DonJuanDeMarco's Profile

期待去依間食肆幫襯好耐， 趁住復活節假期嘅第一日，一個人悠閒地去西灣河拜訪一下傳說中好味嘅醉雞卷。依度地方唔係好大，4至5張四人檯， 但就有啲似一啲日式嘅餐廳：老闆喺裏面做食物，同客人嘅距離好接近，大家可以交流，有傾有講，感覺親切。我好簡單，首先就係點咗醉雞卷，然後問咗老闆，佢哋嘅麵嘅做法、選擇，記點咗佢哋嘅沁沁麵。先講醉雞卷，真係好熟於家庭、私房嘅味道，味道適中，令我想起一個會做醉雞翼嘅老朋友，令人回味，冇得彈。 唯一要挑剔嘅係：個雞卷嘅雞肉捲得遍實(?! 我都唔知唔唔啱？)，還是如果雞卷中間仲捲多一層雞皮，口感就更加正。(純粹個人狂想。)至於個沁沁麵，係用秘製嘅人蔘湯淆成，完全冇用味精，湯質濃郁，入口舒服，同樣係令人回味嘅，同樣係令人有家嘅感覺。而我唯一挑剔嘅係：我覺得西蘭花有少少破壞咗個湯，如果有另外一種蔬菜類可以取代，就更好喇。總括而言係非常好嘅體驗，我一定會嚟再幫襯，試下佢哋其他出名嘅食物。要說多謝嘅一餐。…Read More

午餐叫咗個乾炒牛河，只得3塊牛肉。牛肉係冇牛肉味嘅，劣質嘅雪藏貨；河粉油立立。58蚊，感覺被騙，覺得好唔抵。凍檸茶，冇茶味，冇叫少甜都淡茂茂。同時叫咗一個全日早餐，普通，不過不失（嬲得濟，忘記咗影相）。 如果唔係隔離想食嘅餐廳排長龍，又肚餓，都唔會幫襯， 焗住要中伏。我可以好肯定咁講「唔會再有下一次」。 呢啲食店 ，根本就係侮辱咗香港本土茶餐文化，更加侮辱錯消費者。請唔起廚師，就求其搵啲食物執碼員砌啲食物出嚟賣。…Read More

早幾日經過, 發現依間新開嘅潮州菜館, 睇落都好認真、企理, 再睇睇門口個菜牌, 價錢都好大衆化。決定假日同埋屋企人一齊嚟試新嘢。未行入舖, 喺門口櫥窗見到嘅「凍馬友」, 已經吸引咗我列佢為必食之首。 馬友嘅鮮、嫩、肥美, 就有如「大眼雞」與「烏頭」嘅混合體, 所以識食一定係食凍馬友。價錢認真抵食, 只係$138。特別值得一讚係前菜嘅花生都特別好味, 鹹味清香, 並非純粹鹽嘅死鹹味道。另外, 簡簡單單點咗一個「鹵水三拼」 (腩肉、墨魚片、豬頸肉)。鹵水汁嘅味道有層次, 恰到好處, 唔會太鹹。特別一提係墨魚片應該係是慢煮形式浸熟, 所以非常軟骨。腩肉及豬頸肉都十分好味。而墊底嘅鹵水豆腐, 外香濃, 內軟骨、鮮味, 非一般潮州打冷菜館可以媲美。只係賣98蚊嘅潮州蠔烙, 做法正宗, 不肥不 膩, 蠔仔好多之餘, 每粒都飽滿, 而且處理得好乾淨。真正食得開心又放心!白粥亦都唔會話太過希冧冧, 軟綿得嚟又清新, 清新得嚟又暖胃。經理怕我哋唔夠飽, 仲送咗個「秘製藥膳炆雞腳」 畀我哋試下, 味道幾創新特別, 佢地用咗八角同一啲藥材(例如:當歸), 造成嘅味道有少少似沙茶醬咁樣, 啲大隻雞腳入曬味。整體來說, 呢餐飯非常滿意, 又有驚喜。佐敦打冷不二之選。(* 臨離開時見到原來仲有一味「鹹菜炆門鱔 」, 睇個樣貌已經好吸引, 下次一定要試依個。)…Read More

自私隨處擺放垃圾桶、地下經常有從垃圾袋流出嘅污水、垃圾霸佔行人路。唔只一日、兩日, 而係日日都如是。唔知點解無人投訴、無人理? 作為街坊, 感到好無耐! 投訴無門, 食環處無派人處理。…Read More

第三波疫情下已減少外出用膳, 但間唔中都要外出走走, 食下街外食物, 舒緩下鬱悶嘅心情。經歷咗近來嘅經濟下滑, 市道蕭條, 沙嗲王 嘅餐牌越見新低價, 甚至有部分嘅食物標榜 回覆都八十年代的價錢, 讓食客能夠回味一下沙嗲王初開業時的食物與價格。<白咖哩香茅豬扒飯> - 招牌白咖哩味道無需懷疑, 穩陣妥當, 配飯配麵都相當惹味開胃; 越式風味嘅香茅豬扒, 亦保持水準, 雖然係薄切但不乾硬, 控制得而。<清湯慢煮豬軟骨拉麵配溏心蛋> - 清湯確係清(比較啖), 啱曬我; 豬軟骨燜得非常淋(個人覺醒來得過淋, 欠口感), 不過不失; 溏心蛋合格啦, 唔夠味, 略過熟; 麵, 啱胃口, 軟硬粗幼適中。< 香脆芝士條 > - $10/10條, 好味, 抵食。但需一提: 自助落單的App操作唔到, 需要由店員落單, 希望改善。…Read More

老老實實, 懷著玩玩下, 柴娃娃一班人嚟食依個$78嘅串串鍋午餐, 低玩又開心嘅。而且食物唔差, 仲有驚喜㖭!(1) 其中豬肉片, 好好食, 係爽五花腩肉, 香脆而不油膩。(2) 另外特長嘅蟹柳, 味道同口感都好正, 食完一條又一條。(3) 雞腎新鮮又爽口。(4) 湯底 主要係麻辣, 如果唔係好食得辣, 建議小辣。另外有兩種唔辣嘅湯底可選擇。(5) 飲品每人包兩份, 選擇都幾多。(6) 每位可選擇一款麵食, 例如: 烏冬、出前一丁、韓國辣麵、等等。(7)同行嘅朋友講: 啲牛肉好食, 唔錯。食物選擇都好多, 有肉有菜, 難以盡錄。氣氛唔錯, 環境比想像中闊落、舒適。依編食評做得麻麻, 因為全程掛住食、掛住吹水, 唔記得影多啲相。…Read More

疫症嚴重, 好在7月12日食到(7月15日禁晚市堂食前3日)。3大人加1細路, 點一個「五福臨門海鮮餐」($438+$30), 再加一個「堂食優惠龍寶燒鵝王 1/4隻」($38)。食到飽, 捧住個肚走!「五福臨門海鮮餐」內容豐富:深海大老虎斑兩味: (1) 碧綠炒斑球及 (2) 金蒜蒸頭腩。魚肉相當新鮮, 肉厚, 份量充足。傳統老師傅手勢嘅味道, 令人回味, 餸飯一流!(3) 頭抽香煎大中蝦。蝦新鮮, 大隻, 份量足。調味、火候都恰到好處, 好香口、惹味。(4) 薑蔥銀絲炒沙巴蟹。雖然唔係話好大隻蟹, 但都夠我哋過癮一下! 蟹同樣新鮮, 有蟹膏, 多肉。粉絲索曬啲蟹肉嘅味道, 好好味! 唯一美中不足就係粉絲裏面有啲蟹殼碎。(5) 豉椒炒黃沙大蜆。唔錯, 正正常常, 大排檔風味。(6) 堂食優惠龍寶燒鵝王 1/4隻。真正嘅抵食夾大件! 味道ok, 算唔錯, 都係皮香肉嫩。送餐後水果, 連兩支大啤酒、白飯、加一, $706蚊, 確實「正」到唔使講嘢, 下次再嚟食過!…Read More

「又好食, 又抵食, 又親切, 香港人嘅食堂!」食評一開始, 先來一個總結。疫情嚴重, 街沒什麼人, 很多公司都不用上班, 又因為剛好中午12點, 未到繁忙時間, 難得不用排隊就可以食到光榮冰室。未到繁忙時段, 自然食客食得輕鬆啲, 侍應又做得「他條啲」。這點大家是明白的。光榮快餐 B 一份: 蔥油雞扒飯 + 凍檸檬茶($45)。蔥油加特製豉油汁, 光榮嘅招牌其中一部份, 味道不容置疑! 飯質軟硬適中, 又香又夠熱! 大大塊的炸雞脾, 外香脆, 內嫩滑, 用料又新鮮, 份量充足, 一般OL食客很難獨自完成。凍檸檬茶, 正常水準, 茶味略為「澀」。另外點了「全日特餐」: 蜜汁叉燒通粉 + 火腿奄列 + 牛油麵包 + 熱奶茶($45)。蜜汁叉燒很有驚喜, 叉燒肥瘦勻稱, 充滿蜜糖及燒烤香味, 非一般貨色。通粉及湯底, 水準以上。 火腿奄列都好味, 蛋異常香濃, 火候剛好, 內裡是流動的蛋汁, 可惜「薄」了一點。牛油麵包, 正常, 新鮮。熱奶茶, 屬於同區的頂級。「又好食, 又抵食, 又親切, 香港人嘅食堂!」總結, 再講一次。…Read More

好耐冇幫襯。今次都唔係特登嚟, 只係嚟開附近做啲嘢, 咁啱經過就食個午餐。點咗兩個餐1) [全日特餐] - 香煎豬扒米粉(番茄濃湯)、火腿奄列、牛油餐飽、配熱奶茶。豬扒真係冇得頂, 厚切, 非常鮮嫩, 令人回味。番茄濃湯就.. 普通啲,唔係「濃杰」嗰種。火腿奄列及牛油餐飽, 正常。熱奶茶,「 奶」多咗, 冇茶味。(2) [特別推介] - 酥炸大雞髀配薯條、凍檸茶。雞髀嘅醃料好似有(好濃嘅)南乳嘅味道, 太鹹之餘味道古怪, 我唔敢話佢個雞髀唔新鮮, 但好好地一隻雞髀要用咁濃味去醃製, 的確可疑。雞髀嘅肉質亦比較乾硬。薯條都係太乾身。凍檸茶, 正常。…Read More

因為疫情關係, Lunch Set 暫停, 只能 order Á La Carte。Menu 設計太有風格、太 artistic, 閱覽比較費神, 但好事嚟嘅。「求其是但乜都炸啲啦」- 炸蝦、炸洋蔥圈、炸魚、炸魷魚、炸薯條。其實味道都唔錯。即炸夠脆夠熱。偏鹹。份量充足。如果配啤酒就一流。「有蟹GO又有蟹肉的蟹蟹蟹意大利扁麵」- 其實味道都唔錯。都好多蟹肉, 鮮蟹肉味美; 麵質適中。偏鹹。份量適中。服務唔錯, 調到。環境得意有趣、有心思, 實屬打卡熱點, 無人可以抗拒拿出手機左拍右拍一番。…Read More

「茶王」依個牌頭, 太大、太沉重了。你夠膽用依個名開舖, 食客嚟到自然對你嘅期望好高。第一次嚟, 食早餐, $401)牛油多士 - 麵包唔新鮮。(2)炒蛋 - 零調味嘅普通炒蛋, 內容就只有蛋及油。(我冇嘢好講...)(3)火腿 - (幸運地)有輕輕煎過。(4)义燒通粉 - 正常。(5)熱奶茶 - 茶味淡, 茶身遍薄, 老實講, 連合格都稱不上。難道要特別點88蚊嗰杯奶茶先可以品嚐真正茶王嘅味道?另外一份早餐係1)煎腸仔 - 正常。(2)炒蛋 - 同上。(3)牛油多士 - 同上。(4)沙爹牛肉公仔麵 - 麵淋, 牛肉硬, 湯正常。(5)凍奶茶 - 問題跟熱奶茶一樣, 因為有冰所以味道更淡。真係唔知自己飲緊乜!個人認為: 店員嘅服務係好嘅。但「名」太太太大過於實, 有冇改善、有冇檢討, 都係咁先。*前思後想, 雖然好失望, 但最後決定 - 不給「劣評」。…Read More

我一向對香港嘅「澳門字頭」嘅餐廳又愛又恨, 原因係澳門菜色風味獨特又好味, 但可惜「經營者」有啲係「賭博集團」有關係, 所以心態上我自己唔係咁鍾意幫襯。依間餐廳, 我一直都唔想幫襯, 直至有好朋友同我講: 你一定要試下, 你會對佢另眼相看。由於我唔食牛肉, 只能試試「咖哩薯仔豬扒飯」- 咖哩嘅香氣獨特, 有椰子絲, 複雜嘅香料味道, 比較似嗰兩間所謂 正宗巴基斯坦咖哩, 「龍」字派嗰兩間佐敦咖哩店, 用料及味道, 有過之餘無不及。豬扒唔錯, 肉嫩味鮮; 薯仔出色, 全屬上等新鮮食材。 整體令人回味無窮, 一試難忘。我可以估計到, 喜歡食牛嘅人應該會更高興。另外點選了常餐, 同樣好味, 但整後悔冇食招牌咖哩出品菜色.... 勁7, 所以無言了。…Read More

星期日嘅下午, 整個黃大仙中心北座, 間間食肆都要排隊, 唯獨是一品螞蟻冇人排隊, 對於趕時間嘅我哋, 呢個係一個吸引。坐位舒適寬敞。午餐有麵、有飯、有意粉, 選擇算幾多, 價錢中等。叫咗一份「椰香海鮮辣湯香茅豬扒河粉」、及一份「滑雞清湯蜜汁豬軟骨髮絲麵」, 熱奶茶及紅豆冰。先講「滑雞清湯蜜汁豬軟骨髮絲麵」 - 好味! 份量十足, 大大碗。湯底清, 豬軟骨味濃肉淋, 骨嘅部份已經燜到變成好似筋咁, 好好咬口; 髮絲麵亦比預期好味, 麵質爽口清新。 所以食呢碗麵食到唔同嘅質感、味道、同埋口感。熱奶茶亦係比預期好味: 濃、滑、厚身、味香濃。雖然未至於茶王嘅級數, 但都係屬於好味嘅港式奶茶。跟住要講下唔好味: 「椰香海鮮辣湯香茅豬扒河粉」- 湯冇乜椰香味, 而且偏鹹; 豬扒碎上, 味道似香橙骨, 好奇怪! 河粉較碎。紅豆冰 - 稀, 冇乜奶味。- - -至於不快經歷: 一位身材瘦削細粒嘅男侍應上錯咗個「椰香海鮮辣湯豬頸肉河粉」, 我哋向佢提出, 佢冇講聲「唔好意思」, 就快速攞走咗碗河粉... 而態度、表情都好似係客人做錯咗咁。極冇禮貌。…Read More

無意中經過, 發現門口展示嘅餐牌價錢抵食, 菜式又吸引, 立即決定試下新嘢。行上去, 酒吧裝修, 檯大寬敞, 地方幾舒適, 坐落好有令人靜落嚟, 投入一種慢食慢活嘅氣氛。餐牌上嘅菜色名稱寫得好吸引, 又法國鴨腿, 又加拿大豬, 睇落(用料)好勁下。餐湯係「牛肝菌忌廉湯」, 味道濃郁, 好味。午餐我地點選咗「法色油封鴨髀配薯蓉」 ($48), 及「慢煮加拿大豬梅柳扒配薯蓉」選($68)。鴨髀香軟肉嫩, 而且有兩隻, 份量十足。薯蓉香口, 配菜處理認真又講究, 而且好好味。咁嘅價錢, 實在無話可說, 真正平、靚、正!至於慢煮加拿大豬梅柳扒, 同樣色香味美, 調味適中, 肉質爽嫩多汁, 品質高級又新鮮。亦都因為品質高, 我個人覺得份量細咗啲, 唔夠喉! 整體上非常滿意, 食得舒適, 味道又好, 品質又高。我將會經常幫襯。…Read More

疫情下, 發現新嘅日式拉麵店。南昌站附近嘅新選擇。首先要講嘅係: 人手不足, 但喺艱難嘅時刻 , 明白嘅、體諒嘅。其中一份餐, 叫咗下午茶時段嘅「迷你日式义燒丼」, 配芝麻雞亦及蜜瓜梳打汽水, $34抵食到極, 味道唔錯。义燒冇乜味道, 但芝麻雞亦幾好味。蜜瓜梳打最good, 依啲唔係度度有得飲。另外, 叫咗一份午餐嘅「特盛霸王拉麵」, 配前菜及甜品「地瓜球」。個麵嘅配料、湯底都唔錯, 义燒都係屬於白肉叉燒(我意思係:冇燒烤過), 唔係咁啱胃口。而麵身過淋係至命點, 我唔敢話「麵太淋」係一定錯, 但對我嚟講就唔係咁鍾意喇。個地瓜球好好味, 想食多幾粒。個麵上菜時間較慢, 等咗20分鐘, 唔知係咪咁樣令到個麵淋咗。希望「麵太淋」只係一時失手。我會畀多次機會依間食肆。…Read More