Flogwithme's Profile

之前已經去過呢間嘅旺角總店，真心超鍾意佢哋嘅煎餃同燉湯😭睇住佢哋愈做愈大，最近仲開埋土瓜環分店，一定要支持下🤙🏻每次到訪都一定要食佢哋個煎餃，今次就要咗京蔥羊肉同鮮牛肉洋蔥 雙拼($79/8 +$2)，呢到嘅特色係煎餃係煎三面，所以食落去特別香口，而且皮薄餡靚，兩款咬落去啲汁係湧出嚟勁誇張🥹原味小雲吞15隻 ($38)都唔錯，雲吞皮夠薄，而且都幾滑身，特別鍾意佢哋個秘製醬汁🤎麻辣涼拌大拉皮($42) 都好滑身，幾有咬口，揀咗BB辣唔會太辣，撈埋啲花生同青瓜唔會太heavy～涼拌極品海蜇頭 ($39)份量都好多，海蜇頭幾爽口，搭配煎餃就剛剛好～不過MVP之一必須有燉湯，要咗烏雞燉人蔘($49)同排骨燉蟲草花($46)都一樣咁正，呢到燉湯每煲都好足料，烏雞湯個藥材味好出，排骨燉蟲草花就相對清甜啲，兩款飲落去都好滋補嘅感覺🤍總括嚟講，呢間街坊小店真心好值得一試，唔怪得晚市會大排長龍，而且食物出品都好有水準，幾次到訪嘅水準都好穩定，同埋佢哋啲下午茶勁抵食，人均三十幾蚊就有交易，推介畀大家一試🤤…Read More

作為dough bros嘅big fan，講緊係得港島分店個時已經食緊，望住佢哋做到第一間九龍分店，再去到而家差唔多十八區都有分店，睇住佢哋成長得咁快真心好感動🤍而作為荃灣街坊，自己係社交平台都成日嗌呢間😆其實真係每款都食過至少一次，冇乜款係覺得唔好食，通常都係叫set，因為set都抵幾多😛今次要咗個Sharing Set for 3-4 ($378)，呢個餐包2個pizza，3個冬甩同兩個飲品，個人覺得4人絕對夠食，自己推介大家要啲單價高啲嘅pizza，因為呢到要貴啲嘅pizza都唔使加錢～今次就要咗The Truffle Deluxe，呢個係相對新出嘅pizza，truffle味好出，上面仲有好多奶香味好出嘅水牛芝士同burrata cheese，parma ham夠鹹香，呢個勁推介！另一個pizza就要咗The White King，佢係garlic butter底，食落去蒜香味好出，加埋咗啲檸檬汁會refreshing啲～值得一讚嘅係呢到啲pizza係sourdough底，而且即叫即打，食落特別有咬口，真心幾推介！（額外寫埋個人私心推介：carbonara、the truffle、the parma、pepperoni supreme、bbq chicken，同埋可以嗌half-half揀多幾款口味嘅pizza～）另外就要咗呢到都好出名嘅冬甩，全部都係鮮炸出嚟，食落去勁香，而且仲係流心，所以食嘅時候要墊好小心整到周圍都係🤣三個口味入面最鍾意係Nutella+肉桂糖，呢個真心係食過咁多個配搭入面最好食個個!! Oreo Chocolate都唔錯，Lotus Biscoff就係佢哋嘅招牌，不過甜度相對較高～另外推介大家一定要加BRO's Fried Chicken ($88)，呢個炸雞係超juicy，而且炸皮好薄，平時都會加購🤤總括嚟講，呢間啲pizza真心好正，所以真係不斷回訪咗好多次🥹作為member會繼續課金支持dough bros🙌🏻…Read More

一直都係呢間南印度菜嘅擁躉，自從四年前初訪之後食咗好多次，尤其覺得呢間都幾正宗，每次嚟嘅顧客都有一半左右係印度人外貌，基本上盲嗌都唔會中伏，而且唔限時，啱晒一大班人聚會，奈何有時都幾full，如果一大班人到訪建議要訂枱🤙🏻今次要咗最愛嘅Butter chicken masala($140)同Palak paneer($99)，兩份都好足料，前者雞肉都幾入味，食落去偏甜，後者芝士奶香味都幾出；Garlic Naan ($40)蒜香味都幾出，食落去底部微微脆口，加埋咖哩超正🤪Bamboo Biryani (Mutton) ($160)都係其中一個私心all time favourite 😭佢係將炒飯放入竹筒，再係枱慢慢倒出嚟，見到就知道勁有鑊氣🧡炒飯入口好軟身，而且啲羊肉好入味，亦都夠軟腍，真心一定要試！Butter Dosa ($85)都係必嗌招牌，佢係成隻手臂咁長嘅薄餅，可以點椰子、薄荷或者蕃茄醬，自己私心最推薄荷醬💚Chicken Kothu Parotta ($99)就係雞肉、雞蛋炒麵包，食落去口感都幾軟熟，呢個幾得意😛呢到啲小食都唔錯，Chicken 65 ($90)炸得好香口，炸皮都幾薄，而且入面都唔會好乾柴～Mutton seekh kebab($190)就用鐵板上，上枱個時熱辣辣，而且食落去唔會好羶，加埋薄荷醬都幾夾🔥食香口嘢建議嗌返杯Lime Soda ($40)解膩一流，佢哋Mango lassi都唔錯🌿總括嚟講，呢一間印度嘢真心好出色，所以自己回訪咗咁多次都唔會悶🤪服務亦都唔錯，見到有唔少人喺度慶祝生日，如果一大班人過嚟可以嗌多啲唔同款式， share食都唔錯🥳…Read More

最近見到呢間由韓國人主理嘅濟州岩石板燒好紅，朋友到訪過中環分店覺得唔錯，呢排又想食燒肉就去咗一試🫶🏻估唔到呢間銅鑼灣新分店都幾多人，暫時未見到好多人repost呢間分店，walkin都唔難，不過建議都係訂定枱穩陣啲🤪嚟到個個都係由店員幫手燒，最緊要係覺得到自己嘅心水生熟程度就要夾起啲肉，因為塊板keep住加熱緊，如果拎唔切就有機會overcooked🤣店員燒好就會將啲肉放係啲菜/泡菜上面，等啲肉汁索晒落去啲菜到食落去更惹味～今次要咗set A 200g牛肋肉同100g牛翼板 ($658)，食落去肉質軟嫩，不過最出色一定係Mango beef tongue ($458)因為真係好爽口彈牙🤤 Pork rind ($128)都幾得意，咬落去幾有咬口，加埋黃豆粉又估唔到幾夾😛另外覺得呢還飯嘅MVP一定仲有個炒飯 ($58)一拎上枱仲出緊煙，加埋啲牛食落去好正🥹每枱都會包嘅6款小菜都幾有心思，最鍾意一定係章魚😆如果食到膩一定要嗌返杯smoothie，要咗兩杯mango kiwi smoothie ($48)同埋passionfruit smoothie ($48)都唔錯，飲落去幾足料又唔會太甜🌿總括嚟講，自己覺得呢間燒肉都唔錯，一嚟比起平時嘅韓式燒肉多咗份新鮮感，而且可以一邊吹水一邊有人serve幫手燒肉，同朋友聚會都幾舒服🤫…Read More

之前曾經到訪呢間餐廳，貪佢個無敵維港景，真心應該近過所有維港餐廳，而且仲要係最正中間嘅維港景，喺度食嘢感覺好似味道都會好食啲🤤今次係佢裝修後首次到訪，而家仲未有好多人知，環境都特別清幽🤫Weekend Brunch ($390/pax)會有四款starters to share，最鍾意一定係Croque masame，broiche好軟熟，加埋牛油香好出💛另外幾有驚喜嘅係shahuka，佢除咗有平時都會有嘅臘腸肉、雞蛋同埋蕃茄醬，再加有啲脆脆，食落去口感特別豐富！Eggplant parmigiana其實係茄子蓉以撻嘅方式呈現，食落去辣辣地幾惹味～沙律就正常發揮😛主菜就可以每人一份，自己更鍾意Beef ragu pappardelle，煮麵食落去都幾有咬口，燴牛面頰肉幾入味❤️另一份就要咗Steak and fries (+$130)，flank食落去肉味濃，而且薯條炸得幾香口，調味以鹽同胡椒為主🥩搭配cocktail/mocktail係將成件事再昇華咗，今次要嘅The Kiss 同Thyme of life都係行清新路線🌿食到最後都已經好飽，不過都忍唔住要加配甜品🤫呢到最signature一定係鬼佬糖水，佢係士多啤梨梳打水做base，入邊有啲士多啤梨果肉同埋糖漬羅勒，最鍾意佢嘅糖漬羅勒葉好脆口，入邊仲有啲馬卡龍幾得意～Chef’s dessert platter (+$100) 都好驚喜，估唔到呢個價錢就有四件甜品，包括Canele、黑芝麻巴斯克芝士蛋糕、donut同埋banana cake，唔講得笑呢個banana cake係近期食過數一數二出色嘅，個香蕉味好濃郁，而且夠濕潤🍌黑芝麻巴斯克蛋糕直程係芝麻味濃郁到傻🖤入邊仲夾咗啲芝麻醬，中間做到軟心效果，幾建議叫一份同朋友share🫡總括嚟講，以佢喺尖沙咀呢個黃金地段，呢個brunch定價都算合理，自己覺得最impressive都係前菜🤣係到嘆brunch，放慢腳步，慢慢睇住維港景真心幾寫意🧘🏻‍♀️最正係佢哋生日仲會送蠟燭，啱晒同朋友過嚟慶祝🤙🏻見到佢哋weekday lunch 都係講緊$178，得閒都可以過嚟試吓～…Read More

之前留意到呢間餅店都係因為佢哋嘅羊腩包，睇住佢哋推陳出新，而且不斷諗啲新嘅麵包出嚟都有興趣一試😛自己覺得呢間嘅招牌千層撻 ($10)同開心果千層撻 ($16)都幾出色，個千層酥皮層次好分明，牛油味突出，蛋漿夠滑，開心果味就主要靠面頭開心果碎帶出嚟另外仲入手咗一個芝士吐司，入邊仲有冇滿嘅芝士粒，吐司本身都幾鬆軟，建議大家要用焗爐翻熱，真心還原出爐口感😍最近佢哋仲出咗勁得意嘅魔糍蛋糕，成個jellycat咁真心有啲唔捨得切落去🥹佢係大福皮包住蛋糕、忌廉同香芋泥，食落去甜度唔會太高，大福皮好薄，麻糬都幾軟糯，呢個價錢真心性價比幾高🤪…Read More

呢間主打Lasagna嘅意大利菜館最近超人氣，今次到訪預早兩星期先book到位，去到真係全場fullhouse，如果想到訪嘅朋友記得早少少～前菜三款入面，最鍾意一定係Nonna's Garlic bread ($78)，一上枱係香到傻，仲要個芝士係做到拉絲效果勁澎湃😭Meatball ($88)同Spinach avioli ($98)就正常發揮，前者較重口味偏鹹香，後者份量都幾多～講到重頭戲一定要試Beef short rib lasagna，牛肉嘅份量都幾多，而且佢做咗七八層千層麵，所以食落去口感真係食到一層層，而且面頭鋪滿芝士，加埋一齊食勁邪惡🥹Chicken parmasen都唔錯，係炸到香口嘅雞胸面頭鋪滿芝士，雞肉炸完都唔會乾柴，食落去唔會好油膩😛甜品Tiramisu仲係一大殼咁筆落去，儀式感滿滿☺️呢間嘅Tiramisu偏重咖啡味，食落去唔會好Heavy，如果要慶祝生日嘅話記得Remake，因為會成間餐廳火生日歌，店員仲會好熱情咁送上蛋糕，自己覺得成個氣氛好Lively🥰Sgroppino都幾易入口，Sparkling limonata清新解膩🌿總括嚟講，自己真係好鍾意呢間餐廳嘅氛圍，當晚仲有人手拉管風琴唱歌，據聞原來全港得返兩位歌手識做呢樣嘢，望住呢位意大利嘅叔叔唱月亮代表我的心都幾正🤫而且好多人慶祝生日，感覺喺度用餐氣氛好愉快🥳如果同朋友過嚟生日慶祝應該都幾開心🥳…Read More

大家都知我不嬲鍾意食呢間手工意粉，講緊一個月都食到一次，最近佢又出啲新嘅期間限定，唔講得笑真係值得一試😭一如既往都係要tasting menu ($298/pp) 包2starters 3pastas 2 desserts🫶🏻Calamari Ripieni 係將魷魚塞滿mussel同薯蓉拎去炸，外面炸到微微脆口，入面咬落去係勁鮮！生牛肉他他都特別，呢到嘅調味比較重vinegar味，上面放咗好多shallots同芝士，食落去味道都幾有層次～呢個餐仲包三個pasta，第一份Ravioli Cozze e Patate係期間限定菜式，ravioli皮好滑，入面啲青口係新鮮到傻😛另一款Tagliatelle Eel & Sea Urchin就係用海膽醬做base嘅意粉，當然佢啲意粉係手工意粉，食落去特別有咬口，海膽醬都幾得意，不過比較膩，建議同朋友share～最後仲要咗份Pici fritto，其實pici係一種手工意粉，自己係意大利食過都係比較挺身，比起tagliatelle更有咬口，如果鍾意有咬口嘅意粉建議大家一試！呢份嘅海鮮份量都好多，值得一讚隻蝦好新鮮～自己覺得今次期間限定嘅Lemon Tiramisu完全值回票價，因為呢個完全還原自己係Amalfi Coast個到食嘅個種風味！佢面頭有火炙過嘅檸檬蛋白霜，用limoncello做base，食落去酸酸地，又食到檸檬嘅香，又夠滑，lady finger夠濕，整體非常出色！另外tiramisu都一如既往咁正，真係介紹過太多次寫了～另外推介大家係到飲返shot limoncello，真心係香港飲咗好多藥水limoncello，呢間嘅已經係暫時最貼近意大利飲到個shot 🤫嘢飲整體都唔錯，Italian passion同埋Venetian iced tea都好足料，真係飲到果肉❤️鍾意呢間分店個vibe好熱情，全場都仲係咁多人係pici慶生，一晚6枱生日歌大癲🤣…Read More

呢間其實係我個人飯堂，一至兩星期就會食一次，皆因真係...太出色🙏🏻 今次執筆係因為佢出咗個好出色嘅新品🤤今次佢哋做芋薯主題，將芋頭同番薯加入甜品，配埋唔同嘅配料，今次要咗份拉絲麻糬芋薯豆花 ($45) 佢哋嘅豆腐花底勁清，豆香好出，麻糬都做到拉絲效果，芋頭同番薯夠綿密，而且用薑汁煲過，薑味極重，冬天食係勁暖胃🫶🏻朋友就要咗超煙韌Oreo奶蓋 ($48)，面頭嘅芝士奶蓋好厚好鹹香，加埋大量嘅oreo同oreo粉勁邪惡🤣 呢碗集合晒所有有咬口嘅配料，包括芋圓、小丸子同埋珍珠，自己覺得小丸子係同可可豆乳最夾😛自己都幾推介食佢哋芒果系列嘅產品，入邊係超～多餡料，係滿滿嘅西米🤣 今次朋友就要咗份多芒小丸子 ($48)，芒果唔會好酸，小丸子亦都幾夠煙靭～個人認為多芒系列四款入面，自己最鍾意都係呢款🤍除咗甜品，個人私心推介係吉列豬扒栥蛋飯 ($38)，呢間嘅栥飯都幾足料，拎上手已經feel到好聚手，平時一個可以當lunch～豬扒都幾厚肉，入面炸完都仲好軟腍唔乾柴，加埋大量肉鬆、厚身嘅玉子、酥脆油炸鬼同有咬口嘅榨菜，食落去層次都幾豐富☺️總括嚟講，呢間真心到目前為止食咗廿次都未搵到一個伏嘅餐點，真心推介畀大家大力支持佢哋開多幾間分店～…Read More

之前都同大家介紹過Pica pica，除咗呢間西班牙菜，其實自己都食過佢哋同集團嘅其他餐廳，整體水準都非常之高，定價亦都合理🤤留意到呢間同集團日本fusion菜出咗四道菜週末早午餐($298)，睇落去都相當豐富就過嚟一試，估唔到都幾有驚喜💘上前菜之前會有餐包提供，呢度就做咗銀絲卷配牛奶泡沫，銀絲卷炸得啱啱好，做到外皮脆身香口又唔會太油膩，而且加牛奶泡沫比起煉奶冇咁甜～前菜每人都可以揀兩款，所以可以同多啲朋友過嚟試多幾款～Beef Tenderloin Tartare (+$28)牛肉他他好軟稔，食落去仲帶麻油香🥰呢度嘅牛肉他他搭配店加自家壓製嘅黑胡椒餅，黑胡椒味都幾出，而且餅做得幾薄身，同牛肉他他幾夾～Maki Taco (+$18)就揀咗搭配北海道帶子，帶子非常鮮甜，而且份量好多，同飯嘅比例多過一比一😍手卷做咗天婦羅微微炸過，食落去非常香脆💗 Slow Cooked Egg 就搭配底下有大量嘅秀珍菇同埋面頭做咗薯仔泡沫，薯仔泡沫好滑身，秀珍菇亦都炒得好香口，撈埋啲薯蓉同埋蛋汁一齊食勁邪惡💛主菜就揀咗Omakase Platter (+$98/pax) 呢度嘅魚類每日都唔同，因為都係師傅每日新鮮採購，今次食嘅款式都幾啱個人口味，自己最鍾意就係深海池魚、炙燒鯖魚同埋金目鯛，最正嘅係刺身拼盤仲有多四件刺身，件件厚切新鮮，最鍾意就係油甘魚🥹 呢到嘅玉子燒蛋味幾香，好似布甸嘅口感都幾得意💛最後仲有一人一份甜品，Banana Yogurt “Slider”外表做咗好似菠蘿包嘅脆皮，仲淋咗一啲威士忌焦糖醬喺上面，入邊加咗啲焦糖香蕉，食落去除咗內外嘅焦糖香有對比，啲香蕉真係超甜，焦糖脆面同埋乳酪口感嘅對比超正❤️ Longan Sweet Soup龍眼糖水都幾養生，有啲桃膠、雪耳，飲落去清清地～ 同朋友一人一杯highball/gin都唔錯，呢度嘅highball仲帶一陣香草同果香，飲落去特別清新🌿總括嚟講，呢間食物質素都唔錯，前菜係尤其強項，而且環境都幾好，成間餐廳氛圍唔錯，氣氛都幾好，侍應都幾有禮貌，整體嚟講都幾滿意成個用餐體驗🤍 個人覺得呢間無論係重要節日定係同朋友聚會過嚟都唔會失禮，推介大家一試💖…Read More

自己其實都嚟過幾次呢間餐廳，不過今次就係第一次寫食評紀錄～今次就帶一位從未食過印度菜嘅朋友嚟呢間食weekend brunch ($368/pax)，個人覺得呢間都幾啱印度菜新手，皆因佢係將印度菜名菜一次過集合晒係一個菜單～前菜就有一系列嘅嘅印度街頭小食，私心最鍾意就係炸雞，炸皮做得好薄，咬落去勁juicy，加埋蕃茄蛋黃醬超邪惡😈最有特色嘅一定係口感豐富嘅Pani Puri，脆波包住啲薯仔蓉都幾得意～另一份ALOO TIKKA CHAAT都好清新，鷹嘴豆加埋乳酪同薄荷醬幾fresh🌿跟住就會用個好decent嘅層架上Tandoor towers😍 每位客人都有一件chicken tikka, pink salt salmon同椰菜花，每件都燒得好香口，入面唔會好乾，仲要勁～大件🤪個人最鍾意就係chicken tikka，三文魚仲可以搭配牛油果醬汁🥑～之後就會上咖喱同biryani platter，老實講食到呢到已經八成飽，不過係上菜嘅時候聞到陣香味又好開胃～呢到嘅naan做得薄身一啲，底部都幾脆口，最正嘅一定係truffle naan，上面係有滿滿嘅鮮刨松露香到傻咗🥹 今次都要咗經典嘅Saag paneer同埋butter chicken，兩份都好足料，咖哩非常濃稠，個人覺得butter chicken就比較香～Mutton biryani印度米口感好輕盈，羊肉都好香又唔羶🤑整體嚟講，成個menu都幾豐富，將印度菜嘅精華一次囊括係呢個餐單，啱晒人數唔算好多又想每樣試啲嘅朋友～自己最鍾意呢間餐廳嘅一點係呢到嘅環境，成個氣氛都好熱鬧，個人覺得好啱朋友聚餐同慶生🥳而家12月內於 Pirata Group 旗下餐廳每消費一次就可以獲得1枚印花參加聖誕大抽獎，食得愈多中獎機會愈高，頭獎竟然有雙人來回馬爾代夫5日4夜Trip😱 有興趣就12月食多幾餐🤣…Read More

屈指一算，原來自己已經係幫襯咗Goobne 10年嘅老客戶～呢間都算係第一批進駐香港嘅韓國過江龍，一直都幾鍾意食佢哋嘅烤雞，最近又同朋友恆常到訪🤪嚟到呢度每一次都會食佢哋嘅烤雞，今次就要咗一份半半烤雞，分別揀咗甜辣烤雞 + 蜜糖蒜香烤雞 ($248)，呢度嘅烤雞真心好出色，入邊好滑，外面嘅醬汁份量啱啱好，烤完之後仲會微微脆口🥹另外仲要咗一份韓式玫瑰醬炒年糕 ($168)，玫瑰醬非常濃稠，年糕份量都幾多，而且幾軟糯有咬口，仲有大量嘅煙肉、芝士同魚糕，掛晒上去最底嘅意大利粉真係勁邪惡🥰 總括嚟講，呢間韓國菜雖然冇乜花巧嘢，不過質素就係keep住都咁有保證，自己覺得佢哋芝士嘅系列都幾出色，包括係芝士pizza、芝士烤雞🤤 另外提提大家OpenRice係有訂枱85折，個人覺得折完之後價錢都幾合理，推介大家一試😚…Read More

其實Restaurant week 已經有留意到呢間扒房，當時都唔容易book，價錢都要$498/pax，今次見到佢哋趁住餐廳開業一周年推出限定周年Menu，weekend brunch $388/pax就可以任食牛扒😱今次特登叫埋朋友過嚟試～餐包係focaccia，仲可以搭配煙燻牛油及油封蒜頭，自己都係第一次試呢個配搭，感覺幾有扒房特色，加埋脆口嘅focaccia好夾～前菜可以揀beed tartare或者龍蝦湯，唔講得笑兩樣都好大份😳牛肉他他都幾嫩口，撈埋蛋黃汁配牛油多士好邪惡🤫 龍蝦湯飲落好鮮味，最正係啲龍蝦肉味道濃郁，啲蘿蔔索晒龍蝦嘅精華超正🦞主菜就係紐約西冷牛扒，先讚廚師煎得好香口，而且火喉掌握得好好，真係做到五成熟，食落去肉味濃郁，肉質軟腍亦冇筋，最驚訝嘅係呢個質素竟然係任食😱牛扒仲會搭配一款意粉主菜，Pomodoro penne就係蕃茄長通粉，A.O.P. Chitarra就係蒜蓉意粉，兩者口感都軟硬適中，不過個人比較鍾意蒜蓉意粉有少少辣更惹味～ 另外薯條都炸得幾香口，真心忍唔住好快清晒成碟～最後嘅NYC Daily Dessert係cheesecake，中間仲係軟心效果💛面頭加咗啲yoghurt同埋雜莓，旁邊仲有柚子味sorbert配crumble，即使食完成份甜品都唔會好膩～呢到除咗可以+$128嘆90分鐘wine package，仲可以半價享用bottle wine，係到飲住酒成件事係幾chill的🥂總括嚟講，呢到嘅食物都幾有質素，加埋餐廳裝修典雅，樓底夠高，成個環境去到夜晚應該幾有情調～值得一讚侍應服務都幾殷勤，成個用餐體驗好舒適💖今次嚟食嘅時候見到客人都唔算好多，自己覺得好weekend brunch有得任添牛扒真係抵到傻咗，值得更多人知道佢哋嘅好🥹推介大家可以一戰!!…Read More

之前見到ig好多人去呢間居酒屋，bookmark咗都好一排，今次同朋友專程到訪，就係為咗一試佢哋嘅明太子煎蛋卷💖個人覺得呢到最出色嘅係燒物同一品料理，明太子煎蛋卷 ($88) 呢個真心係必食推介，個蛋做到好嫩滑好軟熟，一切開入面嘅明太子即刻流曬出嚟💛肉厚活3年帆立貝($148) 一上菜個時仲有火嘅效果好啱打卡🤣 帆立貝都幾厚肉，食落幾彈牙🤪鹽燒牛舌($78)都幾出色，食落幾有咬口，加埋生椰菜冇咁膩～ 海膽汁燒蠔 ($118) 就用鐵板形式上，海膽汁比較甜，面頭做咗炙燒，蠔肉都算厚身，食落去都幾鮮～刺身拼盤七點盛 ($380) 當日就有平目、伊佐木、深海池魚、真鯛、間八、赤貝同拖羅，整體嚟講件件新鮮冇筋，而且相當厚切，推介大家由我上面列出嘅順序食就可以由淡味到濃味～島池味噌他他 ($148) 都幾得意，紫蘇葉嘅調味幾得意～炭火燒拼盤6串 ($180) 就有自家製免治雞肉串、雞翼、雞心、雞腎、青椒仔、雞頸，其中最鍾意嘅免治雞肉棒，加埋月見汁食超邪惡🥰 鍾意到加多咗一串自家製免治雞肉串 ($36)～三文魚三文魚籽燒飯團($78) 面頭佈滿三文魚跟三文魚籽，燒到外面脆口，三文魚都幾肥美，食落口感都幾豐富😛最正嘅係呢到啤酒做買一送一，即係$37.5就有一杯啤酒，啱晒同朋友一人一杯啤啤佢🍻 甜品都幾出色，自家製雞蛋布甸 ($38) 個焦糖香好有驚喜！食落去甜而不膩，而且夠滑～總括嚟講，呢間居酒屋雖然定價唔平，不過質素都對得住個價錢，而且樣樣嘢都係新鮮熱辣嚟，幾碟都係出住煙咁上菜，侍應服務都算係殷勤，環境都算闊落好坐，整體嚟講都頗有質素，完全明白點解咁多人到訪～…Read More

呢間居酒屋主打高知市同四國地區嘅料理，同朋友今日收完工過嚟聚下，估唔到weekday都可以full house，眼見唔少朋友walk-in都畀人turn down咗，想嚟嘅話建議大家要book定位!!前菜其實都已經幾唔錯，螢光魷魚沖漬伴海膽汁($48) 食落去魷魚口感偏爽身，加埋海膽汁更加鮮～ 店家推介嘅鹽焗日本銀杏($68) 食法有少少似平時食開心果咁，口感係比較痴身嘅枝豆，個人覺得都幾得意🤪刺身類品項都幾出色，炙燒魚盛沙律($128) 刺身都幾厚切，件件鮮甜冇筋，加埋柚子醋調味都幾清新🌿炙燒皮剝魚壽司($58)加埋肝醬味道更rich～鰹魚半敲燒($128) 鰹魚燒到外皮微焦，內面仲係好似刺身咁好嫩口，表面充滿稻草香氣，肉質濃郁鮮香!!呢道用開放式廚房設計，可以見到廚師係大大個火爐燒串燒，店家會將串燒放係細火爐保持住熱度，最估唔到嘅係呢到竟然有乳鴿串燒，今次試嘅鹽燒鴿皇腿($48)都好肥美，鹽燒鴿皇胸肉($38) 肉質就比較結實，私心推介京都絹豆腐 ($32) 因為真係好～滑，完全係喚起自己係嵐山食個嚿勁滑豆腐嘅回憶🤤另外，仙台牛舌免治雞棒 ($58)食落去都好juicy，加埋月見汁真心冇得輸～ 其他串燒例如係長崎雲仙火腿串($38)同鹽燒沖繩車海老($48)都正路，青椒仔 ($28) 同大啡菇 ($28) 都幾juicy～燒飯糰($78/2pcs) 面頭就加咗啲梅醬，食落去冇咁滯🤣各款一品料理都幾唔錯，自己私心最推就係明太子芝士炒蛋 ($78)，店家會係席前為客人烹調，成件事好ig-able，一拉起就見到啲芝士同蛋勁澎湃，食落去個蛋勁滑～煙燻芝士可愛鯖魚 ($48) 鯖魚都燒到外皮焦脆，自家製免治雞肉蓋($68) 食落去口感好軟綿，入面仲有啲雞軟骨增加口感，加埋面頭蛋黃真心冇得彈🫶🏻最正係呢到有清酒任飲2h free-flow ($98/F; $168/M)，喺吧枱位置放置咗6枝清酒，客人可以隨時攞住小杯出嚟斟自己鍾意嘅清酒，甘口/辛口嘅酒都有，真心抵到傻咗，幾啱同朋友係到小酌，不過既然有放題就係到劈都冇問題啦🤑總括嚟講，呢到整體食物都幾有水準，而且用料都好新鮮，呢到大部分待應都係日本人，佢哋都幾好客，而且仲會同客人一齊乾杯隊清酒，特別讚有一位特登學咗廣東話嘅日本人店員，佢講廣東話講得好流利!! 成間居酒屋好有氣氛，真心覺得同朋友有啲似個啲日劇入面嘅打工仔放工過嚟飲酒咁🏮如果想同朋友狂飲酒，食下小食都推介大家一戰😛…Read More