kitkatgggggg的個人專頁

呢一日朋友收工約飯聚，我哋就嚟到將軍澳呢間主打台式藥膳火鍋嘅馬祖，一嚟到門口已經見到有唔少客人排隊，睇嚟有返咁上下質素，目測餐牌上湯底嘅選擇都幾豐富， 仲有唔同價錢類型嘅肉類套餐選擇，於是我哋嘅就揀咗個298嘅套餐，有極上牛頸脊，西班牙伊比利亞黑毛豬，仲有唔同嘅自助火鍋配料。我就選擇左椰子藥膳雞湯底，賣相唔錯，好快已經聞到椰香同埋店員好快送上牛頸脊同伊比利亞黑毛豬，兩款肉質都好夠肥美，牛頸脊好多雪花，黑毛豬肥瘦均勻。朋友叫嘅麻辣鴨血湯底都好香，湯底仲有凍豆腐同鴨血件，吸收晒啲醬料嘅香味。再加埋牛頸脊同黑毛豬，食到流晒口水。值得一讚嘅係呢度椰子藥膳嘅湯底好清甜，藥膳味甜甜地好易入口，一啲都唔會有油膩嘅感覺。至於prime grade牛肉同無激素豬肉片都好有咬口，肉味香濃。至於出邊嘅自助吧都幾豐富，我比較鍾意台式嘅丸類，選擇好多，有特別嘅芋頭貢丸、花枝條、沙茶牛肉、黃金丸、芫荽燒賣等等。蔬菜份量同埋選擇都幾多，而且食落都新鮮。最後食埋多款嘅雪糕，我比較鍾意玄米茶口味，食到我哋個個舔舔脷，飽到不得了，性價比好高！…查看更多

朋友好想食蒸氣火鍋，加上我哋鍾意食海鮮，於是就嚟到九龍城嘅蟹仙海鮮蒸氣火鍋。我哋決定叫套餐，咁就唔使諗食咩，而且有好多款嘅海鮮，叫咗呢個399套餐，有蟹之餘，仲有龍蝦、鮑魚、虎蝦、同貝殼類。大大盤嘅海鮮拼盤好吸引眼球，滿滿都是海鮮。值得一讚嘅係有店員幫我哋整海鮮，唔使自己落手落腳整到過晒火。鮑魚好鮮甜爽口，而且仲有啲海水嘅味道。帶子都好大隻，比鮑魚更加甜同嫩滑。東星斑魚肉好鮮味，而且都好滑。青口同刀貝好爽口濃味，濃郁到好似飲緊海水咁，唔使加調味料。龍蝦好爽好多肉，大大隻嘅蟹非常多膏，蟹肉好輕易就好撩到出嚟，一疏疏嘅蟹肉好實淨，一啲都唔似平時街市啲蟹咁水。仲有加咗粟米芋頭同菜莆嘅海鮮粥，好似飲緊海鮮湯咁，飲落都係鮮甜嘅海鮮味。最後仲有一碗椰汁燕窩，食埋就夠晒滋潤。…查看更多

屋企人話想打冷，但無左晚市堂食，午市打冷又有啲奇怪，原來呢間主打潮洲菜嘅陳儀興飯店外賣有折，所以就買嚟做晚餐。平時打冷都會食嘅烏頭，呢間餐廳選用元朗烏頭，仲有牌仔證明，無花無假，用鹽焗再凍食，魚肉有黃油，加上附送嘅豆醬一齊食，味道好鮮，咸咸地幾香。我本身都怕外賣嘅蠔餅會淋，但竟然拎到返屋企仲好脆，因為外賣盒有開洞，唔怕焗到淋，蠔仔好大粒，蠔餅好香口好脆卜卜，份量都唔少，幾好食。滷水拼盤有好多款，有生腸、紅腸、墨魚、腩肉、蛋、豆腐等，都幾豐富，而且味道好入味，尤其生腸、墨魚夠爽口，豆腐滑得嚟但吸收左滷水汁，整體都唔錯。…查看更多

今日約咗朋友食飯，朋友選擇左尖沙咀呢間焱丸水產，好有日本嘅感覺，好似日本嘅屋台或者居酒屋咁，人多得嚟好有氣氛。刺身三盛，分別有三文魚、油甘魚、帆立貝，全部都好新鮮，入口好鮮甜，三文魚好肥美。麻醬番茄豆腐沙律，有一碟麻醬可以自己按分量加落沙律，朋友唔食麻醬，而我就好鐘意麻醬，所以好貼心，番茄新鮮開胃，豆腐香濃嫩滑。而炸物都唔錯，幾香口，辣味豆腐炸得幾香，熱辣辣，不過就唔算好辣，炸蓮藕片脆卜卜，好正。壽司盛合，有油甘魚、北寄貝、鯛魚、海膽、吞拿魚等等，非常豐富，我比較喜歡海膽同吞拿魚，海膽入口甘香， 吞拿魚味道鮮甜。鮑魚殼燒同蟹肉甲羅燒都係由店員即席燒，兩者都好驚喜，鮑魚新鮮爽口，甲羅燒嘅蟹膏入口惹味，加上黑松露、蟹肉、鵪鶉蛋燒，味道濃郁有層次。…查看更多

好鍾意食海鮮嘅朋友約我食飯，話想去銅鑼灣嘅蟹仙食海鮮蒸氣火鍋。呢到嘅老闆係海鮮入口商批發，做左好多年，所以有唔少靚海鮮都會拎嚟自家餐廳賣，所以呢到可以食到好多特別而新鮮嘅海鮮。我哋選擇叫$438嘅尊貴海鮮套餐，套餐都好多款唔同嘅海鮮，饅頭蟹、龍蝦、奄仔蟹、虎蝦、月亮貝、鮑魚、青口等店員幫手處理蒸煮海鮮，按唔同嘅時間一次蒸一款海鮮，可以食到岩岩好嘅口感，唔使自己動手整到過晒火。鮑魚同虎蝦都大大隻，爽口彈牙，食落鮮甜嫩滑。青口都好爽口，海水濃味到一個點，同平時西餐嘅藍青口好唔同，感覺好特別。月亮貝同龍蝦就好有鮮味，月亮貝啲肉好滑好甜，龍蝦多膏得嚟好Creamy，肉質彈牙結實。不過我最鐘意嘅都係奄仔蟹，因為夠曬多膏，啲膏好似食緊雪糕咁滑，蟹肉肉質結實有鮮味，饅頭蟹都好特別，細細隻好鮮甜。最後食埋吸收曬海鮮精華嘅海鮮豬骨粥同椰汁燕窩，今餐真係超級滿足。…查看更多

最近見素菜咁流行，就諗住跟着潮流試下。咁啱見到屋企附近嘅波仔新出咗啲素食嘅菜式，估唔到都有啲驚喜! 葡汁雜菜飯入面嘅雜菜絕對唔膩，葡汁嘅份量啱啱好，好易入口同配飯。黑松露蘑菇意粉嘅黑松露味好濃，對比出面餐廳嘅意粉都毫不遜色。而且就算冇肉都完全唔覺。藜麥花椰菜飯個感覺都頗新鮮，好少會係出面食度，而且藜麥嘅口感好特別，感覺相對冇咁單調。而且我仲買咗個眷村蔥油餅，蔥油餅嘅外皮酥酥脆脆、內餡又充滿飽滿的蔥花及蔥香。無論當小食定正餐都一樣咁正，真係一試難忘吖。…查看更多

呢日同朋友聚會，想傾下計坐耐啲，就決定食小菜，因為可以慢慢食，又可以麻甩地飲下啤酒，吹下水。餐牌嘅食物選擇都好多，不過鐘意食熱氣野嘅我Target 就當然係辣蟹，避風塘式嘅辣蟹，加上香辣嘅炸蒜好惹味，肉蟹都幾大隻，辣得嚟又唔會搶左蟹肉嘅味道，仲有啲香濃嘅蟹膏，正呀！避風塘鱔球嘅味道同辣蟹好似，一樣咁多炸蒜，鱔肉外皮脆卜卜，魚肉好彈牙，好岩送啤酒。辣酒煮花螺唔係周圍有得食，估唔到呢到有得食，辣得好過癮，但唔會太辣，啲螺肉好爽口，同埋吸收曬啲汁，好味到啜手指。潮式煎蠔餅，同平時打冷嘅炸蠔餅就有啲唔同，似蠔仔煎蛋餅咁，而且蠔仔都幾飽滿，但都幾好食，少咁啲熱氣，但多左入家常嘅感覺。整體嚟講食物都好有鑊氣，價錢亦算合理，尤其炒蟹好香口，鐘意食蟹嘅人都可以一試。…查看更多

朋友約飯局要求食泰菜，除左九龍地，其實銅鑼灣都有唔少，我地就去左呢間裝修得好有泰式風情嘅小店。一入門口已經見到大大架火車，好似去左泰國嘅火車市場咁。餐牌上都有好多食物選擇，我哋就叫咗泰式肉碎生菜包，呢個絕對係食泰國嘢必食嘅菜式， 生菜大約有十多片，但係豬肉碎非常多，啲仲有啲香料，味道好濃郁。仲有青咖喱海鮮，用咗一個鐵鍋去上菜，我哋另外仲叫咗客蒜蓉包，可以用來點青咖喱食， 入邊有唔少海鮮，例如大蝦、青口、魷魚等， 都幾足料。鐵板豬頸肉馬拉盞通菜都好正，夠晒鑊氣，馬拉盞鹹鹹香香，豬頸肉好惹味。食到咁上下，叫咗杯荔枝沙冰同芒果椰汁沙冰解解渴，飲品都相當大杯，荔枝沙冰酸酸甜甜，食辣野飲就最啱，芒果椰汁沙冰，就好似食緊芒果糯米飯一樣，好香芒果味之餘，椰汁都好出。整體來講食物質素都幾高，價錢又唔貴，份量都幾大，而且坐得都幾舒服，好啱朋友聚會傾偈食飯。…查看更多

原先約左人交收，結果俾人放飛機，朋友就陪我食飯，去咗將軍澳食飯。目測菜單嘅選擇都幾豐富，除咗泰國菜，仲有馬來西亞、印度、印尼等唔同嘅國家嘅菜式， 好似幾正咁！我哋叫咗份沙嗲串燒，三串雞肉三串牛肉， 份量都唔少， 每串嘅肉都好大舊，唔錯唔錯！而且個沙嗲汁好重花生味，正呀！跟住仲叫咗個泰式蠔餅，非常多嘅蠔仔，底下仲有啲芽菜，蠔仔好多好鮮甜，個蛋都好香口。炒通菜嘅味道好惹味，少少辣嘅馬拉盞加埋蒜頭一齊炒， 重口味人士必食。粟米燒魷魚沙律都好正！除咗魷魚，仲有啲蝦仁，其實係海鮮沙律，加埋啲配菜同泰式酸辣汁， 酸辣開胃！人均大概二百零蚊， 但係質素好高，而且食得好滿足，值得再嚟食！…查看更多

呢日收工去坑口食飯，同朋友一齊聚會，咁啱見到呢一間以沙律吧同任飲水果茶做主打嘅塚田食堂，餓餓就同朋友入去醫肚。我哋每人各自叫咗一個套餐，分別係燒花魚定食同埋炸池魚定食。雖然兩個都係食魚，不過味道分別就好唔同。花魚烤得好香口，鹽燒嘅方式帶出魚油香，味道簡單但係魚味好濃。跟餐仲有一啲配菜漬物，牛蒡同青瓜，送飯幾好。薯仔沙律都唔錯，不過一啖就食晒，有啲唔夠喉。至於朋友嗰個炸池魚都好香脆， 有成三條咁多，加埋他他醬食，夠晒惹味，好啱鍾意食熱氣野嘅朋友。除此之外仲可以出去沙律吧拎唔同蔬菜，整自己口味嘅沙律。亦有唔少飲品選擇， 有好多款嘅水果茶、果汁、同罐裝飲品。今餐都食得真係幾飽，人均都係百零蚊， 都真係幾抵食。…查看更多

將軍澳嘅新餐廳越開越多，今日同朋友經過將軍澳海邊，見到有一系列嘅新餐廳，間間都好吸引咁。朋友話好耐冇去台灣旅行，好想食下台灣嘢，一於就試吓呢間台式料理餐廳。一入門口就聞到好大陣嘅燒肉香味，見到有唔少客人都嗌咗台式烤肉，望到都流口水。兩個人食得唔多野我哋就決定叫一份烤牛胸腹同埋大腸干鍋，再叫左個星虹沙冰。牛腹肉配上店家特製嘅烤肉汁，食落非常香口而有肉味，醬汁甜甜地好開胃。大腸乾鍋好香脆， 唔好睇好似好多辣椒咁，但其實唔會好辣，大腸煙煙韌韌，好有口感。最吸睛嘅都係呢杯沙冰，七彩繽紛嘅顏色好夢幻好少女，飲落酸酸甜甜，每隻顏色都有啲唔同味咁，打卡一流。呢度嘅環境都相當舒服， 而且位處海邊， 搬露天嘅環境好開揚，真係有種去咗小旅行嘅感覺。…查看更多

諾士佛台除左夜晚飲酒消遣之外，其實仲有好多質素高既餐廳。今次黎到尖沙咀既Oasis Bar & Grill，餐廳裝修好有高級感，但又可以絕對放鬆。- 我地今次叫左French St. Martin (No.3)生蠔、紅酒燴牛面頰伴紅蔥頭配薯蓉、薄荷寶雲酥燒羊架伴法式忌廉焗薯、荷蘭鐵鍋班㦸配新鮮雜莓、楓糖漿及楓糖核桃雪糕同焗酥皮蘋果撻。- 頭盤既生蠔係黎至法國既，唔會太有海水味，反而有少少礦物味道！呢款生蠔比較肥美，而且非常新鮮，食落口仲係夠哂凍，非常適合配檸檬汁同特製辣汁。- 主菜方面，紅酒燴牛面頰食落好滑好淋，大大個紅蔥就好有蔬菜甜味，薯蓉又好幼滑。味道方面，紅酒汁好適合牛肉，牛筋仲有滿滿的骨膠原。- 而另一款主菜既薄荷寶雲酥燒羊架伴法式忌廉焗薯就好嫩滑又唔鞋，薄荷寶雲酥既邊邊脆得黎，仲食到芥末味。芝士忌廉焗薯一層一層咁，忌廉同芝士好香，非常邪惡。- 甜品方面，我地叫左荷蘭鐵鍋班㦸配新鮮雜莓、楓糖漿及楓糖核桃雪糕。店員好細心提示我地千萬唔好觸碰鐵鍋，以免燙傷！由於鐵鍋真係好熱，楓糖核桃雪糕慢慢溶化落pancake，再淋上楓糖漿同夾埋雜莓食，唔同層次甜味同酸味交融。- 而焗酥皮蘋果撻既酥皮好香牛油味同好脆，加上一片片蘋果，食落同睇落都好傳統。呢款同樣用上楓糖漿，感覺比較健康！…查看更多

蝦蝦燒係香港數一數二評價最好既燒烤流水蝦餐廳，餐廳地方寬敞，蝦缸乾淨又衛生。今次我地食足2.5鐘燒烤放題，海鮮無限量供應，新鮮又多種類。而且餐廳用左無火燒烤，安全又唔會太大煙。餐廳有一有個冰櫃裝住好多海鮮俾客人選擇同夾，仲有好多肉類同蔬菜，前菜同醬汁多到眼花撩亂。海鮮方面，鮑魚、扇貝、大蜆、螺、生蠔、魷魚同原條魚都係任拎任燒，性價比極高！餐廳凡惠顧，都會為每人送上一客大蟮同蟶子，雖然無得Refill，但勝在質素高。而且燒烤爐上下兩層都可以燒，絕對唔會用太多時間又食唔到野。餐廳周圍有好多蝦缸，而每枱都會附有冰桶裝冰水同蝦，夾完流水蝦可以先浸暈佢再燒。燒大蝦、大蟮同鮑魚真係好惹味，食到停唔到口。呢到海鮮非常新鮮，燒蝦大大隻。枱面除左有唔同粉狀調味料，餐廳亦都俾左泰式辣汁供客人選擇。飲品同雪糕方面，大部份都係常見既，有好多本地無糖茶同雪糕，仲有部份台式飲品同忌廉奶、汽水同啤酒等。…查看更多

今日約左3個朋友一齊去行街食飯，四個女仔緊係要搵啲打卡餐廳！咁一於就試下太古城新開既新式韓國菜—Banchan and cook。入到餐廳見到好多乾花佈置，最適合我地女仔打卡😍，好靚啊！職員好快安排左座位俾我地，而且餐廳菜式好豐富，有蛋包飯、炸雞同飯卷等等，好多款都好想試😍。而我地四個都俾韓牛吸引，因為張圖真係太吸引。韓式牛扒三文治好驚喜，仲有配襯埋3款沙律：蘋果薯仔蟹子，紅菜頭同南瓜青瓜藜麥。三款沙律都好好食，火速清碟。🤣另外，芝士炸千層豬扒上面鋪上好厚既芝士，芝士味好濃，岩哂我朋友，佢食到舔舔脷。燉牛肋骨蛋包飯係強烈推介，一定要叫！因為牛肋骨炆到好入味，配埋蛋包飯簡直一流！另外，配菜既兩款蘿蔔都好入味，可惜得一舊，唔夠喉🤣。韓式卡邦尼意粉既煙肉碎炒到好香，加埋蘑菇同配埋個醬汁一流。飲品方面，四杯飲品既賣相都好靚。夏之白桃奶酪既味道好濃，仲有5-6塊新鮮水蜜桃係表面，飲得又食得。而白桃梳打既白桃味糖漿加埋梳打啱啱好，唔會過甜，味道非常清新。而士多啤梨鮮奶咖啡有淡淡嘅士多啤梨味，都唔會比咖啡蓋過。甜品方面，我地叫左烤朱古力棉花糖，棉花糖燒到外脆內軟，上面淋左朱古力醬底部有消化餅碎，夾埋一口勁好食！😍…查看更多

咁啱見完客喺長沙灣附近， 打算收工買啲燒味，斬料加餸返屋企做晚餐，見有唔少街坊係呢間燒臘舖外排隊等候，價錢又唔貴，好似幾好。同收銀阿姐比完錢落好單，就拎飛仔喺門外排隊，好快就有得拎。最抵讚嘅係阿姐好好人，問佢拎多幾包醬汁都冇托手踭！燒鵝半隻$180，價錢合理，買來比老竇食，老竇表示滿意。鵝肉皮脆肉香，而且肉質相當肥美，抵食！叉燒亦係我嘅至愛，呢度半斤叉燒有優惠，$39大大份，蜜汁味道香濃，叉燒有香口燶邊，瘦少少但就健康啲。至於麻辣手撕雞都唔錯，半隻嘅份量都唔少，好足料，麻辣味好香，但唔會太辣，大人細路都岩食。…查看更多