Jobiki的個人專頁

其實我一向都好歧視手抓餅呢種食物，入面用嘅牛油之多，食一件簡直用咗半生人 qouta... 就喺我等緊隔離個玉子燒之際一直聞住個味，又見 keep 住有人 order 最終都係敵不過心魔，叫咗個火腿雞蛋芝士豬柳手抓餅。選擇都唔少，我叫咗個 F。呢個就係火腿雞蛋芝士豬柳手抓餅，除咗個名入面講嘅材料之外入面仲夾咗番茄同生菜，食嗰陣無咁膩。整體黎講好好食。雖然食完都係好滯但係保證唔會後悔。如果閣吓好彩的話仲可能會見到貓店長啊～…查看更多

之前成日聽人講呢間玉子燒係葵芳必食，可惜早兩次都咁啱黎到無開，今日自己一個行街街唔想咁慘喺餐廳獨食，決定再試一次碰碰運氣。上到三樓發現搬咗去一樓𨋢口，好彩今日人唔算多總算有個位企吓。睇 menu 話總共有八樣料可以揀，我揀咗龍蝦沙律玉子燒，口感係就係好滑但係唔夠蛋味，入面有粟米同芝士，呢個佩搭幾好。食到薯仔粒同沙律醬但食唔任何"龍蝦"，蟹柳都無條果隻。不過面嘅蟹子夠多鹹鹹香香幾好食。可以 encore 得過～ ❤️…查看更多

三大一細中午去飲茶，一入到去冇人招呼，cashier 個姊姊話自己搵位，行晒成個場所有檯都有人坐得張最大嘅冇人我地就坐啦，點知殺左另一個阿姊出黎好唔禮貌地叫我地唔準坐，要我地出返去等細檯，咁o岩有張走我地都算，一入黎冇招呼都算啦唔洗咁惡嘅。菠蘿生炒骨 - 幾好食，啲肉個皮夠脆，份量都算 ok 啦。胡椒豬肚湯 - 好鹹，唔夠胡椒香味，而且成碗得兩細舊豬肚，小器左 d。豉汁鳳爪 - 唔夠熱，好似蒸完擺左好耐咁但味道其實 ok 嘅。流沙奶黃包 - 好流心亦好香蛋黃味，呢個好食!綿花雞 - 蒸得夠透，魚肚索晒啲雞汁，呢個都好食!糯米飯 - 呢個好唔，啲飯好硬，炒得唔勻秦。總括黎講野食只係 ok 嘅 level，但今時今日咁嘅服務態度真係令人怕怕!…查看更多

今日一行四人去新街市個熟食中心搵食，見呢檔最就腳又多人食就決定食呢間啦。一坐低即刻有人問我地開咩茶同埋擺低左煲例湯，原來個湯係送嘅，飲落唔覺好味精，不過因為冇咩湯渣我只飲得出係瓜湯。腰果蠔酥 - 即係炸腰果同炸蠔仔，口感香脆唔太鹹，OK 好食。金銀蛋白菜仔 - 佢個味教得啱啱好，又足料，呢個必食!黑椒薯仔牛肉粒 - 成個餸好香黑椒味，唔太辣送飯一流，啲薯仔炸過又索晒啲汁好味。牛肉粒冇雪味又夠淋，正。重點推介惹味胡椒蝦 - 好夠味仲好辣，攪到我地忍唔住叫返支啤酒飲。呢個一定要最後食，因為好濃味，食完之後食其他野會變左冇味。…查看更多

今日一行三人喺大埔行街，專登過黎食返個鹽焗雞飯。呢度嘅鹽焗雞飯其實出晒名，我本身比較鍾意食泰式海南雞飯果種好滑嘅雞，不過大部份都係凍冰冰，而家呢啲天氣都係食熱嘢好。佢啲雞唔算太肥，當然雞胸係有少少鞋鞋地但係好香雞味所以食得過。成個飯最靈魂係佢個沙薑汁，就咁用黎撈飯都可以扒晒成碟。唯一可惜係以前個例湯係送嘅，而家要十蚊一碗，都好抵飲嘅~臘味炒飯做得好出色，有鑊氣之餘又唔會太油，我本身知自己玻璃肚唔敢食但因為朋友食唔晒所以都食咗兩碗，而且今次個肚仔好聽話啊~~ …查看更多

近日喺 Facebook 粉嶺人 group 見到有人話呢間係食新鮮牛雜 (唔係冰鮮) 所以約埋友人慕名黎試一試。呢碗就係個主角，牛雜撈伊~~ 坦白講我覺得係好食嘅，不過因為我平時唔多食牛雜所以我真係食唔出新鮮同冰鮮嘅分別。佢個汁唔算係太濃所以都食到啲牛雜本身嘅味道。順帶一提，呢度嘅伊麵好食，唔會太硬又唔會話有陣油益味。友人點嘅貢丸雲吞水餃河，貢丸就係普通交貨貨色。雲吞同水餃應該係佢地自己包的，都幾好食。我見佢有得買生雲吞、水餃，應該係比人買返屋企打邊爐吧?淨牛腩一碗，佢個汁好濃，有啲 lim 口，牛根位好好食，但係牛腩部份就一係太瘦一係就成舊肥膏，個人麻麻地。菜心新鮮無渣配腩汁一流，好食呀~兩丁人叫四樣嘢真係多得滯，大家要留意啊~…查看更多

今日收工收晏咗，同兩個同事喺公司附近食埋晚飯先再返屋企，三個人叫左三個餸、一個白飯、一支啤酒，埋單 $203 其實都幾抵食咖。魚香茄子算係好大兜又足料，油係多咗少少，但係佢真係好香，姊姊拎住埋黎果陣已經聞到味，食落唔太鹹，用黎送飯一流。金銀蛋菜苗，佢有好多種菜可以揀，不過同事 A 指定食油麥菜，好好食、清清地唔錯啊!菠蘿生炒骨，呢個有少少失望，因為佢個汁太嗆喉，酸得滯。而且個肉偏un口感唔係咁好。同埋可能佢炸得唔係好夠，粉唔算係厚但係就唔脆口。我哋見好多人都會叫雞煲食，下次可能會試吓，食完再同大家報告。…查看更多

🙈 係我唔好之前嗰晚顧住打機今日瞓到成三點先起身，點知我個豬隊友仲晏，咁我唯有搭車過聯和墟搵佢食下午茶啦。豬隊友話太熱唔想行，少有地自動提出要食大快活下午茶，入到去見佢個 menu 都有好多選擇，因為今日係第一餐所以決定食得豐富啲！我要咗個蜜汁雞髀 + 紅豆冰 + 西多士嘅下午茶，都差唔多成四十蚊唔係平咖。不過好彩都幾好食。蜜汁唔太膩、雞髀本身用香草醃過都好入味好 juicy；西多炸得剛剛好又香又脆，不過個人唔鍾意食中間有果 Jam 嘅版本，加埋蜜糖太甜了；紅豆冰略嫌佢淡，如果個椰奶再濃啲就一百分了。🙈🙈 食完成個餐罪惡感爆晒標不過真係好滿足！！…查看更多

觀塘區有好多茶餐廳，今日同事叫我同佢食呢間華峰。坐位都四四正正唔太逼，但係人多都會要搭檯。我叫咗個粟米豬扒飯跟熱好立克。個飯係炒底嘅，唔肥膩。豬扒份量都算多，唔乾唔嚡，唯一係覺得佢可以 yip 得濃味啲，咁就野味好多喇～ 個白汁唔會一陣粉味，個廚應該都有認真處理過。個好立克幾好飲，夠濃！但係如果可以唔預先落糖就好啲。😂 我鍾意飲少糖嘛。同事叫咗個常餐，不過佢食得太快我影唔切相。個麵唔會太淋，個蛋份量就少咗啲，塊包就。。。好似好乾咁，可能擺咗一陣。。。…查看更多

適逢今日又開會開到天昏地暗，得閒開餐已經係下午茶時間。同事之前經過幾次見到人多到無咩意欲食，今日見無人等就叫我陪佢食吓啦。入到黎佢個環境都幾舒服，啲裝潢係特別嘅，好有台北啲主題餐廳嘅味道，侍應都多目測多過八人。同事叫左香菇肉羹，聞落有少少似碗仔翅，食落鹹鹹酸酸咁都唔錯。佢杯珍珠奶茶 8 分糖 8 分冰都幾好似，茶香唔錯但唔夠天仁香；我怕甜所以杯茉香珍珠 5 分糖 5 分冰，都真係幾唔甜，下次可以唔洗咁手緊。兩杯比較個味分別其實唔係好大咁。。。鹽酥雞值得讚，真心好食，連啲炸九層塔都好食。魚丸就見人見智，其實魚丸黎講味道唔錯，食完令我掛住淡水個阿伯魚丸。埋單 $136 兩個人下午茶。。。好貴。。。雖然我影到好大，但佢啲碗係。。。好細嘅飯碗 size...…查看更多

今日開會開到過晒時間，好肚餓但係攰到唔知食咩好，雖然觀塘嘅下午茶有好多選擇但係我決定都係近近地就食呢間。茶餐廳黎講佢唔算係太光鮮但係都算企理，有時入黎食玩 hea 住打返兩舖機都唔錯。姊姊就正常 service 啦唔會黑面嘅。。。天氣太熱我望咗 menu 好耐，決定食個酸酸甜甜嘅煎蛋免治牛肉飯，係開胃嘅。個人好鍾意嗰啲個邊煎到好似炸炸地，而個黃又唔會太生唔會太熟嘅流心蛋。肉醬唔太酸，我覺得佢個肉醬應該係牛、豬肉碎 Mix 所以食落幾滑。結果十分鐘唔夠食晒。坐咗一陣嘆埋杯凍檸茶條氣即刻順返晒，只係略續佢多冰咗啲。💪 差完電又返公司努力過！…查看更多

今日天氣又熱又趕住上堂行過見到呢個手撕雞薰蹄飯所以叫黎試吓。雞唔算係好滑但有雞味，可能佢有手撕的關係食落幾有口感；薰蹄好香同夠凍，唔似燒味舖果啲擺到熱晒；豉油汁份量剛好，唔覺唔覺食晒成盒。😂😂 本身諗住忍口唔好食到太飽驚一陣上基地射箭會手軟，但係太易入口了，發現果陣已經扒晒。不妨一試啊 🙈…查看更多