fionwan's Profile

上網睇到呢間餐廳做買三送一，所以過黎食下。店舖唔算好大，不過裝修幾浪漫，好多夢露。加左108轉牛肉他他，我唔太中意個醃料，成個味太strong。另一個頭盤係煙三文魚沙律，三文魚幾新鮮，菜就無乜沙律汁。Parma ham with mushroom，呢個個汁反而幾好食，個菇好juicy，不錯。鵝肝都好食，又係加百幾轉既，幾香，又滑。意粉面頭有好大片芝士，正常。short ribs，本來係beef cheek，佢話質素不太好，轉左short ribs，好好味，好冧，好滑。另一個main係雞胸，煎得好好食，外脆內嫩，都好好味。甜品4個人俾左6大件，太飽，真係食唔到。甜品偏甜，有檸檬撻、mango mousse cake、opera cake我覺得牛幾好食，4個人，嗌左4杯iced lemon tea，埋單2800幾，fine dining黎講算平。可以一試！…Read More

喺呢間餐廳食咗三次，三次都係因為嘢食好味先返嚟再食，但係三次都覺得服務態度好差。第一次係我坐喺附近等緊叫號，等咗45分鐘終於輪到我，佢嗌我個號碼嘅時候嗌咗一次，大概3秒就嗌下一個，我行到埋去都只係用咗5秒鐘，佢叫我等吓一個，想俾人哋入去先，我真係勁嬲，覺得佢哋做嘢好唔合理，明明嗰張指示牌話會叫兩次，佢先至好唔情願咁樣話限時60分鐘，叫我入去。第二次食嘢就係啲嘢食本身已經唔係上得特別快，嗌埋甜品，差唔多食完用咗大概50分鐘，佢即刻出張單出嚟，同我講話仲有10分鐘，成個感覺係趕你走嘅意思，我勸大家嚟依度食嘢就唔好諗住食埋甜品啦，因為真係未必夠時間。第三次嚟食嘢，我今次只係食咗30分鐘啫，差唔多食完，佢同出面個客指住我張枱講話嗰張枱就嚟食完㗎啦，嗌咗杯嘢飲，又指住我杯嘢飲比個客睇杯嘢飲係咁㗎，你嗌唔嗌啊？拎住張單去買單，佢都係唔會行埋嚟幫你埋單先，施施然抹埋張枱先。我相信嗰位大叔應該係呢間餐廳有份嘅芒果沙冰幾好飲，幾解渴。朋友話嗰幾碗細飯幾好食，而且有八種口味可以選擇，蒸蛋就真係冇乜味。雞泡魚乾幾脆壽喜燒係最好食嘅，叫咗日本和牛，肉質幾滑，飯係日本迷嚟嘅，呢個set都只係98。我覺得牛扒就唔好啦，因為好韌，同普通茶餐廳嗰啲牛扒冇乜分別，我諗嚟依度淨係食壽喜燒都已經夠啦。我試三次已經足夠啦，純粹係因為青衣沙漠冇嘢食，先去食幾次，但係我覺得三次已經唔需要再去了～…Read More

星期日的午市過黎食。老闆拎左一張午餐嘅Menu，咁我八卦個火鍋嘅資料，佢好似要人一定要決定嗌咩咁，成個氣氛好緊張。最尾叫左流心芝士漢堡，好平庸同好咸，包一個粟米湯、沙律。朋友叫泡菜味噌烏冬，咸過咸魚，咩味都食唔到，淨係食到鹽味，食完仲要勁口渴。兒童餐個意粉乾淨淨，係新幹線造型得意。同埋有小朋友喜歡食既布甸。但係個老闆啲服務態度真係好奇怪，隔籬枱一家三口嗌個刨冰，個爸爸好緊張個刨冰有冇椰子，因為佢個仔有椰子敏感，人哋提出個仔唔食得，個老闆個樣即刻好驚人哋要取消退單，個樣即刻黑晒面。雖然我冇俾佢黑面，但係成個氣氛都好緊張，真係唔會再嚟，嘢食都好普通，純粹係食過裝修，熊仔好可愛。…Read More

呢間舖頭主打新式韓國fusion西餐。餐牌都幾多選擇，價錢中價，全餐埋單430幾，合理價錢。明太子飯卷幾好味，有啲似以前嗰間schxxl food既感覺，可惜執緊笠。柑橘乳酪特飲偏甜，我覺得係eye-catching ，嗰啲奶類製品飲多咗會覺得好膩。個布甸本來我擺咗喺中間食咗一半，垂低個頭玩咗一陣電話，竟然俾人收咗，好彩最尾侍應俾個一個新嘅布甸我，下次可以問吓人先收嘢會無咁odd。味道就正常啦，都係好甜同埋唔夠滑。芝士燴飯加Parma Ham，個味道都幾特別嘅，可以一試，有少少蘑菇。呢個牛肉菜沙律就有啲奇怪，其實只係一個餸菜多啲，味道好鹹，要拎黎送飯會合理好多。我覺得而家呢個時勢好多Cafe都收費好貴，佢開係一個中價嘅商場嚟講，呢個價錢都叫做性價比好高，可以一試。…Read More

一行到入去收銀嗰度見到寫住唔收現金咁樣已經睇到好唔方便啲顧客，因為唔係個個都有電子支付。喺門口睇到有飯團外賣，諗住買幾個試吓。企喺收銀側邊等一陣睇吓有冇人出嚟唔好話招呼，講兩句都好。跟住櫃檯個師傅突然間爆一句:「你望住個收銀幫你唔到。」咁咁我跟住再問係咪有飯團外賣，佢一臉鄙視咁話做唔到㗎啦。其實佢可以貼個牌喺出面同人講$25飯團，只係一個gimme ，唔係諗住真係賣，喺度嘥人時間，又冇禮貌。大概兩三年前食過一次，佢嘅魚生飯係將啲魚唔要嗰啲部位堆埋一座山，就當係高級嘢serve俾你食…Read More

鳴越 Pho (中環)中環租庇利街9-11號富興大廈地下6號舖進食時間：28/1/2024 9:00pm食物偏咸，但我想講個收銀阿姐對殘疾人士超無禮貌。當時9:25pm，果位要坐輪椅(輪椅泊咗喺門口)同有口吃既中年男士睇緊餐牌，個阿姐突然間呼喝:「你食唔食呀？我夠鐘收工，唔食就走啦。」個男人即刻話我食我食，佢跟住再奚落個男人：「你講都講唔到。」個男人話：「我想要米線。」佢又鬧「我地呢度無米線架。」落完單後，佢又揶揄個男人：「我哋呢度收港幣㗎，你有冇架？」呢啲人真係好賤格，喺度恰啲弱小人士，請大家抵制呢間餐廳唔好去，一啲同理心都冇，對住個陌生人都唔會咁，更何況係自己嘅客人。…Read More

睇電視知道海港城開左呢間餐廳，假日即刻試試佢。餐廳裝修走cafe叢林feel，佔地面積好大。menu勁有驚喜，中、日、西、港式野都有。講返食物，金魚餃非常ig-able，顏色奪目。食落啲蝦都彈牙，唯獨當時問一個大概三十幾女侍應拎辣椒油，佢當時黑面答我話有，我都估到佢唔會拎，佢真係無拎，得閒都唔拎。叫兩籠點心，要辣椒油好過份嗎？講返飲品，滴滴咖啡等到差唔多食完先黎，無乜咖啡味，唔知點解會「人氣」。另外果杯桃冰啲珍珠幾好食，乳酪檸檬茶夠酸，兩杯都幾好飲。薯條好香口，40幾蚊抵食。三文魚無乜特別薄薄幾片，日式食物價錢較進取但食材係新鮮既。all day breadfast唔錯，牛角包脆既，腸、煙肉正常發揮。個汁好食，明太子配烏冬，烏冬質感太水，浪唔起sauce，用返意粉好食啲。綠茶疏乎厘好難食，好甜，個面一啲綠茶味都無，入面都唔係鬆軟，係一Pat漿糊咁。總結，食左千幾蚊，兩大一細，食唔飽。希望餐廳內部管理下員工，始終呢間唔係茶餐廳。可以一，不可再既一間cafe~…Read More

呢間餐廳雖然開咗好多年，但係都係第一次食食，係老公帶我食，佢話外賣好抵食。焦糖奶昔，好味，奶味香濃。封門牛柳8安士，medium，好嫩唔會韌，唔點醬都好食，點左消滯，係香港食過咁多間三甲內，仲有好甜既小番茄。海鮮麵，勁好味，好多蟹肉同芝士，一啲都唔乾，好多sauce。tiramisu 就麻麻，不建議叫，個面咖啡粉唔夠苦，餅底太濕一Pat野，加埋好甜好難食，好勉強食埋去。總括嚟講，我覺得每樣菜式水準都幾平均，平日入嚟唔使排隊，但係訂咗位就抵啲，有7折，無折埋單800。可再黎！…Read More

生日，朋友揀左Henry同我慶祝，食物就正常，但氣氛好好，侍應長期1對1服務，細心講解餐牌。店外掛左一個雞同牛扒人，好搞笑。餐前麵包，有啲硬，牛油香。黑松露生牛肉他他，賣相其實就有啲一般，但係勝在有侍應即場seasoning俾你睇，逐樣材料介紹俾你聽。唔少得主角牛扒，其實每一期嘅主打都唔同，建議問返侍應，食牛扒我一定係食medium rare，咁樣先唔會過分韌，或者太過bloody。另外嗌咗一個兒童餐俾小朋友食，反而兒童餐就幾抵食， $600有通粉同牛扒。最尾叫咗一個粟米雪糕伴焦糖爆谷，啲爆谷好好食，卜卜脆，充滿左焦糖，粟米雪糕入面都有一粒粒嘅粟米，應該係自己整嘅，味道唔太甜，幾特別，起碼出面啲餐廳應該冇呢個甜品，好開心咁樣吹咗蠟燭過咗一個完美嘅生日。場內都見到有唔少人放工飲杯酒chill下，應該係一個同朋友聚腳嘅好地方。今餐大概都係$3000幾，價錢算係合理，慶祝生日係一個唔錯嘅地方。…Read More

本人於11月3日，下午4:50分於李鄭屋分店購買三杯台式飲品，當中包括愛玉檸檬鐵觀音、波霸鮮奶、奶蓋鐵觀音。下單的時候，深感該位長頭髮，頭髮帶啡色的店員態度十分無禮。我在下單第三杯的飲品時候，對話如下。店員：「要什麼奶蓋？」我：「芝士奶蓋。」店員：「波霸鮮奶沒有奶蓋的。」（呼喝態度，眼神不屑）我：「第三杯飲品，奶蓋鐵觀音」（一臉迷惘，其實已經下單第三杯了，他聽不清楚，還這樣的態度。）在我前一個的客人是一位老婆婆，他都已經被這位小姐姐教訓了。雖然客人買的是20多元的飲品，但是需要用這種態度對待人嗎？跟他的同事反映，卻敷衍了事一句「哦」，連道歉也沒有！在等候飲品的過程中，這位小姐姐更大力拋擲收據，刻意發出一些聲響，希望你們總公司反映給分店聽。…Read More

之前搭的士返屋企經過間舖頭，見到個名咁特別，已經想試下。要等20分鐘嘅招牌叉燒真係幾好食，同燒味店嘅叉燒唔同，我覺得係新鮮啲，同埋冇咁鹹，買咗兩串外賣返屋企食。車仔麵都OK，菜甫幾大粒，豬腸洗得幾乾淨，冇腥味，而且炆得幾稔，牛筋都唔錯，唔硬。咖喱魷魚另外分開裝，呢個我就覺得麻麻地，因為好鹹同埋凍冰冰，但係質感來講都唔係話咬唔到嗰啲，係爽嘅。加咗杯凍檸茶，有啲過甜，冇乜茶味，不過呢度都唔係飲凍檸茶嘅。睇得出老闆係有個性，收銀個姨姨冇乜禮貌，不過呢度應該都係食性格嘅，間唔中過嚟食下都OK，反而就冇乜人情味，唔係幾襯紅磡呢個地方，可能開返喺啲commercial 嘅地區，嗰啲人會比較受落呢種銷售模式。呢間舖頭令我諗起好多年前大角咀嘅車品品，兩位店主都係有性格之人，哈哈哈⋯⋯…Read More

由於近排去咗W M酒店staycation，所以一早book咗喺附近嘅泰道餐廳。呢間餐廳平日都好full，大概都有八成滿，裝修幾有泰式風味。首先，嗌咗個泰式生蝦，味道都唔錯，個醬汁調校得幾好，簡直透心涼。菠蘿沙冰好大杯，飲極都飲唔完，都幾消暑，酸酸甜甜咁樣，朋友嗌嘅青檸梳打都好大杯。本來想食冬陰功，但係驚兩個人食唔晒，最咪嗌咗明爐魚冬陰功湯底，酸酸地，條魚都幾大條，加埋粉絲都幾飽肚。馬拉盞通菜炒得爽口，醬汁調教OK。仲有泰式臘腸肉鬆炒飯，我覺得幾好味，本身鍾意食泰式臘腸，鍾意甜甜地嘅味道。今餐飯大概$700 ，價錢就正常啦，望到海景都幾放鬆嘅，可以揀坐戶外定係室內，咁熱嘅天氣我都係揀咗坐入面涼冷氣，餐廳送餐快速，基本上唔使點樣等啲嘢食就好快嚟到。如果入嚟度假可以試吓呢間餐廳，己有旅行嘅感覺。…Read More

近日，喺電視經常見到報道呢一間餐廳嘅兩餸飯，終於決定去會一會佢。暫時試過兩次都覺得OK，平日夜晚排隊會耐少少，要買咗飛先排隊，等大概15分鐘，星期六日只需要等5分鐘，不過黑醋骨就未必成日有，如果撞正到自己賣晒，就要企喺側邊等一陣。個人認為買淨餸$45點都抵過兩餸飯，因為兩餸飯嘅份量係少啲嘅，返屋企煲啲白飯就可以食得。黑醋骨真係唔係浪得虛明，個甜酸度啱啱好，舊骨煙煙韌韌，送飯一流。之前仲試過咕嚕肉，擺咗好耐都仲好脆，不過係比較細粒啲嘅骨嚟嘅，唔係大嚿嗰隻，但係都幾好。至於鵝腸，唔知係咪擺耐左，我覺得好似落多咗芡汁，太過稠。西蘭花炒蝦球都整得好好食，啲蝦好爽口彈牙，大大隻，西蘭花新鮮，係翠綠色嘅。至於炒蜆性價比都幾高， $45一大盒，真係仲想點呀，如果呢三盒野喺大排檔食起碼要五六百蚊埋單。全家人都食得好滿足，可能會變成嚟緊嘅飯堂，大暑好熱，完全唔想煮飯，真心推介。…Read More

聽聞四季菊嘅天婦羅好出名，特登book咗位揀咗星期六去試吓set lunch。當日餐廳都有七成滿，食物整體質素OK，但未至於好好食，唯獨唔滿意係服務。鱈魚好食，呢個set三百幾蚊我覺得OK，煎得幾好，鱈魚出去買都係貴嘅，所以呢個係抵食。烏冬做得好幼細，天婦羅係沾左薄漿，我覺得都係正正常常，未至於話好好食，反而烏冬幾好。壽司真係做得唔合格，一夾起就散晒，但係食材係新鮮既，壽司飯都比較酸。牛肉烏冬，朋友話OK。另外，有個小插曲令到我有啲激氣，原本俾咗按金1000，我suppose佢退返落去信用卡，所以埋單佢冇扣返，我都冇為意。跟住過咗兩日佢打嚟話唔記得扣番，問我會唔會返去再食，我諗咗兩日覆返佢話短期內都唔會再食，佢真係打嚟問我一句：「我哋餐廳啲嘢唔好食咩？」真係好尷尬，唔通真係直說直話真係好一般咩？仲叫我試吓鐵板燒，即係食咗lunch唔係勁好食，你覺得客人會短期內又返嚟再食過？仲要皇恩浩蕩話比多三個月限期我用過$1000 ，唔知以為係免費嘅，過咗半個月問佢幾時退錢，又單單打打話一定會退返，要一頭半個月，唔問都唔講幾時。成間餐廳員工嘅氣氛都一般，有一個類似主管嘅人當面喺餐廳鬧啲員工唔斟茶比客人，你哋間餐廳係喺酒店入面㗎，可唔可以俾返少少fine dining應該有嘅服務，我真係覺得壽司郎啲態度都好過佢哋……………..另外，過左一個月後，因為四季酒店staycation package去左中環四季菊食晚飯，鐵板燒的而且確幾好食，我會選擇中環店日後再光顧…Read More

見到呢間麵包舖出面排晒隊咁，知道啲人係為咗買麻薯波波而排隊由於條人龍太恐怖，我就轉為買麵包同埋西餅，但係個價錢絕對對唔住質素，同一般屋村麵包舖嗰啲西餅冇乜分別。買咗日式雙層芝士蛋糕同埋巴斯克芝士蛋糕，佢嗰啲忌廉芝士係十分廉價果一種，都幾難食，但係標價要$45.1件，簡直就係呃人，一般商場嗰啲高級餅舖人哋都係賣緊$40.1件，起碼用啲材料真係上盛。葡撻正常，但係炸雞店葡撻好食過佢。綠茶伯爵味菠蘿包，啲麵粉一定係平嘅，因為入面個密度係非常之粗疏，好難食，好鞋，仲要$9.1個迷你菠蘿包，簡直就係呃錢。希望大家唔好再比呢間嘢嘅排長龍呃咗，咁樣做生意熱度過左，仲有咩人會幫襯？…Read More