之前第一次嚟，其實對呢度嘅咖啡已經冇咩好感。杯Americano真係好澀，又唔香，不過就當我唔識飲咖啡啦。琴日係我第二次嚟呢間餐廳，心諗近屋企，都想俾多次機會，試下啲熱食。因為上次嚟嗰陣只係食咗甜品，都叫做正常，只係唔講都唔知自己食緊開心果雪糕啫……其實今次本身都冇諗住特登要寫個食評，再差嘅餐廳，比比皆是。但真係搞唔掂呢，食完之後痾足一整日。話說琴日嘅呢一餐lunch係我全日嘅第一餐，所以都毫無懸念係呢度嘅食物出事。我諗200蚊一份All Day Breakfast，300蚊一份6合set meal (俾錢轉咗龍蝦湯、牛面肉)，大家想買嘅都係一份打卡呃like、食物放得入口嘅體驗，同埋好少少嘅服務啫？All Day Breakfast，我諗日月星街是但入一間都好食過佢。豬肉又油，炒蛋又碎又乾，煙三文魚個樣好似759買返嚟拆袋上碟咁。$188一份，冇嘢飲，你哋真係自己考慮下。個6合set meal 仲癲，肉鬆飯啲肉鬆有泥膠味；龍蝦湯我當然唔會expect你係homemade啦，但係就鹹到苦。最喪心病狂竟然係塊雞扒……肉係霉嘅大佬！放入口會化成粉狀，仲要有陣鹹魚臭味……我真係咁大個人都未食過呢個質地嘅雞肉。再嚟係啲staff……有啲就好似我欠佢錢？定係我做咗啲咩對佢唔住？黑口黑面，又啞嘅……我一行兩人，已經係唔該前唔該後，定係其實香港而家個常態係，啲客俾錢嚟，就係為咗睇你哋啲staff表演自己幾有個性？！都算啦，一間cafe，要求得啲咩。但係門口嗰個收銀，我真係懷疑佢係咪食咗太空油。同佢講嘢、同佢反映啲食物有問題，佢好似我叫個仔起身返學咁「依依哦哦」，都唔知佢有冇聽到我講嘢，又唔知佢明唔明我講緊咩，反正就係有少少反應，但又唔似有反應咁。成件事，我真係冇一刻要求過退錢定係咩補償。我哋直頭係俾完晒錢，先同嗰個staff講，提醒佢哋啲食物出咗事，希望佢哋留意下。前後成個反映問題嘅對話都冇20秒，我哋就離開咗。結果就肚痾咗一整日，決定要寫呢一篇comment。你哋真係好自為之，I mean 無論係店方定客方。係咁先。…Read More
NINETYs Roastery
2025-10-20
The above review is the personal opinion of a user which does not represent OpenRice's point of view.
Like
Date of Visit
2025-10-19
Dining Method
Dine In
Spending Per Head
$250 (Lunch)
