HiEmily's Profile

這次去營致會館用餐，安排了靠窗邊坐位，空間闊落，坐得舒適，服務也不錯，感覺愉快。餐廳環境優雅舒適，氛圍寧靜，令人放鬆。服務人員態度專業又親切，細心照顧每一個細節。菜式方面十分精緻，招牌菜脆香貴妃雞皮脆肉嫩，香氣撲鼻，果然不錯，直得推介；椒鹽九肚魚外酥內嫩，但椒鹽味唔夠；蛋白杏仁茶入口滑順，杏仁香濃卻不膩；最後的西米布甸清甜爽口，為整頓飯劃上完美句號。其他點心就正常水準。另有個點心配free flow美酒餐，對於喜歡飲酒的人士就非常抵食，所以見不少人都食這個餐。…Read More

記得以前有一段時間，成日會去食中環的太平館，但現好耐都無幫襯啦，今日突然想食瑞士雞翼及梳乎厘。餐廳充滿懷舊風味，招牌瑞士雞翼，甜香入味，雞翼嫩滑，仍保持水準，價得推介；熏魚煙燻香濃，魚肉外脆內嫩，但價錢略高，性價比低；摩囉雞飯，雞肉滑溜；砵酒豬扒，豬扒唔韌，醬汁甜中帶酒香，好有特色；最後嚟個巨型梳乎厘，蛋香濃郁，外脆內軟，入口即化，係完美的飯後甜品，必食。整體都ok，服務親切，係一間值得回味的老店。 …Read More

望住維港食薄餅都係一種享受！見Vesu Pizza Bar 打入了亞太Top 50 Pizza，就去試吓啦，雖然排名44不高，但勝在有靚景，望住維港食住 Pizza，真係好chill！餐廳主打 9吋拿坡里手工薄餅，麵團由開放式廚房即場搓揉，放入意大利 Neapolis 窯烤爐焗製，外脆內軟，煙韌得嚟又唔會太厚。頭盤小食及甜品都算ok，coffee都不錯👍🏻餐廳薄餅味道不是非常出色（我覺得灣仔Motorino 好食啲囉），但勝在有靚景加持，無論係想試正宗拿坡里Pizza，定係想望住日落食 Pizza，chill住打卡都好正。…Read More

呢間意大利餐廳嘅海鮮塔Brunch真係性價比高，無論係食物質素、環境氛圍定服務態度都表現不錯。首先，海鮮塔擺盤精緻，配搭鴨肝漢堡更添奢華感，口感層次分明。自助區亦非常豐富，包括沙律、冷盤、芝士、湯品、意式牛肉丸、即煮松露炒蛋、意粉及即切豬鞍，每樣都見心思，味道有水準。主菜選擇了海鮮意大利飯及比目魚，味道出眾，令人回味，但由於太飽，個飯食唔晒。甜品區款式不算多，Cheese cake 及馬卡龍較出色、其他普通。另有即煮酒煮Berry加Häagen-Dazs雪糕，為整個Brunch畫上完美句號。飲品方面，咖啡茶任選。最令人印象深刻係落地玻璃窗旁嘅海景，望住維港享受美食，心情自然放鬆。環境舒適，座位寬敞，服務人員親切有禮，令整個用餐體驗更好。整體而言，呢個Brunch不錯，可以對住個維港靚景食嘢，仲好抵食，絕對值得一試。…Read More

之前食過幾次lunch，由初初唔多人，到後期要book先有位。其實係灣仔算係唔錯的抵食及好食的選擇，所以多人都唔難理解。不過今次我唔係想講佢的lunch，而係想講High Tea。因為時間及地區啱，所以去試佢個下午茶，個Tea set四百幾蚊兩位，有鹹甜點及鬆餅，coffee/ tea，還有杯氣酒。佢啲鹹點與一般酒店的西式high tea有些唔同，係中式點心為主，共有6件，雖然唔係啲咩好貴價野食，但味道都唔錯。甜點方面賣相都靚，鬆餅有微溫，整體都好食，唔會好甜。環境舒服，聊天好地方。可能餐廳坐位不多，星期日都好full。侍應都好有禮貌，但感覺人手不足，她們全程都好忙。…Read More

近排發現問月開咗間新嘅中餐廳 - 大宅，餐廳名稱好特別，感覺係打造大宅家的味道。餐廳雖然細細，但裝修精緻，服務員親切有禮貌。是日食午餐，叫咗兩個午市套餐，有前菜、湯羹、小菜、白飯任裝及精美甜品。上菜時食物熱辣辣，味道不錯。前菜有三樣嘢都好食，湯羹好豐富好多材料、鬼馬咕嚕肉特別、梅菜蒸一夜鹹鮮馬友魚好鮮甜好味道😋甜品方面都好食，芋茸燉鮮奶味道適中唔太甜🍨，石獅子造型芝麻雪糕好得意有芝麻味😍 還有咖啡任飲☕️整體食物及服務都不錯，值得一試。…Read More

四季大堂果個位開揚又光線充足，好適合與朋友去hea，輕鬆relax一下🥂新開的Gallery，裝修靚，😍舒服的梳化位，好期待快啲開幕，約朋友去afternoon tea🍰🍧🧁🍹🍸, chill下….…Read More

Cafe on 8 的 lunch buffet相當超值，不用一百元就可在一個好環境的地食到超飽。本以為冇咩人，但原來都好full，好在有book位。沙律頭盤、熱食小食及甜點是自助，如怕唔夠飽可加$50有埋個 main course。除了價錢抵，最重要是環境舒服，景觀開揚，食物選擇多、質素也不錯，不時有新款食物提供，值得推介。P.S.: 原價$98加一，信用卡有85折👍🏻…Read More

人生的第一次食High Tea就係喺四季酒店的 The Lounge，當時好開心覺得自己份外高貴。雖然多年來都有係各大酒店食過，但始終對四季的High Tea有情意結及念念不忘，好想再去試，但近年四季嘅High Tea成為茶迷必去之地，而且又只可係早兩星期預約，所以經常都Full Booking。適逢朋友生日，所以給了自己藉口去偷懶半天，相約朋友去High Tea，果然平日是比星期六日容易book位好多。 約兩點九到達酒店，間餐廳唔係好大，約廿張枱，Waiter幫我地安排咗個坐近窗口的位置，望出窗外可以望到海景架。現場環境高雅，還有人彈琴，氣氛輕鬆，裝修雖冇半島咁華麗，但環境簡簡單單、光亮，而且酒店樓底很高、環境非常舒適，加上天氣很好，外面的風景非常美麗，人嘅心情都份外輕鬆，坐坐飲吓嘢都已不錯了，感覺真係好舒服。 講吓食物方面，點了個兩位用的傳統英式 High Tea Set，三層高的美食架，真係很吸引，上層有三文治等鹹點、中層擺放了鬆餅、底層係甜品蛋糕，擺放得好靚，靚到有啲唔捨得食，所以食前都係要相機先食，影多幾張相片啦。 上層鹹點有鵝肝多士，蟹肉包仔，碎蛋沙律，帕爾瑪火腿，煙三文魚sandwich等等，呢幾樣都好味。 中層的4個大scones，有提子同原味兩款，外面焗得香脆，裡面又夠鬆軟，scones有微暖，而且幾重牛油味，做得不錯，好好味 。而且有三款醬料任君選擇，忌亷、草莓醬及香橙醬，質感好滑，跟scones食真係最好不過。 下層的甜點有蛋糕朱古力餅杯，cake，熱情果tart及puff等等，其實我都唔係好知佢地係d咩，各款蛋糕甜點都又靚又美味啦... 每樣食品都很精緻特別。 茶方面，我就點了冬天特飲，有少許椰香味，而朋友就點了lychee green tea，清清地，無乜特別，可能我一向唔識得賞茶啦。 環境氣氛、服務一律都係水準之上令人滿意，scones 依然能保持質素，值得再三回味。另記得以前甜點可以refill，有六款，waiter會過來問你要唔要refill D甜點.... 以下是當時refill了的甜點... P.S.: 食到中途時，朋友發現坐在我們附近的人原來是梁錦松先生，他也與朋友在享受下午茶，由此可見四季的下午茶也深受名人喜愛。 …Read More

半島酒店利士廳並非你話去食飯就可去的餐廳，通常只有當去飲宴時先會有機會去到的。可能因當年係度擺婚宴，對佢有好特別的感情，好想重回舊地。所以當知道佢聖誕節有做 Christmas Buffet Lunch，當然即刻報名，雖然已在成個月前訂位都要排waiting list，但好彩最後都wait到。 當日，懷著興奮的心情去享受大餐！ 半島酒店聖誕時無論內外的裝飾、環境及氣氛，一向都無得輸，靚到不得之了。沿著梯級走上位於M2的利士廳，已可見到食物完美的擺放係外邊的大廳，而宴會廳入邊就擺了十多張枱，不算太擠迫。講吓食物方面，食物有分冷盤、沙律、熱盤、甜品蛋糕，種類繁多，擺放得又靚，加埋聖誕的擺設裝飾，靚到有啲唔捨得食，怕破壞了它的完美。 冷盤：有龍蝦、雪場蟹腳、大蝦、帶子、翡翠螺等等。龍蝦大大隻肉質彈牙啖啖肉，蟹腳海水味恰到好處，其他冷盤刺身都新鮮鮮味。 沙律及壽司：有多款新鮮菜類、煙三文魚及熟食沙律可供選擇。Ham，芝士，壽司盤，三文魚、吞拿魚、鮮蝦等刺身，都係水準之作。 熱盤及湯：熱盤款式都多，有牛、燒雞、羊架、魚柳等等，但由於熱盤永遠都唔係我食buffet的首選，所以每樣都只試了少少，但味道都不錯，另有湯及多款麵包提供。 甜品蛋糕及朱古力：士多啤梨聖誕樹、馬卡龍、檸檬撻，芒果奶凍、各款蛋糕甜點等等都又靚又美味，最可惜無Tiramisu ，因為半島個Tiramisu好好味。 另外，仲有個 Tea set三層架擺放了半島朱古力，啲朱古力係半島Boutique 買一粒都要幾十蚊，鍾意食朱古力的人士真係要食多幾粒啦！ 大會都好有心思，準備了一些小玩意給前來的食客玩，另找來聖誕老人派禮物及歌手獻唱，以增加聖誕氣氛。 最後要一讚的是職員的態度非常好，臨走前本打算影多張相留念，餐務經理主動上前幫手影相，還提議一些影相靚位，本來工作人員正在清走佈置，也被叫停了，讓我們有個靚靚背景去影相（真有點不好意思)，但職員細心及以客為先的態度真係值得一讚再讚。…Read More