minghonc's Profile

我哋兩個街坊去食，同行叫沙嗲牛麵。等咗三個字，點知來咗碗無醬嘅麵，牛肉得幾片舖咗碗面三分一。問返先知無晒沙嗲牛，但中途完全無人講聲，自動幫我哋換咗碗鮮牛麵。除咗無醬少料，湯底都只係滾水，所以碗麵基本無味。連熱飲承惠 $36。我就點咗雞肉湯米。餐牌無，但呢味我舊時都點過幾次，印象幾好，貪唔使食咁飽又平過碟頭飯，而味道都算過得去。清湯米粉配雞油同薑茸，加上雞件舖面，呢間來講算唔錯嘅配塔。埋單先知原來佢收我連熱飲 $56，等同碟頭飯餐嘅價，令我有啲錯愕。印象中以前唔係呢個價，貴極粉麵餐都唔會過五十蚊。但既然餐牌無，都只能任佢叫價，畀佢賺埋我今次算咯。埋單時老細收我 $94，我起初唔知價，以為平均一人四十零蚊咁，所以無再多問。同行發覺唔對路，先知原來我碗湯米咁矜貴。另外，就算計碟頭飯價，都係 $36 加$56 等於 $92，始終畀佢收貴咗。我入返去問清楚個價，老闆語氣有啲唔耐煩，話雞肉湯米咪 $56 咯，又話 $36 加 $56 啖 $94 咯。我指出佢計錯，佢先粗聲粗氣話咁畀返兩蚊你咯，完全無表示歉意。收錯數都咁嘅態度，都唔知係真計錯定側側膊。服務方面就算數喇。除咗落單混亂，阿姐抹枱又倒瀉半杯奶茶，道歉都無聲。好彩無濺到我哋身上啫。我見其他枱都有出錯單，估佢做慣離島街坊生意，遊客一多就踢晒腳。總之唔會推薦，寧願你去買麵包買小食都唔好幫襯。…Read More

雖然出品略有飄忽，平心而論咖啡尚算好飲。但呢家主打「日本舊式咖啡店」氛圍嘅離島大支砲原來會趕正常消費嘅顧客。我係街坊。近來有文稿要寫，就揀咗喺佢度坐吓，順便試試出品。之前去過兩次，都係午飯後三點左右，坐到傍晚閂門前。我同伴侶齊齊坐一卡位，開電腦做自己嘢，亦各自點咗杯咖啡。兩次都一樣夾埋消費咗 $88。而兩次間舖都保持有空位，其他枱唔係熟客就係市區遊客，各自悠閒。臨走前都有同店長嗲兩句，起碼當時唔會覺得自己原來已經畀人暗暗落咗黑名單。之前印象唔錯，亦都想試吓佢手沖咖啡，就決定帶埋電腦再去坐一個下晝。當時兩點半左右，入面空咗三枱。我同伴侶坐低後，店長之一擺明因為知我哋會坐得耐，專登提一提今日每位顧客都只能限時坐一粒鐘。我有啲錯愕但都無諗太多，就問係咪因為今日週末呢？店長就話來緊咁多日直至月尾結業都一樣。如果唔方便就實在無辦法喇。我哋見無得做嘢，咪馬上走。後來查返，店家其實無喺任何地方規定過過顧客逗留時限一粒鐘，所以頗肯定係畀人針對趕走咗。我前兩次去都係週末，都無坐爆嘅情形，唔知店長邊度來嘅自信來緊半個月都會貨如輪轉呢？況且就算幾咁人多又熱門，咖啡店會為咗做多幾轉生意，趕走坐得耐些少嘅顧客，都前所未聞。再者，你杯咖啡係精心製作嘅，我都會想逐啖逐啖咁慢慢享受，而唔係急住灌晒落肚。今日佢咁樣一趕，除咗侮辱顧客，侮辱店家品格外，亦侮辱咗自己出品嘅咖啡。我知佢月底後就唔做堂食，改專營外賣。但既然店長都係嗰個店長，睇來我都係無緣享受呢間排隊到碼頭嘅名店喇。…Read More

已經好多年無食日式拉麵食到咁想拍枱。好多餐晏晝都喺厚福街搵食。心血來潮想轉下口味，就行入後巷，發現呢間門面都裝修得幾企理嘅日式拉麵店。我點午市套餐，加八蚊嘅蝦湯拉麵加烤雞軟骨。一入門口，聽店員講嘢有普通話口音，老實講會有些少戒心。但唔入都入咗，畀次機會咯。地方算寛敞，當時無乜客，我一人坐四人卡位。由於有疑慮在先，所以都留意下廚房陣勢。師傅畀我感覺有啲懶懶閒，單手拎起碗麵唔知同店員講乜。最後見師傅親自拎碗麵出來畀客人。拎畀我嗰時，佢單手沿邊邊慢慢跣落枱面，一聲不發。成套動作怪怪地。一食就嬲，估唔到今時今日喺香港重會食到呢種明顯扮日式呃錢嘅垃圾。湯係簡單粗暴嘅味精湯，係面頭加咗羹蝦米同疑似蝦油先無咁肉酸。麵就似超級市場買返來嘅貨色淥一淥。好慷慨咁跟咗一塊叉燒，切得唔厚唔薄，唔覺有特別調味，勝在有咬口啲咯。居中放咗幾隻熟蝦，就係白烚嘅熟蝦，真係開咗我食日式拉麵嘅眼界。勉為其難咁食完。通常食拉麵我會飲晒碗湯，有飽腹感。今次撈少少蝦米就算，食完個嘴同個胃都不得滿足。之後上嘅烤雞軟骨就不過不失。串燒或其他小食似乎係由一位都係有普通話口音嘅大嬸負責，同樣係邊個煮就邊個上菜，所以係大嬸遞畀我。埋單重要加一，承惠 $85。通常食完好嘅日本菜，我都鍾意靜靜地坐一陣嘆下茶。今次食完只係成肚中咗伏嘅怨氣，快快脆走，邊埋單邊打緊呢篇食評。我會形容呢碗麵係侮辱緊香港人嘅味蕾。都咩年代喇，唔通重覺得香港人好蠢啲錢好好呃？咁今舖我無查清楚虛實就貪得意試咗，的確蠢咗一次嘅。喺附近咁多食肆嘅尖東，呢間山寨拉麵完全無存在價值，快啲執唔該。見呢度讚好嘅帖咁多，真心疑惑當中有幾多係做枚喇。講開都幾奇怪，既然有咁多工夫賣山寨麵呃錢，點解唔好好地煮返家鄉菜呢？或者索性鍛煉返門手藝先開舖呢？…Read More

好少食飯食到成肚火。之前幫襯過勝興幾次，試佢推車仔啲點心。收價偏高，又唔算特別好味，所以之後都好少考慮。有次趕船，見勝興有盅頭飯，諗住係茶樓即叫即有嗰款，所以又幫襯返。我隨便叫咗午市嘅蒸鯇魚套餐，點知原來佢即叫即蒸，要等三至四個字，剩返十分鐘畀我食飯。當時的確唔多高興，又食得狼狽。十分鐘內要食油菜、飲湯、食飯同食魚，重有茶，點諗都唔會係舒服體驗。最尾為咗趕船都係食唔晒，要畀多一蚊買外賣盒，自行打包。不過意外發現魚肉鮮嫩飽滿，湯都好足料，所以盤算下次再來慢慢享受鯇魚餐。點知嗰狼狽嘅十分鐘就已經係全劇高潮。之後每次路過都問下有無鯇魚餐，問咗兩星期都無，話無入貨。的確好可惜，咁無我咪食第二間咯。好啦，有次問定知道終於入貨，就度定兩日後即今日去食。下晝一點帶家人一齊去，同阿姐點咗兩份鯇魚餐。阿姐話賣晒完整的魚，剩返魚頭同碎嘅魚腩肉，問我要唔要。我等咗咁耐，雖然心有不甘，但既然坐低咗，覺得有魚腩肉都好丫。好啦，又等多三個字。奇怪點解佢只上一碟油菜，明明點咗兩份餐。同阿姐講，先知佢只係幫我哋落咗一份。係咪低能㗎？講咗咁多句嘢都可以聽錯？跟住問返清楚先知廚房嘅料唔夠出兩份，只係出到一份。所以我哋迫住轉咗碟肉餅飯套餐。阿姐話要蒸十三分鐘，我哋只能無奈接受，唯有食住鯇魚等咯。好啦，千呼萬喚終於等到一碟綜魚喇。你老尾，又話有魚腩碎嘅？碟上得四副魚嘴喎。我哋都好肚餓，唔高興都要馬上郁手。因為面頭舖咗層梅菜，諗住下層可能收埋咗啲肉呢？一舊，兩舊，三舊，食晒四副魚嘴，原來真係得魚嘴，乜腩都無。大佬一個套餐收我六十蚊，結果等三個字食一碟無肉嘅魚嘴？認真咩？同埋佢嘅例湯送完即止，當時下晝一點，已經無上任何例湯。我食到中途搵極都搵唔到肉，塊面已經黑過舊炭。最後上埋肉餅，普通，重要細碟。正常我係唔會畀六十蚊食肉餅蒸飯咯。肉塊入面有馬蹄，家人因為唔食馬蹄，結果成餐幾乎只係食咗啲飯，之後成個下晝都嗌肚餓。畀錢嗰吓，忍唔住問咗阿姐波。落錯單要人白等，以為有兩份點知得一份，話有魚腩肉點知得四副魚嘴，咁樣就收人百二蚊，認真咩？好心廚房見唔夠料就咪出餐畀人啦，你呃緊人食你啲廚餘呀。其中一個阿姐覺得唔好意思，話下次再去佢畀返多啲我，但我估無下次喇。食餐飯都係希望心滿意足啫？食到咁失望又成肚火，我就唔想再搏啦。…Read More

如果貪大份飽肚，一餐有齊湯包野飲，環境闊落坐得舒適既話，海星既晚飯可以一戰。但若對食稍有要求既話，唔會幫襯海星。晚餐收得唔平，六七十蚊上落。叫左碟咸豬手粒炒飯。成碟飯好易整，炒底，鋪幾粒肉，倒茄汁，鋪芝士，焗，搞掂，完全無廚藝可言。食落好濃味，因為啲茄汁夠辣夠重口。但你諗真啲，若果食材夠靚，點會有人用咁重口既汁去蓋過晒啲食材味？無錯，咸豬手粒係無味既，所以先要用汁搭救。雖然佢收得貴，又成個套餐咁上，賣相又唔錯，但識食既人就知呢碟飯係頹野，用最少功夫就煮到出來既慳皮貨色。去正宗茶記食碟涼瓜火腩飯好過啦。環境係唔錯，但啲侍應好唔掂。打扮mk唔係問題，問題係要知道自己做緊侍應，對客要有禮貌，要有笑容，令人感覺舒服。我食飯時打完風無耐，靜影影，侍應就自己圍內嬉皮笑面咁玩。呢啲我唔會介意，人之常情。但一望住我就黑返塊面，眼甘甘啤住我，又無笑容又唔識講野，令我覺得唔多自在。大佬我係客，應該要有受尊重既感覺。侍應親切啲，錢都畀得甘心啲。最後餐飲叫熱奶茶，見係啲mk侍應沖，已知不妙。飲左兩啖，毫不婉惜咁擺低走人。飯已經係頹貨，頹奶茶更不容姑息。奶茶呢啲咁考究功夫既飲品，梗係要老師傅先識沖啦。憑你地班唔識尊重客人既mk就想學人沖奶茶？伏已中，識食既一定唔食海星。…Read More

早幾日食完醬家的蕃茄拉麵，意猶未盡。想起拉麵台風也有蕃茄拉麵，就是伊台風，便躍躍欲試。別誤會哦！這碗不是伊台風，是魚介豬骨湯麵，之前每次來我都點這碗。未試伊台風前，就先回惜一下魚介豬骨湯麵，好作個比較吧。由於本人重口味，偏好濃稠湯底，這碗湯麵我認為是香港數一數二的美味。第一次吃，就不用提有多興奮了。由於湯底濃郁，夾麵很容易就掛起湯底，比我吃過的某些沾麵更似沾麵。麵條結實有嚼勁，荀乾爽脆有微辣，叉燒又大又厚，整碗麵份量十足，每次吃完都會拖著肚皮，和對身形歉疚的心情離開呢哈哈。美中不足處，是叉燒。大則大矣，厚則厚矣，但味寡肉鞋，似一片大瘦肉，沒有日式叉燒常見的軟稔與肥腴。你可以當這叉燒口味是本店的特色，百貨應百客，也許有人喜歡。若不是這叉燒，拉麵台風就是我心目中的香港第一了。試了這麼多次魚介豬骨湯麵，終於要搞新意思了。未上菜前，我見香港學徒用噴火槍噴我碗麵，滿令人期待呢。上菜後，原來麵上鋪了一層芝士，芝士面又焦了一層黑皮。除此之外，碗邊攝了四五片蕃茄，湯低也由橘黃變了朱紅，是蕃茄湯底的緣故吧？好啦要開動了！由於時間關係，我早就吃完了。簡言之，伊台風是魚介豬骨湯麵的加強版，多了芝士和蕃茄，落得慷慨。芝士跟麵和叉燒黏成一圑，豐富了口感，稍稍補救了叉燒的缺陷。蕃茄入碗時是凍的，又多又大塊，會稍稍使麵降溫，值得注意。至於湯底，老實說，我吃不出蕃茄的味道。只見色水殷紅，濃稠依舊，大概是魚介豬骨湯底加了點茄醬染色吧。由於前幾天才吃過醬家的蕃茄拉麵，一比之下，伊台風的所謂蕃茄湯底就有點教人失望了。所以我覺得伊台風跟魚介豬骨湯麵最大的差別，在芝士，喜歡煮溶芝士的朋友不妨一試。順帶一提，拉麵台風的佈置，是我去過的香港拉麵店中最喜歡的。不華麗，不雅潔，但很有舊日的小店風味，不論是金屬吧枱，海藍色的富士山壁畫，還是朝氣勃勃的日本流行歌，令人稍覺時光倒流，回到日本的舊時小鎮。很多人都發現了，拉麵台風都用高櫈，上櫈麻煩，侍應會幫手托你上櫈，將你連人帶櫈推向枱前，邊推邊喊「出發！」。都市人慣了冷漠，突如其來趣怪的一聲，確實逗人莞薾。這大概是日本師傅的心思吧！…Read More

七半係旺角上日文堂，適聞旺角開左間有日本水準既蕃茄拉麵店，就決定上堂前食佢一碗。點知...醬家晚市開六點。我六半去到，見到十個左右排緊隊。唔理，照排，一場黎到唔係縮沙呀？我諗畀盡佢九個字，剩低三個字我點都食得完。結果就真係排左九個字，hi aunti...入門口果刻，條龍已經積到廿幾人。途人見咁大陣仗，都不自禁停低望望，排長龍果然做到聲勢。諗住快快脆食完去上堂既我，又錯了。排左咁耐隊已經躁躁地，坐低落埋單，餓住咁等，等佢上菜居然足足等多七個字。七點三入席，而碗麵放上我枱面既時間，係七點十。結果排隊連上菜等左我足足一個鐘又廿分鐘，原定七半上既日文堂梗係遲晒大到啦...食果陣重有啲火火地，但我明知呢啲野無得怨店家，又唔係人地拎住枝槍迫你黎食。等上菜之際，百無聊賴，就留意下侍應點做野，終於發現排長龍等餐懵之謎。全店得一位日本女士做侍應，分位落單上菜收銀一腳踢，人手確實緊拙。正路日式拉麵店都會奉冰水，醬家係乜都無既。無計，侍應實在騰唔出手。但其實佢地係知要奉水，我見有師傅會煮煮下麵偷啲時間出黎斟水奉客，惜始終人手唔夠，佢都斟唔晒畀所有客。我坐得遠離廚房出入口，就飲唔到佢杯水啦。但即使人手緊拙，都未至於招呼唔切既，師傅煮好麵一定會即時上菜，保持高溫，未至於拖耐用餐時間。咁點解重要排隊排咁耐呢？原來侍應唔會叫排後面既客上前攝空位。去過澳牛食野，一定見過伙記點指兵兵，問下排緊隊既客有無一位兩位三位，有就叫你上前，按佢指示入座，地盡其用，絕對唔畀有位凋空。但醬家堅持先到先得，排後既客唔會先過排先既客入座，所以總會凋空幾個座位。例如我見到有三人枱，啱啱坐低左一對情侶，重剩一個空位。而排係龍頭既係四人組，無論如何都唔會坐到張三人枱，侍應都唔會叫一個排後既客攝埋剩低果個位，由佢凋空。我唔知佢咁做既理由係乜，基於公平定怕起爭執定純粹唔憂做。可能骨子裏始終都係個凡事計盡既香港人，當下就覺得凋空座位好無效率，又累啲客等耐左，有乜為呢？不得不懷疑店家係咪吊高黎賣，尊登砌條龍係門口造勢。唉，分位既野我識條鐵咩。講返碗麵，我點左店家推薦既大蝦蕃茄麵，八十五蚊。同港人食慣既博多豬骨拉麵唔同，呢味蕃茄麵無乜餸，真係得兩隻大蝦同幾粒葱花咁大把，鍾意多配料既朋友要失望了。我比較睇重麵同湯，麵似四川担担麵，幼身、偏稔、易咬，幾夾我口味，但就未必啱追求彈牙既食客。聽聞老闆朝朝去果欄親自選蕃茄，點菜後師傅就即時炒蕃茄，確保新鮮熱辣。唔～蕃茄湯底的確落足功夫，雖然濃稠，但口味唔重，唔會過醎過酸，而係啖啖鮮甜，陣陣清香，拿捏得恰到好處。食完之後幾粒鐘，口腔都保留到蕃茄既甘味，抵讚。不過講真，食飯唔係齋睇餸既，食既重係心情。要等到人唔耐煩先有得食就無謂啦。要一嚐醬家，我提提你諗清楚先，你啲時間係咪多得滯，無掟駛？你係咪唔肚餓，捱到一粒幾鐘？唔係既話，都係食三分一價錢既星座蕃茄麵算啦。…Read More

酥皮叉燒包同賽螃蟹春卷先後兩次改變左我人生觀。我諗添記食客十有八九，都係衝住酥皮叉燒包黎。咬落第一啖，牛油香激噴而出，席捲口腔，果刻簡直係人生既高潮。為呢個包，我回味左一個下晝。本來唔好春卷，嫌乾身同膩口。但一食添記賽螃蟹春卷，我懺悔了。外脆內嫩，外乾內濕，配埋喼汁，意想不到既搭調。我媽都食到貼貼服服，承認佢煮唔出。第一次去，未試晒。食親既包點，一來餡料新鮮，二來鎖水恰到好處，包既內壁都會保持一層濕土，外乾內潤，陰陽相濟，盡顯功夫。若果你點蝦餃、燒賣、粉果、鳳爪，我估就無咩特別既～…Read More