多氣泡，但芝士味都係好濃，係一杯普通芝士奶蓋茶。✴️整體而言，大阪燒真係幾抵食，飲品我就覺得正正常常啦，勝係茶味好香。不過大家就要預返多啲時間，因為都幾多人等。…Read More

1️⃣厚切雞扒蕃茄沙律菜意大利包 配蜜糖芥末薯角 $78 （包飲品及餐湯）味道正常而且份量完全夠晒飽！雞扒厚身得嚟又多汁，煎得香口，食落唔會乾掙掙👍🏻2️⃣香炒泰國香椒膏鳳尾蝦意大利粉 $88 （包飲品及餐湯）意粉上到嚟熱辣辣，雖然有啲啲硬，但接受到，而且分量都足夠；食落係同冬陰公嘅味一樣，有啲香茅味又有啲椰漿味，不過就唔夠辣，如果可以有辣味會更惹味！3️⃣厚切豬扒蕃茄沙律菜意大利包 $62（包飲品）呢一個係下午菜餐，同雞扒嗰個嘅配搭/味道都一樣，但就視乎返個人對肉類嘅喜好啦。✴️整體嚟講，推薦意大利包！兩款嘅意大利包幾驚喜，有肉汁又唔乾身，仲要夠晒飽肚👌🏻而意粉如果俾返啲辣味會更惹味！…Read More

1️⃣ 明太子鮮蝦意大利粉 $98意粉嘅口感煮到啱啱好，有濃濃嘅明太子同少少辣味，配埋蝦乾同魚籽真係食好夾；而鮮蝦爽口彈牙，唔會霉霉爛爛👍🏻 不過食物溫度唔夠熱，嚟到嘅時候只係微暖，有啲可惜，同埋分量算偏細。2️⃣香煎黑椒蒜蓉日本帆立貝 $78呢款小食相對比較普通，個人覺得唔抵食。✴️整體而言，意粉嘅味道真係幾出色，有機會都會想再試埋其他幾款！而店內裝修同環境都令人好舒服，唔會逼又唔會嘈。…Read More

呢間早排開嘅台飲店，餐牌真係好多選擇好吸引！-1️⃣黑糖珍珠鮮奶 $30 (M size)平時飲開無糖飲品，而黑糖系列只可以少甜，但以黑糖鮮奶嘅飲品嚟講，我覺得佢嘅甜度係唔會太過甜。以前飲過嘅黑糖鮮奶都冇咩奶味，但呢杯好重奶香又好幼滑，飲落口好smooth；黑糖珍珠唔會有燶味，食得到黑糖嘅香味，珍珠正正常常幾有咬口，唔會煲到爛晒。兩者味道平衡得幾好，攪勻一齊飲就有淡淡嘅爆谷味。2️⃣全手工· 自家製奶凍 $16 (買飲品+$8換購)奶凍口感順滑亦都食到濃濃嘅奶味，不得不說呢個價錢買到真係好抵！但我覺得係偏甜嘅奶凍嚟。3️⃣水果茶 $27 水果茶嘅基底係百香果，嗌咗微糖都幾清新，唔會死甜，味道正正常常。✴️整體而言，黑糖珍珠鮮奶都幾唔錯！ 同埋見佢哋除咗奶凍之外，仲有自家製茶凍，但嗰日7點幾去到已經得返最後一杯奶凍，想試要留意下啦！…Read More