princess.wws's Profile

大少有日收工行過試左一次, 話呢度d叉燒幾好食, 所以今日帶埋我黎試下, 順便睇試下佢d炒蛋得唔得! 話晒都唔係開左好耐, 環境都算乾淨企理。其實又係一間懷舊feel既港式茶仔, 呢d茶仔越開越多, 間間既menu同set都係一模一樣, 總離唔開炒蛋叉燒同奶茶。常餐: 叉燒湯通粉叉燒又真係幾好食, 帶少少肥, 而且都算係咁, 有4片。有時去澳牛見到果兩三粒叉燒碎真係想鬧人~ 湯底ok, 似係用左雞湯。但係通粉似乎過淋, 入口即爛, 煲過龍!常餐 - 火腿鮮奶炒蛋又係果d食咩冇咩味既好例子, 雖然蛋炒得好滑, 但神奇地係冇蛋香既! 多士係又淋又涷既, 好似攤左好耐咁, 軟叭叭。常餐 - 涷奶茶涷奶茶好滑, 就算加左冰都覺得茶味好濃。大少個叉燒煎蛋湯通粉, 多左隻冇蛋味既蛋!茶味香濃既COT, 其實飲落又覺得有少少苦澀。結論係, 呢間坐得都ok舒服, 但係我都係prefer澳牛, 雖然次次響澳牛都食到好似打仗咁, 但係佢既炒蛋真係無人能及!!!…Read More

本小姐生日就快到, 好同事Miss Chan Chan請食lunch, yeah~老細上次黎食過拎左張early lunch coupon 有折, 雖然我地食11點半應該唔會太多人, 但係都book左枱穩陣d。點知去到真係咩人都冇, 我地係第一枱客! 個lunch 定食menu係漢字夾雜平假名片假名, 不過好在都仲有英文, 唔駛估估下!因為太肚餓既關係, 淨係影左我同我老細食咩, 冇理到其他人! 我份定食: 燒牛肉 + 煎鵝肝 + 自家燒帶子 + 茶碗蒸 $168 (跟餐配白飯及麵豉湯)麵豉湯一般, 至於個茶碗蒸就真係好大兜, 蒸得好靚好滑。燒牛肉切條上, 燒得剛剛好, 唔鞋, 好juicy。上面有一件份量唔細既鵝肝, 好滑!燒帶子唔係原隻, 係將隻帶子撈埋蟹肉同其他配料一齊燒, 仲加左芝士, 所以燒出黎好香。老細果份: 天婦羅盛合 (蟹鉗, 蝦, 魚, 野菜) + 自家燒帶子 + 茶碗蒸 $168 (跟餐配白飯及麵豉湯)…Read More

今年開始, 我地呢班低能表姐妹決定每逢有人生日就出黎慶祝, 頭炮係食上海野~ 上樓我自己都黎過一次, 講真d野真係好抵食, 唔收茶錢同加一, 而且坐得都幾舒服! (本人太遲寫呢篇食評, 聽聞價錢加左, 詳情請參考其他較新鮮既食評啦~)今次我地5個人叫左12碟野, 埋單都只係$444 (嘩~ 對慶祝生日既我地黎講, 呢個數有d唔吉利, 早知叫多碟野啦~~)左上: 鎮江肴肉~ 肉質乾身左d, 好鞋口, 味道一般。右上: 雞絲粉皮~ 好食, 如果可以再落多d麻醬就仲好!左下: 椒鹽排骨~ 超香口, 好食到要夾埋d炸蒜頭黎食!右下: 紅油抄手~ 唔食得辣既我都覺得完全唔辣。]左上: 上海粗炒~ 唔算太多油, 都可接受。右上: 炸銀絲卷~ 炸得岩岩好, 顏色金黃, 一定要點鍊奶食!左下: 咸肉娃娃菜~ 咸肉得兩三片, 但真係好咸~右下: 蒸銀絲卷~ 因為有人唔食炸, 所以叫多條蒸既, 但都係炸晒好食d~左上: 灌湯小籠包~ 皮略厚, 湯汁少, 但味道唔錯。右下: 高力豆沙 x2~ 好好食, 豆沙唔會過甜。…Read More

我同大少都係蛋痴, 知道呢度有巨大化奄列都想試好耐, 6點鐘左右過到黎當食晚飯, 超多人!叫左火腿小奄列, 喱腩撈意粉, 雲吞河, COT同埋阿華田奶昔。個火腿小奄列一拎埋黎我已經皺晒眉頭, 我唔知點解佢要落豉油, 搞到份奄列好咸。又唔係煎太陽蛋, 我未見過有人整奄列係落豉油架喎!!! 蛋味俾豉油味完全蓋過晒, 我寧願自己沈少少鹽落d蛋度, 都總好過而家只係食到怪味! 至於d蛋都算唔錯, 唔會好乾, 但係食食下又發現, 呢份根本唔可以算係奄列, 因為佢係蛋還蛋, 火腿還火腿! 即係有3-4塊蛋皮, 每層中間又夾d火腿, 佢地只係一層蓋過一層, 根本唔係用蛋包實d火腿, 係咪趕收工所以求求其其煎出黎? 隨奄列附上既餐包, 同隔夜貨冇咩分別, 凍冰冰好難食。 今次真係希望越大, 失望越大~大少話佢個喱腩撈意粉幾好食, 個汁好香, 牛腩又淋又入味。鮮蝦雲吞河都唔錯, d蝦好爽, 只可惜俾份奄列頂住個胃, 食唔晒。茶味香濃既COT個人覺得杯阿華田奶昔貴左少少, 又未至於好飲到驚為天人, 只係平日唔會咁樣飲華田。…Read More

同大少一早爬起身去睇早場Transformers 3D, 睇完搵地方食晏仔。好耐冇幫襯過別府, 呢間野既食品質素同服務一向都極之麻麻, 見食飯時間周圍都係人, 呢間野又唔駛點等, 於是即管再試下睇下係咪仲係咁唔掂。今日係公眾假期都有lunch set, 我地一人叫左一個。基本上係對d野食冇咩期望, 但反而個牛肉溫泉蛋讚岐手打烏冬窩有少少驚喜! 呢個愛知縣辣油究竟係d咩辣油呢? 似麻油多d喎, 辣都唔辣下。牛肩肉幾爽口, 唔鞋。牛肉出奇地好食, 有油香, 將隻蛋撈勻落個烏冬度可以令到個烏冬更滑。跟餐既麵豉湯真係唔飲好過, 咸到苦, 仲難飲過響日本超市買返黎即沖果d!!!加錢既蝦餅好神奇, 一d蝦味都冇, 似食緊果d日式炸帶子, 成舊粉~總括而言, 我應該又有一兩年唔會再幫襯~…Read More

我係果d叫芝士焗龍蝦伊麵底但唔食龍蝦淨食芝士汁撈伊麵既人, 所以呢間野既芝士麵係完全啱晒我口味! 位置有d偏僻, 唔係有人肉地圖之稱既大少帶我響d巷仔捐出捐入, 我一個人係絕對黎唔到。鋪頭細, 坐得好迫, 班職員姨姨同廚房大哥講野超大聲, 我地食左半個鐘就俾佢地surround sound咁炸左足半個鐘, 食完真係耳都聾埋......雖然我地一向對呢d街坊小店既服務態度同質素都冇咩要求, 但求佢唔好用粗口鬧我地就算, 不過d職員講野大聲到好似開片咁又真係好難接受。算, 講返d芝士麵先!兩兜芝士麵拎埋黎時我地都覺得好似細兜左少少, 不過食下食下, 你會發現開始有飽飽滯滯既感覺, 食完再飲埋杯野, 已經飽死左! 個芝士汁真係好好食, 好有酒樓既芝士焗龍蝦伊麵底feel~唔算抵食, 純粹係賣個芝士汁~煎蛋煙肉芝士麵有一隻太陽蛋同3條煙肉腸仔雞扒芝士麵有一條雞肉腸同薄薄既雞扒~ 睇黎好似有3條煙肉抵d!…Read More

Pokka Cafe儲印仔卡又吸夠印仔換一碗味吉拉麵, 今次係"美國牛肉極上醬油拉麵"買一送一!醬油湯底香濃, 本來仲驚會好咸, 點知原來都好鮮甜。美國牛肉唔鞋口但就食唔出有咩特別, 因為牛肉味唔見特出。隨麵附上紫菜一大塊, 俾你一路食一路撕落碗麵度。有人鍾意食肥膩野, 所以叫左碟腩肉。份量唔多得6小件, 脂肪層唔算厚, 所以其實唔會覺得好肥膩, 肉質淋好入味, 點左黃芥辣仲香仲好食!上次食過既牛脷因為太好食, 所以要encore! 不過明明記得上次冇黃芥辣。…Read More

要不是我倆山長水遠到將軍澳找相熟的視光師配眼鏡, 也不會跟這間屬於美心集團的簡約小店相遇。小店的氣氛很悠閒, 四圍都是花花草草小盆栽, 木枱配上sofa, 有點懶洋洋的感覺。menu很簡單, 只有款式不多的burger, 焗薯, 三文治和意粉餐。不是特別肚餓, 要了一個什菌意粉及碎蛋焗薯share吃。有些小盆栽枯黃了, 可能店員太忙, 忘了澆水吧?什菌意粉不算creamy, 有點乾身, 附上的蒜蓉法包很香脆, 意粉份量不多, 如果肚餓的話應該會不夠吃。碎蛋焗薯的材料多得跌出來, 味道很不錯!Mocha尚可, 偏甜, 雖然店裡說咖啡是starbucks coffee, 但飲不出平時在starbucks買的mocha的味道。這裡的咖啡價錢平, 是否將貨就價呢?…Read More

自從中環間巴沙新加坡小品執左之後, 好掛住好姐叻沙既我食過好多間所謂"星馬餐廳"既叻沙, 間間都唔對辨, 食到心灰意冷, 心諗唔通響香港搵間似樣d既叻沙真係咁難?有一日上網睇過期頭條日報搵食, 見佢介紹呢間餐廳, 睇睇下內文發現好姐個大名, 先知原來好姐黎左呢度做大廚! 餓左叻沙咁耐, 我終於可以再食返好姐既手勢! 除左喇沙之外, 海南雞飯同黑蘿蔔糕都係必食之選, 加埋我最愛既薏米水, 正!希望Kitchen 65可以keep住水準, 我一定會成日黎幫襯! BTW, 如果有斑蘭蛋糕/ 斑蘭糕就好喇, 可以為呢一餐畫個完美既句號!剛煲好既薏米水, 好清甜~酸柑汁味道好fresh, 酸酸甜甜, 一飲就停唔到!主角黎喇~~~叻沙一上枱我就知道係出自好姐廚房, 因為同以前響巴沙食既賣相好似! 只係配料唔同左d, 以前有魚丸同雞蛋, 而家就有鵪春蛋。螄蚶係一豌叻沙既靈魂, 冇左佢唔得! 螄蚶好鮮甜, 唔腥, 配料仲有豆卜, 魚片 (切條上), 蝦, 芽菜同鵪春蛋。點解會有鵪春蛋既呢??? 真係唔係好明! 不過鵪春蛋既味道好香, 都不失為一種好既配料。我見過其他地方係加椰菜, 炸魚蛋, 青瓜絲, 蟹柳, 魷魚圈......最恐怖係加青口!!! (青口, 係來自富豪香港酒店, 好驚嚇!)話說回頭, 湯底極之惹味, 椰汁味香濃, 辣味適中, 我飲到一滴不留! 個人認為螄蚶比較少, 只係得兩粒, 如果可以加多幾粒就好喇~ 店員隨叻沙送黎一兜參巴辣醬, 夠咸香, 撈落叻沙好好食!海南雞飯雞肉夠嫩滑, 好有雞味! 食雞有雞味真係好重要, 詳情可睇下本人"好時沙嗲"果篇食評......油飯夠香夠油, 菜略為少左d, 不過呢個係香港食肆普遍既問題, 有一兩條菜跟餐已經係皇恩浩蕩, 呢度, 相比起其他地方已經算多菜。呢個海南雞飯有一點比較奇怪, 就係唔知點解d雞加左豉油, 但總的來說都係中上之作。炒黑蘿蔔糕好惹味, 蛋碎中有菜甫, 好香口, 可惜食完碗叻沙已經好飽, 食唔晒d蘿蔔糕。…Read More

中午諗夜晚食咩好, 同大少講不如食西餐, 諗起之前朋友介紹過呢間Olive Cafe, 即管搏一搏打去睇下仲有冇得book枱。可能我地訂6:15算早, 所以仲有枱, 職員好好人, 響電話度提我地用citibank信用卡響8點前埋單可以全單85折! 成日去荃灣都會經過, 但就未入過去食野, 今日終於有得試。一坐低, 店員就介紹廚師推介同晚餐, 有禮貌同有笑容, 令人感覺舒服。我地決定要一個set dinner, 加多個頭盤同意粉, 落order時我問左店員好多問題, 佢都好有耐性同笑容咁回答我, 冇鞋口鞋面, 值得一讚! 食物水準一流, 價錢合理, 試過一次之後已經成為我既心水餐廳!落完order, 店員先送黎兩件烘得外脆內軟既核桃麵包, 點橄欖油同黑醋食極之perfect, 但最估唔到係附上既牛油加左香草, 要加分! 又要點油醋, 又想食香草牛油, 唯有將本身唔算大件既麵包撕開一半食晒兩種味道!餐湯係薯蓉忌廉湯, 好香, 未算creamy, 如果濃d會更好。跟餐既沙律我地揀左蝦沙律, 都係用油醋dressing, 菜葉亦都好新鮮, 蝦冇雪味。頭盤叫左Olive Cafe既招牌菜 "煙三文魚他他伴木瓜牛油果", 真係名不虛傳, 靚到一上枱已經吸引住我同大少既眼球! 由上至下依次數落黎既係: 原片煙三文魚, 三文魚他他, 牛油果, 木瓜, 伴碟既係藍莓醬。餐主菜係炭燒鵝肝牛柳配法式薯批, 鵝肝外層煎得香脆, 入口即溶。牛柳我地要6成熟, 大少鍾意食生一d, 切開有少少血水, 食到中心位置都仲咬得開, 火候剛剛好。法式薯批既薯仔有炒過, 好味。另外叫既燒大蝦什菌炒天使麵, 蝦有炭烤味, 肉質爽口唔霉。天使麵用橄欖油同蒜頭炒, 好香, 麵身亦好彈牙。…Read More

本人一向比較懶寫食評, 好多時都係過相落電腦先醒起要寫。但係今次著實係唔快手d唔得, 因為杯froyo真係太可怕喇~ 可怕到連相都唔記得影......中午同同事響樓上彩福飲茶, 上酒樓前見到有間froyo, 大家已經話不如飲完茶落去食返杯。見openrice既食評都唔錯, 心諗一試無妨, 雖然大家食點心食到好飽, 但女仔都係有兩個胃架嘛, 於是大隊操入去一人叫一杯做甜品!基本上我食froyo都會要原味yogurt + blueberry, 有時會加mochi, 所以冇睇佢櫃裡面d toppings就叫。拎埋位食先發現佢d blueberries竟然唔係新鮮生果, 而係罐頭貨 即係果d有一大pat紫色醬加又霉又淋又死甜既藍莓, 嚇到我同另一位叫左相同toppings既同事額角冒汗......望下佢d傳單, 明明係話用新鮮藍莓架喎, 究竟發生咩樹? 正想拎杯野去問個店員, 低頭又嚇然發現杯野已經溶左大半! 間鋪都好夠冷氣吖, 點解會溶得咁快??? 未食已經溶到變晒液體既froyo, 再加埋d紫色醬, 真係已經唔知自己食緊咩......唉, 算數! 三扒兩撥食晒佢, 唔係, 係"飲晒佢"。唔駛錢都唔會再黎幫襯呀!…Read More

未幫襯過, 今次一心諗住黎食明太子意粉! 打開個menu發現選擇太多, 套餐都有十幾款, 簡直係令我同大少呢d有選擇困難症既人頭暈眼花! 諗左好耐先決定到食咩, 一人叫左一個set, 我果個係意粉迷你焗飯set, 大少果個係漢堡定食, 兩個set都包飲品。意粉set既餐湯係菠菜忌廉湯, 唔夠creamy, 而且有d油膩既感覺, 有好多油浮面, 味道一般。意粉set既沙律, 有麻醬同油醋汁, 酸酸地幾開胃。明太子鮮蝦什菌意粉超creamy, 意粉出奇地彈牙, 原來佢d意粉係響新加坡煮好急凍黎到香港再翻熱, 不過都仲係咁好食!食完個意粉已經夠飽, 吞埋個迷你焗飯簡直有飽到上心口既感覺! 個焗飯雖然係迷你版, 但絕不求其, 有兩隻大蝦同兩隻帶子, 好多芝士好好食!漢堡set個漢堡好大件, 肉質唔鞋口, 加上一大堆白飯同一大堆沙律, 好抵食!後加既牛油煙肉菠菜好香口, 舊牛油係放響面頭既, 要自己撈落d菜度, 有煙肉片又有煙肉粒雙重口感。…Read More

今次係為左個免費拉麵而黎, 因為Pokka Cafe印仔卡儲到有個味吉叉燒拉麵送, 呵呵~ 本來以為免費野質素可能麻麻地唔敢有太大期望, 點知原來好好食, 而且service仲好好添, 係一貫pokka cafe既good service! 值得推介~豬頭logo好好笑沙律大大兜落order時同經理哥哥講要用免費叉燒拉麵呢個offer, 佢竟然同我講今日有肥叉同瘦叉可以揀, 問我想要邊款叉燒! 我呆左幾秒先識俾反應佢, 因為冇諗過鋪仔細細竟然可以咁貼心, 連叉燒肥瘦都有得揀, 值得一讚! 佢話肥叉有一半係肥肉, 香口d, 但係我唔想成口油, 於是都係揀左瘦叉。豬骨湯底好好味, 好味到我掛住飲湯唔記得食麵! 個碗好深, 如果呢碗拉麵係要俾錢既話我都會覺得好抵食。身為內臟人既我又點可以唔叫返碟汁煮牛脷試下呢? 牛脷好淋好入味, 份量比想像中多, 而且切成一條條好方便易入口!…Read More

本來都唔打算幫襯, 因為諗起響上海城隍廟排隊排到癲先買到果d小籠包實在太厚皮, 好驚又係食返同一樣既野, 不過裝入鋪頭, 見到其他食客食緊果d小籠包都好正常, 先至放心入去試下。我同大少都唔係太肚餓, 所以只係叫左少少野食。馬蘭頭係一種前菜, 其實我真係唔知駛唔駛伴d咩一齊食先叫正宗, 因為我只係一大匙咁畢入口! 麻油味好香濃, 如果叫碗白飯黎撈, 應該都會好好食!鮮肉小籠包既皮比預期中薄, 因為響上海食果d真係厚到好似食緊一舊麵糰咁! 雖然汁唔算多, 不過d肉都好新鮮, 但係我始終都覺得翡翠拉麵果d小籠包比較皮薄多汁。蒸饅頭好軟熟, 點鍊奶食真係一流!鱔糊有好多鱔, 唔油膩, 最怕有d鋪頭剩係得銀芽同韮黃, 兼且炒到成碟油。…Read More

同大少去黃金買電腦野, 拎住個機箱唔行得遠, 記得附近好似有間添好運, 於是用openrice apps confirm左地址之後就拎住個牛龜咁大既機箱去開飯。本來以為要等位等好耐, 點知一推門入去就有位, 雖然坐響房仔好迫, 但係餓到死唔駛等位迫下都冇咩所謂。點心選擇唔算太多, 基本上都係一般酒樓食到既款式。每枱都有一壺大大個膠壺既茶俾你自己搞掂, $2位茶, 冇得揀茶葉, 雖然服務欠奉, 不過點心真係唔錯。 天花板呢盞藍光LED燈夠晒詭異, 同成間鋪格格不入, 唔知搞咩裝d咁潮既燈, 好嚇人! 既然個個都推介酥皮叉燒包, 唔好叉燒包既我點都要試試。餡多, 叉燒醬汁顏色正常, 唔係偏紅果d恐怖醬汁, 不過面個d酥皮好似重奶味左少少, 有d騷味。 豬潤爽口, 腸粉都好滑, d豬潤多到包唔晒, 跌晒出黎! 咸水角好足料, 外面脆, 中間煙靱, 熱到放唔到入口, 要攤一攤先可以食。 糯米飯稍為差左少少, 顏色唔均勻同唔夠軟熟, 但都算足料, 有冬菇粒, 蝦米同腊肉粒。 燒賣大大粒, d蝦好大隻好爽, 重點係冇咩肥豬肉。 牛肉球真係有一絲絲陳皮響入面, 好多馬蹄粒, 滑~…Read More