mapletwist's Profile

返工日子等左成朝終於到午飯時間，但由於疫情關係，同事全部都叫外賣，唯有獨自一個出去食飯。可能時間尚早，平時好多人等既海安咖啡室竟然唔洗等，決定入去試下。睇完餐牌，本身諗住叫司華力腸薑葱香油撈麵餐，跟住望到隔離枱食客啲叉燒好似幾吸引，所以改返叉燒撈。等左大約五分鐘就到，果然冇令人失望！叉燒賣相好靚，肥瘦適中顏色鮮艷又多蜜汁，肉質夠嫩，唔會太甜又唔算油膩好好味！而麵底都係好出色，麵質唔會好硬，有大量薑蔥，非常足料，$48包飲品好抵食！極力推薦佢嘅叉燒，雖然叉燒唔係佢嘅主打，但係都咁高質，比起主打賣燒味既餐廳更好！…Read More

同朋友出尖沙咀，見到澳門茶餐廳12點前都仲有平早餐食，就入左去食。天氣咁熱，間餐廳好似完全冇冷氣咁...最後揀左E餐豬扒紅腸剪蛋湯出前一丁同埋C餐鮮茄牛腩湯通粉配奶油豬仔包share最先到係鮮茄牛腩湯通粉，熱辣辣，早餐價一啲都唔細碗，湯底足料，唔係用罐頭番茄湯，通心粉唔會太淋，牛腩都夠嫰，如果湯能夠落少一點味精會更好。豬扒紅腸剪蛋湯出前一丁就一般般啦，紅腸淋左啲，麵質都ok既，豬扒得兩條。奶油豬仔包夠多煉奶好好味。…Read More

約咗屋企人嚟楚撚記食飯，好多人等位，好彩預先訂咗枱。金沙黃金白飯魚啲炸蒜辣辣地脆卜卜配外脆內軟嘅白飯魚好好食。豉椒炒蜆就麻麻哋，雖然個豉椒汁都幾濃味，但係啲蜆唔新鮮食落有沙同埋冇乜鑊氣。豬油撈飯啲豉油豬油蔥同芫荽全部可以根據自己喜好落，依家出街好少有得食，好味好邪惡。香煎黑松露手打蓮藕墨魚餅，黑松露味同墨魚味夠晒濃。菠蘿拔絲咕嚕肉味道酸酸甜甜，咕嚕肉香脆，最特別係佢旁邊放上手工糖絲，上面滴左少少餸汁。燕麥金沙蝦球係我最鍾意嘅餸，蝦球表面有鹹蛋醬，咸咸地又甜甜地咁幾好味。西楚霸王雞佈滿炸蒜跟香蔥好正，但係太多骨同未夠熟。啫啫生菜煲辣辣地d菜清甜入哂味幾好食脆皮炸大腸底下墊左d菠蘿片叫咗九個餸幾個飯同啤酒埋單$1000有找仲有糖水送超抵食!!!…Read More

夜晚諗唔到食乜，咁啱之前收到張外賣紙，就決定打電話叫外賣試吓，佢應承60-75分鐘先到，結果30分鐘就到左。一打開蓋，泰式香辣雞Pizza仲係熱辣辣又香，入面有洋蔥青椒蘑菇菠蘿雞肉泰式辣醬，上面仲沈左啲黑椒碎，甜甜地又辣辣地幾好食。煙三文魚焗飯入面有蟹柳蘑菇魷魚青椒配忌廉汁，整碎晒d煙三文魚成兜飯撈勻超好味。檸檬蜜糖燒雞翼，d雞翼燒得香脆可口，但係就冇乜檸檬同蜜糖味。$188有普通批+飯+小食同三罐飲品，超抵食。…Read More

同朋友行完SOGO好肚餓，去咗附近嘅板長食晚餐，可能因為差唔多夠鐘閂門，侍應啲態度麻麻地，明明隻碟有油洗唔乾淨叫佢換過隻都唔肯，只係大大聲同我地講話幫我地抹返乾淨！大部分食物質素都算可以，最鍾意食芝士飛魚子軍艦，芝士同飛魚子絕配。赤蝦刺身夠新鮮算抵食。海膽蔥粒吞拿魚軍艦就偏貴，不是完整一片吞拿魚。火炙牛油果醬三文魚壽司都值得推介，牛油果醬夠晒健康，配搭本身頗肥嘅三文魚啱啱好，但係佢啲火炙有d燒得唔夠有d燒太耐質素參差。黑椒牛舌冇黑椒味，切到大細勁唔平均。…Read More

午餐突然想食得健康d，見到原味家作sell自己無味精，無雞粉，原味道，好似幾啱我就決定試吓。最尾揀咗頭抽木耳炒麵套餐配花膠川貝雪梨烏雞湯。頭抽木耳炒麵，最大既賣點係炒麵都可以極少油，呢樣做得唔錯。但係麵質偏硬同埋好咸，真係冇落味精？餸就真係得黑木耳，連芽菜同蔥都冇。Menu推介呢款炒麵可以加辣菜脯會好惹味，但係可能外賣所以佢冇俾我。至於花膠川貝雪梨烏雞湯，冇乜油湯味超濃香甜得黎都係咸左少少，如果有湯渣會更好。$62一份午餐仲有湯飲都算抵食。…Read More

朋友話今日帶我去食一間尖沙咀幾出名嘅芝士撈麵，點知原來呢間野都幾偏僻，入到香檳大廈轉咗幾個圈終於搵到。雖然佢好隱蔽，但原來都幾多人食過推介。朋友叫左雞扒芝士撈公仔麵，我就揀左豬扒芝士撈公仔麵，再加一碟蜜汁龍鬚share。勁多芝士汁喺面超邪惡，芝士味超香濃又唔會好鹹，鍾意食芝士撈麵嘅人一定要黎試下！雖然多汁但係又唔會搞到啲麵淋晒，同埋豬扒都算大塊幾好食。蜜汁龍鬚其實係魷魚鬚，唔會太硬，甜甜地幾好食仲有芝麻喺面。…Read More

晏晝本來想出街食飯先來落大雨，唯有又跟同事叫網上外賣平台外賣。今次喺太興度叫咗個叉燒燒肉飯，等左半個鐘終於到。食物顏色唔算吸引，好深色，同平時行過見到掛喺度果啲咁鮮色都幾大分別。但係食落啲叉燒蜜汁夠晒甜好好味，可惜d肉太瘦，如果係半肥瘦叉燒就正。燒肉有五舊，味道不過不失，望埋去以為燒肉皮好似脆卜卜，但係食落都係唔脆，可能因為外賣焗到冧咗。超多飯啲汁落晒底，撈完唔會太鹹啱啱好。$72一個雙拼飯加一杯熱飲稍貴，不過落大雨都冇辦法。…Read More

同朋友到銅鑼灣行街，突然好想食泰式湯麵，咁啱見到呢間餐廳喺附近就決定試吓，等左大約10分鐘就入座。本身想叫船皇湯河，因為見佢有好多餸，可惜最想食既河粉賣晒，所以轉左米粉。真係超多餸，牛雞豬都有，可惜豬潤又賣晒，睇嚟下次要早啲黎食。湯底超正，好濃味又有好多肉碎，仲有脆卜卜嘅炸豬皮喺面。米粉好幼身但係好有口感超入味，大部餸都幾好食，牛丸豬肉丸全部都彈牙，係雞翼d肉太淋我唔係咁鍾意。飲品揀左檸檬梳打，唔太甜大大杯。同朋友點左個泰式炸蝦卷share，炸到熱辣辣，加埋泰式辣醬好好味。…Read More

又到午飯時間，難得今日比較空閒，決定自己一個行遠少少食。途中見到呢間台灣郎，先察覺到自己好耐都冇食台式野，所以決定食呢間。 $66一個lunch set有前菜主菜飯同飲品算抵食，每款仲有四個選擇。最後我揀咗上湯浸時蔬、台灣馳名鹹酥雞、台南魯肉飯加蜂蜜薑茶。上湯浸時蔬係用娃娃菜，味道不過不失。鹹酥雞雖然皮厚左少少但係炸得好脆又唔會太鹹。魯肉飯好好味仲有半隻蛋，又唔會好似真係台灣嘅魯肉飯咁多油。最後佢杯蜂蜜薑茶超辣，夠甜但係蜂蜜味冇乜，好適合女仔飲。…Read More

可能因為天氣炎熱搞到個人冇乜胃口，所以想求其平平地食少少野算，行過見明德既魚皮餃湯米粉唔使$40，決定買一碗拎返屋企食。果然一分錢一分貨，啲米粉粗到好似米線咁，又唔滑又唔吸湯仲要斷晒，用筷子完全夾唔到要用匙羹食。成碗得三隻魚皮餃，唔好睇佢好似好大隻咁，啲皮幾呎厚又硬仲有小小生，入面粒肉其實係得手指尾塊指甲咁大咋，湯略鹹。之後同屋企人講開呢間餐廳，原來佢嘅衛生情況比食物質素更差，唔推薦大家試，尤其堂食！…Read More

疫情終於好轉酒吧禁令解除，難得早收工，所以約咗d舊同學去中環happy hour聚下舊。行到蘭桂坊，見呢間酒吧某d啤酒有買一送一，所以就入咗去。職員安排左我哋坐outdoor ，一開始叫左兩杯Asahi。 不過天氣太熱，坐左冇幾耐杯啤酒就熱晒。本身突然間想食nachos，可惜呢度冇，侍應就推介左Arancini，外面係炸rice ball，入面口感類似risotto，濃濃既野菌芝士味，上面有一片薄薄既黑松露，外脆內軟好好味。…Read More

同朋友去左觀塘OPC搵嘢食，門口侍應話佢哋呢間餐廳唔係成日開門，咁難得今日撞正佢開，所以決定試吓。因為價錢都幾貴，我同朋友叫咗一份dinner set再散叫一個餸。蛋香厚燒西班牙黑毛豬鞍，豬鞍厚肉又多汁，蛋香味濃仲有啲蜜糖喺面甜甜地幾好味，伴菜薯仔都好入味。紅蝦油天使麵，顏色鮮艷賣相好靚，因為連d油都係蝦油，所以蝦味超香，另外兩隻大蝦肉幾鮮甜。手搖檸檬茶唔使落糖水，見到佢臨尾加咗啲檸檬皮碎喺面令到杯飲品更香。…Read More

大熱天時又曬冇瓦遮頭，行行下見到小巷有間餐廳，決定入去坐低休息下。可能因為位置較偏僻同埋過咗午餐時間，餐廳冇乜人，我同朋友一共叫咗兩杯飲品同一碟小食。朋友點左杯啤酒，d望落泡都沖得幾滑。而我就揀左banana milkshake。味道唔會好甜，香蕉味都幾重，大大杯，仲有一大舊好邪惡既忌廉喺頂。小食就揀左馬來沙嗲雞肉串，因為見佢有promotion平左。一碟有五串，雖然唔夠熱，但係算幾香口，沙嗲醬味道濃郁都幾好味。…Read More

以前細個放學同啲同學去銅鑼灣行街，行到又攰又肚餓就會嚟呢度食車仔麵，難得今日又喺附近，決定重溫童年嘅味道。今次點左個三餸車仔麵 - 豆卜蘿蔔豬頸肉米粉配腩汁咁多年冇黎食，仍然保持水準。榮記嘅白蘿蔔一向出色，比出面其他車仔麵店更甜更有味道，本身我唔喜歡白蘿蔔，但係每次嚟榮記都一定會食。仲有，佢嘅腩汁特別香濃又唔會太鹹，非常適合配豆卜呢類咁吸湯既餸，然後大大啖餸連湯一次過放晒入口。豬頸肉幾好，唔算好肥好油，另外仲有配菜送添。…Read More