gracesiuhaha的個人專頁

晏晝唔想煮飯就落樓試吓呢間餐廳。呢間餐廳都開咗一段日子，之前喺出面睇，佢嘅定位應該係cafe，最多人嗰排成日都見到有人夜晚嚟食甜品，咁今日晏晝就過嚟試吓啦！首先上左杯homemade lemonade。係我鍾意嘅味道，好輕嘅甜，適量嘅酸，甜酸平衡，真係有啲似清新嘅檸檬味。唯一不足係細杯左啲，不過出嚟食嘢嘅餐廳都係咁上下㗎啦～接住落嚟係卡邦尼意粉。諗住卡邦尼意粉咁容易，間間舖頭都有，應該唔會出事啦，點知就比我食咗人生第一個出事嘅卡邦尼意粉😵‍💫首先，職員上咗碟意粉之後，我好奇怪，點解冇餐具既呢？然後職員禮貌地指示我餐具係自助嘅。當刻我心裏有打個突，我唔記得有冇收服務費，但係我一碗意粉再加一杯嘢飲埋單都$212，唔通係因為冇收服務費？所以連「上餐具」呢個咁簡單嘅「服務」都豁免？拎好餐具，終於可以開餐。賣相正常，餐牌標榜用蘭王蛋。冇食開蘭王蛋嘅我，先試咗一啖蛋黃汁，感覺好似平時買開嘅普通日本蛋黃比較濃味。識落口，佢哋嘅麵用咗天使面，而唔係一般嘅spaghetti，即係幼身啲嘅面。當時我仲覺得廚師應該係有心思喺食物度，喺材料上都做過下設計。點知，僅止於此。火腿用左Parma ham，可惜煎得太乾，可能廚師本身係想做乾脆嘅口感，但係脆就唔見咗，剩返落嚟嘅只有乾嘅感覺。而且食水未免太深了吧？成碗麵就真係得呢3塊Parma Ham！既然碗麵嘅定價已經去到百幾蚊，一係你就用返啲平價啲嘅火腿，起碼比分多少少肉嘅份量去點綴個顏色同口感，一係就比多兩塊Parma Ham，依家嘅大細一開二，喺視覺上嘅份量都比較多一啲，而且食起上嚟唔會咁容易整污糟面。口感上，意粉煮得唔錯，係al dente。味道一般，蛋黃味唔夠濃，冇辦法令成個意粉充滿蛋味。忌廉落得亦唔多，本來我好欣賞，唔會咁漏，但點知食唔到奶香同忌廉味，令我懷疑係根本冇落過忌廉，定係落得太輕手？洋蔥炒唔夠火候，食到洋蔥口感亦食唔到洋蔥嘅香味，要再煮焦一d，先有焦糖味、焦香同顏色。芝士睇落好多，但係其實只係好薄輕飄飄好似木魚碎咁嘅芝士碎， 撈完之後已經冇晒芝士味。如果想突出芝士嘅鹹香，建議都係用返紅車打芝士比較好。如果已經係用緊紅車打芝士，建議換過個牌子🫡以我所知，好多cafe係有用卡邦尼粉（好似奶粉咁嘅粉）就咁撈咗個煮熟嘅意粉沈少少材料上碟，就係拎出嚟賣百一二蚊嘅意粉。咁究竟根既定位係咩呢？係好似呢類型嘅cafe，以$10內嘅成本去賺錢，定係想做一間用心出品嘅小店呢？如果只係想用低成本去賺最多錢嘅，咁我覺得保持現狀就可以。但如果係想做有心嘅小店，喺食物上有好大既進步空間。作為街坊，我比較期待一間好食嘅餐廳。…查看更多

工作日忙夜忙，夜晚係要食返d好野平衡下心理。由於好想食好食既生蠔，就係openrice搵呀搵，搵呀搵⋯⋯皇天不負有心人，俾我搵到呢閒服務周到，食物質素優良既餐廳——Oyster to go！一坐底，我同友人都衝住佢既生蠔而來。成幾十款，法國、澳洲、美國、蘇格蘭......多不勝數。因為我地都想食好西，即刻就決定要個oyster set。揀好之後，餐酒隨即奉上。我比較中意fruity d 既，而呢杯有少少dry。我以為我會唔鍾意，但點知偏dry嘅白酒襯生蠔更好！而我地揀曬心水生蠔後都仲有兩款quota剩，店員就好好咁問我地口味偏好，推薦左兩款俾我地。而我地揀既款有：⋯⋯我只記得最大最肥美既一款，來自法國既Gillardeau。🙈除左食蠔，我地都揀左d熱食，暖下個胃。要左碗湯，菇菌味濃郁，食落依然有粒粒口感，不過黑松露係松露醬，就唔係鮮磨，大家唔好咁高期望。對比價錢，好合理。由於我地以為自己仲食得落，再嗌多個意粉。媽呀⋯⋯好飽！，意粉芝味香濃，醬汁濃稠，飽到再三叫聲：媽呀！話明食好西，幾飽都要有甜品作結。睇佢賣相，估佢同街外既同款甜品味道差唔多，果不其然。唯一唔同既係佢係布丁，比岀面既口感厚實d，岀面製作既我覺得比較似奶凍。成晚真係滿足到爆啊！🤤…查看更多

去完西沙玩之後因為人太多而上唔到公共交通，唯有踩ofo岀返巿中心。踩到肚餓之際，見到眼前呢間鋪有落地玻璃設計，採光充足，由外望入去已經俾佢吸引到！再望下餐牌，價錢適中，即醫肚！裏面環境寬敞，近落地玻璃既位置採用左高地台設計，座位係塌塌米，大概有6張4人枱。而普通座位設計更有十人枱，一大班朋友歡聚都好岩坐啊👍🏻唔講咁多，去「飯」！呢個泡飯同我想像中有些許岀入。本來我以為係三文魚係主角，會比較濃味。點知食左啖之後發現，湯先係主角！！昆布湯味突出，微咸，但唔會濃到頂唔順。浮面一粒粒既脆脆米令每一啖口感更豐富！本來湯飯係淋既，但每啖加埋脆脆米，令到每一啖都有「脆、淋」相交既口感，正！可能因為湯飯太岀色，令只係烚過下既三文魚顯得失色。至於大板燒章魚丸，叫佢係緣於一個誤會😂我想食大板燒，但就睇錯左。咁煮到埋黎就食啦！ok既，唔難食不過都冇特別好食😁個面脆卜卜，入面有章魚肉，麵粉比例岩岩好，唔會成口澱粉質既感覺。醬料份量岩岩好，唔會咸，又唔會唔夠醬。呢到最吸引我既係環境，其次係食物，係hea足一日既好地方！…查看更多

Yumyumyum!依家望相打返都仲回味緊🤤呢間餃餃餃子位置方便易搵，就係利東街附近，食完仲可以係利東街行下。好啦，直入正題，講下食物先！呢晚我地要左兩份鰻魚飯同一份八隻既ChaoChao餃子嘩⋯⋯我唔係鰻魚痴，但都覺得佢好好食！燒汁咸甜得宜，咸甜比例大概係6:4。鰻魚冇乜骨，就算有既都係好軟、幼、短，所以食落一d都唔un口。燒汁夠撈飯，唔會食落口寡寡。碗飯睇落細，但食落再加上餃子，份量岩岩好。招牌餃子中規中矩食落夠香脆，唔會乾身得制。返而係餃子與餃子之間好難分開，要分開既好易夾爛。皮薄餡靚，豬肉味香，而且即叫即煎，加分！佢地仲有多款醬汁提供。不過個人覺得ChaoChao餃子已經好夠味，所以冇試到。呢間鋪除左價錢實惠好吸引外，服務都係其中一個令我印象深刻即地方。我地坐bar台位，廚師會同客人傾下計，問下好唔好食，呢下係值得加分既！…查看更多

上網見到話呢到係望海景cafe，於是一心歡喜黎，但原來係隔左條馬路先望到觀塘海濱長廊，先望到岀海。餐廳望落好有去左外國cafe既感覺餐廳內部樓底夠高，採用落地玻璃透光設計 令人入到黎感覺優雅又舒服。我地三個人總共叫左三個菜。意大利飯外表岀眾，可惜味道平平，偏向淡口，冇一種食材既味道特別突出，而綜合既味道亦唔見得好食。唯一讚既係帶子嫩滑。呢份all day breakfast已經係全枱最好食既餸，但都只會俾3星半。份量夠大，滑蛋夠滑，滑蛋下仲有茄汁豆，沙律醬係honey mustard，再加石榴，幾爽甜好味。不過個人覺得煎煙肉可以脆口d，依家只係煎左層油岀黎但冇咩口感。slow cook chicken salad個沙律汁略酸，同d嫩滑既雞肉係夾既，不過食曬雞肉得返菜時就顯得略酸啦！不過雞肉真係好嫩，雞味亦濃。呢杯honey lime係由友人品評。據聞飲品帶薑味，青檸味欠奉，蜜糖味都唔覺，只飲到略帶甜味。總括而言，食飽再黎嗌杯野飲坐下，享受環境，較為合適。…查看更多

年初三夜晚黎到，排左幾分鐘就已經有得入去。我地兩個人叫左一個海鮮闊條麵，一客辣味雞翼。諗住用杯飲水，點知兩隻杯都摸到有積，仲要抹都抹唔甩🥴講返食物先！本來不抱任何期望，點知咁樣反而有驚喜。頂部麵條焗至乾身，食落脆脆地，連帶下面帶有白汁既面條，一啖食到白汁、軟麵、脆麵。唔！真係幾唔錯，有驚喜！海鮮就一般，都係雪藏野，唔會難食，都唔會好食。嘩！！！！！雞翼啊！對於雞翼狂迷黎講，好難有雞翼係唔好食。呢間pizzahut既雞翼上枱仲好熱，好幾隻一邊既皮焗到乾身，唔脆，但個面焗皮口感一流！Overall，呢餐所係above average既晚餐。…查看更多

黎到觀塘覓食，焦點已經由大商場、連鎖店轉移到工廈區。試過好幾次係工廈食到好餐廳後，今次就試下呢間走溫馨家居風既和式小店。座位多且闊落，坐得舒適。而每張櫈下面都有置物籃放個人物品，係貼心既舉動☺️大窗戶透光十足，令餐廳感覺更闊落。再加上大量自然光引入，配合裝修既木建築，的確舒適溫馨。話咁快就上第一道菜：咖哩豬排飯定食呢到上菜真係好快，如果我冇記錯，當日叫左十五分鐘左右成個定食就上左枱。咖哩帶微甜，典型日式咖哩。豬排皮做唔到吉烈效果，第一啖已經霖左。第二道送，蒲燒x魚腩定食同頭先既豬排定食一樣，有牛舌、麵鼓湯做前菜。嘩！主角上場啦！點解係蒲燒x魚腩呢？係因為我已經唔記得係咩魚，只記得每塊魚肉中間近骨位都有魚油。食起黎非常滑口，令燒過既魚肉食起黎都唔會乾身，唯有細味之下先食到微弱既魚油腥味。但對我黎講，個蒲燒汁略為重口味左右d，所以愈食愈咸。最後都要叫杯飲品。呢杯白桃梳打，清清甜甜，好岩我口味。而另一杯烏龍檸茶就失色d。烏龍同檸檬兩種味道格格不入，做唔到混和效果，而且檸檬太酸，就算倒曬糖水落去都係酸左少少。整體黎講，都係一間優閒舒適既餐廳。…查看更多

大年初一，行完大運唔知食乜好。咁岩搵到ENT有開，而且唔加價，行完個大運即刻入大尾督回味一番😋黎呢到交通都好方便，撘小巴20C會快過巴士十幾分鐘，撘到總站落就得架啦。黎到ENT已經七點，天都黑啦，但正中我下懷☺️最中意坐佢撘帳篷既半露天座位，感覺好chill上次黎只係記得食左西餐，睇真d先知原來呢間係墨西哥餐廳，哎呀😵記錯曬！不過仲好，下次想食墨西哥菜就知去邊！😋睇完menu，我地要左兩個set dinner。先上左兩杯白酒。然後再上餐湯，今晚係羅送湯，稍辣，但好開胃好正。平時食咖哩魚蛋都覺得辣既就應該接受唔到。再上凱薩沙律。唔，係我中意既味道，乾身脆卜卜既火腿配合烘麵包粒、生菜、比一般凱薩沙律醬再微酸一d既凱薩沙律醬，好開胃！份量幾大，係平時岀面跟餐沙律既一倍。嘩！上main course啦！我地要左香煎海鱸魚牛肝菌意大利飯同自家製辣肉腸薄餅。海鱸魚味道適中，鹹鹹地，略嫌塊皮煎得唔夠脆。意大利飯始終都係個心會有d實，咬落粉粉地既感覺。個辣肉腸pizza堅辣！好有墨西哥風味，啲辣肉腸好似係醃過墨西哥辣椒個種辣，但係可接受既。最後一道菜係甜品，係芝士蛋糕，同市面上一般嘅芝士蛋糕冇乜分別，唯一嘅分別係佢偏軟身啲，芝士味冇咁濃，感覺冇咁漏。Overall黎講，都係完美既晚餐…查看更多

係德福食完飯想食甜品，見呢間鋪開左咁耐都未試過，d甜品無論係相定display都幾靚咁，於是叫左個睇落應該無伏既oreo cake，點知⋯⋯件cake造型大路、正常，份量適中。學大台藝人口吻：「oreo有oreo味，海綿蛋糕有海綿蛋糕味，朱古力有朱古力味。」但我想講夾埋就真係唔好味🥴！首先，包蛋糕塊膠紙好難搣落黎，搣到夠蛋糕歪歪地先搣到（可能我個人問題啦）。第二，最頂個一大塊朱古力好似布咁，吉極都吉唔斷，最後係成塊揭起食左入面d蛋糕先🤦🏻‍♀️第三，味道正常，但口感好分離。姐係個種你唔係食緊一件cake而係一啖食緊幾種食材既感覺。材料每層之間好鬆散，唔夠融合。如果有下次，可能叫窩夫同可麗餅會更好。另外有好多位，空間感夠，都坐得舒服。…查看更多