jennifercheng的個人專頁

男朋友喺新蒲崗放工，同佢喺Mikiki行咗一陣街之後，就入咗呢間亞金南洋茶室食飯。 餐廳主打星馬菜，有唔少set dinner都幾抵食，不過因為想試吓佢啲招牌菜，所以都係決定單點。 我叫左一個招牌叻沙，男朋友就試咗佢哋檳城炒貴刁，之後再叫咗玻璃魷魚通菜同炸蝦餅share食。 先講個叻沙，湯底好濃、椰漿味重，揀咗中辣都唔算太辦，鍾意食辣但係又怕太辣嘅朋友可以放心。另外麵底都好正宗，用咗米粉溝油麵，再加上配料十足，果然係招牌菜！ 男朋友個炒貴刁我試咗幾啖都覺得好唔錯！超重鑊氣，加咗肉鬆、蝦仁同臘腸，整體幾惹味！ 玻璃魷魚通菜啲魷魚爽口彈牙，再加埋秘製醬汁，好食！ 蝦餅外脆內軟，配左一啲薑蔥喺面，夠晒香口！ 另外同男朋友分別都叫咗一杯嘢飲，青檸梳打同珍多冰，都唔錯！  無諗過行下街隨意都發掘到好食嘅餐廳！買單兩個人都係食咗$250，性價比幾高仲要幾好食，下次想食星馬菜都會揀呢度！…查看更多

今日食呢間楚撚記真係幾時都咁人氣旺盛！一去到已經見到好多人排緊隊， 旺場到book咗位都要等一陣先有得入。夥計好有禮貌，係咁同我哋講唔好意思。  餐牌唔多講，大排檔有嘅嘢呢度都有多無少，仲有好多佢哋嘅招牌菜。今次同男朋友得兩個人，所以淨係叫佢一啲餐牌有推薦嘅：菠蘿拔絲咕嚕肉、避風塘鮮魷、飛天通菜煲、楚撚豬油撈飯同埋阿華田可力沙冰。  第一樣嚟嘅係避風塘鮮魷，見到個賣相都已經有驚喜。好多時出去食大排檔嘅椒鹽鮮魷啲料頭真係少得可憐。。但係今次呢個料頭同魷魚都畀足料，夠晒惹味之餘，魷魚都炸得幾好、外脆內爽口！  飛天通菜煲份量好多，好有鑊氣調味夠足！  菠蘿拔絲咕嚕肉係用咗梅頭，食落去啖啖肉，啱晒唔鍾意有骨嘅朋友。自己最欣賞就係呢度嘅咕嚕肉比較乾身，唔會太多芡汁濕立立，連埋拔絲一齊食口感仲幾特別。  豬油撈飯依家唔係好多地方食到，夥計拎上嚟嘅時候會俾埋香蔥、芫荽、豬油同豉油，我哋可以按自己嘅口味去撈。呢個咁邪惡嘅豬油撈飯，非常香口，真係會令人忍唔住一啖接一啖！  最後呢個阿華田可力沙冰，70幾蚊一大渣，好抵飲！阿華田味較濃，沙冰清爽，啱晒夏天飲。  今次食完都明白點解楚撚記可以keep住大排長龍！環境比起一般大排檔乾淨好多，嘢食質素又高，啱晒啲鍾意食大排檔但又怕污糟嘅人。今次得兩個人唔係食得好多嘢，下次一定會叫埋多啲朋友一齊去，試多幾味佢哋嘅撚手小菜！…查看更多

The Grill Room已經放咗喺我to-go list好一段時間，難得男朋友話想食西餐，即刻私心揀咗呢間試試佢。一上到去就知道人氣爆燈，平日夜晚8點半都全場坐滿，好在本身book咗位所以等咗一陣就入得。餐廳本身有dinner set，入面都包咗5個courses，不過驚份量太多，所以最後都係選擇單點。首先叫咗Parma, Asparagus & Truffle Salad，Parma Ham略帶鹹香，用加上超濃郁黑松露香氣嘅蘆筍同溫泉蛋，一啖入邊有多重享受。 主菜就叫咗嚟The Grill Room必食嘅Angus Rib Eye，事實證明果然係必食，叫咗五成熟煎得啱啱好，肉味香濃，高質！  加咗一個truffle fries，薯條炸得香脆，配埋黑松露，簡直係Perfect match！外男朋友叫咗個Seared Scallop Linguine，帶子煎得啱啱好唔會太老，而龍蝦汁係沾滿每一條意粉，夠晒邪惡！  以銅鑼灣嘅西餐嚟講，The Grill Room嘅質素真係值得一讚，最後埋單每人$400都唔使，性價比都好高！因為太飽嘅關係今次試唔到呢度嘅甜品，下次再嚟一定會預留返個肚試一試。…查看更多

每次朋友叫我推介泰國菜，泰廚都一定榜上有名！其實每隔一段時間就會返去食，今次終於的起心肝寫返篇食評！餐牌唔多講，泰國菜要有嘅都應有盡有。值得一提嘅係，星期一至日，每日都有一款菜式做優惠價，超級抵食！另外如果叫滿$200，仲可以用超抵價$1換一款小食或者甜品，大家記住唔好走寶！今次同男朋友兩個人，叫唔到好多嘢食 ，我哋揀咗肉碎生菜包、黃咖喱海鮮、薄餅、優惠價嘅泰式明爐烏頭、+$1換嘅泰式生蝦、珍多冰同埋青檸梳打。泰式生蝦$1有四隻，真係抵到不得了！配上泰式酸辣汁、蒜片同辣椒，作為前菜真係超級惹味。之後就係肉碎生菜包，唔好睇佢一碗好似好細，其實份量十足，夠包晒咁多塊生菜！  黃咖喱海鮮入邊有魷魚、大蝦、青口等，材料夠多，香濃咖喱汁配上薄餅，真係perfect match!泰式明爐烏頭真係原條連埋火爐一齊上，另外店員仲好貼心仲俾咗碗湯，等唔夠嘅時候可以在加湯。烏頭魚肉嫩滑，湯底用上唔同嘅泰式香料，味道酸酸哋又係開胃之選！   老實講，泰廚真係名副其實又平又好食！之前嚟嘅時候都試過其他嘢食好似串燒、小食拼盤等，全部質素都好好！今次兩個人食咗咁多嘢埋單都係$342，人均$170，真係好抵！之後都會繼續返嚟幫襯！…查看更多

朋友喺觀塘返工， 所以約去觀塘食飯當然要搵地膽推介啦！今次食呢間新匯聚打冷小廚，位於觀塘工廈位置算方便，地鐵站過去都係5分鐘。  叫得打冷小廚，所以餐廳都係主打潮洲小菜。雖然好多都想試，但由於我地得2個人，費事眼闊肚窄所以最後只係叫左一個細既滷水拼盤、金銀蛋娃娃菜、細嘅潮式蠔仔泡飯同一杯西瓜涼粉冰。  滷水拼盤雖然係細既，但份量真係超多超抵食！一碟有齊鹵水鵝，墨魚，豬大腸，紅腸，滷水豆腐同豬頭肉，啱晒選擇困難症人士。  我自己最鍾意就係墨魚，爽口彈牙，食唔停口。朋友就超欣賞佢哋嘅滷水豆腐，因為夠晒入味！  金銀蛋娃娃菜份量十足，上湯香濃，平時唔多食菜嘅朋友都好捧場！  潮式蠔仔泡飯好足料，每一勺都有三四粒蠔仔，量多之餘質素都好，蠔仔肥美得嚟都夠鮮味！配埋芫茜、芹菜、香菇等配料，超好食！輕鬆清晒成碗！  最後嘅西瓜涼粉冰夏天消暑一流，入面仲有好多西米，有咬口啱晒我！  兩個人最後都係食咗$318，扺食、好味、份量又足，遲啲疫情冇咁嚴重可以叫多啲朋友嚟試多幾款菜式。…查看更多

今日收工喺銅鑼灣行咗陣街，男朋友點心癮起，但酒樓晚市冇點心，所以就上open rice揀咗呢間籠太子點心專門店止止癮。餐廳位置係蘭芳道，離希慎廣場幾分鐘路程，都好方便。入到餐廳店員安排我地坐4人枱，空間十分足夠。點心選擇同酒樓差唔多，不過好處係有啲點心可以揀2隻或4隻，啱晒兩個人去可以試多幾款嘢食。 我地最後叫左籠太子蝦餃皇、鮮蝦燒賣皇、海皇芝士千絲卷、名醬蒸鳳爪、紅油抄手、原味鮮蝦腸、雪山叉燒包同辣牛肉大春卷。先嚟嘅係雪山叉燒包，類似菠蘿包嘅外皮帶甜，麵包鬆軟，配上蜜汁叉燒餡，好夾！ 招牌籠太子蝦餃皇同原味鮮蝦腸皮薄餡靚，特別係蝦餃個餡好飽滿，蝦肉爽口彈牙，值得一讚。食點心又點少得燒賣，呢個燒賣皇睇相都見到夠晒大粒，好足料。 名醬蒸鳳爪入晒味！紅油抄手調味唔錯，辣度剛好，平時唔太食得辣嘅男朋友都讚好食。 海皇芝士千絲卷炸得脆卜卜，餡入面有芝士、鮮蝦、芹菜等，芝士仲可以拉絲，鍾意食香口嘢嘅朋友唔可以錯過!最後辣牛肉大春卷係用左植物牛肉，幾有新意。食落一啲都唔似素肉，真係幾可亂真！ 重點係食到捧住個肚，埋單兩個人平均都係$100左右，超抵食！…查看更多

疫情開始穩定，終於放心出返街食好西！今日呢間好燒式平時好爆場，所以趁住放假book定位去試下佢。呢度食物選擇多過其他串燒店好多，除咗一定有嘅串燒肉類、蔬菜同海鮮之外，仲有意粉、小食同廚師推介嘅墨西哥薄餅同乳鴿之類。今次我同男朋友得兩個人，所以主要都係揀返串燒。店家亦都超貼心，填紙落單嘅時候有得揀返辣度同埋想要嘅調味。 每次去食串燒都必叫嘅雞泡魚乾，燒得啱啱好唔會太乾，香味十足。 呢度嘅蒜蓉包真係一啲都唔孤寒！啲蒜蓉係鋪滿包面，包你啖啖都食到，仲要另加跟埋個燒蒜頭，蒜蓉控係不能錯過！ 串燒肉類方面，我哋叫咗（左起）雞軟骨x2、牛脷、安格斯牛肋串同墨魚丸。所有串燒調味十足，燒得香口，值得一提係牛脷同牛肋串燒得嫩口又juicy、牛味香濃！之後到重頭戲海鮮！今次叫咗蒜蓉燒扇貝同蟶子皇，兩款都超高質！ 扇貝睇相都見到好厚肉，而且燒得恰到好處，嫩滑又鮮甜。 而蟶子超級新鮮，爽滑彈牙，都係必試之選！仲有原條燒茄子、韭菜同埋娃娃菜，我哋揀咗孜然粉，所以好惹味！原條茄子超大份！ 最後食到超滿足，埋單每人都係$300，高質又抵食，下次一定會再嚟！…查看更多

話說有朋友之前同我推介過一鍋堂，話食物質素高而且長期排長龍，所以趁住呢排天氣開始涼就決定去試吓。我哋一早book咗枱，九點上到去等左一陣，店員幫我地落咗湯底，就帶咗我哋入座。   湯底方面佢哋比起坊間其他火鍋店多好多選擇，除咗常見嘅蕃茄沙嗲湯底等等，亦有有唔少養生系列，亦有一啲限定湯底。我哋今次叫咗潮汕湯，湯料好足，未打邊爐之前試飲咗幾啖，好清甜。  入座之後，店員教我地用手機scan枱上面嘅QR code落單。食物種類好多，每份嘅份量亦都唔會太大，就算兩個人食都唔怕太多食唔晒。  除咗scan QR code之外,佢都設有一啲自助吧，提供前菜、新鮮蔬菜、醬料、飲品同甜品。 嘢食方面，值得一提嘅係海鮮，我哋叫咗聖子仔、海蝦同帆立貝等等，全部都好新鮮，蝦肉爽口彈牙。  午餐肉、扎肉仲有多款丸類，可惜我哋得兩個人試唔晒。 打邊爐肥牛當然唔少得，呢度嘅肥牛幾重牛味，放題來講算係唔錯。  墨魚滑必叫！細細份，啱晒兩個人食，煮完之後仲係好滑。  同我一樣鍾意食蔥嘅一定要嗌呢個蔥丸，煮熟之後係會爆汁，食落去好香蔥味，好正！  食完之後就明白點解呢間火鍋店會經常排長龍，嘢食質素真係好高，而且價錢合理，人均$200都唔使！強烈建議要嚟食嘅朋友都預先book枱，因為真係好多人排。  …查看更多

今日約咗男朋友食晚餐，佢話想食泰國菜，所以就去咗九龍城搵食。知道九龍城有她多泰國菜選擇，所以問下住係附近既朋友，佢推薦左一間叫泰象館，所以我地就直接向目標出發。晚飯時間既關係，餐廳都幾多人，但待應們都好nice，落單果位姐姐係泰國人，但廣東話講得好流利。 講返野食，佢地有提供2-4人晚市套餐，但因為男朋友想食咖哩，所以最後都選擇左單點。我哋叫咗馬拉盞炒通菜，咖喱雞，三色串燒，蒜蓉包，青檸明爐烏頭，椰青同青檸梳打。  首先值得一讚係上菜速度好快，落單無耐炒通菜就已經到左。 每次食泰國菜都必叫馬拉盞通菜，呢度炒得好有獲氣，少少辣非常開胃。  而串燒可以自由配撘，我地豬，牛，雞三款都有叫。串燒配上沙嗲汁非常嘢味，最好食係雞肉燒得夠香之餘亦唔會太乾，仲有肉汁係入面。  因為我地都唔想食飯既關係，所以叫左蒜蓉包點黎配咖喱雞。蒜蓉包外脆內軟，好香蒜蓉味。黃咖喱好足料入面有雞肉 三色椒 洋蔥同薯仔，咖哩甜甜地唔太辣，食唔到辣既朋友都可以試下。  明爐烏頭，烏頭非常大條，魚肉新鮮肉厚，個汁帶有青檸香味，有少少辣，同烏頭好夾。  最後值得一提係椰青，大大個好甜，入面嘅椰青肉都非常多，好容易起出嚟。 整體黎講，朋友推薦果然唔錯，野食質素高，價錢合理，下次想食泰菜都會再黎。…查看更多

話說之前係觀塘工廠大廈無意中發現到一間日本餐廳，今日趁約左男朋友食lunch專程去試。雖然我地去果陣已經過左午飯時間，不過餐廳都幾爆下，待應安排左我地坐入去店內另一面比較靜。 佢lunch set都有好多款，魚生飯到定食都有，花多眼亂。最後我地叫左一個火炙魚生丼同一個七色丼share。 lunch set全部都包左前菜，茶碗蒸，蜆肉味增湯，甜品同飲品，相當豐富。飲品方面我地升級左做柚子梳打同巨峰提子梳打，味道幾清新唔錯。值得一提係茶碗蒸，好足料之餘仲蒸到好滑，蛋味又濃，好好食。 講返主食，火炙刺身丼有炙燒左口魚、鰻魚，帆立貝同三文魚。刺身帶微微既火炙味，仲有油香，真係好邪惡！  而七色丼有海膽，三文魚，油金魚，帶子，蟹鉗，𩶘魚，大大隻嘅刺身蝦。食材方面非常新鮮，海膽有驚喜，比起坊間其他刺身飯既海膽鮮甜好多！  整體黎講，野食質素好高，份量都啱啱好。午餐來講，呢餐算係十分豐富。…查看更多

今日去太古睇戲，睇完戲之後男朋友建議直接係太古食埋飯，所以就決定睇下附近有咩食。因為想食中菜，係康怡廣場行左個圈見到玉桃軒，記得之前去過銅鑼灣分店飲茶，野食都唔錯，所以就入左去。  星期一至五晚市有好幾款優惠，全部都好抵食，不過要留意每枱淨係可以揀一款。男朋友好想食片皮鴨，所以就直接揀左老京城片皮鴨，加$68仲可以一鴨兩食，不過我地得兩個人怕食唔晒所以今次無叫到。除左片皮鴨，我地仲叫左一個薑葱焗日本珍珠蠔煲。  先講片皮鴨，除左鴨外會跟埋麼麼皮、京葱、青瓜同甜麵醬。一隻鴨上到枱發現原份量真係好大，鴨皮香口重油香，配上青瓜中和油膩感，男朋友食唔停口。第二樣抵讚既係，呢度唔似坊間其他餐廳啲配料經常唔夠包鴨食，佢地配料都俾到好足，食完啲鴨仲有剩。  而薑葱焗日本珍珠蠔煲，份量都好多，有六七隻蠔。蠔夠大隻肥美，吸晒薑葱既香味，好正！ 整體黎講，食物質素唔錯，價錢合理，下次可能會帶屋企長輩黎食。…查看更多

今日收工同朋友去左紅磡搵食，朋友話想食拉麵，之前聽過德民街果邊有幾間日本菜，所以就去睇下。去到見到一間拉麵小店，門口好有日本氣氛，同朋友睇一睇餐牌，覺得唔錯就入左去啦。入到入面地方唔算好大，但好有日本屋台既感覺。  拉麵有三款固定兩款期間限定，我地兩個今次叫左一個黑天王，一個白天王，小食方面就叫左一份烤餃子，一份芝士年糕。拉麵除左口味外，配料同味道都可以因應自已喜好黎揀。 我食果個係黑天王，湯底是係新鮮豬骨湯和黑蒜油混合，黑蒜油味道十分香，條條麵都吸收左黑蒜油既味道，味道偏濃，麵質揀咗適中，所以唔會太硬。  我朋友就食白天王，湯底係用新鮮豬骨淆製十幾個鐘，所以味道十分濃，啖啖都好香。麵底都係因應自己口味揀，所以一定啱自己胃口。  而烤餃子，餃子皮做到好脆口，但一咬開入面係充滿肉汁，所以要小心啲食。  最後芝士年糕，軟糯既年糕入面包住芝士，㕿口又唔會太膩，唔錯。  整體黎講，野食質素高，價錢合理，下次應該會黎試下佢地既期間限定拉麵。…查看更多

今晚約咗男朋友食飯，因為佢話想試吓新野食，我就叫佢上網搵吓想食咩，佢就提議一齊去試吓西班牙菜。為咗就返我係中環放工，所以就揀咗間近近地喺上環嘅La Postre。  食物選擇好多，傳統西班牙小食tapas、主菜、甜品同飲品一應俱全。  今次小食我哋揀咗黑松露薯條同芝士煎蟹餅。黑松露薯條擺盤方面十分有心思，薯條亦都炸得好香脆，而醬汁係用咗黑松露撈蛋黃醬，黑松露味好香同蛋黃醬亦都好夾。  芝士煎蟹餅邊有六隻蟹鉗，撈埋雞蛋、草菇、 薯仔粒、蟹肉等等煎成，蟹餅上加左木魚碎，材料十足，再配埋芝士嘅鹹香，十分好食。  主菜方面我哋叫咗兩人份嘅西班牙海鮮飯，配上青口、蜆、櫻花蝦同大蝦，海鮮嘅份量亦都好足夠。海鮮飯做法都好傳統，用咗茄汁、甜椒粉同青黃紅椒，加上海鮮嘅鮮味，成個飯香而不膩，絕對係必叫之選。  甜品方面，我哋叫咗抹茶麻糬窩夫。窩夫嘅粉漿加咗抹茶粉，再放左煙韌嘅麻薯，食落有兩種口感。配上抹茶雪糕，抹茶蛋糕，紅豆同糖漿，想落咩配料可以自己選擇。  食到咁上下，店員邀請我哋幫佢填一份問卷，填完之後仲送咗一個焦糖布丁俾我哋。  最後我同男朋友名自都叫咗飲品，佢揀咗凍嘅桂花荔枝茶，而我就揀咗熱嘅蜜桃柚子茶。男朋友話佢個杯桂花同荔枝好夾，唔會太甜，好好飲。而我個杯亦都好香桃味，清清地，食飽飲番杯可以解膩。  整體來講，食物質素好高，價錢合理，服務亦都好好，下次想食西班牙菜都一定會返嚟，因為有好多菜式仲未試到！…查看更多

今日同朋友兩個人去左食彩福皇宴，因為見到佢有個龍蝦嘅優惠推廣，一隻都係88蚊，非常吸引。其實佢呢個龍蝦係可以配伊麵或者其他麵底，但因為我地得兩個人，所以就無加配麵底。  我地叫左一隻龍蝦同一個冬瓜盅。龍蝦嘅整法我哋揀咗用芝士焗，芝士味非常濃郁，同時又唔會蓋過左龍蝦嘅鮮味，龍蝦非常厚肉，肉質好爽口，食得岀係十分新鮮。呢個龍蝦性價比真係超高，下次多啲人嚟食，一定會叫多幾隻同埋試佢個伊麵！  至於冬瓜盅，我地兩個都認為係不過不失，不過食完隻龍蝦再食個冬瓜盅，都覺得個冬瓜好清甜。整體而言，彩福皇宴嘅餐廳環境非常舒服，裝修亦都好新好靚，大家都可以趁佢個優惠推廣仲有嘅時候去試吓。…查看更多

話說上次食過養心殿之後一直念念不忘，今次係外國讀書嘅朋友返嚟香港過暑假，所以就帶同我一樣鍾意打邊爐既佢去試下。  因為朋友唔想食辣嘅關係，我哋今次叫咗必嗌嘅美人鍋同未試過嘅酸菜白肉鍋，價錢都係計返較貴嗰個湯底。酸菜白肉鍋同前一次食嘅麻辣鍋一樣，除咗湯底嗰份材料，佢會另外比多一份酸菜白肉你，等你食到咁上下可以再加。 另外要留意，白肉鍋裏面包埋寛條粉，份量都好多，唔好好似我同朋友咁再另外叫多份。  湯底一到，我當然係即刻飲返碗美人鍋先啦。我叫朋友試吓，佢飲完第一啖完全係驚喜嘅表情，之後全晚都keep住係咁飲湯。  配料方面，我哋叫咗手切牛肉。同上一次一樣，雪花分布好平均，好滑、牛肉味好重，都係其中一個必嗌之選。  第二樣必叫嘅就一定係黑松露蝦丸，一如既往黑松露味好濃，蝦丸亦都爽口彈牙。因為朋友鍾意食貢丸，所以都叫咗份，質素都唔錯。  上次食過佢哋嘅響鈴好好食，所以今次都有再叫。呢間分店炸得仲好，脆卜卜，就算淥完都有少少脆好香口。  之後仲叫咗生菜、水耕菜、什菌拼盤同寬條粉。  食完之後，仲送咗兩杯熱情果沙冰，味道都唔錯，酸酸地好清新，啱晒食到好飽嘅我哋。…查看更多