有朋友仔約食飯，所以諗住出街食。因為疫情關係，近來少左同一班朋友一齊衆會，襯住今次機會，一於去個環境好啲，有情調嘅地方。之前有朋友提起過南海一號個環境同食物都好正，大家都住港島區，所以最後我地揀左南海二號。睇返南海一號嘅資料，上到去二號，已經好感受到佢係跟返鄭和下西洋嘅路線去設計餐廳裝修同菜式。今次去南海二號，真係令我大開眼界，除左餐廳設計上用左船嘅甲板設計，有一個夜空走廊真係整得好靚。今次坐左去餐廳另一邊，一邊品嚐美食，一邊睇到晒成個維港景色！講返美食先，其實所有嘅頭盤都好精緻好好味。不過我最鍾意嘅係陳皮話梅萵筍。真係第一次試呢個味道，凍嘅萵筍，又爽又脆，加上少少話梅嘅酸甜同香味，真係好開胃。另一個我都好鍾意嘅頭盤菜式係冰鎮鮑魚。本來都對鮑魚冇咩大期望，通常屋企火鍋鮑魚都硬身。不過一夾，原來鮑魚已經預先切開，一入口，好嫩滑！淋喺上面嘅醬汁帶少少甜、少少辣，好帶到鮑魚嘅鮮味。仲有個川味牛筋凍，啫喱口感一入口即溶。第一啖係少少麻辣嘅香味，之後肉汁嘅香味即刻喺口入面散開; 清香有餘韻。今次其中一個主菜係金榜醬煮大蝦。一上枱已經聞到陣陣椰香同少少咸香！隻蝦真係大概有6吋長，仲有一個炸饅頭。呢個湯真係非常鮮味，啖啖都足料，應該落左好多瑤柱同金華火腿蓉，用嚟點饅頭真係一流！講返隻大蝦，熟得剛剛好，入口爽滑。而且大廚已經開左一半，淨係用刀叉都已經可以食到蝦身嘅肉，感謝廚師嘅細心。雖然偏向重味少少，不過我都舔晒啲醬汁。茴香牛肩胛上枱已經聞到好香嘅香料味。一咬落去，好鬆軟! 有時候會好怕出面街食到一大舊好硬好硬嘅牛。不過今次呢道菜真係好好味！除左鬆軟，完全食到牛嘅肉汁同脂肪味。茴香味剛剛好，唔會蓋住牛肩嘅肉香同脂香！搞到我都忍唔住食多左一兩件。未上呢道招牌茶燻雞，其實已經聞到茶香。個雞皮爽滑甜身帶茶香，我諗鍾意食清淡同濃味嘢嘅朋友都會好鍾意呢道菜，滑滑嘅雞又有濃濃嘅茶香。最後有一個龍蝦湯泡貴妃飯。呢個飯一定要襯熱食，香濃龍蝦味，金黃厚身嘅湯，回味無窮。之後就食到炒米香，軟硬度適中嘅飯粒，米又有蔬菜粒嘅爽脆，真係估唔到湯飯都可以咁有層次感！…Read More
