AdrianHo0229's Profile

之前為咗同屋企人慶祝生日，選擇咗呢一間Airside嘅高級中菜館食晚飯。入到去已經感受到個氣派，服務同衛生都無懈可擊，位置舒適，窗外仲可以見到新蒲崗嘅夕陽景色。有好多款食物可供選擇，令人眼花撩亂。最後我哋一行三個人，叫咗梅酒啫喱鵝肝凍、北寄貝沙薑漬、五頭鮑魚各一客、二十四小時慢煮牛肋肉、松茸海膽越光米、陳年花雕醉鴿以及甜品拼盤。北寄貝沙薑漬味道好突出，至於個醉鴿有肉嘅鮮味同時亦都有酒香，母親大人讚不絕口。而個鵝肝味道好好，又唔算太油膩飽肚，但係個梅酒啫喱味道太淡，其實係可有可無。鮑魚就味道鮮甜，而且肉質好彈牙，但係我嘅家人就略嫌佢比較韌咗少少。至於個二十四小時慢煮牛肋肉，不愧係廚師推介，味道係讚不絕口。另外個松茸海膽越光米，佢哋整到好似 risotto 咁，好有心思，味道好特別，不過就接近搵唔到海膽要特別一讚係個甜品拼盤，參考下面嘅圖片，大約有六至七款甜品。我作為一個唔係特別鍾意食甜品嘅人都覺得唔錯，再配合乾冰嘅煙霧效果，打卡效果一流，而且餐廳亦都肯配合去寫生日碟。如果你係甜品控就千萬不要錯過。當日用信用卡有九折，所以最後埋單就大約$3100 ，雖然價錢少貴，但係我覺得如果係為咗特定日子慶祝，其實係值得去嘅。…Read More

每次選擇晚膳嘅餐廳就會好頭痛，左思右想下最後選擇咗呢一間位於海港城嘅餐廳。燈光雖然比較暗，但係環境真係一流，由於當日係Weekday夜晚顧客唔多，我哋獲分派窗邊位，可以飽覽到維港璀璨的夜晚景色，而且露台係開放嘅，可以行出去再近距離啲去欣賞景色。衛生狀況良好，而且侍應服務質素高，亦都好好客，上菜速度亦都符合預期。食物方面選擇都幾多，至於價錢亦都偏貴。我哋最後叫咗一份刺身拼盤、一串牛舌、一串雞軟骨、一份南非燒鮑魚、一份海膽甲羅燒以及一碗牛肉稻庭烏冬。刺身拼盤賣相一流，適合打卡呃like，味道亦都好新鮮。至於牛舌有驚喜，我作為一個唔鍾意食牛舌嘅人都覺得好食，但係個雞軟骨就略嫌鹹咗啲海膽甲羅燒味道唔錯，可以叫師傅額外比多幾塊麵包我哋。個燒鮑魚味道好鮮甜，不過價錢就略嫌唔值咁貴。埋單接近$1300 ，仲要係因為通過OpenRice訂位所以已經獲得九折優惠。老實講比想像中係貴嘅，但係綜合食物質素同環境我覺得呢間餐廳係對得住呢個價錢。…Read More

之前要去九龍城上堂，係由於午飯時間有限，而且附近冇乜特別餐廳，所以最後選擇咗呢一間Cafe。個 vibe 幾 free，亦都係 animal friendly，不過人手唔太夠，亦都唔算坐得舒服。menu 選擇唔算特別多，最後我叫咗檸檬蜆肉貓耳朵粉，以及一杯少甜嘅抺茶鮮奶。老實講，個貓耳朵粉味道就真係平平無奇同一般，冇任何特別之處，至於杯 matcha latte 即使係少甜都略嫌太甜。埋單好似大約$160，以午餐嚟講唔算平，CP值一般般。…Read More

呢一間係圍方最新開嘅中式餐廳，我聽見屋企人的推薦下決定嘗試。星期日夜晚需要等位接近25分鐘，不過喺就坐嘅安排上面有啲混亂。我哋兩個人就分別叫咗一隻乳鴿、一份大澳海鮮生炒王、兩隻蟶子以及兩隻元貝，另加一碗白飯。蟶子同元貝味道新鮮，不過另一半就投訴聖子有啲沙。至於個大澳海鮮生炒王好足料，只係略嫌油多咗少少。而隻乳鴿就符合預期，不過碗白飯就略嫌太生太硬。另一個驚喜嘅地方係有龍井茶可供選擇，唔係有好多餐廳有龍井茶可供選擇。坐起上嚟會有少少迫，不過侍應就好熱情，服務同衛生幾好。埋單計兩個人食咗$520 ，我覺得還算物有所值。…Read More

雖然時不時都會經過呢一間位於亮賢居地下嘅西餐廳，不過都有好多年冇光顧過。某天因為某些陰差陽錯嘅關係，終於再有機會光顧呢一間西餐廳。我哋一行三個人就叫咗一打來自南韓的生蠔、兩份大蝦意大利飯以及一份西冷牛扒。由於我哋嗌嘅係套餐，所以會附送麵包羅宋湯以及一杯飲品。羅宋湯味道唔錯，至於生蠔味道都頗鮮甜，冇乜腥臭味，重點係只係$10一隻，算幾抵，都算對得住呢一間餐廳嘅名字。但係個主食就真係相當一般般，首先我本人係食西冷牛扒，本身都已經叫咗七成熟，但係都幾韌，味道一般般，多肥膏，而且接近係冇配菜。至於其他人對個意大利飯嘅評語係味道唔錯，但係只係得一隻蝦，未免有少少太孤寒。三個人食咗$500 ，午飯嚟講都算有少少貴，不過尚算可接受。…Read More

有一日想去飲茶，恰巧有朋友推介呢一間係大角咀新開張嘅酒家，就本着好奇心想試一試，點知中咗大伏。間酒樓有兩層，都幾光猛，衛生就中規中矩，人手就明顯唔夠。我哋獲派去2樓，張枱啱啱對正部冷氣機，非常寒冷。食物種類都算幾多，原本都有啲期待，點知接近30分鐘都未有食物嚟，飢寒交迫之下向侍應查詢到底發生咩事，先獲悉原來根本就冇落到單！如此荒謬嘅事都係我第一次遇到。我哋之後同當初幫我哋落單嘅經理交涉得到嘅回覆係佢都唔知發生咩事，如此混亂嘅管理點可以比到人信心？非常差嘅體驗，唔會有下次。…Read More

近年都比較少食放題，恰巧有一晚朋友建議一齊食久違的日式放題，我欣然答允。位置就當然無懈可擊，距離地鐵站出口只係30秒路程。當然唔會坐得太舒服，服務態度就同一般嘅放題差唔多，都係比較有性格，至於衛生都只係一般般。用餐時間為兩個鐘，令到我哋不至於太匆忙。但係食物方面就真係選擇多如繁星，首先有好多自助嘅冷熱盤前菜，包括麻辣魚皮中華沙律甚至有熱嘅老火湯供應。至於飲品當然係任攞。其他食物包括壽司、魚生、手卷、天婦羅、串燒、肉類等等，亦都會有一啲比較特色嘅食物例如羊架、鵝肝、榴槤、花膠燉湯、蠔等等。當然食物嘅鮮味及新鮮程度不能同高級日本餐廳相比，但整體嚟講我覺得水準可以接受，而且上菜速度都算幾快，至於侍應都會好勤力咁收碟，值得一讚。每位$350嚟講，我覺得CP值幾好。…Read More

呢間居酒屋應該算係區內最受歡迎，如果唔提前訂位，基本上唔會有位，我今次即使訂咗位都只係安排到Bar枱俾我。個位置有少少隱蔽，不過都唔算難搵到。服務同衛生都唔錯，不過係坐得有少少唔舒服，不過坐喺吧枱嘅好處係可以近距離欣賞到師傅如何用心製作食物，都算係一種視覺享受。我哋兩個人分別叫咗海膽鵝肝三文魚子飯、一盒八貫壽司、三串燒物 (雞軟骨、牛舌心以及松阪豬頸)以及和牛鰹魚湯稻庭烏冬。首先個壽司拼盤賣相非常打卡-able，材料新鮮，味道很好。跟住個海膽鵝肝三文魚子飯賣相一流，味道亦都相當唔錯，仲要嘅係都幾飽肚。至於串燒以及稻庭烏冬水準亦都合乎預期，我尤其推薦個牛舌心，我即使平時唔鍾意食牛舌，亦都覺得個味道一流，十分鮮味。最後結帳為$1130 。價錢當然係有少少貴，但我覺得個食物水準係對得住呢個價格。…Read More

堅尼地城實在有太多餐廳可以選擇，令人眼花撩亂，最後選擇咗呢一間喺海旁嘅西餐廳。當日由於地下滿座，所以獲派2樓近海邊的窗邊位。景觀真係讚不絕口，因為可以飽覽到汲水門大橋、青馬大橋以及昂船洲大橋的壯麗景色，令人目不暇給。坐得都幾舒服，衛生狀況亦都唔錯，不過有啲侍應態度比較串。我哋兩個人叫咗鵝肝配焦糖水果、炭火燒魷魚、阿拉斯加蟹肉扁意粉以及朱古力mousse，同時亦有餐前麵包。鵝肝同埋燒魷魚味道唔錯，尤其是係個鵝肝配埋蘋果以及無花果，從而令到個鵝肝冇咁油膩飽肚，不過唔知點解呢兩道菜送到嚟嘅時候都已經有少少凍，有啲扣分。至於個意粉我覺得冇預期咁好食，有啲油膩好飽肚，以及蟹肉份量偏少。而最後個甜品就都算幾好食。埋單$725 ，我覺得性價比就一般般。…Read More

以前嚟嚟去去喺西貢都係食海鮮，今次係第一次喺西貢食西餐。餐廳環境頗佳，燈光同人手都好充足，服務態度以及衛生都良好，會有額外嘅凳仔比顧客擺嘢，非常貼心。而且四周圍都有多部大電視播放體育節目，適合喜歡睇運動嘅顧客。我同另一半就叫咗一份 baby back rib，Garlic Butter Lobster Tacos以及蒜香欖油蝦肉意粉，以及一杯少甜的matcha latte。首先真係要讚matcha latte，唔甜而且好有茶味。個Tacos味道好特別清新，不過食嘅時候可能會比較遴迍。至於個意粉就好惹味，不過太多油。最後個 baby back rib 會配埋薯條，個薯條味道可口兼且好脆，美中不足嘅係個back rib肉質比較霉，可能代表唔夠新鮮。結帳大約$700左右，我覺得CP值算中上，個人覺得呢一間應該係西貢區最好嘅西餐廳，甚至係其中一間最好嘅食肆。…Read More

近年來第一次嚟 the forest 用膳，最後選擇咗呢一間都算出名嘅泰式餐廳。服務態度比想像中殷勤，不過就唔算坐得太舒服。由於我哋唔算肚餓，最後兩個人叫咗一客假日套餐 (會包括一份主食、一份小食以及一杯嘢飲)，以及額外加咗一份豬牛串燒。我哋選擇咗泰式金邊粉作為主食，至於小食我哋就叫咗泰式無骨酸辣鳳爪。個金邊粉太甜，即使落咗青檸汁亦都冇用。至於個鳳爪味道還好，不過份量太少兼且我哋喺入面搵到一條疑似頭髮的物體反而個串燒就正正常常，符合預期。埋單只需要二百幾。老實講，呢個價錢冇得要求太多。…Read More

有接近20年冇再食過呢一間風光不在的拉麵店，之前去西沙Go Park，竟然發現有呢間拉麵店進駐。受到童年回憶的驅使之下，決定從事重試返呢一間拉麵。相對起以前，食物嘅選擇非常少，冇晒以前我好鍾意食嘅冷麵，拉麵亦都只係得四款，不過好似新加咗壽喜燒。舒適程度還好，不過服務同以前一樣都係欠奉。我就叫咗味千之霸拉麵，再轉中辣嘅麻辣湯底，至於另一半就叫咗牛肉壽喜燒配烏冬。我覺得如果你係唔食得辣嘅，就唔好轉麻辣湯底，因為中辣都已經好辣，而個拉麵味道就好一般般，咁多年都冇乜進步，相反個壽喜燒味道反而仲好，有少少驚喜。食咗$200左右，我覺得都係不過不失。…Read More

之前夜晚左思右想下選擇咗呢一間在銅鑼灣有名氣的打卡餐廳。一開始都擔心呢間嘢嘅食物質素，因為通常打卡餐廳啲食物都係一般般，但係最後發現我嘅擔憂是多餘的。入到去個格調真係有啲似法國嘅餐廳，服務衛生唔錯，而且我哋當晚幸運地獲得窗邊卡位，飽覽維園以及天后嘅景色。我哋當晚甚至有即場的大提琴演奏。當然個演奏家都只係時不時拉幾下，不過我覺得都已經夠誠意。我哋兩個人叫咗三款食物，包括八安士安格斯牛排、西瓜帶子沙律以及香茅煮蜆，加上餐廳附送的蒜蓉田螺 (OpenRice訂位嘅優惠)。個帶子沙律幾好，因為味道幾清新，可以消下滯。而個香茅煮蜆就中規中矩。田螺味道還好，但係再配埋麵包殺傷力就太大。至於個安格斯牛扒係一個視覺享受，因為侍應會喺件牛扒上面淋上燃燒中嘅酒，打卡效果一流，而且件牛扒亦會充滿酒嘅芳香，非常有心思。埋單$700都唔使，平過我嘅預期，有驚喜值得推薦。…Read More

因為有一段時間冇食台灣嘢，所以之前有一日嚟到啟德玩就選擇咗呢一間台灣麵作為晚膳嘅地方。以台灣麵店舖嚟講，呢間算坐得闊落及舒適，衛生好而且燈光充足，至於服務態度就尚算 ok。我同另一位朋友就分別叫咗台灣牛肉麵(小辣嘅麻辣湯底) 以及金錢肚牛筋麵，另外再加咗花枝丸以及綜合滷味拼盤作為小食。個台灣牛肉麵味道幾好，不過份量略嫌少咗啲，同埋佢嘅小辣都已經係幾辣，如果大家唔食得辣就千祈唔好揀。至於個兩點份小食就中規中矩。叫咗四樣嘢都唔使$300買單，價錢算幾平民化。…Read More

之前為咗 team dinner，有同事選擇咗呢一間位於一號銀海嘅中菜廳。位置上並不方便，我哋都係坐的士先去到，距離最近嘅地鐵站都會有一段距離，而且位置都算隱蔽。入到去地方好闊落，格調唔錯，服務同衛生都幾好，例如侍應都會比時間我哋幫啲食物消毒。重點係由於呢間中菜館晚市門可羅雀，所以個環境好幽靜，非常符合我嘅要求。我哋之前已經安排咗個菜單，一共叫咗七道食物，雖然份量唔算太大，但係我覺得整體嚟講味道唔錯，而且佢哋全部嘅賣相都非常適合打。我最推薦嘅係玉帶冷翡翠、叉燒以及東升斑。玉帶冷翡翠味道好清新，至於個叉燒就唔算肥。所有食物的賣相可以參考我附送的圖片。由於我唔使俾錢 所以我冇辦法評論個性價比。整體嚟講食物質素值得推薦，美中不足係個交通唔方便。…Read More