Manlie's Profile

終於訂到兼去到難好訂位的すき焼 森 Sukiyaki Mori，要每個月的1號打去訂下個月，例如我想10月去食，就要9月1號打電話訂位喇！以前同朋友去過日本松板食過正宗壽喜燒，一直念念不忘好想再食，好在香港現在有すき焼 森的出現，未飛到都可以止止癮～藉著朋友生日就來すき焼 森 慶祝，我去的是歌賦街分店，上環地鐵站步行8-10 mins。之前一日有人會打電話來Confirm booking，亦Remark是慶祝生日，我訂的是午餐，Sukiyaki Set，$580一位。去到安排坐Bar檯位～首先前菜是好清新的冷盤 — 菠菜舞茸，熱盤有舞茸茶碗蒸，兩款都很不錯，如果茶碗蒸再多些少就更好～之後師傅就開始煮，師傅會介紹一下食材，食材都是來自日本，會按不同時令轉款，今次就有菜、豆腐、洋蔥、大蔥、菇等等而牛肉是日本A4和牛，分別是西冷同牛肩，還有日本蘭王蛋沾牛肉食～由西冷開始煮，師傅倒入壽喜汁再調味，一邊煮已經流口水🤤，師傅亦好健談，大家傾下烹飪、日本、旅遊，交換下心得。一開始會有半碗飯，不夠可以再添，西冷牛味不錯，但我同朋友都覺得牛肩更好，油花比較均勻，味道亦比較濃～食完牛肉會有麵豉湯，正正常常啦。好戲在後頭 - 滑蛋牛肉飯，師傅拿出牛肉碎再打蛋煮，老實說賣相不算很特別，但食落蛋滑肉味濃，比預期中好好味呢～最後仲有雪糕同咖啡，因朋友生日，雪糕碟會有Happy Birthday 及蠟燭，朋友對這生日飯好滿意，我自己亦大滿足！以服務及品質來說，CP值高的一餐～…Read More

本身係住附近, 都知道Myth House開左一段時間, 諗住咁近就等無咁多人先去試啦, 而早排有電視節目黎取景, 而我媽正正就係「蛋白粉」加上佢好少女心鍾意打卡, 就一於黎呢度補祝番母親節飯~~幾日前於whatsapp訂位, 想俾媽咪影下相就book左outdoor…點知當日比預期中熱! 好在有風機同Cover, 但仍然強烈建議大熱天時坐indoor,不過亦因為大晴天, 影相又真係靚d既, 真係好在心機為整幢建築及周邊裝飾, 黎遠睇已經好eye-catching!Set Lunch有5款選擇, 唔同菜式唔同價錢, 都係包左前菜、主菜同餐飲。流浮山鮮蝦滑餅 配 酸菜菠蘿莎莎。咕嚕甜酸泡泡侍應好推薦呢款, 話係用當地食材去整呢道菜, 就即管試試, 我初初想像到係泰式蝦餅咁, 但上碟時就知自己諗錯曬, 擺盤好靚, 成件事好粉紅色~~ 鮮蝦滑餅好彈牙, 加上酸菜同咕嚕分子, 食完好開胃!是日餐湯 – 西洋菜忌廉湯其實媽咪本身麻麻地西湯, 本身聽到係忌廉湯就諗住揀沙律算, 但再聽到係西洋菜忌廉湯就話好好好, 睇黎鍾意西洋菜既媽咪都無諗過可以變成西湯,  飲落雖然西洋菜味無平時中湯咁濃, 但多左份香滑, 都幾好~~香煎紐西蘭比目魚 配 川椒剁椒汁  (Lunch Set $208)呢道菜係我當日最欣賞, 叫果時已經覺得好fushion, 上碟時用煲仔上又幾得意, 媽咪話可以keep warm耐d。比目魚係煎香左, 魚皮仲有少少脆口, 但魚肉仍然好嫩滑唔老, 川式剁椒汁未至於好辣, 但同個魚好夾! 而最surprise既係比目魚底係薯蓉, 吸曬魚油同辣汁, 超好食!蟹肉手工扭扭粉 配 忌廉黑松露醬。黑松露羊奶芝士片  (Lunch Set $198)之前睇OP MENU 見到有腐亂羊架, 好想試, 但MENU係會from time to time轉, 好在有我至愛既蟹肉, 而黑松露亦係我鍾意既, 一定揀呢個扭扭粉啦! 雖然無比目魚咁搶focus, 但都煮得好creamy, 上碟時勁香! 而扭扭粉比平時意粉有咬口, 都幾飽肚~~  餐飲方面都係叫普通檸茶咖啡, 唔多作介紹, 但天氣好媽咪想坐多陣就問埋今日有咩是日甜品, 一問之下原來有Hidden Menu -- 椰子清湯雪耳, 心諗咁中式既? 侍應話唔係普通糖水黎架, 係做到好似大菜糕咁...又咁岩媽咪係鍾意椰子同雪耳, 就叫呢款啦!  呢度d菜色未見樣,  已經令人有滿滿既好奇心, 見到樣未食入口就更新好奇。個presentation係一杯仔咁, 好fresh好消暑咁款, 的確食落有d似大菜糕既texture, 大概係椰青+少少香茅味+雪耳, 味道係好清新,  可以balance番主菜既濃味~~ 成餐飯無論視線上同味覺上都有唔同既衝擊, 最重要係媽咪表示好滿意! 睇黎下次屋企再有大時大節既飯局就會再黎呢度~~…Read More

原來差不多5年無寫食評，呢間絕對值得蒲頭一寫！其實已經第3次幫襯 La Barra，第1次食完已經想寫，但又想試多幾道菜色先寫~~MENU La Barra 位於荔枝角地鐵站同長沙灣地鐵站中間，係有少少吊腳，但行去亦唔係話好遠， 長沙灣地鐵站C2出口大約6-8分鐘。裝修以橙色為主，再配上西班牙花磚，簡約得黎又帶點西班牙風情，話明小店，餐廳不算寬敞，但有足夠位置用餐，亦有Ｂａｒ檯位，我自己反而幾鍾意坐Ｂａｒ檯。平日夜晚都算多人，建議訂檯！ Crab Croquetas 蟹肉可樂餅 & Squid Croquetas 墨汁魷魚可樂餅  $18/pc餐廳有3款可樂餅，分別係松露蘑菇、蟹肉同墨汁魷魚，我自己就偏好蟹肉同墨汁魷魚，每次都會叫！就算你單叫一粒都可以～入面係有蟹肉同魷魚粒，雖然都係mix左薯蓉，但味道係大不同，Creamy得黎都食到蟹肉同魷魚粒，兩款都食到鮮味～～Iberico Ham  純種黑毛豬火腿 48個月 $128我係超鍾意食Ham，平時出去食同樣份量一定唔止呢個價錢，而且呢度既Ham充滿油香回甘，又唔會太膩太鹹，同行友人唔係好食，我差不多自隊一碟大滿足！Gambas al Ajillo 西班牙蒜油蝦 $98呢道菜係西班牙餐廳必有的Tapas，蝦肉新鮮爽口，蒜片已經煮到香甜，伴碟既麵包片點蒜油食係超正，如果蒜香再重少少會更惹味！Meatball with Mushroom Sauce  自家制肉丸 $88本身係無諗過叫呢道菜，但周邊既檯都有叫自家制肉丸，出於羊群心態就試下，肉味濃同個自家制既汁好夾，重口味少少既友人大愛！Manila Clams with Mojo Sauce 馬拉蜆配Moji醬 $198西班牙少不了海鮮，Menu上有馬拉蜆亦有青口，其實兩款都好想試，但怕太飽只好二揀一，因為好耐無食Moji醬既菜式，最後決定叫馬拉蜆，下次先試青口!  d  馬拉蜆隻隻都好肥美又無沙，而Moji醬又唔會蓋過馬拉蜆既鮮甜，好快清曬！Red Prawn Paella (Today Special) 西班牙紅蝦飯 (是日推介) $248第一次幫襯時已經食過西班牙海鮮飯，回味無窮，係覺得比起某d酒店餐廳更好食，之後再黎想encore，但見到Today Speical 有Red Prawn Paella，要知道西班牙紅蝦係蝦中極品，就試試佢！隻蝦蝦味真係好濃郁，蝦羔勁香甜，燴飯仍然都係咁好食，飯粒係吸曬濃湯，收水收得剛剛好~第一次食 Seafood Paella 西班牙海鮮飯 既相 for reference  ~Churros 西班牙油炸鬼 $68Churros 係西班牙傳統甜點，好鍾意呢度既Churros沾滿砂糖得黎仲有肉桂既味道，加上 Churros 外脆內軟，會不自覺就食下一條食下又一條， 而Churros 大多配朱古力醬，呢度除左朱古力醬仲有Vanilla雪糕，可能已經有砂糖，再點朱古力醬會覺得甜左d，反而點Vanilla雪糕都覺得好夾喎~~記得留肚食呀!…Read More

我自問唔抗拒拉麵, 但又未至於非常熱衷, 往往寧願留番QUOTA響日本先食。而身邊既友人係拉麵愛好者, 香港亦愈開愈多過江龍拉麵店,  如有好介紹友人都會推薦我一試。公司響灣仔,而灣仔近年亦越開越多拉麵小店, 之前試過兩間都OK啦,今次呢間堅正, 大半年無寫食評都要寫一寫 –別天神! OT完氣羅氣喘到左別天神, 店仔細細只有BAR檯般既位, 感覺有少少似屋台 (日本街頭車仔拉麵檔)。拉麵有兩款 – 別天神豚骨 & 蝦味噌豚骨, 完全方便選擇困難症, 有單點亦有套餐, 套餐跟小食 – 餃子或小龍蝦蟹籽沙律, 而我的選擇係別天神豚骨套餐+餃子 HK$ 105。拉麵上檯~~友人急不及待叫我 ”飲湯先! 飲湯先!”, 得得得, 我飲湯先…以!! 真係好正, 唔太杰唔太濃, 岩岩好, 飲完一啖會忍唔住再飲, 我飲左好幾啖先開始食麵呢! 麵質軟硬剛好, 不是太粗, 個人鍾意幼身D, 連湯食仲好! 至於半熟蛋同叉燒係正常水準, 叉燒唔會’UN’, 而蛋可以再半生一點。至於餃子就輪為配角, 味道是一貫日式餃子~另一個要推就係有濃味食法,可加入店舖準備好的芽菜及蒜蓉, 我不是芽菜人只加了蒜蓉, 其實叫蒜泥更貼切, 的確加左更香濃,又另一種味道! 如剩飲湯就覺得唔加都可以, 連埋拉麵一齊再加蒜就更香濃, 味道層次豐富呢! 總括黎講, 湯底完勝! 我通常食拉麵都未必可以成碗湯飲曬 (太飽), 但今次見底!! 鍾意佢唔太濃剛剛好, 好怕太濃食到好口渴, 鍾意濃郁既人亦唔會失望, 因為可以加”料”添味, 呢間一定會再幫襯!!…Read More

都一段時間無寫食評喇，相就儲左一大堆，就係的唔起心肝寫～～我會加把勁 (希望)！尋日去左長沙灣同友人食飯，可惜ＯＴ到八點半，因上星期出差食了１０日西餐，想食番亞洲野～友人說元州商場開了間新的韓國菜，見有位就衝入去，本身沒太大期望，沒想到有驚喜！一入去就有真既ＯＰＰＡ同你講An-nyeong-ha-se-yo！當然餐廳是播放ＫＰＯＰ啦～餐廳都唔細，還有一個自成一角既ａｒｅａ俾多人既客人！另外裝潢一Ｄ都唔馬虎！裝飾擺設既都係７，８０年代既感覺，幾全面幾有心ｗｏ！之後ＯＰＰＡ就會俾四小碟你～我唔太好韓式醃物，但友人話幾好架，的確食食下全清！除了四小碟，少不了韓國常用的銀器餐具，還有水及韓式醬汁～ＭＥＮＵ有齊中英韓，還有畫出來既圖片，有推介及辣度描述～起初以為只主打年青點既韓食，但亦有傳統石頭飯水冷麵等，連唔係太多韓國餐廳會有既醬油蟹都有！每款旁邊有ｎｏ.，方便同ＯＰＰＡ落單，當然同場都有操廣東話的店員～我點了海鮮豆腐辣湯泡飯＄７２，一碗白飯是分開上的～唔好以為平平無奇咁，我成煲食曬！湯入面有魷魚仔，青口，蜆，蠔仔，豆腐，金菇，瓜粒，已打落去既蛋，雖不是什麼靚海鮮，但湯都幾鮮甜，豆腐又滑，絕不欺場～其實比想像中辣，但連飯食就岩岩好呢！友人見我就咁叫個湯，就叫個部隊辛辣拉麵蛋邊鍋可以share食，肉可選擇牛，雞或豬，我地揀左牛，之後OPPA 俾左個gas爐我地先，再等個鍋上檯。嘩，原來都幾大個！如圖中，中間就係煮過既牛肉+洋蔥+菜，仲有部隊鍋應有既韓式魚片、年糕、芝士腸、芝士+辣醬+麵，底部仲有蛋、南瓜、金菇同紅蘿蔔絲。邊邊有芝士，芽菜，牛油粟米及爐邊蛋。滾之後就開動喇！個麵好入味但要盡快食，如果唔係再滾就會林，辣味足，其他配料都好入味～近乎響韓國食既味道！牛油粟米等佢溶溶地後超好味，又香又甜！而其他爐邊料就不過不失啦！兩個人食到超飽，每人$110，仲要無加一。我諗我會再幫襯～…Read More

是日老了，大生日過大海！當然少不了我很期待的生日飯。在澳門中，Don Alfonso 是其中一家我很喜歡的餐廳。雖不是第一次到來，仍然很欣賞這裡的裝潢，還有美美的水晶燈：），每一檯不會很近，確保各客人都有充足的空間！這裡的Set Lunch有不同的courses, 2 courses with dessert MOP 330 / 3 courses with dessert MOP 430 / Full Menu MOP 530。完全照顧到細食及大食的你，而且以這價格享受到如此上承的佳餚及服務，絕對值得！店員首先端上熱烘烘的自家製麵包籃，還有牛油，橄欖油及意大利黑醋，麵包是不同材料所焗制，我比較偏好軟身的，提提大家要襯熱食喔！還有要試試這裡的意大利黑醋，特別香！ 吃麵包的同時，店員端上Welcome小吃，是煙三文魚，少少香草及紅花，檸檬汁。我本身不太喜歡煙三文魚，總覺得有少少半生不熟的怪味，但香草及檸檬汁完全中和了那種怪味，食落很surprise的好味，很fresh的感覺。 因為麵包既關係，已經不是太餓，所以只是叫了 2 courses with dessert - Appetizer and main course. Appetizer 有4款選擇，我當然揀了我鍾愛的帶子，但說實話見到"芹菜蓉"時有少少卻步，不過我相信主廚，照叫！ 當然沒有令我失望，presentation已經很賞心悅目，上檯時好香，相機食完到我食喇！帶子煎得剛好，外脆內軟，伴著芹菜蓉及配菜非常配，不但沒有那種草青味，而且更能襯托出帶子的鮮及香。 Middle course有5款選擇, 我沒有叫，不過都給大家看看，參加一下吧！但Menu是會不定期更改的呀！然後到main course喇，同樣有5款選擇，喜歡羊的我當然不會放過這機會！多好看！視覺享受完，急不及待到味覺享受喇。羊架是超粉嫩，離骨，不羶。茄子蓉帶有鄰少少菇味，而且很欣賞以蓉代汁，更易蘸真正品嚐到個配搭。小蕃茄入面釀了少少蓉的物體，平時我不會吃小蕃茄的（我的確有點偏食），本已遞給友人食，友人吃完一粒後，說我一定要試下才行，好吧！一試，超香的芝士及橄欖，又有少少蒜似的，連配菜都做得那麼細緻，很讚甜品有6款，之前試過Tiramisu是超班的，喜歡的你就一定要試，因為之前食過，今次叫其他試試^_^。我點的是杏仁慕絲配玫瑰雪葩，因為友人訂位時已知會餐廳，所以有birthday version呢！杏仁慕絲比預期中硬身，不算很重杏仁味，剛好但未算好出眾，反而那玫瑰雪葩是超好味，好香！就算那生日牌都是可以食，是很薄的餅邊邊輕輕烘過，好靚。最驚喜是竟然有幸遇到Mr & Mrs Alfonso, 好nice，逐檯打招呼及問對食物的意見，又祝我happy birthday, 還合照留念。 餐廳的中間有張檯放有不同的朱古力，配上餐後咖啡或茶，輕鬆作結。 總覺得主廚是個魔術師，可以將我不吃的食材做到易接受而家不會抗拒，每每都會有驚喜，一定會再來！當然還要多謝友人的安排啦。…Read More

唉...最近超忙, 忙到令小學同學聚會一延期再延期到今日, 同學仔話聽同事講荃灣開了間新的打邊爐店想去試試, 叫滾兩滾~就去試吧! 店舖位於曹公坊, um, where is it? 同學仔就叫我響荃灣廣場等, 再向福來邨方向行, 無耐就到! 而且滾兩滾在那條街中是最光猛的, 一看就看到了! 一入去見到個大魚缸呢, 感覺海鮮挺不錯!入到去同門面一樣光猛, 原來有兩層, 店員帶我們上2樓, 裝修有別於一般酒樓式的火鍋店, 以淺色為主調, 光猛, 有少少日式感覺。另發現檯都算大張, 幾好...是關好怕放完食物張檯會好迫!再看看碗碟及那墊紙, 是我愛的櫻花呀!之後店員就遞上menu, 款式都不少, 要慢慢揀! 湯底都幾多選擇, 竟然有人參雞湯, 龍蝦湯, 清酒大蜆, 杏汁菜膽豬肺等等...又幾別出心裁啵!畫完menu之後, 就混自己心水醬料喇, 醬料盤有生熟蒜, 蔥, 莞茜, 辣椒粒等等...等一陣就上湯底喇, 我們最後一致決定要很多功夫才做到的杏汁菜膽豬肺湯底 HK$108, 店員還很有信心的說是推介而且沒味精的! 一上檯, 都幾大鍋!!無幾可可以飲杏汁豬肺湯, 先飲湯, 杏汁味剛好, 白菜都吸了湯味, 而且好稔好好味! 平時的我就算飲杏汁豬肺湯都不算食得多豬肺, 就算整得幾乾淨都好, 總覺得會有陣味, 不過同學仔食完話ok呀, 即管試試...又接受到啵! 而且一鍋入面都有幾多菜同豬肺, 超足料, 每人都至少飲兩碗才開始打邊爐呢!邊飲湯我想食的椒鹽鮮魷 HK$68出場了...在看menu時...有一欄小食, 竟然有椒鹽鮮魷, 多數火鍋店都不一定有小食的呢, 好surprise...剛巧突然又好想食香口野, 就鬼祟地畫了"1", 哈哈! 初初以為小食, 份量不會有很多, 一來到就好似平時大排檔小炒那麼多呢! 亦無諗過火鍋店可以做到夠火喉的椒鹽鮮魷, 外脆內軟, 椒鹽味夠, 鮮魷剛好不會很難咬! 但記得襯熱食!火鍋料陸續出場喇! 手打墨魚滑 HK$58, 墨魚滑是我打邊爐必食的, 這裡的墨魚滑就算碌得耐都還是很彈牙呢!帶子片 HK$48, 平時坊間食的是雪到好硬, 上檯時都仲會有少少霜, 但這裡的不但沒有霜而且size都幾大, 酌一酌就食得, 鮮甜好味!看menu時看到有兩款餃是外面很少見甚至未見過 - 黑松露餃及黑麵豉蟹皇餃, 各自都是HK$78一客, 但其中一個同學仔想試黑松露餃, 蟹精的我當然想試黑麵豉蟹皇餃, 叫曬兩款又太多...店員聽到我們決定不了, 超好人的可以給我們雙併呢! 店員說這兩款餃是自創的呢, 先說黑松露餃, 總覺得黑松露是出現於西餐, 但放入餃入面又幾得意幾香, 不過個人認為亦不及黑麵豉蟹皇餃, 一咬開確實有蟹皇香, 跟肉餡更配, 下次再來我會叫一整客黑麵豉蟹皇餃 (笑)。近年打邊爐又點少得即炸響鈴 HK$38, 這裡是即叫即炸的, 上檯時還是暖暖的, 即食又得, 放湯又得~即食就食到酥脆, 不過我鍾意放湯食, 會有味道一點!突然...有原條黑立刺身上檯, 還以為上錯, 原來不止我一個會鬼祟order自己鍾意的東東。我初初以為好貴, 是關外面即劏都差不多要200蚊吧! 同學仔就是偷偷問過只是HK$128 就二話不說order了! 上檯時個魚頭同魚眼還是會微微郁呢...雖然有些恐怖, 但這是新鮮的表現! 刺身好鮮味, 口感是爽爽的, 不腥! 不知不覺會一片又一片放入口! 而且魚骨還可以放落湯底, 更加鮮甜! 其實是可以叫店員拎回廚房切件才放湯, 不過我怕切完有碎骨, 同學們就整條骨放湯, 多豪氣!因為有人不吃牛, 所以就叫了豬肉青 HK$48, 都OK爽口, 合格!唐生菜 HK$32...早知湯底入面有那麼多菜就不叫啦! 可是已經好飽, 盡力的吃了一半~so far 都好滿意, 店面乾淨, 食材新鮮, 份量足, 店員又勤快, 沒想過這位置會有那麼有質素的火鍋店~大家都覺得是可以再encore!…Read More

醬油蟹 - 每次去韓國都無緣吃到, 但身邊的朋友卻說 “你咁鍾意食蟹, 醬油蟹係必試架!” Um…不過近年都是去日本多, 暫時未有計劃去韓國呢…雖則近年韓流無間斷襲港, 但仍然未見到醬油蟹出現, 直至上年終於見影喇! 還未算很多地方有, 無意中見到這間炑八又有醬油蟹又有韓燒, 試試打去訂檯喇, 不過電話都幾難打, 打幾次先通同有人聽呢! 店員電話問是否團購, “唔係呀, 不過想留定一客醬油蟹, 唔該!” 隨即亦上網八卦一下團購的套餐, 原來是韓燒套餐, 不過團購已經結束, 不打緊啦!7點準時到達, 店員說要安排座位叫我們等等, 等的時候, 突然有個都是客人的女仔問我及友人是否兩個人, 原來她們買了2人及4人團購, 但臨時有兩個朋友甩底, 又已經訂了檯, 問我們介不介意用了它, 免得浪費。如店員說無問題, 我當然無問題啦! 最後是OK的! 安排座位後, 店員遞上團購專用的menu, 店員叫我們揀要什麼, order完店員極快速收了menu, 都趕不及影相, 上網找回二人晚市韓烤套餐, 6揀2的烤肉中, 我們揀選了牛肋骨肉及五花腩肉, 及韓式炒年糕。另提醒店員我們之前已留的醬油蟹, 團購二人晚市韓烤套餐及醬油蟹套餐各HK$198, 加一。Order後才有時間看清楚店內環境, 都是蠻韓式的設計, 檯面都算夠位, 檯與檯之間亦不算太窄, 空間感OK! 櫈子可以打開坐墊放入自己的隨身物品, 不過如果有靠背就更好吧! 每檯的烤爐上方都有伸縮吊掛式抽氣管, 吃完衣服都不會沾有油煙味啦!介紹一下檯面上的東東, 當然有韓式銀餐具及韓烤醬料, 分別有豉油, 韓辣醬及鹽。最左手邊還有兩小舊肥膏開爐用以代替油, 既天然又不浪費! 當然少不了韓國料理必有的前菜, 可是我不太好醃漬物, 好在友人鍾意食, 前菜有泡菜, 洋蔥, 茄子, 白蘿蔔及芽菜, 友人說除了茄子沒什麼味道外, 其他都好味, 提一提友人是可以refill的, 即是喜上眉梢, 哈!另一邊已放有生菜籃, 除了生菜, 還有少許生蒜, 青椒及青瓜, 都是烤肉的佐料, 而且都是可以refill的。跟餐飲品方面叫了忌廉溝鮮奶, 另外友人叫了一杯Asahi HK$38, 當然還有水提供。工具上每張檯都有夾子及鉸剪方便烤肉時用~之後店員拿了一個茶壺過來, 原來是蛋漿, 分別有純蛋漿及加入泡菜兩款, 如不是團購的還會有芝士呢! 今次亦都是我第一次試爐邊蛋, 這概念是用烤肉時的熱力拎蛋熟透, 當然熟的速度及程度是跟火力大小有關, 我們不是開到最大火烤肉, 爐邊蛋差不多到尾聲就食得, 食落似蒸蛋, 都幾滑, 不過沒什麼蛋味, 不過不失。好快就上牛肋骨肉及五花腩肉, 不知是否團購關係份量不算太多。先說牛肋骨肉, 是醃了的, 切得剛好一啖一舊, 甜甜地, 點少少鹽更可以令牛味更出, 肉質都幾稔, 不錯。至於五花腩肉, 上檯時仍然雪得有點硬...跟韓國本土一樣沒有醃的, 就是要食天然的肉味, 但無論肉味及SIZE都不及本土, 厚些會比較好, 不過用生菜等佐料包起來吃, 還是合格的。韓式炒年糕對港人來說都不是新鮮事喇吧, 味道比坊間的辣了些, 味道尚可!壓軸出場的是我最期待的,生醃醬油蟹, 跟餐有飯及湯, 因為烤肉套餐已有兩個飯就叫店員少給一個飯以免浪費吧! 醬油蟹比想像中細, 但蟹膏都OK多而很鮮味, 不過不喜歡的人可能會覺得腥, 之前食過蟹刺身都會知道蟹刺身的肉質會比較稔, 經醬油醃後味道仍然鮮, 很不錯, 又不會說過咸。而飯的確是醬油蟹的好朋友, 因醬油及蟹膏都是濃味, 飯起了中和作用, 不太吃飯的我都吃了半碗呢!起初覺得不太夠, 誰不知吃完超飽, 滿足的一餐。如果不是因為有團購, 相信平均每人都要300蚊以上, 算是偏貴少少。而店員都好快手, 有求必應, 不知是否太忙, 大多說話沒有語調及表情…另外, 如果有人生日切蛋糕, 場內還會播韓版生日歌呢!…Read More

連日來病病地，無胃口，連友人約食飯都不想出去......友人見狀問想食什麼，口淡淡下突然超想食瀨尿蝦或濃味的東東，所以友人就提議到增輝，因為未試過，好奇心驅使下引領出關喇！去到見兩邊都有舖，是但入一邊，8點幾不用等都有位。友人都有一段時間無幫襯，但就記得胡椒豬肚花甲湯是招牌之一，HK$148。的確足料又夠味，驅寒一流！花甲都幾多而且不會很老！不過飲飲下愈來愈辣，相信小朋友或不嗜辣的人會受不了，飲到最後特地拍下這圖，很多多多胡椒，但這木桶存熱很好，食到尾湯仍然是暖的。為食菜而叫的金銀蛋浸時菜 HK$78，選了白菜仔，沒有慣常叫的蜆菜那麼稔，菜很爽脆，沒有草青味，又吸了湯的味道，且有雞蛋皮蛋咸蛋，蛋白很滑，連肉碎及湯飲鮮甜好味，很不錯。之後來一個豆腐火腩煲 HK$88，老實說，平日我不會叫這道菜，總覺得火腩(燒腩)應該是脆口乾吃的，煮稔了而且有汁不是很怪嗎？今天起我的觀念要改改，因為這得確很好味，火腩都是五層肉，一層肥一層瘦，好正！豆腐是炸過的，不油膩亦不易散開，配料還有少許冬菇及白菜，那個獻汁才是這道菜的精髓，說不出是什麼味道，總之跟煲份3面的材料就是很配。紅燒乳鴿 HK$78，雖則是大隻，但價錢比坊間貴，炸得都幾脆，炸完食落還有滷汁味，肉質都仲幾嫩，不過不失。最後就是我來的原因，但差點沒有點呢！因海鮮是時價，沒有例牌，餐牌沒有價錢，一問之下14蚊両，而且這裏的瀨尿蝦都是大大隻，平均一隻7~8両，即是2百幾蚊一隻，比想像中要貴呢！本來諗住算吧…不叫了，友人就說一場來到，叫吧！忐忑一番之下還是叫了，本想叫一隻就算，又怕好肉酸，兩隻吧！的確沒有讓我失望，面頭的脆脆已經好好味，忍不住用匙羹勺來吃。因瀨尿蝦大隻，上菜時已破開了三節，及備有鉸剪方便剪開蝦殼。這是中間那一節，比匙羹還要大，更因為是新鮮即叫即整，蝦肉超彈牙呢！更誇張的是連蝦頭都有好多肉，啖啖肉大滿足！總括而言，食物質素都是好的，只是價格上感覺似酒樓多於大排檔，而且發現都幾多明星幫襯過，不過友人話每次來的水準會有點參差，相信我下次再想食瀨尿蝦都會想起增輝，希望再幫襯時keep到品質啦！…Read More

今晚得我同媽咪撐檯腳，平時好少主意的媽咪竟然話想食海南雞，難得有要求，做女當然要滿足一下！即刻openrice一下，搵到兩三間，最後選擇了孖寶！因媽咪先要返兼職，我就先到店舖搵位，可能時間尚早未算很多人，孖寶格局屬於平民路線，廚窗掛住很多雞呢！店內約有６張４人檯，所以如少過４人大多數要搭檯或被搭檯呢～坐底後看看除了海南雞還有什麼主食，看起來都是套餐為主，雖則選擇不算多，只有海南雞，口水雞，魚香肉餅，咖哩雞/豬扒，梅菜肉餅等，不過夠專就可以更專注質素呢！未點菜時店員已遞上雞湯，看來是人人都有！未有細心研究下就先見到圖１中的二人餐 HK$138，二話不說就已經叫了！有半隻海南雞，魚香煎肉餅，油菜，２碗湯，２碗油飯。除了湯，很快就上了飯及醬料，有豉油，酸甜醬及薑蔥蓉～一看２碗飯就覺得，大獲了...好似太多呀!! 再看多次牆上的客飯, $38-42左右, 再看看其他食客...就知道今餐一定"有餘"...夠曬應節! 每碗湯都有雞腳, 還落了紅蘿蔔幾清甜! 至於油飯, 都幾香但顏色不算很均勻, 軟硬度有少少參差, 不知是否將不同次數煮的混合~再上半隻海南雞...無骨的! 雞味不算很重, 但都幾滑又不肥, 這價錢來說很不錯喇!菜是生菜, 正正常常啦, 不過媽咪話蠔油幾好味=,=反而這魚香煎肉餅有驚喜, 煎得香而不油, 有少少咸魚香, 薄薄地送飯一流!聽日不用煩LUNCH要食什麼了! BTW, 外賣盒加1蚊! 下次會冷靜些叫客飯就夠了!…Read More

是日又同好友去中環按腳仔, 按一按舒筋活絡, 鬆完當然要醫醫肚, 好友帶我去這間座落老蘭的泰國菜, 行去的時候都有少少隱蔽, 餐廳有分室外及室內, 室外的多是HAPPY HOUR叫小食佐酒, 室內的就好似我們食泰菜, 因大多少人都要食煙, 坐室內的人不算多, 看! 好似有少少包場feel~因外面的檯都很多, 店員都集中在外, 我們點菜時都要舉一陣手才有回應, 幸在店員都是有禮的, 叫完就很快亦遞上餐具& menu!Menu上是中英對照, 推介的就會有圖片! 最款菜式都有自己的no., 如遇上外籍店員又不諳英語說no.都ok!先來的泰式醃生蝦 HK$100, 雖然蝦不算大隻, 但有12隻都算多喇! 肉質還好, 但未有彈牙感, 醬汁酸酸辣辣不算特別突出, 不過不失, 但算是抵食吧!之後就是泰式燒豬頸肉 HK$75, 一整塊豬頸肉燒完再切片, 都有十幾片, 略嫌乾了些少, 還好保留些少油份, 豬頸肉本身不算醃得很重味, 是關豬頸肉是有醬汁配上, 這醬汁是偏濃的, 都算有效地吊出豬頸肉的肉味, 還好!因為想食芒果糯米飯的關係, 就不叫炒飯叫個炒河 - 濕炒河粉 (豬) HK$80, 汁跟配料都多, 有西蘭花, 椰菜花, 紅蘿蔔, 豬肉片, 菇, 總算為這餐添些蔬菜, 反而河粉不算多, 獻汁不會好咸, 河粉不多全部都會占到獻汁, 食完濃味再食這河粉balance一下, so far 都算不錯!最後就是飽肚甜品 - 香芒椰汁糯米飯 HK$45, 大概有一個芒果, 雖不酸但亦不夠甜, 糯米質地反而不錯, 軟硬度剛好, 反而椰汁不太夠, 味道偏淡口...下次未必再叫...老實說服務及食物是不錯的, 但又未至於好好食, 不過都值得再來encore!…Read More

每年十月都會特別忙, 因為很多好友都是十月生日的...少不了飯局及蛋糕~之前有同事買過Sift的cupcake作散水餅, 雖然甜了些少但都算不錯, 上網睇睇都有Pastries, 所以收工後就去買兩件for友人生日! 包裝是簡單的小盒子再加上品牌貼紙, 我問店員有沒有蠟燭, 有!買了chocolate cake及lemon tart, 未食已經覺得這店很注重外型, 很美觀! (不好意思, 我拎的時候有點粗魯, 下塌了...) 當然...味道才是王道!首先是SIFT的Signature - Sift chocolate cake HK$ 45.00...這款cake內有praliné crunch, Valrhona 40%, Guanaja 70% crémeux, chocolate fudge cake。平時最怕甜到蛀牙的朱古力CAKE, 不過店員說這是他們的招牌, 不會很甜, 的確朱古力味很濃, 但不會覺得很"漏", 亦很喜歡朱古力脆脆, 不會很難叉開, 脆脆混合蛋糕的感覺好得很, 食完好想食下一啖呢!另一款就是 Lemon Meringue Tart HK$ 43.00, 檸檬撻周圍都有, 看似簡單但原來都要用很多材料, 有Pâte brisée, almond cream, aerial lemon lime curd & zest topped with torched Italian meringue and covered with French meringue petals. 至於味道, 一句到尾好似兒時食的 x頓檸檬夾心餅味, 雖說清新, 但普普通通...圍邊的餅過硬...兩款cake雖是南轅北轍, 好在Sift chocolate cake拉回不少分, 仍然是。總括來說Pastries比cupcake優秀, 有機會再買其他款試試先!…Read More

最近有很多不同的話題(是非 )都不能暢所欲言, 唯有小圈子一下, 三五知己吹吹水。本來想去只有韓燒的店舖, 點知問了好幾間都是有時限, 90分鐘...當然不夠我們盡訴...之後朋友記起這間韓國料理, 原來好幾年前還未轉名前是我帶過她們來的, 連我自己都差點忘記了, 因為這裡不是只吃韓燒, 還有其他料理, 所以沒有時限, 又好坐, 完全滿足我們的要求! 預先訂了檯, 店員安排了梳化卡位給我們, 挺舒適的!檯上都已經放好韓FEEL餐具, 店員亦很快就已經斟茶。餐牌都是圖文並茂, 而且有中英日韓, 好清楚! 而且每款都有no., 因這裡的店員有些是韓國人, "寵寵寵"之下講no.就一定不會出錯啦!等食的時候, 貫徹韓國料理作風少不了8小碟, 但見到別人有銀魚仔就問問店員, 就即刻再給我們, 如有些想再refill, 店員亦好落意安排~ 試了幾款的我都覺得不錯, 就是傳統的味道吧!先上泡菜煎餅 HK$100 , 好似pizza一開八份, 薄薄軟軟的, 食落口感似pancake, 有泡菜香而不辣, 不嘗辣的朋友都食到, 亦不會有泡菜的酸味, 邊邊有少少脆更添香口, 味道比想像中的好!少不了我喜歡的炒年糕 - 辣海鮮炒年糕 HK$150, 跟韓國街頭不同的是這用了海鮮的高級版, 有原隻蝦, 魷魚, 蜆等等, 食落不似雪藏, 亦煮得剛好沒有過火! 年糕當然更加沒有問題, 很正宗的, 反而辣汁比想像中辣, 好食到連食幾舊後都要飲啖茶, 當然絕不是很刺激的那種, 如不嗜辣, 另有一款不辣的宮廷炒年糕以供選擇。不嗜辣的朋友就因為吃不到辣海鮮炒年糕, 就叫了個拌雜菜粉絲 HK$100, 老實說好食是好食, 亦不會炒得很油, 只不過很多韓國料理都做到, 沒有過人之處, 用料都是雜菜切絲, 索價$100未免太高吧!吃到中段開始多人, 甚至外面很多人等位, 才發現原來很多韓國人幫襯, 店員跟客人都是在"寵寵寵", 感覺上全場說韓語的比廣東話還要多, 不過連韓國人都來幫襯應該算正宗才會來吧! 隨著全店滿座, 店員們都忙碌著, 想叫人加茶都有少少困難, 才發現...原來有個鐘按完可以叫人來~哈!烤什錦拼盤 (牛, 豬, 雞) HK$300, 份量都ok, 醃的口味近似香港式的醃肉, 爐都易控制, 網是比較疏那款, 所以不用落油因為落了都無用, 如果只是肉的話覺得只是不過不失...好在~有得另加佐料 HK$60, 成事件韓式了幾倍! 有生菜, 香葉, 蒜頭等...最像樣的就是醬料, 跟在韓國食烤肉時點的一樣, 很有回憶, 好好味!這樣食才夠風味吧! 所以如果會叫烤肉的話, 叫佐料很重要呢!最後有送的甜品, 是凍的柚子蜜, 好清新, 很適合食完濃味佳餚, 清清口腔!…Read More

食完炸雞見到這家新開的台灣料理, 打正士林旗號, 整個counter都有自家設計, 都幾可愛!看一看menu, 以套餐為主打, 不過於這food count來說索價算高呢! 怪不得不算人幫襯, 最後點了A餐HK$56 - 有蚵仔麵線, 甘梅地瓜及蜂蜜檸檬飲料, 這價SHARE 就OK, 要是只有自己一個就不必幫襯了!蚵仔麵線看來跟在台灣吃的有點不同, 還有我覺得叫雞絲麵線好似比較貼切, 蚵仔即蠔仔, 只有幾隻而且幾腥, 麻麻地, 麵線還可以, 只是湯底的味道不是我的口味...反而這甘梅地瓜條好好食, 炸而不油膩, 切到好似薯條, 份量而不少, 那粉味道很香口, 一食就停不了, 看來我再幫襯只會買地瓜條就算了!最後蜂蜜檸檬比港式的檸蜜清甜, 食完炸物清清口腔餐可以!…Read More

是日去睇行李箱，見餓就上FOOD COURT睇睇有什麼好吃的! 看到由韓國人主理的韓式炸雞, 我不是星星的粉絲, 所以其實對劇中的炸雞沒有什麼了解, 不過見相中賣相不錯就試試看吧! 有3個味道 - 韓辣, 醬油, 甜辣, 分別有3個SIZE, 大中小~S - HK$28, M - HK$33, L - HK$65。 一落完ORDER就即刻翻熱及伴醬~有小叉提供~第一次試, 試韓辣味先, 跟友人SHARE叫了M SIZE! 除了炸雞, 面頭還有幾舊韓式年糕, 不過有少少乾身~至於"炸雞", 做法有少少似咕嚕肉, 炸完再加醬汁, 所以食落不是很"炸", 醬汁就是傳統韓式醬般濃烈辣辣的, 又未算超辣幾香口好食, 只是覺得未夠香脆!最緊要入面的雞肉不是很乾, 都算是bite-sized, 一兩啖一舊, 可以再encore!…Read More