ReneeKan's Profile

中午諗唔到食咩，行過見到招牌就入咗去試！去到叫咗個「慢煮雞肉雞白湯拉麵」，由於窮又孤寒所以無加$20轉餐，就咁單叫咗碗拉麵！落完單之後勁快3分鐘就有得食碗麵一上枱，感覺略為空虛。首先餐牌張相入面嘅木耳絲完全消失咗！雖然我明白圖片只供參考，但個樣都差幾遠！然後到我最期待嘅溏心蛋，一咬，勁失望！從未試過係拉麵舖食到 九成熟嘅溏心蛋！隻蛋係成碗麵嘅靈魂！唔講麵質同湯底，淨係咁嘅溏心蛋已經令碗麵唔合格！其次佢嘅湯底又淡又唔似雞湯。唔講我仲以為係磨菇湯！感覺勁似係罐頭湯加水咁，食完勁口渴！結論就係：錢多又想環境清靜嘅可以入去試，唔係可以慳返！…Read More

星期六都要返公司OT，就諗住買個靚早餐安慰下自己原本想試下隔離舖嘅蛋餅，點知經過見到佢終於都開返，於是即刻轉軚買佢嘅三文治！之前已經食過佢嘅三文治好幾次，除咗芝腿滑蛋未試過之外，其他味都食過晒，但我最鍾意都係咖哩牛肉同鹹牛肉口味！今次叫咗鹹牛肉滑蛋三文治，加$6要咗杯細港式咖啡。大概十一點半去到，落完單等咗大概五分鐘就有。行到返公司，份三文治仲係暖暖地，味道亦都一如以往咁好食，份量亦都一樣咁大份！至於杯港式咖啡就正正常常。下次再食，我會加$9要杯大嘅，感覺上抵啲…Read More

之前一直想食流水蝦放題，終於今日去粉嶺行完山就揸車過來食！早一日經openrice book咗5：30，可以食2個半鐘到8點！由於食5：30時間尚早，餐廳比較少人，所以安排我地坐室內離自助區比較近嘅位置，而流水蝦缸就係座位隔離，可以坐係自己位夾蝦，唔使行出去，十分方便！一坐低已經送上一盤海鮮拼盤及一條烏頭魚。所有海鮮都好鮮甜好好食，連出面自己攞嘅燒烤肉類都好好食！至於主角泰國大頭蝦亦都十分新鮮，肉質爽脆，每隻蝦頭都有膏。甜品方面只有雪糕，但味道有好多選擇，包括港式奶茶、玄米茶、榴槤、焦糖、沖繩海鹽及其它基本味道！所有食物都好食好滿意，而且就算夠鐘都唔會有人埋嚟趕你走。可惜都有些少不足之處，位置比較偏僻，要揸車入黎，不過有免費泊車，而且服務方面可以再殷勤少少，基本上無咩人服侍，連係爐邊加水都要自己嚟。好彩呢期餐廳有promote免收加一，如果唔係要加一就有少少唔太值嘅感覺😅…Read More

之前食飯經過見到呢間養心麵，又係open rice見到無負評，就諗着揾日嚟試。終於今日平安夜諗着試下啲新嘢，就lunch過咗嚟試呢間台式車仔麵。點知原來係個伏！😞嗌左麻辣湯小辣，關廟麵，豬腸，鴨血，蘿蔔。碗麵一上枱，賣相十分空虛，而麻辣湯唔麻又辣，只係清湯加普通辣椒醬！！！關廟麵一入口似未完全煮熟咁。豬腸還好，唔會勁肥，但唔夠滷水味。鴨血普通，還好唔算特別出色，只有蘿蔔入味好食。碗麵埋單48蚊，無下次！失望的平安夜午餐！下次都係去返隔離食澳門車仔麵算！…Read More

第一次寫劣評就俾咗呢間嘢！之前係尖沙咀食過另一間和牛放題 x蔵，食完覺得幾好有驚喜，所以今次係團購見到呢間同x蔵差唔多，但團購價仲要四百蚊有找，就決定買嚟試試！點知中伏！！環境唔算闊落，都逼逼地，而且啲飲品同甜品櫃擺位有啲奇怪，分散晒嚟擺！食物方面，一開始上咗個刺身拼盤、海鮮及各種肉類拼盤。刺身好食，唔差！海鮮都正正常常無驚喜！但佢啲澳洲和牛真係好差！勁失望！全部都好un！第二輪諗着試多塊和牛，俾多次機會佢地，點知第二輪啲和牛仲差！！！特別係個西冷，得2條似肉碎咁嘅肉條，勁hea我地！同第一輪完全唔同樣！點解會好意思咁都照攞俾客人食！係咪因爲我地係團購，所以俾啲差啲嘅我地？！我地一心過來食和牛，點知除左和牛之外，其他嘢都算正常好食！特別係牛舌！有啲驚喜！但都唔會有下次！！…Read More