anisch's Profile

平時每次行過都排長龍，今日準時收工即刻衝去，6:30去到唔使排隊，終於食到、個和牛船麵真係無得頂, 湯底夠濃夠香, 和牛好冧, 最驚喜係幾件牛腩超得，加埋幾粒有香濃牛味嘅牛丸，餸多過粉，啲粉索晒湯超好味！$158一碗唔係平但我覺得值！湯底有少少辣, 不能吃辣者唔駛再加辣椒都已經夠, 如果再多番少少河粉就更加滿足了。配上西瓜沙冰簡直係三十幾度下的絕配，沙冰沒有加糖水、仲附上一片西瓜，飲完再食埋生果，230蚊左右落古樓，真心係滿足嘅一餐👍🏼…Read More

個胡椒湯好好味、辣度適中（嗜辣者可能嫌不夠辣）、最正有大大個原個蒜頭（好多餐廳只有一小件甚至無都見過）我可以一啖蒜頭肉一啖飯一啖湯撈埋嚟食。湯入面有好多件肉骨、數落六七件都有、（喺新加坡食都無咁多件骨呀）仲要啲肉係唔嚡嘅、亦無肉酥味、點甜豉油食真係正到爆。只係88蚊真係好抵、性價比好高，係我喺香港食過咁多間餐廳裡面最好味嘅新加坡胡椒風味肉骨茶👍🏼 下次要試埋佢個喇沙至得。唯一唔太方便係只收現金😆…Read More

同兩老一齊食咗餐好正嘅日本菜食物質素高、又唔貴、魚生好新鮮、而且有啲係半價十分超值、兩老高度評價鰻魚飯、非常肥美、另外串燒牛舌亦好juicy, 食到捧住個肚每人都係三百零蚊、真心覺得好ok.但令我驚喜嘅係佢哋侍應嘅服務，真係另我好深劇，一班年輕服務員的服務真係好到不得了，成晚不斷主動行嚟加茶，聽到我哋話搵紙巾就主動遞上紙巾，臨走時幫我哋開埋門仲要㩒住掣hold住道門，抵我額外畀多少少貼士👍🏼尖沙咀好多日本食肆，要突圍而出並唔容易，希望呢間keep住水平，下次會再嚟幫襯！…Read More

好耐無寫食評了，但今餐真心想寫。第一次幫襯，唔知佢係咩餐廳、由於已經接近佢收舖，試唔到蒸魚、於是叫咗個「龍鳳配」套餐，睇下佢嘅「秘製叉燒」有幾好食。個餐有霸王花豬骨湯、叉燒拼油雞、油菜、開胃菜甫、同埋我轉咗菜飯。叉燒好稔好軟熟、唔會太肥、完全無豬腥味、油雞同樣好稔、無雪味、重點係個汁好好味、唔會死鹹或太油、總之就好好味啦。$69加咗$3轉菜飯、今餐真係好滿足、捧住個肚走，臨走前忍唔住同阿姐講，好好食呀！…Read More

在銅鑼灣好難搵到又平又好食又大件的茶記, 但呢間係我覺得好味大件夾抵食的.呢個餐, 包括有一個鬆脆奶油豬仔包, 熱辣辣, 外脆內軟, 好味到係感人果隻.仲有火腿庵列, 一啲都唔細碟.加埋大大碗茄汁腸仔通粉(仲搭條唐生菜添), 以前真係有鮮茄, 而家cheap咗, 轉咗畀茄汁, 仲要係碟頭飯"茄汁xx飯"果啲茄汁, 不過都算ok啦.加埋杯奶茶, 茶味好香.咁樣, 都只係$29, 在時代廣場一帶, 真係算好抵食啦!…Read More

今次係第二次嚟食, 第一次嚟時, 只得兩個人, 食唔到乜嘢, 只記得冬蔭功好好飲. 今次一行四人, 可以叫番夠本. 先嚟一個泰式生蝦, 我唔係幾食得辣, 試咗一點個醬汁, 辣到飛起, 但同行者食得辣, 食到唔停得口, 仲話生蝦新鮮.跟住再嚟一個拼盤, 有炸蝦餅, 炸魚餅, 春卷. 我欣賞佢唔會炸到乾身, 入面仲好juicy, 尤其魚餅, 好少食到覺得鮮味的, 這裡的很好. 來這裡目的係飲冬蔭功. 其實好騎呢, 因為我係唔食得辣的. 但又要一路飲一路叫辣, 我鍾意佢唔會一味只辣或一味只酸, 而且一客好大碗, 絕對夠4人分.呢個咸魚炒椰菜苗係阿姐介紹的, 佢話呢期好當造, 的確係好新鮮,好爽口.最經典的係個明爐烏頭, 大碟到呢, 個魚湯(汁)好好味, 條魚亦鮮甜, 唯一係太多其他雜不甩在碟上, 例如粉絲,磨菇等太多, 好難"撩"啲魚嚟食.全晚最唔掂係個椰青, 睇外表已經麻麻地, 啲肉仲有陣味, 應該係放咗好耐, 熟得滯果款.圖後綠色果碟係千層糕, 又係麻麻地.一行四人埋單共五百幾蚊, (其實仲有個菠蘿炒飯, 唔記得咗影)抵食!…Read More

呢間舖開始一段時間,一直沒有機會去食, 午膳時段勁多人.直至今晚, 好夜收工, 近九點, 一支公入去食.叫咗個清湯牛坑腩米粉, 同一碟蠔油芥蘭.湯底清甜, 牛坑腩好稔, 無渣, 食落第一口, 好香牛味, 好食! 米粉略嫌碎咗啲, 但唔會太硬 (好怕食唔好似未淥熟的湯米)一碗都有六塊牛坑腩, $34一碗, 合理.芥蘭$12一碟, 鬼死咁大碟, 一個人食到有啲吃力. 菜算新鮮, 不老, 但如果再灼稔少少好啲.整體來說, 可以再番兜. 見餐牌力sell同鄰桌都食咖喱牛飯, 可惜我唔食咖喱啦.…Read More

雖然見有啲評價好似差咗, 但印象中的不倒翁仍然係好好食, 所以入秋後決定再來一試, 結果不負所望.一行六個大人一個細路, 叫到成枱嘢食 , 完全唔覺得啲食材質素有走樣喎. 叫咗個鴛鴦湯底, 沙爹配清湯, 沙爹味夠濃 招牌餃依然好大粒, 好多蝦, 個個食完都話好飽鱔片同脆鯇呢, 我覺得脆鯇好啲, 因為我嫌鱔片多骨, 但兩者都新鮮.我最鍾意, 基本上係因為佢而返嚟呢度食的, 係鵝腸, 好新鮮, 好脆, 唔會有腥味, 又唔會好肥, 絕對好味 第一次叫佢地的豬潤, 好大塊, 好鮮, 但始終唔多敢一熟即食, 要灼到徹底熟晒先敢食.是夜主角始終係牛, 幾次嚟都係叫脊位, 圖中見到的係第二碟, 好稔, 亦有牛香, 但唔會話好"肥香"(即係唔會覺得好"漏")整體來說, 食物質素仍然有水準, 不過, 服務係差過以前啲, 同埋好鬼嘈.結果埋單$1,800, 每人3舊水, 在預算之內, 這個冬天還會再來!…Read More

呢間舖位較隱敝, 但質素不差的日本料理, 午膳時份經常滿座, 晚飯則多數有位, 皆因在灣仔夜市係較為難做, 但我會繼續支持. 是夜沒有叫套餐, 每樣食物都不錯:豐富的一餐, 兩個人合共消費$480, 不俗!…Read More

是晚在外工作又係好夜收, 身在深水埗, 只係識得嚟譚仔食.清湯底+豬潤+墨丸米線+凍0T小甜. 盛惠$32湯底和米線質地一向都ok, 尤其係米線的質地好重要, 唔會太稔或太硬, 要好似煮意粉咁Al dente先好食, 食過好多舖頭的米線, 真係可以差天共地得好緊要, 但譚仔三哥的都能保持一貫水準.平時都有叫開豬潤, 但今晚就差咗啲. 食豬潤, 都係要去對面維記... …Read More

月初時先嚟第一次食嘢, 不過係食下午茶, 當時評價係一般, 以下午茶質素來講, 並不算好. 本着凡事都有second chance 的心態, 這晚再來一試晚餐, 結果感覺非常好!最出名的鹹蛋肉餅真係超級好食, 極之送飯, 絕對係會令你成碗白飯食到乾乾淨淨一粒都無剩果隻.好鬆, 好香, 但唯一係, 食到尾聲, 覺得個汁有啲鹹.另外再叫了一個豆豉鯪魚油麥菜, 唔錯, 但都係無法子有少少鹹.整體來說, 比起上次下午茶感覺好得多!所以, 再有機會, 係會再嚟食晚飯其他小菜的, 但下午茶就唔會啦.…Read More

之前幾晚打完邊爐, 估唔到轉頭再去食羊腩煲.又係太夜收工去食晚飯, 無乜胃口, 本來入茶記係想叫簡單麵食, 點知餐牌上竟然話已有"新上市"羊腩煲. 諗都無諗, 即叫!個煲算大個, 勝在多羊腩, 但頗肥, 個汁頗鹹, 腐竹同冬菇都多, 可惜竹荀太老, 馬蹄竟然只得兩粒, 失敗!$128一個煲加碟都算多的唐生菜, 不過不失啦.…Read More

好耐無嚮快餐店打邊爐, 是晚太夜收工, 乜都唔想食, 突然醒起不如去大家樂打邊爐.太耐無打, 完全唔知叫幾多先夠食, 結果只係叫咗一個餐加兩碟散叫. 總數約90元.結果係僅僅夠兩個人食咁啦. 另外散叫的兩碟食物, 分別係上圖左下角得四粒咁大把的肉丸, 同埋右上角的娃娃菜.偶一為之, 勉強可以啦. 但應該唔會再返兜囉. …Read More

Pret的三文治, 係我的all time favorite. 其中以全天候早餐(all day breakfast)最啱心水, 好多料, 又juicy! 好多分店都食過, 其實真係間間差唔多, 呢間算係較為多嚟, 慶幸次次都有位 唯一係, 咖啡一向係一般啲, 飲茶會好飲啲(原包茶葉的)…Read More

以前叫滋味一方, 後尾轉咗名做友膳方, 但質素其實差唔多, 中上. 杏花新城嚟講, 佢係唯一一間會成日返去食的, 因為有湯飲有魚食, 重點係食完唔會覺口渴, 好.今晚繼續叫同一款套餐, 包括有一煲湯(是日為花膠花旗蔘加唔知乜加乜), 一碟炒菜(以前多數係白菜仔, 今晚轉咗做芥蘭), 一條蒸魚(今晚揀咗豉汁蒸盲鰽), 一條小菜(今晚揀咗美極汁煎豬扒), 另加兩個砵仔白飯.坦白講, 呢個餐兩個人食, 好大機會食唔晒, 因為飲湯都每人有兩碗幾, 飲飽. 條魚又大條, 如果三個人食, 會啱啱好.今晚條盲鰽唔錯, 略嫌豆豉多咗啲 我老公鍾意食平時跟餐的炒白菜仔, 但我就鍾意芥蘭多啲, 而且無平時食的炒白菜仔咁油.睇相好似唔多靚, 但其實好好味, 食到一半先醒起影相.埋單$240, 健康美味一餐, 有魚有菜有肉有湯, 算唔錯啦. 不過好似貴咗? 以前好似$200左右... …Read More