hongkonggirl331's Profile

小妹見元朗開咗間四川菜，諗住一試，但佢嘅酸菜魚真係令人非常失望。招牌酸菜魚($168例)味道夠辣同麻，但最搶味嘅竟然係「鹹」！鹹到食完條脷係會有苦味，又辣又鹹真係唔知自己食緊咩，魚完全冇味，一夾就散。本來諗住食啲冰粉解鹹（竟然唔係解辣），點知個士多啤梨冰粉($38)一陣藥水味，再加上啲花生粒有啲「油益味」，又係一伏。相反其他菜式就做得唔錯，好似涼拌萵筍絲($48)，食落冰冰涼涼又帶少少椒麻味，好正。而魚香肉絲鍋巴($108)，肉絲有鹹魚嘅鹹香味同椒麻醬嘅辣味，配合炸到香脆嘅鍋巴，令人帶嚟驚喜，好在呢餐飯都唔係完全失望。…Read More

如果唔食得辣，稻成酸菜大黃魚($188)應該會係你杯茶。湯底具備「辣」同「麻」嘅味道，但可惜都比較輕身，對於食得辣嘅人嚟講都係唔夠惹味。不過小妹覺得佢嘅魚有少少腥，唔知係咪同佢小辣有關。如果大家想食平啲，佢仲有個酸菜魚片，都係$98，對於對魚冇乜要求嘅人嚟講可以一試。另外嗌咗個蟲草花炒翡翠苗用嚟緩衝吓麻辣，點知原來係冇咁嘅需要，味道為正常發揮。…Read More

由香港知名廚師Ricky打造嘅川菜，經過各大傳媒宣傳，小妹眼見好似好犀利咁，於是就相約朋友一試，嗌咗一個超抵二人餐($398)，有相關信用卡仲有折！祥仔招牌酸菜魚份量尚可，魚肉冇表明係咩魚，但食落都好嫩滑冇腥味，惟一缺點係居然有骨！呢個係酸菜魚嘅一大敗筆！大家食嘅時候一定要小心。湯底辣度足夠，但就真係得個辣字，完全冇「麻」嘅感覺，睇吓上面嘅材料，就真係得啲乾辣椒，要知道川菜唔係得個辣字。套餐中有酸辣粉、口水雞、麻辣木耳、麻辣小籠包、乾煸四季豆、麻辣香芹豬肉水餃等，個人反而覺得做得唔錯，但主角酸菜魚就真係有啲失色。由於二人餐份量唔大，所以小妹同朋友嗌多咗個櫻花蝦炒飯，質素一般，多人食飯飽肚之選。…Read More

喺香港仍未咁流行酸菜魚等川菜嘅時候，早已駐足香港多年嘅霸王川莊，招牌酸菜魚(桂花魚價$298)竟然頗有質素，用上原條桂花魚，魚肉雪白，食落嫩滑，有新鮮魚應有嘅彈性同口感，酸菜嘅酸度足，湯底用上多種具麻同辣嘅椒類，如胡椒、藤椒、花椒、指天椒、紅辣椒等，食落又辣又麻，雖然冇大陸酸菜魚嘅辣味咁複雜，但冇十成，都已學到八成。如果唔鍾意食辣嘢，香煎小黃魚湯麵($82)係唔錯嘅選擇，小黃魚肉質鮮甜，外皮微脆，湯麵嘅湯底呈奶白色，魚味濃郁到可以媲美豬骨湯。特大新鮮果茶($55)味道一般，但勝在夠大杯，用嚟止辣一流！仲有八寶茶呀!!!…Read More

來自東京嘅人氣蘋果批Mille Mele Tokyo早前登陸銅鑼灣，主打即焗蘋果批，喺日本橫濱同鐮倉有3間分店。「招牌蘋果批」($36/個；$138/4個)以手工製酥皮聞名，加入慢煮厚切富士蘋果粒作餡，配上日本直送吉士忌廉同豆乳忌廉，經兩次烤焗，食落充滿乳製品嘅幼滑口感同香氣。不過小妹覺得佢唔係最好食嘅蘋果批，皆因蘋果肉唔夠多，蘋果肉質素偶有參差，好睇運氣食唔食到香甜蘋果。而酥皮就香氣十足，可惜層次略嫌不足，批身較薄，但整體都算合格嘅。小妹反而覺得佢嘅「千層牛油脆粒」（$38/杯）嘅層次非常足夠，粒粒都炸到酥香脆口。「蘋果梳打」($28)，梳打水伴新鮮富士蘋果肉糖漬而成嘅蘋果醬，飲落冰涼而唔太甜，都幾出色。…Read More

日本BAKE Inc. 旗下人氣品牌RAPL亦過江香港， 每日現場新鮮烤製，以北海道新鮮牛油揉製出144層酥皮，聞落牛油香味極重，食落又非常鬆脆！呢一間係採用厚切成方粒嘅青森蘋果，味道微酸中帶香甜，再注入新鮮即打嘅吉士醬，食落真心正！呢一間嘅蘋果批隻隻都脹卜卜，原因係佢超揼本，將最多嘅蘋果肉塞入個批度，只用少少吉士醬襯托，所以每一啖都係蘋果肉，認真以本傷人！($42/個；$160/4個)…Read More

近日因為疫情關係，好多人都唔可以外出用餐，就連High個Tea都難，但就有酒店推出外賣下午茶，而且仲要係小妹最愛嘅「榴槤」呀！呢個下午茶同原本喺酒店享用嘅下午茶有少少唔同，就係少咗非榴槤嘅鹹點、任食嘅榴槤雪糕同飲品，但價錢就比原先平咗二百幾蚊，大家可以衡量吓抵唔抵。不過小妹就覺得一個可以外賣嘅三層架真係幾神奇（雖然係紙製嘅架，但拎起上嚟好輕好方便），酒店方面仲好貼心咁畀咗個冷凍袋同乾冰，令所有甜品同雪糕Keep住冰凍。其實真正擺甜品嘅係得兩層，下層係英式傳統鬆餅（有傳統嘅提子鬆餅同紅莓鬆餅），另配士多啤梨果醬、Forbidden D24 榴槤蛋卷、馬來西亞直送貓山王榴槤果肉、貓山王榴槤布甸、榴槤班蘭千層蛋糕同烏龍茶啫喱；而上層係抹茶荔枝D24榴槤卷、D197榴槤芝士泡芙、金榜榴槤芝士蛋糕同D24 榴槤椰子糯米糍。外加一個紙杯裝嘅榴槤雪糕。每樣甜品都有兩件，啱啱夠兩個女仔嘅份量。個人認為最推介嘅係榴槤雪糕，真係原隻榴槤肉打成，食落有一絲絲榴槤肉嘅纖維，足料到爆！其實小妹喺佢晚餐Buffet已經食過一次，真係一試難忘，只可惜依家冇得任食。建議將榴槤雪糕搽喺鬆餅上面代替果醬，包保你驚喜萬分。至於個馬來西亞直送嘅貓山王榴槤果肉，小妹本身都頗期待，但生果嘅嘢都真係幾參差，一嚿香甜得嚟回甘，但另一嚿就完全係苦澀味重，真係睇你有幾好彩，對於未有做好質素控制，呢度真係要扣少少分。其他甜品都不過不失，同佢晚餐Buffet入面食嘅榴槤甜品差唔多質素，比較值得食嘅係貓山王榴槤布甸、榴槤班蘭千層蛋糕同抹茶荔枝D24榴槤卷，最後以烏龍茶啫喱清清味蕾，就係一個Happy Ending。…Read More

一般五星級酒店好少有美式快餐龐，而朗廷入面就有一間主打美式快餐嘅餐廳。小妹同朋友係嗌Room Service，嗌咗一個脆辣雞排漢堡配蕃薯條，另外再加一個水牛城雞翼。漢堡質素一般，雞肉好「鞋」口，但醬汁、酸瓜、各式蔬菜等加埋就好好味，仲有蕃薯薯條，咬落香甜脆口，正到爆！而水牛城雞翼則整得恰到好處，雞肉嫩滑多汁，醬汁香辣惹味，值得一試！…Read More

位於朗廷酒店內嘅Artesian係一間主打Gin酒嘅酒吧，年中吸引好多Gin酒愛好者去朝聖。小妹今次參加咗酒店Package入面嘅Gin酒體驗，試咗傳統雞尾酒Gin &Tonic，調酒師選用一隻充滿西柚香氣嘅Gin酒，再加上色澤粉紅嘅士多啤梨味Tonic水，客人可以自選配料如乾果、香草等，飲落甜美易入口，非常適合女仔。…Read More

要講到下午茶嘅龍頭，一定係半島，但係朗廷酒店嘅下午茶喺香港都有一定地位。位於尖沙咀朗廷酒店嘅下午茶，係傳統英式下午茶嘅代表。可能令大家最新奇嘅係佢座地式嘅三層架，但小妹最欣賞嘅係佢竟然有只提供鹹點嘅Tea Set！香港大部分酒店嘅Tea Set都係以甜點為主，又或者半鹹半甜，小妹惟一食過全鹹點Tea Set嘅地方，就係喺英國，所以佢真係傳統英式下午茶嘅代表！…Read More

位於中環美利酒店嘅天台餐廳及酒吧Popinjays，主要提供高級歐陸式餐點，餐廳裝潢成藝術館一樣，到處都掛滿畫作，每個角落亦有唔少藝術品，而每張枱都係港女最愛嘅大理石紋枱。小妹係食Package入面嘅下午茶Tea Set，鹹、甜點各自五件，鹹食有黄咖哩雞泡芙、羅勒香蒜火腿漢堡包、紅菜頭羊肉墶、三文魚青瓜包同鵝肝青蘋果多士。而甜食有開心果紅桑子萢芙、芒果椰子慕斯蛋糕、Valrhona海鹽朱古力蛋糕、薄荷芝士雜莓馬卡龍同草莓柚子墶，五五比例非常Balance，食吓鹹點又食吓甜點，唔會太膩，而且食物質素都頗高，唔會話有假味或者怪味。…Read More

位於中環美利酒店嘅The Tai Pan，主打賣相精緻嘅高級西餐，雖然講就係高級西餐，但價錢非常相宜，Lunch Set或Dinner Set由$400至$1000不等，視乎你食幾多道菜同埋想食咩食材。小妹食呢間餐廳亦都係因為Book咗酒店嘅Staycation(二人價值$3300)，呢餐晚餐係包埋喺入面，有四道菜。前菜方面，小妹同朋友嗌咗龍蝦沙律同蟹肉意大利飯，前者係凱撒沙律上加上足一隻嘅波士頓龍蝦，龍蝦肉新鮮彈牙；後者係撈滿蟹肉嘅意十利飯，但份量有啲多，細食嘅女仔可能食完就飽。餐湯方面分別係粟米濃湯同意大利雲吞配牛骨湯，前者香甜濃郁，後者清新豐潤。主菜方面，一個係豬鞍，一個係煎鱸魚，水準之上。甜品較驚喜，「黑森林」居然係份子料理形式嘅甜品，朱古力雪葩、紅桑子雪葩、原粒車厘子分開上，擺埋一齊食就係朱古力黑森林嘅味道，但分開食又好有趣。蘋果金寶非常香脆，但雪糕用咗核桃雪糕，較為搶味，如果用返雲呢嗱雪糕會更好！個Package仲包咗呢間餐廳嘅早餐同另一間餐廳Popinjays嘅下午茶Tea Set，早餐係半自助式，主菜方面中、西式任嗌，只要你食到幾多，就可以嗌幾多，食物係同一個廚房出品，一樣冇得輸。至於下午茶就待下面介紹。…Read More

位於尖沙咀Hotel Icon內嘅The Martket，出名係CP值高嘅自助餐，小妹食呢間餐廳嘅自助晚餐係因為Join咗佢「食加住」嘅Staycation(二人價值$1650)，只係每人加$200就可以食到原價每人約$700嘅自助晚餐，計起上嚟都幾抵。呢個自助餐仲要做緊榴槤主題，最吸引我嘅除咗任食嘅原隻龍蝦、蟹腳、龍蝦鉗、海蝦、青口等海鮮外，就係佢不計成本嘅榴槤鹹、甜品，仲有無限任添嘅新鮮榴槤果肉(完全冇加其他嘢，係真嘅榴槤肉)同榴槤雪糕。此外，其他冷熱食、印度菜、意大利菜、廣東小炒等選擇都多，值得一試！惟獨佢冇供應生蠔，鍾意食生蠔嘅朋友或者會卻步。…Read More

話說小妹前排趁疫情數字回落嘅時候，相約好朋友去咗一間位於屯門、以西式定食做主打嘅西餐店，發現CP值非常高，忍唔住想同大家分享。西餐廳位於V City附近，非常就腳。店內係小清新風格嘅裝潢，以白色為主，一行入去就有一種溫馨舒適嘅感覺。小妹同朋友一人嗌咗一個定食，一上枱，兩個人就忍唔住「嘩嘩」聲，因為個餐真係好．大．份(利申:對女仔嚟講)﹗首先係「美國有骨豬鞍配薯蝦絲」($166)，揀咗薯菜，淋上野菌汁嘅豬鞍肉味甚濃，食落質感唔會太「鞋」口，肉汁鎖到實，野菌汁味道唔會太搶，反而令豬肉嘅香味更濃。個人認為薯蝦絲都唔錯，香脆可口，配上小妹最鍾意嘅泰式辣醬，認真Ichibang﹗前菜都好用心，居然用Super Food紅菜頭作為沙律，紅菜頭冇一陣草青味，反而爽口得嚟酸酸甜甜，非常易入口，應該係以糖醋醃漬過，令其風味更佳。朋友嗌嘅係「香煎鱸魚配特式炸雞粒」($168)，同樣揀咗配薯菜，用上紅花忌廉汁。經過輕煎嘅鱸魚外皮微脆，魚肉滑溜煮得啱啱好，唔會過熟。小食炸雞粒雖然唔係話整得好出色，但作為配角嘅佢真係不過不失。值得一讚嘅係，佢每個餐都附送一杯新鮮雜果，唔係罐頭嗰啲，係真係手切新鮮生果﹗另外佢嘅水吧都係任飲，上至凍飲，下至熱飲都非常齊全，但提供嘅款式都要視乎餐廳而定，唔會日日一樣。小妹真心覺得呢間餐廳值得推介，食物質素同份量嚟講對得住呢個價錢，CP值頗高，有興趣可以試吓﹗(疫情期間建議外賣)…Read More

鰻魚飯可以話係小妹我每次去日本必食嘅名物，最近因為疫情關係，小妹暫時去唔到日本親嘗日本鰻魚風味，就惟有喺香港食啦。而早前從日本嚟香港開分店嘅「名代宇奈とと」，主打以高級備長炭現烤鰻魚，吸引小妹前往朝聖。是日小妹夥朋友一齊前往，嗌咗一客鰻魚重特上（$158），以原條鰻魚上枱，實在令人震撼。鰻魚經過高級備長炭現烤，由於每條鰻魚都皮肉豐腴，經過明炭烤過後，魚油滿溢，淋上以砂糖和醋秘製而成嘅醬油，完全可以突出鰻魚魚肉同魚油間相互結合、令人滿足嘅滋味。再配上產自日本埼玉縣嘅稻米飯，食落認真唔錯。如果想有多種食法，可以考慮鰻魚飯三食（$88），鰻魚塊雖然唔多，但可以配合附上嘅芥末、鰹魚湯配搭嚟食。小妹鍾意第一食為原味，品嘗原汁原味嘅鰻魚飯；第二食就可以加芥末，辣辣哋有啲似食緊丼飯；第三食就可以喺加咗芥末嘅鰻魚飯入面加入鰹魚湯整成泡飯，又係別有一番風味。小妹鍾意食微甘嘅鰻魚肝，所以特別以套餐價加咗$15附有鰻魚肝同漬物，不過個人覺得個鰻魚肝湯味道唔突出，感覺都係食番烤鰻魚肝更滋味！…Read More