marcovhiu's Profile

去到星期三小weekend，自然想搵啲好嘢食慰勞吓自己，搵到間係旺角嘅樓上cafe，就去試吓啦。咁我地就叫咗個明太子醬烤魷魚意大利麵同脆炸鱈魚牛油果蕃茄意大利飯套餐。套餐係包餐湯，沙律同埋餐飲。個餐湯係南瓜湯，南瓜味都幾重而且唔會太濃味，感覺好清新。而個沙律亦都好清新，啲菜好新鮮而且份量都足夠，個沙律醬仲係自己調味，好有誠意。個脆炸鱈魚牛油果意大利飯一上就聞到好濃嘅蕃茄味，啲鱈魚炸到好香脆，魚肉結實好有口感，個意大利飯亦都啖啖都係蕃茄嘅茄香味，令人好有食慾。個明太子醬烤魷魚意大利粉亦都好有特色嘅，個魷魚份量都好充足，明太子醬個味亦都好濃，食落滿足之餘又唔會好濟好油膩。啲意大利粉亦都好掛汁，成件事好夾。呢間嘢嘅食物有一種清新嘅感覺，可能揀嘅嘢都冇咁heavy，可以再嚟。…Read More

呢排仲未有得去旅行但係又掛住台灣嘅嘢食，朋友就介紹我嚟呢間木玥巷到試吓。呢間舖裝修簡約有小小日式風格，坐落都幾舒服，但係作為一個食肆最重要都係啲嘢食。我地叫咗個鹽酥雞試吓，發現呢到嘅鹽酥雞非常香脆，但係又冇出面用好多麵粉包裹，只係得薄薄一層，非常有咬口又有雞味。配埋個柚子汁，簡膩一流，係我係香港食過最好食嘅鹽酥雞！正餐到就叫咗個紅燒牛肉麵同安格斯滷肉飯。個麵湯底清甜不油膩，牛肉亦都係厚切，咬落去好有質感，牛肚有鮮味爽口，個牛筋咬落去亦都好軟滑，啲骨膠原爆晒出嚟。至於個安格斯牛肉飯簡直係好食到叫出嚟，啲牛肉肉碎炒得好香，配埋個白飯簡直係絕配。最後我地叫咗兩款飲品，店員推介話係最新推出，咁就當然要試試佢啦。一個係寒天多多，乳酸飲品個味唔算特別重，個白桃又唔會太甜，有種好清新嘅感覺，啲寒天又唔會好硬但同時又好有質感。另一個係黑糖寒天歐蕾，黑糖嘅糖香加埋歐蕾嘅奶泡香滑，甜得嚟又唔膩，仲有陣陣奶香，非常推薦大家試吓。…Read More

咁啱係灣仔區附近做嘢，灣仔區物價比較高，食物又多熱氣嘢，真係唔知食咩好。係差唔多搭巴士走嘅時候見到呢間癡膠雞，個名幾gag就諗住去試吓啦。入面個裝修唔算豪華，但係個粉筆壁畫又幾有心思。不過去食嘢個嘢食都先係重點。咁我地就叫咗個招牌癡花膠雞濃湯米線同椰子雞米線。個花膠雞湯底好重雞味，啲花膠爽軟得嚟彈牙又唔癡口，啲米線又掛到湯。而個椰子雞米線就好香椰子味，未食已經聞到好香嘅椰子味，個湯亦充滿雞油香。個雞肉亦都好軟滑，咬落去啲雞味爆晒出嚟，非常之吸引，係其他地方好難食到咁高質有油香味又有雞味嘅雞肉！飲品跟餐我地就叫咗個蜜桃烏龍冷泡茶同桂花烏龍冷泡茶，個茶底味好香，回甘味出，但又唔會濃同苦。桂花味亦都非常清香。呢間癡膠雞係灣仔區算係一間比較冇咁heavy嘅選擇！…Read More

呢排工作地點轉左去油尖旺附近自然就要去發挖吓身邊既食物，見到一間係轉角既台式小食店自然就會想去試吓，但係又成日都夾唔到時間去，終於有日可以係下午茶時間出去食左個下午茶。去到雖然冇乜野舒適既坐位但係都唔會介意企係到食，因為個門面都唔會好污糟或者好多人，所以都係好放心係到食埋先走。咁我就叫左個芋泥肉鬆三文治，招牌台式香酥蛋餅同埋凍奶茶。個芋泥肉鬆三文治有滿滿既芋泥，十分足料。個芋泥味亦都好出，每一啖咬落去啲芋泥都迫緊出黎，又香又滑。之後仲有個招牌台式香酥蛋餅，台式風味好足，我就揀左肉鬆，火腿，芝士既組合，classic既台式風味，咬落個芝士味好足，每啖都係好足料，個酥餅又香又脆又唔食會好油，食完唔會飽飽濟濟。最後個奶茶亦都好出色，係自家制奶茶，又有奶香又有茶香，每啖都好滿足好細滑，有種茶餐廳風味係到。…Read More

疫情期間要搵餐飯食都唔係咁易，到到都好多人，又要排又多人又危險，但係元朗呢間嘢就真係幾好，店舖唔大，雖然都唔算少人但係好有空間感，同附近食店有強烈對比。入到去燈光都好鮮明，裝修俾人一種好溫暖嘅家的感覺，拎開張餐牌先發覺原來都有返小小睇頭，‘五星級酒店法國餐廳及澳洲知名得獎法國餐廳主廚主理’。但係名呢啲嘢信唔過，就真係要食過先知。咁我就試咗佢一個普通嘅晚餐，首先嚟咗個忌廉湯。一試就知不得了，口感細膩軟滑，入口忌廉香氣濃厚，舌尖感覺到湯入面嘅軟滑小忌廉粒。問一問先發現原來個湯係手打 唔係其他餐廳買現成。就憑呢個湯我完全感覺到廚師嘅誠意。之後就上咗個沙律同多士。多士原本都以為係用多士爐，但點知佢係整咗個法式多士，用煎嘅方式將麵包煎脆，外脆內軟，包身滲透出陣陣牛油香。個沙律又係另一個加分位，望到廚師嘅刀工位，將蕃茄切成細小正方形，混和入去沙律菜入面，提高咗成個沙律嘅新鮮口感，個醬仲要係佢地獨家調配，口感清新輕盈又不膩，剩係個前菜已經知道廚師完全係實至名歸，對煮食有種熱誠，每一樣菜式都用心去煮，每個細節都處理好。過咗陣，主菜就到，咁我就叫咗個日本松葉蟹膏蟹肉忌廉意大利粉。一見到個擺盤已經驚為天人，已經可以稱得上係藝術品。蟹膏嘅香，蟹肉嘅鮮，兩樣嘢對味蕾嘅刺激激發人類嘅食慾，意大利粉又煮到恰當，彈牙！彈牙得嚟又可以帶埋佢地嘅手打忌廉上嚟，忌廉嘅香氣比飲湯嗰陣更上一層樓，由口腔帶上鼻腔再直攻腦門。加埋蟹肉啲香係口入面放射性爆開，帶嚟另一種層次嘅享受。食到一半到，飲品就嚟啦，佢係一杯芝芝芒果乳酪，我心諗都差唔多，有杯芝士嘢飲，飲埋就差唔多。但係一飲就知不得了，芝芝芒果係實係有芒果，仲要係新鮮芒果！個乳酪味有小小酸，芒果有小小甜，兩樣加埋芝士，甜而不膩，小小乳酪酸令我有返胃口繼續食晒成個意粉。老老實實，係入去之前我都冇諗過會好食得咁緊要，通常家庭餐廳都係有種家庭嘅味道，但呢間家庭餐廳食出高級法國菜嘅味道，仲要夠平！對於係元朗有間咁好食嘅嘢我到而家先發現係有小小跌眼鏡……Read More

小鍋米線呢間野就一直都係元朗好出名食到街知巷聞，但係我又唔係好清楚佢幾時又係天水圍開左間分店。咁既然見到咁就去睇吓佢咩料子啦。裝修上面又唔係話有太大分別，都係普普通通，餐牌上面既食物都係差唔多，兩間店既食物種類都係一樣，冇分別咁。但係食起上黎就可以消楚咁分別到元朗店同天水圍店既分別啦。碗麵既配菜睇起上黎個色澤冇咁濃，配菜食起上黎又冇咁濃味，個感覺係幾差，份量又少，食個酸菜就知。個米線就兩間都差唔多。不過個湯底就淡好多同埋有小小燶味。唔係幾感受到個誠意。而個小食我就揀左個雞扒，炸到好乾，係到食柴皮咁。…Read More

係九龍灣到做野咁耐，發覺基本上唔會有任何燒味既出現，一係就係太貴，一個飯成60/70蚊，太貴，完成唔符合成本效益。一係就係太遠太唔好食，完全沒有任何意慾去食。咁我又發現到呢間燒味俠，位於一個幾方便既位，雖然個價錢都唔平，但係見到有啲人排隊，咁我就去試一試佢既實力啦。我既習慣就係去試吓佢既油雞飯。老老實實，從一件叉燒就可以試得出一間燒味店既功夫，正所謂越簡單既野就越難做得好。咁個叉燒老實講係的確有啲咸，而且又硬，同時又鞋，真心覺得唔好食，個油雞又係，都唔知係咪受到叉燒感染，都係好咸，個飯就一定係受到佢地感染，都係好咸。個湯就好啲，都幾清幾好飲，成為左呢餐飯既清泉。…Read More

係呢個疲情之下相信好多人都養成左一個食外賣既習慣，係一個咁多人食飯既工業區，買外賣返公司食亦都係好合理，咁我呢，就發現到呢間泰國野，價錢夠晒平民，個味道又唔差，而且個份量又夠晒，個2重點就係佢有送埋凍飲。呢間小泰閣既招牌係海南雞飯，但係佢真正好既唔係海南雞飯。佢好食既野包括但不限於以下。1) 白咖哩，佢既白咖哩係做得好出色，個咖哩味好重，同時有又有香茅香味，配埋個白飯一流，就好似呢個飯配合埋個豬頸肉，完全係100分。2) 撈粉，佢既撈粉係好好食，香辣就不在話下，個泰式香味出晒黎，係呢個炎炎夏日，食一啖就所以食慾出返晒黎。…Read More

相信大家係呢一兩年，都冇乜點去到燒烤，而我又咁岩搵到呢間大欖燒烤，呢到最大既好處就係，可以咩都唔洗帶直接行入去就可以燒野食，既然咁方便咁我就再方便啲，直接黎講網燒，唔係拎住支燒烤叉食到身水身汗，呢間野真係好多野都可以食到，又魚又羊又豬又牛，又有菜，又有菠蘿，飲品方面亦都充足。啲肉就整得好好食，本身個身質就已經唔差，再加上佢既醃料又整得好好，就為食材增加左唔小風味。而且個價錢又唔係貴，如果食量大啲既朋友去食完全係可以食到有賺。…Read More

又黎到一星期一次既星期五，指定動作就一定係去食下午茶，而下午茶黎講，最好就當然係又有得食又有得飲，咁木衛二鑄茶所就咁岩可以一次過滿足晒兩個願望，佢又可以飲到台式飲品又有一份炸鹽酥雞，真係一舉兩得。咁講返個茶，我就叫左個泰戈爾冰茶，個冰茶好有茶味，同時亦都充滿左果香，加埋冰凍既口感，完全係係香港呢個咁熱既地方帶來一絲冰涼。而個鹽酥雞，雖然我都諗住係送既就唔好要求咁多，食到就ok，但係佢出到黎又唔係喎，佢個鹽酥雞炸得好香脆，雞肉又鮮又滑，完全係抵食。…Read More

係元朗，好多好野食，可以講得上係咩都有得食，呢排比較鍾意既就係呢間哈佬燒烤川味，佢既川菜味道係十分香，第一次去食嗰陣，聞到係廚房傳出黎既川辣味，即刻流晒口水。當中好食既就係個辣子雞，佢又唔係好辣，但係個雞肉味好鮮好香好鮮。個酸菜魚又係整得好好，加埋啲粉，吸晒啲味，十分之夾。但係最重點既就係魔鬼炒蜆同埋川小炒，個魔鬼炒蜆唔係出面啲一毬炒蜆之流，個辣味同個蜆味好出眾，配埋個白飯就真係一流，一個人可以食到一碟。而個川小炒即係出面既小炒王，但係佢加多左個川辣味咁就成個世界唔同晒，佢配白飯又好配啤酒又好都係一流。…Read More

發覺自己真係越黎越鍾意食辣野，特別係而家夏天咁鬼熱，食返小小辣野可以令自己更加有胃口食野。呢間係荃灣既麻辣風雲就可以滿足到我既要求。行上樓梯發覺間野真係好大，個間隔好闊，每個人都可以有足夠位置。咁呢次就叫左幾個小菜。第一味上黎就係個炸饅頭。個炸饅頭炸到好脆好香，配埋個煉奶真係絕配。之後就上左個一式四份既拼盤，四種小食各有特色。由微辣去到辣，一道一道食咁十分過癮。之後就上左味酸菜魚，都係嗰句，酸菜魚其實係食個酸菜。最後就黎左個干鍋，個麻辣味十分過癮，越食越辣越食越過癮，配埋個飯真係越食越多，文字真係形容唔到，好好食。…Read More

平時係九龍灣食飯又真係唔知食咩好，好在九龍灣既cafe都算多，就例如呢一間cafe oasis，就係其中一間。地方好大，大概都可以坐到40-50人，但係去食既人數又非常多。雖然人多，但係空間感十足，環境舒適。呢間cafe既特別之處就係佢每日會有唔同special menu，雖然大類都係類似，即係飯啊，意粉啊，飯卷等，但係味道每日都唔同，新鮮感好夠。但係就可以要等到咁岩有野岩你食你先會走去食。今日我就揀左呢個日式咖哩雞肉飯，個咖哩味都夠但而且又唔會辣，十分開胃。…Read More

是咁的，一去到星期五，大家返工都唔會點有心機做野，呢個時候就係去食tea既好時間。但係係一個天氣咁熱既夏天，又點會想去食野呢。所以最好既解決方法就係去買杯台式飲品，又可以要到肚又可以有啲凍野降一降溫。呢間係九龍灣既"我想和你無所事事"就係一間好有創意既台式飲品店。睇佢個餐牌就知係非常有心機去幫每一個平平無奇既飲品去改一個有創意又吸引到人既名，絕對唔係一件容易既事。咁我就揀左呢個GG黑糖珍珠鮮奶拿鐵，可以有鮮奶飲得黎又可以有珍珠可以咬吓，佢個珍珠好彈牙又唔會UN，唔係啲香口膠質地，非常好食。而個鮮奶亦都好香好淳。…Read More

要我講學利雞煲就真係唔洗講野，我可以寫一份廿幾三十頁既論文去介紹佢，到底係有幾好食有幾特別，我唔係話其他雞煲唔好食，不過係唔同次元既野。要知道一個雞煲係唔係咁簡單，雞要滑，汁要濃，汁要辣，但係味道要夠鮮。元朗學利完全係將雞煲既層次完全提升左200%。佢既雞煲又香又鮮，識食就一定係要食大辣，其他辣係完全發揮唔到學利雞煲既極限，只有雞煲去到大辣先可以將雞煲既味完全發揮。可能會問大辣點食咁辣。咁呢層可以放心，佢既雞煲最大既特點係啲雞係香甜，本身雞煲係有甜味係到，如果係大辣以下，咁個辣味就抗衡唔到雞既鮮甜。真係完全浪費晒，唔講咁多，試吓就知。…Read More