somanyee's Profile

開張已經幫襯到而家，本身我唔係素食者，但間中會食素，感覺健康啲，尤其夏天唔想食咁多難消化嘅食物，素食都係好好嘅選擇。如果唔太肚餓，我會揀食車仔麵，可以整餸，材料都好健康，湯底都好好味，好多時都飲晒。如果肚餓，我就食佢啲客飯，款款都食過，都好多選擇，同埋佢係真係用好多唔同蔬菜，唔係嗰啲假肉，選材都算好健康。同埋啲店員都幾Nice，好似家庭式經營咁，幾有人情味，仲不時有向長者派飯活動。香港小店越嚟越經營困難，希望佢哋可以繼續做落去！…Read More

細個喺觀塘住，間中都會黎食，搬咗好多年後就好耐冇食過，今日經過觀塘，特登行去睇吓佢仲係咪開緊，點知真係仲喺度！嗌咗個15夜、印尼炒麵、牛肚湯同埋印尼咖啡，唔知係咪好耐冇食過，覺得全部都好好味！！！已經即刻好想再食！仲要老闆同老闆娘嘅招呼一樣好熱情同有禮貌！因為肺炎嘅關係，間舖頭啲枱櫈擺得闊落左，但裝修冇乜點變，仲食得舒服咗。食完之後真係好掛住呢種老味道，如果佢突然間冇咗，我諗我都會好掛住好傷心。呢啲老店唔知仲可以維持幾耐，真係要多多幫襯同埋珍惜。…Read More

以為只係食餃子，但原來都有好多其他選擇，而餃子本身都已經有好多種唔同味，連素菜都有兩種！湯底都有唔同，我最中意菇湯，同埋餃子可以配搭小食，啲小食都好多款㨂，食過茄子同埋豬扒都好好味，價錢唔貴。另外又可以揀五隻或者10隻，有時唔餓食5隻都夠，有一男一女唔知係咪老闆，招呼好好勁有禮貌。疫情期間見佢地唔算多人，可能都係得附近街坊幫襯，但係其實我覺得質素相比其他同區嘅都算唔錯，好過食連鎖嗰啲餃店，新鮮啲！大家可以去試吓，佢仲有生餃子外賣，質素都OK。…Read More

無諗過工廈有間咁外國feel嘅pizza! 仲要我哋打去叫外賣時，接電話嘅人係講廣東話，我冇諗過去拎外賣時竟然入邊係兩個外國人！原來係地道嘢！帶咗三個Pizza走，有肉有素有ham, 我覺得反而素係最有驚喜，啲芝士味好特別，牛肉都好香！唔鞋！個Pizza底我好鍾意，係傳統果種手工Pizza，絕對唔可以同連鎖店嗰啲相比！價錢都非常合理，甚至係平，七個人三百幾蚊食到勁飽！絕對值得幫襯！好想試晒咁多款，後尾先知佢最出名原來係嗰個咖喱生果Pizza，諗落好奇怪，但係食過嘅人都話好好食，下次要挑戰下！…Read More

其實佢嗰個位係非常之隱蔽，有時行過左都會唔覺，因為佢擺咗個易拉架出嚟先至見到，覺得好得意又有海南雞飯又有意大利粉，仲有漢堡包！間鋪喺巷仔入面，跟住行到入去先發覺係一間好文青風嘅小店，裏面得兩個staffs, 設計好簡潔，嘢食上菜速度都好快，我地試咗漢堡包同埋海南雞飯，質素都OK，漢堡包塊和牛好Juicy, 海南雞啲姜蓉都好正，另外佢都有啲自家檸檬薏米水，同埋小食價錢都唔貴！最重要係店舖嘅音樂好啱聽，成個氣氛好舒服，可能新開無乜人知，我見得外賣客，大家可以去試下，下次我想試埋意粉。…Read More

求其search 入去食的，嗰時六點未夠，已經full jor 2/3 , 之後食完已好多人等位，所以早去早著數！ 講返食物，都食左好多嘢，梳乎厘pancake當然唔少得，真心好美味，入口即溶，cream好有奶味～～ 茄蝦意粉略嫌甜左少少，但蝦彈牙，意粉都軟硬適中！沙律係將啲料分上，要自己撈，不過都算新鮮，個汁都醒胃。仲有叫左芥末雞翼，我幾中意，好香好脆～～Staff 服務都幾好，應得好快，執嘢都快，但唔會催你走嗰種，丫漏左最重要！啡都好飲！！ 位都坐得舒適，好多梳化位～…Read More

見佢咁多好評，山長水遠行去試下，肺炎期間無乜客，入到去得2枱客，我叫左招牌和牛炸醬拌麵，朋友叫牛肉麵，個樣正常，點知我個拌麵食落係完全無味，我開頭有諗係咪因為無放味精，但朋友食完都話係完全無調味。我真係無食過咁難食嘅拌麵，仲要$78一碗，嘢飲另計，公道啲講我朋友碗牛肉麵係正常，但我嗰碗拌麵真係完全無味，返屋企自己開包即食拌麵都一定好食過佢100倍，最嬲係佢仲夠膽店名叫自己拌麵！有無搞錯！今次真㡳好大伏，估唔到咁多好評都出事，絕對唔會再幫襯。…Read More

因為夜返，佢又開得晏，無得食揀求其食，入到去發現無乜人，自己寫紙，都係要最普通嘅餸，魚蛋雞翼蘿蔔，沙嗲湯底，首先，湯底無味，啲餸都唔入味，仲要唔算平，服務又無，個中年女人唔知係咪老闆娘，黑口黑面，總之成個氣氛都好似想你快啲走咁，佢又無客又未閂，都唔明有乜咁急，食完我都唔會想留低啦，唔駛係咁望我食完未啦。總之，試過一次絕對唔會再去，寧願食24小時老麥或自己返屋企煮面好過，我都唔明點解佢仲可以開咁耐未執，可能附近實在太少選擇。…Read More

有班朋友好中意黎呢度食，因為一定有位，同埋唔駛卜都食得，但我真係食2次，2次都痾到七彩，我唔知係佢啲嘢唔乾淨定點，同行朋友就唔係全部痾，但都有1-2個話食完個肚唔舒服。佢個廁所係貨櫃改建嘅，當然唔乾淨得去邊，所以肚痛係有啲煩，試過2次都肚痾，之後我都唔敢再去。同埋佢拎食物係有啲遠嘅，要人多先夠手一次過拎多啲，如果唔係你就要行好多轉，個地下係爛車場咁，夜晚較暗，見過有細路跌親，自己睇路小心啲。總之呢個價錢咁嘅食物質素，我唔會特別推介，去食燒肉好過。…Read More

本身旺角嗰時都有食開，知佢觀塘開返都幫襯過幾次，我覺得嘢食ok，係啲雞翼無乜味，服務都算殷勤，但琴日去到佢大播啲大陸歌，好難聽，仲要播到超大聲，都算，廚房煮嘢食嗰2個呀姐都無戴口罩，應該話係將口罩拉到落下巴，仲要不停傾偈吹水，話一通返關就要返大6乜乜乜，嗰時我已經食梗碗米線，即刻覺得好不安，想像到有幾多口水已經落左我碗米線度，最後求其食兩啖就走左，短期內都唔會再幫襯，仲要宜家本地又爆返肺炎，咁嘅衛生情況令人好擔心，要幫襯就自己諗清楚。…Read More

因為佢開好夜，唔係成日食到，有時又好多人唔想等，今日啱時間又無乜人，即幫襯，要咗個紐約芝士漢堡，加$15煙肉，好香好多料，塊扒好juicy，bbq醬又好啱我胃口，芝士又煙un，最緊要係，我勁中意佢用bagel!覺得無包咁淋同滯，另外仲有粟米片同牛油果醬，全部食哂無剩！下次想試埋佢嘅意粉同雞翼，老闆又好nice，一個人打理間鋪，又開夜晚，令我諗起深夜食堂，希望可以繼續食到啦，將軍澳好少開咁夜嘅西餐，有時唔想食茶記都有另類選擇。…Read More

第一次食，宵夜時間唔算多人，咁啱有張枱就堂食。老闆非常熱情，係咁介紹，又比我地試食個炒飯，本身叫左輕型雞扒飯同叉燒飯，已經好大份嚇親，再加埋佢碗試食炒飯，飽到唔識形容，好彩無加蛋，一定食唔落。我覺得下次可以2個人share 一碗飯再另叫雞扒，佢一盒飯嘅份量真係夠三個人食！講返食物，雞扒仰好味嘅，好香，叉燒我就覺得麻麻，太甜，唔明點解貴咁多，講真無嘢飲仲要坐街邊2盒飯收$120係好貴，同埋夏天堂食真係好熱，要諗清楚。…Read More

因為長輩生日指明想試被迫食，明明一早6點去拎飛，大枱第3張，平日夜晚，等成個半鐘都無位！！！火都黎！佢話成間鋪得2張大枱，一張早過我地入，一張就食完十世死都唔埋單，原來係內地人，食到成張枱勁污糟，啲細路玩紙巾玩到周地都係，如果唔係為左長輩，我真係想拉隊走！老人家企左勁耐又餓，早左咁多拎位都安排咁差！態度仲好衰！未食已一肚氣！講返食物，就係一貫美心質素，無乜特別，一心食過個片皮鴨，哇！嚇親！同普通酒樓嗰啲有乜分別？頹到！完全唔好食！厚到呢！咩事？勁有中伏feel! 我一定唔會再幫襯！每次行過見到啲人死等爛等，就想反眼，長輩試完都話無下次！…Read More

假期黎食，好彩訂左位，同埋早食，超滿座！ 仲有好多人叫外賣，雖然好忙，但服務都唔錯，keep住加水，嘢食都好快。食物方面，叫左蝦炒飯、燒鵝、菜、椒鹽鮮魷同「燈」湯，（突然唔記得點寫），全部都好滿意、長輩都話好食，我地咁啱又有卡位坐，都幾舒適，有機會一定會再黎。重點係，唔算貴！性價比高！仲有好多嘢想試，遲啲叫埋多啲一齊食就可以試多啲款。因為openrice 好煩又未夠200字，又要被迫打廢話，呢個規定唔知邊個諗出笑，勁無謂。…Read More

我就只食過一次咁大把，都咁唔好彩比我見到呢一幕，話時月初同朋友喺附近做完嘢諗住食個快飯，朋友推介呢間話好抵食，入去到總算乾淨企理，我地四個人坐左張卡位，嘢食就無乜特別都係一般茶記。咁我食嘢比較快，又唔中意轆電話，我啲朋友又未食完，我咪周圍望，咁啱我又坐正喺個廚房位對面，竟然比我見到入面個廚師偷偷地拉低口罩食煙，我當場呆左兼難以置信，諗返自己頭先食過嘅嘢即刻想嘔返出黎。我即刻同朋友講個廚房佬食煙，但大家都唔想煩所以無諗住做乜，只當自己唔好彩，以後都唔會幫襯。喺呢啲時候仲要整嘢食時食煙，所有食客被迫食佢啲二手煙，如果佢有肺炎，我地全部中哂招。…Read More