jennifer2580's Profile

你好，作為你哋開店就已經開始捧場嘅粉絲，頭先我啱啱食完一碗令我非常之失望嘅拉麵，想喺呢度同你地分享吓我嘅感受。記得我個一次食拉麵Jo嘅時候，香港仲未好興食拉麵，算係個風潮啱啱開始，嗰陣你哋老闆仲喺bar枱幫手，好謙虛好勤力嘅後生仔，印象非常好。熱辣辣嘅拉麵一上枱，食完兩啖之後我就愛上咗，如果冇記錯，你哋係第一間我會食晒連湯都飲埋嘅拉麵店。第二次食，叫埋朋友嚟，大家都好欣賞，讚口不絕，估唔到你哋連餃子都幾出色。我再一次飲晒成碗湯。好快你哋就拎米芝蓮，我都不停同朋友講話呢間拉麵店好正，覺得你哋實至名歸。因為搬咗屋，所以越嚟越小食。呢幾年，更加多過江龍過來香港開分店，但你哋仲有年年拎米芝蓮推介，同時你哋都開咗分店，雖然少咗幫襯，但我都為你哋感到驕傲，間唔中都會懷念去你哋舖頭食拉麵嘅時光。上次食嘅時候已經係上年，都係圓方分店，食咗蟹拉麵，湯底非常之咸，每食兩啖麵就飲一啖水，但係麵質、湯嘅整體同埋蟹等配料都係水準之內，食完我好滿足，仍然會想再次支持你哋，不過係我第一次飲唔晒你哋啲湯。今日我去圓方分店，叫咗蒜油拉麵，今次係唯一次連麵都冇食晒，但我明明好肚餓。個湯，稀到一個點，豬骨味冇，得個咸味蒜油又唔香麵質好一般，仲隱約食到用水烚面嘅嗰啲水嘅味最可怕係塊叉燒有啲怪味，類似雪藏味嘅嘢食到尾個湯越嚟越咸。最後我已經唔想再食落肚，第一次冇食晒首先食拉麵最重要之一係一杯冰凍嘅水，但今日嘅你哋，打住拉麵jo口號，賣成十款飯，十幾款小食，枱上面得返熱茶一杯當其他拉麵店都好費盡心思繼續去挑戰自己，而你哋就將拉麵店變成日式料理店，好味都冇所謂，最衰係唔好味，仲要勁貴，連埋加一食最平碗拉麵都近一百蚊，完全唔值，我覺得我返屋企煮出前一丁嘅滿足感仲大我好失望，食完好空虛。唔知係因為轉咗手，定係廚師嘅水準唔夠，定係你哋管理不足，總之今次之後，已經令我對呢個品牌失去信心，我諗我唔會再幫襯多次。希望你哋可以改進，對得住你哋米芝蓮嘅名號。…Read More

堂食放寬返，梗係要約朋友出去飲飲食食！餓咗好耐嘅打邊爐同埋雞煲，喺呢一間餐廳就可以一次過滿足晒兩個願望啦～ 除咗雞煲仲可以四選一揀其他煲～我哋見過雞煲咁好味，忍唔住自己加咗湯打住邊爐先，又真係幾好味喎火鍋湯底我哋揀咗胡椒豬肚湯，胡椒味超濃郁，落親咩落去都會有胡椒香墨魚滑超好味，追加咗三次海鮮質素都唔錯，帶子出奇地大隻，抵食麵食全部都獨立包裝，方便又衛生另一樣嘢幾開心就係佢哋嘅飲品選擇好多，啤酒都有，而家唔係平時成日見到嘅韓式飲品，而係台灣入口嘅台式飲品，仲有冷泡花茶，啱晒鍾意養生嘅女仔最最最最大驚喜就係竟然有好多嘅台式甜品可以選擇，唔似以前好興嘅乳酪雪糕咁，其實都食到厭晒，同埋完全估唔到佢嘅台式甜品全部都勁高質，雖然我已經飽到反晒肚，但係我都追加咗三次，講真如果佢哋開一間台式甜品鋪我哋一定會支持！首推係芋圓，薏米，同埋仙草凍，一定要留肚食！！仲有其他任食選擇，配料唔算多，最緊要高質，一定會再幫襯！…Read More

平時呢幢大廈一定大排長龍，難得呢排好少人，所以就去咗試呢間西餐。叫咗藍芝士焗薯、軟殼蟹漢堡包，仲有椰汁紅豆冰。對我來講，食西餐如果個餐包好味，已經贏咗一半。岩鹽香草條好味到以為自己去咗意大利😆我好鍾意食藍芝士煮嘅食品，但香港暫時未見識到一間好味嘅餐廳係識得煮藍芝士，估唔到呢一間掌握得幾好。首先餐廳揀呢款藍芝士嘅味道真係好重好濃，薯仔冇特別嘅調味，所以會食到滿滿藍芝士味，作為藍芝士迷嘅我非常滿足。薯仔應該係先烚後焗，所以會比較滑冇咁乾身。欣賞。軟殼蟹漢堡包配蕃薯條，蕃薯條非常之多，應該有兩至三個蕃薯。炸軟殼蟹同漢堡包出奇地夾，沙律菜非常新鮮，直頭想encore叫個沙律。椰汁紅豆冰，一飲就飲到好重嘅椰汁味，全杯都係落重本真材實料嘅椰汁呀，重味到蓋過雪糕同埋紅豆嘅味，哈哈。雖然個場裝修一般，但係服務唔錯，而且食品好有誠意，睇得出係有心機處理食材，價錢又唔貴，一定要支持。…Read More

間唔中都會食下滿江紅小甜甜，都食咗五六年，次次都叫好多嘢，今次兩個人食只係叫咗個涼拌土豆絲同埋水煮烏江魚鍋。以前食開酸菜魚同埋蒜泥白肉，間唔中都會好懷念，今次一是新野就出事。涼拌土豆絲係前菜，醋味比較重，我本身唔食醋所以唔太喜歡，欣賞啲土豆絲切得好幼，口感好似食緊麵，又唔算太辣同太咸，係一個唔錯嘅前菜。水煮魚非常之辣，辣到食唔到魚嘅甜味，每一次都好驚畀辣油辣親，忍唔住叫咗杯司樂解辣。第一次烏江魚，冇咩特別，魚味唔出質感亦偏硬，都鍾意食桂花魚多啲。配料有啲青瓜、金菇、粉絲同埋芽菜，但係由於實在太多辣油，所以都唔係好食到。成個窩好大兜，兩個人食真係食唔晒，人多的話叫碗飯應該唔錯。…Read More

朋友推介尖沙咀呢間有蒸氣，咁啱今日客人比較少，所以店員招呼都好好，每一碟都會幫我地處理，調校好時間同埋收碟嗰啲。叫咗呢個二人餐，揀咗個最平嘅餐，食物選擇唔係太多，有七款海鮮，兩款丸，同埋一款菜，盛惠每位328加一。沙包蜆好細隻，而且得幾隻，好彩冇沙。日本元貝都係比較細隻，味道都算幾清淡，得少少鮮甜，係比較高質嘅海鮮。薑蔥蒸鮮魷好味喎！好濃海水味，而且質感非常之好，第一次食咁好味嘅蒸魷魚，可惜唔係個餐單入面。美國桶蠔一人一隻，都幾大隻，蠔味唔太出，唔會有腥味，不過都唔算好出色。大連鮑魚蒸咗之後好細隻，加咗啲蟲草花上去但係冇乜味，蒸得有啲耐所以非常之韌。金銀蒜蒸勝瓜以為有咁多蒜應該好濃味，點知都係還好，好在勝瓜本身甜。手剁豬肉丸同手剁墨魚丸一人兩細粒，都幾彈牙同埋食得出係正宗手剁，唔錯。湯底揀咗鮮螺竹絲雞，雞同埋螺頭都係非常之細件，亦飲唔到應有嘅味，原本以為會吸收晒海鮮嘅精華，但係飲唔到海鮮嘅清甜，完全唔知發生咩事。最後食完好肚餓，份量太少，呢間野嘅調味都係比較清淡，價錢算偏貴，環境還可以，食材都係中規中矩。…Read More

筲箕灣呢間人氣小店，想試好耐。因為嘢食好特別，環境又非常之有情調。一去到門口，果然冇令我失望，日本居酒屋嘅格調，充滿傳統嘅東灜氣氛，喺度食嘢人都開心啲。呢間餐廳嘅menu好特別，有烏冬、有串燒、有鍋物，仲有清酒，無論你係想過嚟傾偈吹水定係想食正餐，一樣適合。咁啱我同朋友都唔算太肚餓，所以叫咗個清酒雞肉竹笙烏冬、鹽燒白鱔、厚切牛舌、明太子雞翼。清酒雞肉竹笙烏冬出乎意料之外嘅鮮甜，清酒用嚟煮嘢真係可以帶出鮮甜，京蔥同埋蟹蟲草花嘅配搭亦都令到啲碗烏冬多咗啲fusion嘅感覺，值得一試。鹽燒白鱔上到枱已經有少少凍，可能係鹽燒所以味道比較淡，不過魚味就變得突出，欣賞佢嘅厚切，口感幾過癮。厚切牛舌水準之作，朋友鍾意食牛舌嘅覺得好好味，必叫！明太子雞翼不過不失，略嫌太咸，口痕嘅朋友不妨試吓，不過價錢就比出面貴。如果用嚟配清酒嘅話，應該唔錯。…Read More

如果小曼谷有會員，我一定要第一個報名。雖然已經食過小曼谷好多次，但係原來都仲有好多餸未食過😆😆今次叫咗燒豬肉丸、燒脆皮白鱔、泰王咖喱炒大蜆、風味燒豬頸肉、泰式原味烤薄餅燒豬肉丸用蜜糖燒，泰式豬肉丸嘅豬肉味好濃，而且有少少肉汁，用蜜糖燒到面頭脆卜卜，正呀，好鍾意食！燒脆皮白鱔超級肥美，每一啖都漿住油脂，鱔皮都係燒得好脆，落咗少少醬汁但係唔算濃味，所以食得出鱔肉嘅魚味。推薦！我哋叫咗泰式原味烤薄餅，姐姐問我地使唔使叫咖喱配，本身我哋想揀普通嗰個款，但係建議泰皇呢款，因為佢加咗雞蛋，所以我哋就叫咗泰王咖喱炒大蜆。薄餅好好味，因為啱啱烤熟，上枱真係超級熱，本身就咁食已經好香牛油味，一蘸咖哩竟然係出奇地夾。咖喱味道偏甜，唔算好辣，非常適合香港人口味。啲蜆係真係大大隻，而且好滑好鮮甜，估唔到食泰國菜嘅咖喱都可以食到咁新鮮嘅蜆。呢個堅抵食，本身同朋友諗左好耐食唔食燒大蜆，但係$128得半打，覺得好似好貴，點知食呢一個咖喱炒大蜆，又有得食咖喱，而且起碼有成10隻大蜆，只係$148，好抵！風味燒豬頸肉勁好味，其實喺香港都食過好多間好味嘅泰國餐廳，但係唔知點解冷庁食小曼谷都好似發現新大陸😂 燒得剛剛夠，有炭火嘅香又有啲焦。欣賞佢相對大塊但就用咗薄切。你哋上咗台之後我同朋友係瘋狂食冇停過手。好味到覺得下次可以外賣拎返屋企加餸😆整體來講服務非常好，每一碟餸都擺得好精緻，而且份量都唔細，最緊要係，真心每一碟都高質，性價比好高，加上呢一間分店係新開，所以裝修都好新淨，而且比較有特色，推薦大家下次來呢間分店食啊！…Read More

好耐冇食過一間滿意嘅任食火鍋呢排少出街，唔係朋友約會都好少出去食飯。人多當然食任食啦，呢間選擇唔算特別多，勝在有新派嘢，有啲創意～叫咗酸菜白肉同麻辣，酸菜唔太酸，有淡淡胡椒味，做打邊爐湯底都唔錯。麻辣唔算太辣，啱返香港人口味咁啦～兩個人都送個海鮮拼盤，正啦！魚同蜆都唔錯，冇沙又算新鮮，蝦就差啲。等湯底前叫咗個小食，b仔雞尖味道有驚喜！不過喺度食都幾貴🙈欣賞呢間嘅份量細，啱晒眼闊肚窄嘅人，又可以試多啲新嘢～炸午餐肉同油炸鬼好正，油炸鬼配酸菜湯底好好味！雜菌拼盤細細份但有五款菇，正～都係啱酸菜湯～舖頭細細，坐50-60人，醬油選擇都唔少㗎～第一次見醬料有炸洋蔥！熟蒜油好正，肉同菜都啱，好似重慶嘅油碟咁。唔夠辣再追加麻辣料又得～呢間店用tablet落單，又唔會好似其他火鍋店咁暗，喺度食嘢都幾舒服！整體來講，會再來試～…Read More

每次諗唔到食咩就會去passion，因為佢有雪糕、湯、咖啡、果汁、蛋糕、沙律、意粉，基本上係咩都有😂Sunday brunch，叫咗份自選沙律、凱薩雞肉沙律，配南瓜甘筍熱湯同埋cappuccino 。香港比較少正宗嘅西式沙律吧，呢度$9x可以揀五款沙律，你鍾意可以叫店員舀多啲呢款，舀少啲嗰款，而沙律嘅選擇都唔係剩係得菜，有比較飽嘅意粉、有焗薯仔、有雜菜、有咖喱素菜、有藜麥雜穀、或者蕃茄芝士等。今次呢五款整體味道都偏酸，可以因爲落咗醋，而我係好憎食醋，所以同朋友交換咗食。不過都食得出全部蔬菜都好新鮮，係外國入口嘅高質貨。凱薩雞肉沙律勁好味！雞肉、芝士、麵包、煙肉碎、羅馬生菜，全部都好好味又夾！我絕對唔介意日日都食佢😭😭南瓜甘筍熱湯係blend咗嘅蔬菜湯，所以食得到南瓜同甘筍原汁原味，非常之香甜，雖然冇落好多cream，但個湯都夠晒滑，飲完之後成個人都勁滿足！咖啡好飲，不過都唔夠條餅乾好味😆 差啲問店員有冇得另外買。整體來講，朗豪坊嘅呢一間passion，絕對係any time嘅進餐之選！…Read More

薩莉亞作為全港最抵食嘅西餐廳，絕對係窮撚嘅飯堂。由於實在太平，所以每次都叫到好似放題咁😆 今次叫咗辣味雞翼、蒜蓉焗青口、香焗白汁雞肉菠菜、蒜蓉包。辣味雞翼確實係幾辣，雞翼調味冇Pizza Hut咁好味，中規中矩啦，同埋雞翼真係好細隻😂。蒜蓉焗青口有驚喜，青口好大隻！蒜蓉同洋蔥碎落得好多，焗完啲香氣走晒出來，好味，仲冇咗青口陣腥味！反而醬汁酸酸地有少少奇怪。白汁雞肉菠菜嘅白汁係酸嘅，雞翼都有雪藏味，菠菜食食下好苦，下次都係唔好叫啦。蒜蓉包焗得超脆同香口，一睇就知蒜蓉牛油畀到足，好香好濃味，抵讚！窮嗰排間唔中食下薩莉亞都係一個唔錯的選擇😏…Read More

由中學食到而家，一直都冇加過價，味道仲係咁好味。隨你鍾意係我喺銅鑼灣唔知食咩嘅時候嘅選擇😂😂 $15兩個手卷，又平又好味，去邊度揾喎！佢最出名係三文魚手卷，即叫即整，仲有其他魚生手卷、壽司、刺身、生蠔、日式熟食，間唔中仲有新Menu。今次叫咗三文魚手卷同蟹膏手卷。三文魚手卷嘅三文魚係角切，乜都好肥美喎，好似食緊三文魚腩咁。鮮甜又有咬口，都幾高質！因為手卷比較細件，所以每一啖都可以食到魚生、紫菜同飯，正🥰 蟹膏手卷出面比較少有，就算有都係壽司，但一件都最少$10，但一件手卷起碼係三件壽司啦！絕對物超所值😎 重點係，好味！🤪🤪隨您鍾意，堅決一生推💪🏻…Read More

約咗兩個月，終於都約到朋友嚟食呢一間店，之前一開舖嘅時候超多朋友打來卡，搞到我好期待啊😆。嚟呢度就係為咗海鮮大咖，每日有六款海鮮，隨着季節或者產量而定，日日都唔同，今日有鮑魚、魷魚筒、大蝦、螃蟹、帶子、花甲。所有海鮮其實都係處理咗先至上枱，所以湯一滾其實就要拎起以防太熟。整體都非常新鮮，鮑魚同蟹等都係大大隻，而且全部份量都好足，食極都仲有，仲好似越食越多哈哈。我最鍾意係魷魚筒，真係好先鮮甜同爽脆，出面好少食到好味嘅魷魚筒。花甲有少少沙，同埋太細隻冇咩肉食😭 帶子煮得過熟，所以唔算太好味，要小心處理。螃蟹係出奇地有蟹膏，好驚喜呀！我哋仲比$68升級左，可以任食火鍋配料、仲有啤酒同埋其他嘢飲，飲品勁多款！粉紅色同黃色嗰罐韓國嘢，超！好！味！後來發覺其實食海鮮已經夠飽，不過佢啲火鍋配料其實都幾吸引，丸類、菜、麵全部都齊啦又多款，同埋有啲中國嘅特色配料，好似麵根等，出面比較少食到。最緊要係佢嘅飲品好好飲，而且啤酒任叫其實都幾抵！…Read More

如果三樓卷之屋唔開，我就一定會食呢間。佢同卷之屋質素都唔差得遠，最大嘅分別有唔同嘅選擇，而且佢主打嘅海膽比較新鮮，呢間仲有丼飯同燒蕃薯食！三文魚芝士蟹籽手卷，芝士醬冇咩芝士味，個人來講都係比較鍾意食爭鮮嘅芝士蟹籽😝三文魚就唔錯啦，厚切得來可以大大啖食🥰 仲有佢塊紫菜係脆的！😍 每次食到脆嘅手卷紫菜都會特別開心，因為咁先係食手卷嘅精髓呀！不過壽司飯就比較硬身，應該係珍珠米嘅問題，食咗一半已經開始覺得濟哈哈。芝士火炙鰻魚手卷，塊芝士燒咗但未溶，好fail😆 鰻魚剛剛用火炙燒熱咗，仲食到炭烤味同暖暖地，同埋我欣賞師傅會喺飯同魚生中間加青瓜絲，口感唔會太寡。小店來講算好有誠意，繼續支持！…Read More

食宵夜多數會揀港式小食，呢間人和分店開到比較晏，有麵有小食有甜品，無論你係好餓定只係口痕，人和都滿足到你。叫咗碗豬紅韮菜豬大腸、魚肉釀豆腐、滷水豆腐。滷水豆腐非常之咸，咸到食唔到落去。魚肉釀豆腐的魚肉出奇地鮮甜，而且份量唔少，因為呢款係舀起個豆腐再釀魚肉入去，唔似出面釀喺豆腐上面，得嗰半啖魚肉。豆漿食得出好濃豆香味，食過其他分店都冇呢間煎得咁好味，而且剛剛煎起即食，個邊仲有小小脆，正！豬紅韮菜豬大腸係小食店必叫嘅美食之一，炸蒜完全係畫龍點睛，令呢碗平平無奇嘅小食變得非常香口，而且炸蒜應該調咗味，所以打救返湯底本身冇咩味嘅小敗筆，變得剛剛好。豬紅切得好均稱，三樣面料份量都係平均，唔使爭住食😆 四個人食咗三個小食，結果都係非常之飽。食過其他三間人和分店，原來最好食係呢間，一定要再幫襯！…Read More

I-cremeria又有出咗新味啦😍 今次係薰衣草伯爵茶味！雖然要$68，不過我好鍾意食薰衣草，所以都忍唔住要試一試🙊一如以往佢哋雪糕真係好滑好軟熟！而且每一次嘅味道都好濃郁，絕對唔會失望。今次嘅薰衣草味，係濃到好似飲緊薰衣草茶，勁開心！第一次食咁濃味嘅薰衣草食品🥰伯爵茶味呢就唔係太食得出，主要應該俾濃濃薰衣草味蓋過。作為薰衣草迷，食完之後好開心，因為成個口都係薰衣草味！其實坊間好少真係有薰衣草味嘅食品，所以呢一個係真係好大驚喜！焦糖杏仁餅已經腍咗，食唔到焦糖嘅香，配雪糕食亦唔算㚒。I-cremeria的雪糕筒唔同出面，質地唔算特別脆，但配返本身奶味重又滑嘅雪糕係幾適合，個樣又靚同有特式，所以每次食到筒時都好開心哈哈。今次呢隻味絕對會想再回味多次！…Read More