ahwingfood's Profile

朋友生日要食餐好既慶祝吓，喺OpenRice搵吓有咩優惠券，見到呢間放題燒肉店人均$310就有6款黑毛和牛任食，好似幾抵～就決定試試佢🤓第一轉落單會有牌仔介紹係咩肉，可以試啱先再叫，雖然和牛嘅油花睇落幾靚幾均勻，不過食落肉味唔濃、油香都一般般，真係志在有和牛食吓🤣生牛肉壽司幾似魚生，不過都係試過就算😂冇咩特別味而且有啲薄💩特選薄炙牛里脊肉食落反而比和牛仲淋身啲，少少肥牛嘅感覺幾唔錯～好多款牛都切得薄得滯，冇咗個口感🥺所以我哋最鍾意嘅都係牛肉粒，啖啖肉得嚟又有油香😋雞肉豬肉都有好幾款選擇，最特別係雞頸肉，燒完好香又彈牙👍🏻海鮮方面有帆立貝、蝦、青口、蠔等等，帆立貝雖然唔大粒但都有彈牙嘅口感，以放題嚟講好唔錯，我哋都食咗好幾隻☺️熟食方面有自己出去夾嘅吉列蝦、炸雞軟骨，落單嘅有炸蠔、炸芝士、炸雞，主食有冷麵、拌飯和牛肉燥紫菜飯等等，選擇幾多、食落正常，係炸雞唔知點樣好似有層未熟嘅麵粉咁😂雪櫃有沙律同甜品，個人覺得tiramisu最好味😛唔會雪都乾曬硬曬，咖啡味幾濃～…Read More

呢日放得晏直接食埋飯先返屋企，以前呢個鋪位係間開咗好耐嘅粥店，自從轉咗手之後都未試過，見價錢相宜就入去試吓🤓淨餸(包生菜底)同3餸麵都係$39起，部分餸例如豬大腸、牛腩、櫻花蝦餅就要加$2-$3，我揀咗淨餸牛腩、蘿白、魚片頭、多蔥😛份量正常，有話特別多肉，不過$42我又覺得差唔多啦🤣牛腩大約有5-6粒、炆到好淋好入味、唔會太多肥膏、啖啖肉幾唔錯😋蘿白都好淋冇渣，炸過嘅魚片頭就都係大家想像到嘅味道口感🤣生菜有6條左右，平時去譚仔轉菜底都要加$5，所以呢個價錢同質素真係幾唔錯，下次有quota正正式式試下麵先～…Read More

前排kkday有優惠，二位自助午餐只係$448 (包埋加一)，咁啱忙完一輪，就決定同朋友食餐好既😛11:55開始入座，可以由12:00食到14:30，枱面都好闊落、座位之間嘅空間好足，加埋落地玻璃、成個感覺幾舒服🙈首先食啲沙律同魚生，生菜好新鮮好爽脆，鯛魚好彈牙非常推薦，三文魚亦都食得出幾新鮮，係吞拿魚有啲乾，不過至少冇雪味👍🏻凍海鮮方面有蝦、蜆、青口同螺，蝦肉煮得啱啱好、爽口彈牙，螺肉亦都唔會太乾太硬，作為對蟹冇咩興趣嘅人，真係寧願平啲、少啲凍海鮮但高質🤣估唔到呢個價位都有燒牛肉，仲要超級嫩滑，甚至好味過某啲五星級酒店，所以最後食咗三塊😋燒味都有好多選擇例如油雞、豉油雞、燒鴨、叉燒，個人覺得叉燒最好味，肥瘦均勻夠入味，雞同鴨就要夾啱部位，因為胸位的確幾鞋🤣燒菠蘿同燒豬肋條都大推，菠蘿好多汁好甜，豬肉軟淋得嚟又有油脂嘅彈牙感🥰不過油飯真係麻麻，好淋又冇味☹️其他熱食例如烤魚同烤豬扒都唔錯，不過千層麵嘅麵就好厚同埋有啲粉😗最令人期待嘅當然係雪糕，有成12款口味，有啲味冇寫喺塊板度，所以最好睇返雪櫃入面嘅介紹牌～我試咗奶茶、黑芝麻、抹茶同焙茶，全部味道都好濃郁又唔假，質感都幾軟滑，雪糕控會好滿足😆其他甜品選擇唔算多，有啲亦都唔太啱香港人口味，個人最鍾意左上角嘅朱古力蛋糕，濃郁得嚟帶點微甘，食落口感一致、融為一體👍🏻…Read More

前排喺社交平台無意中見到呢間由台灣人開嘅餐廳，佢個蚵仔麵線睇落好吸引，所以就決定搵日去牛池灣試吓😝兩個人一齊嗌咗個鹽酥雞便當($60)、大腸蚵仔麵線($35)同埋炸臭豆腐($50)，所有炸物都係即叫即製、非常新鮮😋店內位置唔多，加埋鋪頭出面都係得3張枱，不過嚟得都只係志在食吓台灣風情😂老闆首先比咗碗麵線，入面有大概5隻好肥美嘅蚵仔，大腸都有5-6舊，份量幾足，比起一般餐廳食到嘅更加滿足☺️麵線唔會碎曬，同湯嘅比例啱啱好👍🏻鹽酥雞便當有幾款配菜，包括滷水蛋、滷水豆腐、木耳娃娃菜、西芹炒豆乾，呢類食物好難煮到超級好味所以正正常常我都okay，最重要係唔好太鹹😂鹽酥雞有6粒，全部都好脆又juicy，真係好似去夜市即刻炸比你嗰啲🤩不過圖片明明話有成碗滷肉飯，結果只有一小羹滷肉，所以少失望，不過念在佢有咁多其他配料，$60都幾抵🥰炸豆腐真係好正，完全做到嗰種好多氣泡、彈彈地嘅口感，表面就好鬆脆又唔油膩，其實好多時只要新鮮炸起就好好食😆我最欣賞頭面嗰堆酸椰菜，用嚟解膩、清喉嚨一流😚…Read More

作為麵包控，有得揀都會想食三文治/卷餅多過白飯🤣但要足料又唔貴真係無咩選擇，咁啱見到呢間餐廳$58就有burger + 沙律/薯條 + 飲品，咁抵緊係即刻衝入去試吓🤓嗰日唔想食牛就叫咗手打豚肉漢堡，麵包即時用鐵板烘過，外脆內軟又有牛油香味😋漢堡扒好juicy、有微微焦香，如果厚身少少個口感會好好多，但呢個價錢真係無得好講😆我最欣賞面頭嘅炒洋蔥，夠淋夠甜，令成個漢堡嘅味道豐富咗好多👍🏻沙律我叫咗走醬，啲菜都好夠新鮮😉影出嚟個漢堡包好似好細，不過午餐絕對夠食，男仔就可能要叫返薯條先夠飽🙈最重要係留返張單下次會有$5優惠，真係超級抵‼️…Read More

中環嘅pizza店真係多到數唔曬，全部啲餅皮望落都外脆內軟超級正，本身揀去La Camionetta係因為有個超抵嘅lunch set，但原來只係平日有，所以最後就單點咗個La Camburrata($228)同埋Cold Cuts Platter(全份好似大概$120)🤓Pizza除咗布拉塔芝士，仲有Fior Di Latte呢種水牛芝士、白毛豬火腿、少少蕃茄仔，肉嘅份量對得住價錢，而且批底完全冇令我失望，熱辣辣、外鬆內軟、厚薄適中，最重要係切開芝士嗰吓真係超正，雖然鋪得有啲核突🤣連埋芝士嘅奶香成個薄餅即刻冇咁膩，不過兩個人食真係會飽到頂胃，下次都係等平日嚟食lunch set，又有得切芝士、又可以share兩款口味😝當我哋見到份Cold Cuts Platter咁大，就開始後悔點解唔嗌半份😂入面大概有4種唔同嘅火腿，我最鍾意面頭肉色嗰款(原諒我平時完全唔會買嚟食所以唔太識分🙈)，食落好似我曾經試過嘅風乾黑毛豬火腿、肥瘦適中，配埋鬆軟嘅麵包就啱啱好👍🏻最後我哋都要攞走啲食剩嘅麵包，呢度兩碟嘢分分鐘夠三個人食😆…Read More

荃灣最多嘅就係米線，有日經過荃昌中心，見到呢間新貴香園都幾多人幫襯，要坐到鋪頭外邊嘅露天位置，應該有返咁上下水準，所以就決定試下🤓湯底除咗有基本嘅酸辣、麻辣、清湯，仲有香濃沙嗲，不過我都係鍾情於酸辣湯($33)，配料方面就叫咗蘿蔔($7)同埋滷水豬肚($9)😋因為客人眾多，所以等嘅時間比其他米線鋪會耐少少🤏🏻米線望落份量都幾足，但夾起就會發現係啲麵頂起咗，配料嘅量唔多，例如蘿蔔只有4小舊(好似好大塊但比較薄身)，食落中間仲有啲硬☹️豬肚就好爽口彈牙、煮得夠入味👍🏻…Read More

有日要去紅磡做嘢但臨時取消咗，11:30有啲肚餓又唔想就咁食個飯，見到呢間九份飽有我想食咗好耐嘅蛋餅，就決定幫襯佢😝兩個人總共嗌咗三樣嘢，分別係台灣擔仔麵($50)、雙重起司蛋餅($33)同埋鹽酥雞($38)，另外加$10要咗杯芒果紅茶仙草😋估唔到個麵都有幾多唔同嘅料，例如半隻滷水蛋、蝦仁、貢丸、酸菜、肉燥，肉丸彈牙多汁，蝦仁大大隻又爽口，麵質方面有啲似油麵、我幾鍾意佢嘅硬度👍🏻芝士蛋餅真係做到拉絲嘅效果，餡料份量好足、食完飽到上心口，不過略嫌表面嘅餅皮未煎到好脆身，下次都係嗌返芝士加另一種餡料，食落應該會冇咁滯🤣酥雞算比較大粒嗰種，即叫即炸所以夠熱夠脆，咬落去都好多肉汁，一份大概有13粒，兩個人夠食有餘，非常推薦大家試吓👍🏻…Read More

呢日同朋友出旺角食飯，見到呢間鋪頭幾吸引、又有$60嘅「小拉麵」可以揀，咁啱我哋兩個都唔太餓，所以就決定幫襯佢🤓朋友揀咗濃湯同埋加咗隻$12嘅流心蛋，原本我想加配芽菜，可惜嗰日冇晒，就轉咗要$10嘅木耳絲🍜小拉麵嘅份量大概係正常麵餅嘅2/3，叉燒有一大片、仲有啲紫菜同筍，雖然我只係加咗木耳，但唔知點解紫菜都特別多😆揀咗「麵硬」嘅口感幾啱我、少少煙韌咁～湯底味道唔算好豐富，主要都係清清地嘅豬骨味，冇咩其他蔬菜味或者鰹魚粉味😉叉燒夠軟腍、係薄身咗啲，不過想食到油脂香味/炙燒香就最好嗌返其他拉麵😛以呢個價錢嚟講真係好唔錯，亦都啱晒想食少啲碳水化合物嘅人👍🏻不過唔太建議大家揀濃湯，因為質地好似沾麵嘅湯、而且都幾鹹，好容易就會越食越膩🙈…Read More

前排好想瘋狂食甜品，咁啱見到皇冠假日酒店推出咗個幾抵嘅下午茶自助餐 ($214 + $26.8)，以韓國士多啤梨為主題，所以就book枱去試吓🤓我去嗰日都幾多人，幾乎坐滿曬咁多枱，好彩攞嘢食都唔洗排隊(除咗即叫即製嘅食物)🙈第一碟當然要試甜品，我攞咗千層酥、櫻花蛋糕、芝士撻、慕絲蛋糕、泡芙、酥皮忌廉卷同埋牛乳布丁，全部都係士多啤梨味，當中以慕絲蛋糕和櫻花蛋糕最出色，兩隻都做得好綿滑、士多啤梨味突出👍🏻不過唔建議攞酥餅類嘅食物，因為大部份都好硬好乾，配搭嘅忌廉亦都唔足夠💩今餐嘅MVP一定係即叫即製法式班戟，師傅煎得夠薄又唔會過熟過硬，可以揀加士多啤梨/芒果/香蕉/忌廉，不過唔知點解啲芒果有啲酸😂 Häagen-Dazs雪糕有八款口味，包括比較特別嘅開心果同栗子撻，不過我覺得pancake要配返啲清新少少嘅口味，所以試咗綠茶同士多啤梨先😋熟食方面有4款中式點心，燒賣內餡幾彈牙、面頭隻蝦仁都好爽口😝部份菜式有用士多啤梨入饌，例如香煎龍脷柳配韓國草莓莎莎、燒鴨胸配雜草莓，不過兩者都唔太食得出士多啤梨味🫢龍脷柳嘅肉質唔錯、夠厚身，至於煙鴨胸就有啲韌…炸物方面有蝦多士、咖喱角同好長嘅春卷，雖然蝦肉幾彈牙、調味掌握得唔錯，但油饐味好重，所以都冇再翻兜☹️菠蘿Pizza嘅批邊就比較硬，不過叫做有唔少芝士👌🏻冷盤方面，有麵包控必試嘅羊奶芝士多士同埋草莓蝦仁三文治，羊奶芝士切到好厚、味道濃郁，不過多士唔係即時烘熱就硬係爭咗啲😗蝦仁好爽口，但青瓜嘅味道太出，完全食唔出士多啤梨，變咗青瓜夾包🤣至於壽司、火腿、蕎麥麵就正常自助餐水平～…Read More

金鳳大餐廳都算係香港老字號，午市套餐亦都幾抵食，六七十蚊就有成個套餐，本身我同朋友想試肉醬意粉，點知得返一份，見到其他人叫牛肩胛意粉好吸引，所以就臨時轉軚🤣羅宋湯有少少好似忌廉湯嗰種順滑嘅口感，反而蔬菜味唔係好濃，個人嚟講就唔會話特別好飲🤣不過餐包超鬆軟，唔係空氣包但食落完全冇負擔感，扒房啲麵包真係零舍好味😆牛肩胛幾有驚喜，食落有幾濃郁嘅肉味，夠淋身但唔係疏到冇晒肉質嗰種、仲有啲彈牙，我幾鍾意佢嘅油脂比例，食落有油香又唔會覺得太肥膩，整體嚟講係高水準嘅午市牛扒餐👍🏻雖然價錢略貴，但我覺得同食物水準合乎成正比、值得一試😉意粉方面冇咩特別，係舊式茶餐廳蕃茄意粉嘅味道，口感方面略嫌有啲淋，但都係合格以上嘅水準😚…Read More

好耐好耐之前喺深水埗練波，有時夜就會喺附近食飯，有日想同朋友慶祝就決定去飛鷹試吓，無論喺10年前定10年後，鐵板餐嘅價錢依然比出面嘅扒房平好多🤩$127就有餐湯、餐包、牛扒配薯菜同飲品，轉意粉就要加$10🍝羅宋湯都幾鮮甜、微微辣，有唔少我鍾意食嘅椰菜🥰餐包非常鬆軟，有舊式麵包舖嗰種牛油麵包香味，溫度亦都啱啱好可以溶到啲牛油，作為麵包控嘅我非常滿意😋牛扒方面我哋分別揀咗肉眼、西冷、牛柳，全部價錢一樣，不過肉眼睇都好難分辨🤣肉眼本身脂肪含量高啲，所以食落都彈牙啲，牛柳就偏淋左少少，西冷算係兩者嘅中間，但都唔會太硬、好容易切開，叫五成熟就啱啱好👍🏻份量方面都幾足，我份肉眼幾乎有兩塊牛扒咁款，雖然底下嘅菜唔可以話多，但至少比出面嘅扒房俾得慷慨🤣整體嚟講係非常之抵食水準又唔錯嘅扒餐，尤其是有童年嘅味道，所以食得好開心😆不過就唔好追求肉味好濃或者服務好高級🙈…Read More

作為一個三餐都想食包嘅人，見到呢間餐廳嘅餐牌即刻俾佢吸引住，每份吐司都有厚厚嘅炒蛋，價錢大約係$30至$40，有學生證或者着校服仲可以減$5，既然有折就試試🤓我叫咗豚肉漢堡吐司(原價$34；學生$29)，食物係即叫即制，所以一攞上手非常之熱辣辣又香噴噴，炒蛋望落去都覺得好嫩滑，雖然夾住兩塊豚肉漢堡，但比較薄身、冇乜口感，值得一讚嘅係底下有唔少椰菜絲，亦都撈咗適量嘅醬汁👍🏻麵包烘到啱啱好，表面微微脆，入邊就微微暖又保持到鬆軟口感，而且食得出牛油香味，所以麵包方面我就好滿意😚呢間餐廳仲有賣台灣拌麵同便當，住附近或喺附近返工嘅朋友都可以試試😆…Read More

一入太安樓就見到間排晒長龍嘅車仔麵，而且所有餸菜擺放晒出嚟好吸引，望望餐牌淨四餸都只係要$40左右，咁抵又咁多人幫襯應該都係水準保證👍🏻排隊嘅時候見到佢話啲雲吞係自家製，前面個客人叫咗份雞腎睇落又好吸引，而蘿蔔係測試一間車仔麵嘅最佳配菜，因為好容易有渣或者有苦味，再加份牛腩夾埋都係$41😚好彩啱啱叫完嘢食就有空枱，可以坐低慢慢品嚐，嚟到發現真係好大碗，蘿蔔至少有七嚿，雞腎大大件都有五嚿，男仔食嘅話冇麵都應該都幾飽🤣蘿蔔軟腍夠入味，雞腎表面爽口彈牙，不過最好叫職員展開先容易啲食雲吞有好香嘅蝦味同大地魚粉味，蝦肉豬肉都好爽口彈牙，幾值得一試👍🏻每舊牛腩表面都有層好容易咬斷嘅筋，而且炆得夠腍，又唔會一咬就散，如果鍾意食呢款牛腩嘅絕對要嚟嚟試吓😆排隊嗰時仲聽到有得揀菜底，啱晒需要減碳水嘅人士😉…Read More

太安樓叫得做香港小士林，當然有唔少台灣美食，呢間老兄苔專賣地瓜球，餐廳仲推出唔少特別口味，例如肉鬆沙律醬、椰蓉朱古力因為自己好鍾意食梅粉，價錢方面又同原味一樣($28/10粒)，所以就決定嗌份梅粉地瓜頭試吓🤓因為嗰陣時係朝早，所以全部地瓜球都係整定擺咗一段時間，店主會再額外加啲梅粉落去🫙攞上手唔算好熱，亦都因為係整定嘅關係，咬落去唔脆、有少少硬，不過的確好煙韌，而且梅粉嗰少少鹹味可以中和返地瓜球嘅油膩感，兩者真係好夾👍🏻建議大家夜晚先去食，地瓜球應該就會新鮮啲好味啲😋…Read More