callai's Profile

真心覺得是間很值得好評的社企餐廳。最初想來都是想支持下社企，試完之後你不會再有這個想法，下次再來是因為這裹的野食好味。餐廳地方好寬躺，人唔多，員工有禮貌。叫了個馬來咖哩牛椰漿飯套餐，牛肉份量不少，夠淋，個汁好味，還有一隻蛋，魚仔乾、炸花生、青瓜和少少酸菜，酸菜尤其好味，酸甜適中，椰槳飯有淡淡的椰漿味，不太濃，不是好濕的那種。個湯好多料，有豆卜，蔬菜。飲品轉特飲美祿恐龍都只是加7蚊，成餐總共七十幾蚊。…Read More

茶餐廳必有的沙嗲牛肉麵早餐，轉出前一丁唔洗加錢、煎雙蛋、牛油多士、凍奶茶少甜。以前牛油多士要加一蚊，凍／熱奶茶加三蚊，現在全部不用加錢😙，全部加埋只是$39，正👍🏻個出前一丁煮得剛剛好，留有小小硬度，等你有時間食塊多士先再食便啱啱好。沙嗲牛肉個汁唔錯，份量足，比其他茶餐廳多，最正係牛肉的質地，有小小咬口，有牛肉味，看看牛肉的表面和咬落去的口感，完全冇落鬆肉粉👍🏻美中不足是凍奶茶少甜變埋少奶及近乎走甜，下次可試番正常的凍奶茶。…Read More

行過見到依間主要做點心的有茶餐廳早餐食，還有豬膶麵添便入嚟試吓。叫左個豬膶麵轉一丁加$4, 餐肉太陽蛋拼多士，凍奶茶。一食個豬膶便真的非寫過食評不可。豬膶又多又夠厚，剛剛熟多少少，還有蔥和蛋花添，並不是坊間那些幾出名，但件豬膶紙咁薄，個湯重係起灑泡的灼豬膶水🤨可比。相信喜歡豬膶麵的朋友一定鐘意。餐肉都夠厚和味道應該不是啲cheap cheap 餐肉，多士牛油足，太陽蛋和凍奶茶正常。真係喜出望外，下次再想食豬膶麵時都會再來。…Read More

經過見到有間新餃子舖便走入去試吓，佢除咗餃子也有一人雞煲。叫咗個流沙鹹蛋黃鮮肉煎餃八隻配味菜胡椒豬肚湯，湯不用加錢共6 2蚊。味菜胡椒豬肚湯份量足，湯料都不少，十分夠胡椒味。煎餃子🥟的皮夠薄，不太大可一口食曬。值得一贊是坊間好多煎餃都係炸的，但這間真的是煎👍🏻，個底也煎得脆。流沙咸蛋黃鮮肉餃鮮肉都多，但咸蛋黃味便不太覺，也沒有有流沙。唔知係個湯定煎餃，感覺上味精比較重手，食完一陣間面頰兩邊已有些麻。…Read More

這間餐廳應該都開左一段時間，open rice內竟然相都冇張，但其實我也只是幫襯過一兩次。雖然佢叫蛇王弟，但我見最多人食的反而是蒸魚。我自己亦不太好蛇，好耐之前食過咖喱牛腩，印象中不錯，今次便叫了較少見的咖喱牛仔骨外賣 (外賣加2蚊$57)。咖喱味道香濃，雖然面頭的油多了些，但用匙羹片走了便可以，有入味的薯仔，洋蔥🧅和青椒，牛仔骨都淋，有牛肉味🐮。例湯亦🥣較預期好味，有舊紅蘿蔔🥕，唔覺有太多味精。…Read More

我都好少會一間舖頭寫2次食評，但這個真是好味又扺食，見這小店通關後也靜了很多，希望可以多啲人認識這高質小店。今次我唔係食壽司🍣，係外賣吉列豬扒定食。預先打電話叫定，外賣攞到番屋企開始食都有成3個字，但塊吉列豬扒都冇淋，下面的蘿蔔絲有點像半熟般，還可以連飯一齊食，吉列豬扒肉質淋，夠厚夠硊，個人喜歡肥些重好。小食份量都唔小，蘿蔔夠淋入味，肉是有些咬口那種，小食未必次次一樣，試過是牛舌或炸年糕，都好味😋。麵鼓湯🥣啲海帶很多。…Read More

之前幾間係依個位的食店都做唔住，這個位置人流實在很小，雖然都係大埔道但同一馬路🚦之隔的對面真是天淵之別，近排見佢轉了手改賣泰國🇹🇭嘢便想試下，幫襯過幾次豬頸肉飯，咖哩等等，肉的份量好足，好味、性價比甚高，但次次都忘記影相。今次叫了個雙拼飯，即炸雞加海南雞，$40還有個例湯，炸雞加海南雞都各有一個醬掂。份量當然十分足夠，炸雞有四件都唔鞋炸粉唔厚，因為外賣所以外皮有小小淋是正常的，而海南雞的份量都唔少，啲肉重好滑，比好多其他的店舖好，下次可堂食便叫炸雞外賣便海南雞。PS: 之前試過個冇骨鳳爪到好味個計還可以撈飯。…Read More

今日去開北角便特登早一個站落車去試試這間鯊魚燒賣， $13有7粒加豉油麻油辣油，辣度剛剛好。其實我都唔知鯊魚肉係乜嘢味，但係食落十分彈牙，一啲都唔粉有魚味。但我覺得有啲人會嫌佢有小小腥味，我個人便覺得冇問題，我唔係嗰啲食雞要走皮，食羊要唔羶，食牛要似豬的人。…Read More

好耐冇寫過食評了，今日過開紅磡原本想去食小籠包，但係冇開。周圍行咗陣便揀了這間食下午茶，叫咗個咖喱溫泉蛋芝士吉列豬扒飯，咖喱有得揀辛口，少少辣幾好，個日式咖喱汁有芝士及溫泉蛋，份量好足，最驚喜嘅係塊吉列豬扒估唔到又大又厚，雖然睇落好似冇乜肥膏，但係食落估唔到好腍，外脆內軟，絕對可以同一啲頂級嘅吉列豬扒專門店媲美，以這個價錢嚟講絕對是頂級，食完超飽。店舖環境寬敞，地方整潔，原來除咗黃埔外喺深水埗都有分店。…Read More

今日去完友和自取，7點鬆啲行過見到都幾多人便入去試吓，好彩我一個人不用等位，見到人人都食酸菜魚，好似幾好味和好足料，但原來舖頭有賣煲仔飯，便叫左個窩蛋免治牛肉煲仔飯 ($58)，跟餐紅豆冰(+$12)。煲仔飯要等廿分鐘，一來時見到啲餸舖滿面，份量都幾足，免治牛肉冇乜鬆肉粉味，雖然不算好濃牛肉味，但有啲咬口，煲仔飯豉油亦調得幾好，有老抽的嘅香味，落多些亦不太咸，反而窩蛋因為太早落熟哂。最驚喜是飯焦冇黑哂而是金黃的，紅豆冰都ok不太甜但紅豆少啲，總的來說是很滿足的一餐。…Read More

行完黃金經過見到這間舖有巴基斯坦咖哩牛腩便入了來試，巴基斯坦咖哩和我們平時吃開嘅黃咖喱有些不同，是比較水的。叫餐時姐姐話套餐係冰鮮腩散叫是新鮮牛腩，便叫了個巴基斯坦新鮮牛腩和凍美祿小甜。牛腩雖然肥膏唔多但都好淋，冇乜羶味。咖喱幾香是小辣，對我來說剛剛好，但如果對一些冇識開辣嘅人便會覺得太辣。薯仔應該係滾水烚熟後再加落去沒冇乜再煮過，所以唔夠入味。下次試吓套餐嘅冰鮮腩看看有什麼分別。凍美祿還可以，不是太淡，講真全港都冇乜邊間舖頭冲得好飲的，除了以前一間新加坡來的連鎖店外，大部份都是美祿少少糖水多多。…Read More

2個人叫了一個九貫壽司盛盒🍱，燒鮑魚、另再次加一些灸燒左口魚壽司🍣、海膽魷魚壽司等等。好味😋，價錢實惠。盛盒的壽司好新鮮，另叫的三文魚腩左口魚等壽司亦十分肥美，壽司的魚生都大件，而飯是偏小的，正好可吃多幾款。燒鮑魚上有個可能是蟹膏的醬，味道和鮑魚十分配。滿3百元還可免費做會員送了個燒鮑魚👍🏻。下次如在家gathering 可再試其他盛盒。店舖主要做外賣的，只是牆邊有幾個位，除了我們2個人只是後來有一個人在店內食，其他都是外賣。…Read More

以前喺界限街舊舖做燒味同滷水時都有幫襯開，現在轉左去新鋪雖然只做滷味，但師傅👨🏻‍🍳冇轉，一樣咁好味扺食。見佢只得一個食評，實在忍唔住手要寫吓📝。上次二佰三十蚊一大盒滷水鵝，再加一盒鵝肝、豆腐、豬耳、雞腎，但忘記了影相。滷水鵝🦢味道啱啱好唔會太鹹，啲鵝肉好淋，皮唔韌亦不會太肥，雞腎豬耳都好味，尤其鵝肝亦很滑。今次食滷水鴨🦆下庄只是三十五蚊，但食咗幾件之後才記得影相。今次雖然係鴨，但質素並沒有下降，當然肉身冇鵝咁厚喇。…Read More

這間都幾出名的便不多介紹了，下午茶海南雞飯份量都不小，海南雞當然滑，不會太多肥膏，醬汁有黑醬油👍🏻。最特別是碗雞什湯，喜歡內臟的不要錯過了。還有值得一讚是店舖的背景音樂，播一些instrumental的金曲🎶，可考慮播一些light jazz也很襯。…Read More

樂斯餐廳，區內人應該好多都知這間有五十幾年歷史的餐廳，而我這好少來粉嶺的人只是剛好經過被她門外餐牌的一樣菜式吸引著而幫襯-咸魚豆腐煎肉餅。咸魚煎肉餅十分香口，也食到豆腐，如果可以多啲豆腐會更好。此外也叫了客家鑲涼瓜，涼瓜沒有走油(用油炸一炸）的，雖然顏色不是青綠色但更入味，鑲涼瓜也很大舊。兩樣餸都是即叫即煮，美中不足是白飯太淋身了。店主更有夏枯萎草送，甜度啱啱好，其實200字先可以評分實在太多了，一般人非打手吃一兩樣嘢邊有咁多嘢寫😡…Read More