Lamlam26's Profile

呢一間係一間有人情味嘅餐廳，入面廚房同侍應感覺就好似係一家人咁樣，有講有笑，就連啲乘客都畀佢哋感染，所以第一次幫襯嘅我都食得幾開心，唯一嘅缺點就係食物嘅質素指只屬一般。葡國雞焗意粉係即叫即煱嘅，所以時間長少少，不過侍應叔叔就已經落單嘅時候提咗我哋，好貼心。整體味道普普通通，還可以。而呢個蕃茄大蝦意粉幾多比較好，個番茄汁調得錯，隻蝦都ok，不過炸得勁咗少少，呢種意粉好少係炸蝦黎嘅。飲就叫咗一杯玫瑰花茶同埋一杯凍即磨咖啡，好欣賞佢哋除咗紙飲筒之外仲有金屬飲筒畀客人揀，我好怕啲紙飲筒浸到淋曬。…Read More

這間店的漢堡包很出名，因為唔想食牛肉，又唔想食魚柳包，所以就揀咗余均益辣椒醬巨型雞扒漢堡，塊雞扒真係好大，炸粉好薄，炸得夠香脆，配余均益醬帶少少辣又真係幾好食。大食漢堡包點可以無薯仔條呢？所呢度嘅薯條有大同細size，我揀咗大嘅，幾好食，都幾有薯仔味。聽講呢度嘅魚湯烏冬都好出名，原來可以就咁叫一碗魚湯，所以又叫埋，呢個魚湯真心正，好濃嘅魚味，真係真材實料。最後加錢飲咖啡，作佢杯latte都唔錯，咖啡豆都幾香。…Read More

今晚難得食舊式上海小館嘅餸菜，真係開心，因為依家呢類餐館買少見少。先嚟松鼠黃魚，大大條魚大大碟先至係143蚊，真係平到你唔信，而且個味道唔錯，個汁唔會太酸，條魚都夠厚身。其實跌松鼠黃魚要嚟送飯真係絕配，但係一場嚟到呢啲舊式上海舖，點可以唔試上海粗炒同埋炒年糕呢？比起松鼠黃魚，呢度嘅上海粗炒又相對細碟咗，味道還可以，不過就炒得濕咗少少。至於個雪菜肉絲炒年糕幾好食，啲雪菜好香，啲年糕如果再煙韌多少少會好食啲。呢度嘅豆漿都幾好飲。…Read More

呢一間深水埗名物屹立多年真係大件夾抵食，啲夥記係年長少少，不過服務好好而且好有人情味，今時今日香港真係好難搵得到。炸大腸份量足且又炸得好脆口，點埋甜酸汁就perfect。粟米魚肚羹勁大鍋，竟然$100都唔使，入面仲係勁多魚肚，認真誇張。炸腰肝卷係呢度嘅名物，好食，唔多油，雖然知道入面係豬潤豬腰呢啲內臟，不過食嘅時候又唔係覺得好邪惡喎，外層脆漿都幾薄，整得幾好。最後要咗個蝦醬通菜，又係好大碟，非常滿足。…Read More

原個雪燕燉椰皇，堂食優惠$28，冇將價就貨，熱辣辣大大個，仲要勁多雪燕，媲美旺角某某老牌大酒樓嘅著名燉椰皇，每日限量50個，黃昏六點幾去幫襯竟然已經賣曬，因為我聽到之後有人再叫，侍應姐姐已經話燉椰皇賣曬，叫佢哋轉食燉木瓜，認真誇張。哋都有叫到呢個同樣做堂食特價嘅桃膠燉木瓜，都係原個上，以$28黎講，呢個燉木瓜嘅size都算大，入面嘅桃膠都唔少，都幾足料，希望佢哋堅持到咁好嘅出品，等我哋啲街坊又口福。…Read More

呢一間可以話係一間非常正宗嘅工廠區工廠大廈canteen，如果冇人推介，真係唔知呢度夜晚咁精彩，可以食到咁正咁刁鑽嘅餸，可惜我哋今次唔夠多人，只係叫到四碟嘢，下次真係要吹雞嗌一棚人嚟，試埋佢其他嘢。四樣嘢之中最有驚喜就係呢個砂鍋蔥惹味炒飯，佢用嘅材料唔算複雜，不過呢個砂鍋飯真係好香，夥記拎埋嚟嘅時候已經聞得到，撈一撈勻佢就可以開動，個飯炒得夠乾身，啲配料亦都炒到香曬，最重要係個底竟然有飯焦。第二個覺得好正嘅就係呢一個要預訂嘅煲，魚扣煲，啲魚扣好大件，證明咗條魚本身應該都幾大條，煮得好入味，夠曬淋，而且冇腥味，用薑蔥爆香咗更加好食。椒鹽鮮魷同埋啫啫生菜都整得好食，夠鑊氣夠曬惹味。…Read More

聞名不如見面，次次經過都排長龍，所以開咗咁耐都未有機會入去試下，今日竟然機會嚟喇飛雲，經過嘅時候竟然冇人排隊，梗係狗衝入去啦。牛角包就一定要叫嘅，揀咗個原味嘅，22蚊，竟然同隔離麵包部買走嘅一樣價錢。另一個pastry就揀咗肉桂蘋果scone，兩款都好好食，坐低食嘅仲會幫你整返熱佢，另外就叫咗兩杯咖啡，味道都ok，簡簡單單就過咗一個精彩嘅下午。…Read More

作為啟德居民，唔講都唔知Airside 7樓開咗間新嘅西餐廳，今日試咗，性價比高，最重要係個價錢非常親民。首先叫咗兩個小食，分別係炸番薯條同埋炸魷魚鬚，呢類小食你話做得好突出就好難嘅，不過最重要係呢啲油炸嘢竟然出嚟唔算多油。煮食就叫咗西班牙乳豬，即叫即做，豬嘅質素唔錯，豬珠騷味，而且脂肪含量唔高，唔使一邊食一邊𦧲肥膏，乳豬皮做得好脆口，另外佢乳豬嘅伴碟都非常精彩，睇得出呢間餐廳非常有心思。飲品叫咗佢哋嘅特飲，左邊個杯係海底椰冰檸檬茶，右邊個杯係鴨屎香檸檬茶，叫嘅時候都冇諗住咁大杯，所以呢間西餐廳真係又抵食又好食。…Read More

依家呢一間牛肉檔專門店越開越多先至有機會幫襯一下，因為之前成日都見佢排長龍，所以一直都未有機會幫襯。秋葵牛肉丼，要咗個中size，牛肉同埋秋葵嘅份量都算多，味道就同吉野家差唔多，牛肉都唔算好肥，中size其實都幾大碗。另外貪得意叫咗一個泡菜，都係加$10 ，以呢個價錢嚟講都算大份。另一份就叫咗牛肉咖喱飯，都係中size，要咗青菜套餐，再加杯冰紅茶，份量算幾足，男士都食得飽，青菜比我想像之中嚟得大碟。抵食。…Read More

今天元朗工作試咗一間性價比高嘅西餐廳，食物質素唔錯，而且坐得幾舒服。佢呢度嘅set lunch都有好多選擇可以揀，我就揀咗紅酒燴牛尾，牛尾嘅份量比想像之中多，而且肉嘅部份亦都算多，唔會一味得牛尾嘅骨冇牛尾肉食，佢個牛尾炆得好入味，而且啲肉質都比較嫩，好食。就咁睇落去呢個餐要$85好似價錢偏高，但係除咗主菜之外，佢仲有餐湯同埋餐包，餐包仲要係多士，脆卜卜好正，今日個餐湯係南瓜湯，味道唔錯。 個餐仲連埋一杯餐飲，我就叫咗熱咖啡。…Read More

呢一碗擔擔麵個麻醬溝花生醬味道真係好香，食嘅時候先將個醬同埋個湯撈勻，上海幼麵好滑身，普普通通嘅榨菜絲肉碎同花生碎就已經令到呢碗擔擔麵好好食。呢碗上海雲吞味道唔錯，真正做到皮薄餡靚，有一塊紫菜同埋個湯入邊有好多蝦米仔，雖然明知道係味噌湯，但係都忍唔住飲咗幾啖。韭菜餃要咗放湯，因為諗住佢會冇煎餃咁熱氣，餃入面嘅韭菜好新鮮而且又散發住韭菜嘅香味，餃子塊皮係正宗北方餃子厚身少少嘅皮。杯豆漿都幾好飲，好香口味句。…Read More

喺土瓜灣打滾咗咁多年都唔知原來有呢一間食煲仔飯嘅茶餐廳，雖然味道雖然未係超級突出，不過勝在性價比高， 60幾蚊一個煲仔飯，大大煲兼材料足。鳳爪排骨飯加潤腸，鳳爪嘅質素就一般，不過個排骨幾好食，潤腸亦都唔係嗰啲一味得個肥字嘅潤腸，仲有少少酒香味添。以兩個煲仔飯嘅質素嚟比較，呢個鍋蛋牛肉飯出色好多，牛肉新鮮而且份量多，煲仔飯有飯焦。我哋另外再叫咗兩個小菜，分別係欖菜肉碎豆腐煲同埋啫啫芥蘭煲。兩個煲仔菜嘅份量都比想像中大，而且味道唔會太鹹，同一般茶餐廳好唔同。最後想讚一讚呢度嘅服務，因為知我哋食煲仔飯會share所以主動俾碗仔我哋，另外又有一條毛巾俾我哋揭開煲仔飯個蓋，好細心。…Read More

封門柳黑牛吐司，睇落去好似唔係好大份，實情就係超級飽肚，我覺得比漢堡包更飽肚，不過切開咗方便兩個人share。選用竹炭吐司令到呢個菜式顏值加分。封門柳牛肉味濃，加上條條牛肉都呈現紅紅地色，生熟度掌握得唔錯，無血水但係夠嫩。加錢轉特色薯條餐，而特色薯條就選擇咗呢個火炙明太子薯條，呢個薯條真係有啲料到，第一次食到呢個配搭，喺幾款特色薯條之中呢個性價比最高。跟餐飲品就可以喺雪櫃任揀，除咗一般嘅汽水之外，竟然有紙包裝烏龍茶或者茉莉花茶，健康啲嘅選擇。…Read More

估唔到紅磡有個咁chill嘅地方，地方靚，又竟然無乜人，價錢好合理，真心正。Mango Smoothie $45，真芒果打冰，性價比高。Lemongrass Tea $34，雖然係茶包的茶，不過場內有自助沖熱水，於是就變成無限添飲。舒舒坐幾粒鐘，傾吓計，無人趕，有冷氣。…Read More

寒冷嘅天氣就係令人想起蛇羹、煲仔飯同埋羊腩煲，呢間小菜館頭兩樣就好似冇，不過呢度嘅羊腩煲又的確係真材實料貨真價實。啲羊腩唔算好肥，但係又唔係瘦晒，始終我覺得食羊腩煲啲羊腩係要有小小肥先至夠香嘅，呢度嘅羊腩炆得好腍，而且又好入味，啲馬蹄同埋枝竹都好好味，另外會跟一碟生菜俾你之後落嚟食，唔好嘥咗個羊腩汁啦。呢度嘅咕嚕肉又係做得好好食，外面輕微脆口，質感有啲似齋雞粒，入面嘅豬肉好軟熟，連啲半碟菠蘿都好味過人，呢間小菜館真係有料到。…Read More