dukekev's Profile

城中最著名吃Prime Rib的餐廳非Lawry's莫屬。美國的元祖店已有超過80年歷史。早就想一試呢間餐廳，所以趁生日前預訂了HSBC Premier Dinner Set，$1388兩位。餐廳位於中環，內部裝潢典雅，但有點舊。侍應服務很好，入座時要了支still water，索價$95一瓶。餐前有杯柚子清酒泡沫作開胃小品。麵包有水準，暖身且外脆內軟，牛油亦好香。頭盤為海鮮三重奏，有魚子醬藍蝦他他、帶子撻和蟹肉牛油果卷。當中以藍蝦他他最好食，生蝦爽滑，份量足，配上魚子醬和豉油汁更顯鮮味。冰旋翡翠沙律為Lawry's其中一道招牌菜，十分講究溫度。侍應先派冰叉，然後即席把沙律菜放入不鏽鋼碗，並於碎冰上旋轉拌勻食材。沙律菜爽脆，並有車厘茄和紅菜頭絲，佐以些利酒沙律醬。如果以煙肉代替紅菜頭絲就更合我心水。經典大蜆周打忌廉湯 - 大蜆有4大隻，十分鮮甜。湯也充滿大蜆和洋蔥的甜味，十分好飲。上主菜前先來個青檸雪芭清新味蕾。主菜燒牛肉選了medium rare，由廚師推出招牌不鏽鋼餐車，並即席切出美味的燒牛肉，並配有yorkshire pudding和薯蓉作配菜。燒牛肉嫩滑，肉味豐富，但沒有想像中juicy，可能點rare會比較好。Yorkshire pudding偏鹹和乾，唔太好食。另一道主菜為香煎石斑魚及燒八爪魚。燒八爪魚有碳燒味，軟滑不韌。石斑肉質就比較嚡。甜品為椰香鮮蜜瓜，像蜜瓜肉糖水加上椰子雪糕。味道普通，個人不太喜歡。由於是生日的關係，侍應邊唱生日歌邊送上蛋糕，蠻有儀式感。生日蛋糕都好食，甜度適中且忌廉不多。…Read More

位於紅磡巷仔的隱蔽小店，只有四五張枱，主打新派越南菜。平日午市座無虛席，曾試過walkin但冇位。今次於晚市walkin就不用等位。點了一個二人套餐$298，包沙律、小食一款、主菜兩款及餐飲兩杯，而且免加一，性價比高。是日沙律有四隻鮑魚仔。鮑魚仔爽口，沙律菜新鮮。小食點了香茅魚露煮蜆，為當晚最好吃的菜式。啲蜆大隻鮮甜，份量十足，惟少量仍有沙。個蜆湯非常鮮甜，由於落了香茅、南薑，感覺有點像不辣的冬蔭功。海防生醃海鮮飯 - 飯充滿椰漿味，配料有赤蝦、帆立貝、八爪魚和鮮墨魚，很足料。當中以八爪魚和墨魚最入味，新鮮爽口。蝦和帆立貝較淡味，如灑幾滴刺生豉油就更好。總司令便當，有香茅豬扒、越式蛋餅和胡椒扎肉，加埋隻燶邊太陽蛋，賣相極佳。厚切豬扒味道不錯，並不是一般餐廳用鬆肉粉醃過的豬扒。黑糖芝士奶蓋班蘭珍多冰 - 珍多冰crossover台式飲料加上黑糖芝士奶蓋，味道不太甜，但實在太heavy了，還是喜歡傳統的。…Read More

午市套餐$118，包一碗拉麵、一客前菜，兩串串燒和一杯嘢飲，另收加一。前菜秋葵味道不錯。招牌虎蝦濃湯麵，需另加$50，有點貴。湯麵賣相吸睛，隻虎蝦好大隻，用櫻花蝦包住嚟炸，味道有兩個層次，蝦味濃郁，幾有創意。湯底似龍蝦湯，極濃稠，越食越杰身變撈麵。一個人食晒成碗好膩下。濃厚地雞蒜湯拉麵，需另加+$10。湯底蒜味太濃，個人覺得麻麻，蓋過晒其他味道，如果係純雞白湯就好。配料就幾好食，有粟米秋葵雞皮串、雞肉丸和溏心蛋。串燒質素相對較好，火侯有水準。雞皮蝦卷(+$2)，蝦肉爽口，雞皮香脆，好好食的配搭。葡提鴨卷，鴨肉比較嚡，包住粒提子幾特別，衝擊味蕾。蟹肉牡蠣(+$2)，炸廣島蠔鮮味，加上蟹肉點綴，雙重口感。海膽大葉卷(+$4)，火侯剛好，海膽creamy鮮甜，份量亦足。…Read More

以前幫襯過其他牧羊少年咖啡館分店，原來這間太子店是元祖店。餐廳位於小街，閒日晚市入座率都有近八成，以現時的市道來說已經不錯了。食物質素不俗，環境寧靜，方便傾偈，服務到位。點了一個2人套餐$428。前菜選了參巴鮮茄煮沙白大蜆。蜆不算很大，份量適中。醬汁微辣惹味，略蓋過蜆的鮮味。即場入會做會員送咗客迎新小食 - 燒汁焗八爪魚丸。八爪魚丸新炸起熱辣辣，爽口彈牙，配上燒汁出奇地好吃。主食兩客，選了金沙咸蛋黃鳳尾蝦意大利粉。咸蛋醬不太油膩，味道跟口感都不錯，惟蝦只得4隻，慷慨點會更好。鹽麴燒比目魚，伴烤澳洲西蘭花及普羅旺斯燉菜。比目魚煎得皮脆肉嫩，配菜都煮得入味好吃。飲品大部分都不用額外加錢，選了栗子燕麥奶沙冰，栗子味濃，比想像中好飲。冰梨無花果白桃烏龍芝士奶蓋，配搭看似特別，飲落正正常常，沒特別驚喜。甜品為開心果味的Häagen-Dazs雪糕。另一客+$58 upgrade焙茶心太軟蛋糕，配焦糖脆餅雪糕。心太軟熱辣辣焗起，外皮微脆，流心醬順滑，焙茶味濃郁，味道很好。…Read More

之前幫襯過晚市火鍋，花膠雞湯底濃郁好味，火鍋料新鮮，但價錢略貴。此店現在午市推出花膠雞米線，湯底跟晚市火鍋一樣好味，花膠都大大件，只需$68，性價比很高。米線上桌時還用上酒精火鍋爐，保持熱度，誠意十足。另外還點了蟲草花竹笙蝦丸米線($58)。手打海蝦丸有兩粒，十分彈牙，平時晚市賣$20粒，現在相對性價比更高。追加小食$10兩粒荔枝蝦丸都脆口好食。午市免收加一，不過選擇其實不多，基本上都是湯雞米線，有醉雞、椰子雞和貴妃雞。…Read More

據聞是越南人主理的小店，位於較隔涉的但多美食的崇潔街。小店座位不多，午市客人多會有點逼。午市點了一碗生牛肉湯河($55)和香茅豬扒湯河($50)，加$23兩件蒸粉包和$8凍青桔茶。生牛肉湯河湯底清香順喉，牛肉份量適中。香茅豬扒肉質鬆化，正常發揮。蒸粉包味道稍淡，要自行加魚露調味。青桔茶微酸清新，幾特別。整體來說性價比高，下次可以試試其他菜式。…Read More

區內新開的外賣小店，店名特別。Menu選擇不多，只有羊渣麵、兩款餃子、煎鴨蛋和特色飲品。羊肉羊渣麵($48)，選了上海麵，外賣分湯上，麵質保持彈性不過淋。湯底濃郁呈奶白色，都帶點羊味。羊渣是羊肉碎片連肥膏位炒到焦脆，羊油香四溢。羊肉羊渣兩種口感相得益彰。巨大胡椒椰菜豬肉煎餃(跟餐+$8)，的確大大隻餡料足，煎得香脆不太油，胡椒味濃加上秘製醬汁增添惹味。整體食物是不錯，不過款式太少，而且主打羊肉受眾面略低，感覺上較難維持。…Read More

位於黃埔的葡國菜餐廳，食物質素幾好，價錢合理，服務都不錯。平安夜當晚試咗佢地嘅Christmas Menu 4人餐(未計加一$1388)，包任食自助沙律吧和4杯節日特飲。頭盤有兩道：火紅吞拿魚腩釀牛油窩夫 - 吞拿魚蓉味道不濃，窩夫酥脆，幾特別嘅配搭。香酥果仁花鴨胸配百香果陳醋 - 鴨胸肥美，厚切7成熟，鴨肉嫩滑，肥膏部份燒得焦脆，油香四溢，好好食。湯就係毛蟹肉海鮮濃湯配烤海鮮碟。海鮮濃湯除咗蟹肉，另有肥美鮮蠔、爽甜大蜆、魚柳和帶子，好豐富嘅一道湯。三道主菜都很有質素。赤燒西冷蓋頂扒配燒蕃薯蓉和扒菜 - 牛扒燒得剛好，肉汁豐腴，有肉味。慢煮聖誕燒雞卷配醬燒海鱔 - 燒鱔厚切，燒得幾香口，肉質彈牙，但有些碎骨。燒雞卷傳統煮法，有用雞肉和煙肉包住讓餡，味道都不錯。醬香鮑魚配海膽醬葡國燉飯 - 好有水準嘅risotto, 個汁好好味，好creamy，濕度剛好。鮑魚粒不多，味道亦被risotto個汁蓋過。…Read More

初試呢間開左兩個多月嘅外賣小店，叫左$36嘅「香煎慢煮豬肉眼炒滑蛋三文治」，即叫即整，熱辣辣，外賣盒包裝精美。三文治麵飽屬厚切，餡料滿滿，睇落勁大份，超足料。豬肉眼就係成塊完整豬扒切件，由於係慢煮，所以肉質好腍；炒蛋就成吋厚，香滑好味。食左半份其實已經有D飽，食到尾都要放棄少少麵飽，真係食唔晒，好少食三文治食到咁飽。唯一美中不足係所謂嘅烘底，其實係將塊飽用油喺鐵板度略煎，既唔脆，又索油。如果就咁用返焗爐烘塊飽，效果應該更好。…Read More

位於啟岸商場的馬拉菜小店。店面好細，座位只有十數個，而且有點迫。小店由兩人打理，一個煮嘢，一個侍客，客人多時反應會慢啲，但服務態度很好，有人情味。招牌檳城蝦麵 - 個湯底蝦味好濃，足料製作，入口似飲緊龍蝦湯，飲完都唔口渴。麵底係油麵米粉摻摻，配料豐富，有燒蝦、大蜆、豬頸肉、魚蛋、蛋、豆卜等。滋補肉骨茶 - 湯底濃，藥材味較重，食到底有點苦。豬肉唔嚡口但冇乜肉味。其他配料有冬菇和豆卜。脆炸南乳雞翼 - 跟餐小食，即炸起皮脆肉香冇得輸。麥脆咖央多士 - 多士烘得香脆，配上極邪惡的厚切牛油和椰香味濃的咖央，好好食。椰絲斑蘭卷 - 額外送嘅甜點，斑蘭味被椰絲蓋過，不過不失。…Read More

餐廳較小，全場只有8張檯，有少少壓迫感。獲安排坐窗口位，景色開揚，可望到維港夜景，屬餐廳最大賣點。點了兩個「微醺之夜」套餐，其中一個主菜加錢食龍蝦，兩個餐連加一$840。整晚服務都很好，侍應主動加水，跟食客有適量的交流。鮮果蝦沙律配君度橙酒汁 - 蝦肉爽口，開胃的前菜。雪利酒紅酒洋蔥湯 - 加左酒個味怪怪地，帶點微酸，都係正常洋蔥湯好飲D。香檳泡沫南瓜海鮮湯 - 有蝦有蜆，味道一般。香煎蟹餅配三文魚籽 士多啤梨紅酒汁 - 蟹肉一絲絲好足料，蟹味濃郁，再煎香D就更好。香烤味噌三文魚清酒煮蜆 - 三文魚煎得好好，皮脆肉嫩。蜆就煮得過熟，有點韌。焗龍蝦尾配蘑菇貝殼粉 忌廉馬德拉酒汁 - 龍蝦肉爽味濃，煎帶子和蜆殼粉都好食。Tiramisu窩夫 配馬卡龍 - Tiramisu味道不錯，賣相亦佳，但窩夫已淋，有點畫蛇添足。訂檯時主動問是否需要碟邊寫字，服務貼心。白酒藍莓啫喱 提子冧酒雪糕 - 餐牌寫提子冧酒雪糕，嚟到變左cookie & cream雪糕，仲啱口味。啫喱就冇乜味，麻麻地。…Read More

喺香港食新疆菜嘅餐廳唔多，鍾意食羊嘅朋友唔會錯過任何一間。天山小館屬茶餐廳格局，除左新疆菜，仲有粵菜和川菜，價錢稍貴。第一次黎就主打食羊：羊肉餃一打($140) - 餃子大小適中，多汁多餡，都有羊味，但$140真係有D貴羊肉串4串($88) - 烤得剛好，不會太乾。羊肉餡餅4件(118) - 餡餅炸得香脆，餡料唔多，但仍保持肉汁。烤羊排4件($178) - 羊排肥美，燒得香口，配上孜然粉好惹味。手抓羊肉4件($258) - 羊肉嫩滑，煮得入味，洋蔥就比較生。限於羊肉本身質素，味道跟大陸吃到的仍有距離。大盤雞半隻($208) - 半隻雞黎講，雞件唔係好多，配料就有薯仔、辣椒、青椒。墊底嘅褲帶麵好煙韌，索晒D汁幾好食。…Read More

外賣點了10隻雙拼湯餃($42)，5隻韭菜餃，5隻木耳椰菜餃，外賣加$1。落左order先見到有off menu嘅是日推介香菇蓮藕豬肉餃，唯有下次先試。餃子皮薄，餡料足，大小適中。個人覺得韭菜餃味道較濃好食D；至於木耳椰菜餃就較有口感。雞湯湯底冇乜特別，略淡，但飲完唔口渴。外賣都有三盒醬：醋就最match餃子；豆瓣醬太杰唔係我杯茶；菜甫爽脆略嫌唔夠辣。紅磡區內餃子店唔多，呢間都可以一試。遲D打算翻兜試埋煎餃，同其他口味餃子。…Read More

週末自助午餐以海鮮盛宴為主題，汽酒、果汁任飲，食物款式都算豐富，味道就不過不失。冰鎮海鮮有蟹腳、凍蟹、黃金螺、凍鮑魚等，質素普通。魚生就比較新鮮。熱食有燒龍蝦、粉絲扇貝、片皮鴨、燒牛肉、魚翅灌湯餃、紅燒雞絲翅等，還有不少中式點心。叉燒有驚喜，半肥瘦微焦，好高質。甜品種類不多，款式亦不算吸引，惟有movenpick雪糕撐場。值得一讚是環境和服務，一行12人有個獨立partition, 侍應服務亦不錯。…Read More

星期五晚未到7點已經全場坐滿，十分旺場，氣氛熱鬧，但侍應就明顯不足，個個都忙過不停。想加水、追單、埋單都等一段時間先有人回應。點了兩個DiningCity餐廳週的set dinner，共四道菜，每人$298。上菜好慢，飲完湯等左20分鐘先上前菜，之後再等多半個鐘先上主菜。綜合來說，服務跟食物質素都在水準之下。蟹肉粟米湯 - 粟米湯濃，蟹肉鮮甜，還有少許魚子醬提味，味道不錯。芝麻牛油果沙律 - 芝麻包滿牛油果，幾香口。沙律菜新鮮，無花果醋味道獨特。煙三文魚三重奏 - 三款煙三文魚各兩片，有刁草和酸忌廉味。香煎三文魚配蘋果氣酒煮海鮮 - 三文魚煎得香脆，但份量略少。海鮮有3隻大蜆和3隻青口，但其中1隻青口只有殼沒有肉，蘋果氣酒汁偏甜。網燒安格斯牛肩胛肉小排(+$68) - 全晚最失色的一道菜，牛扒生熟度近medium，筋多且極韌。甜品為奶油煎餅卷和Tiramisu(+$38) - 煎餅卷預先製作好，餅卷雪硬左但都脆。Tiramisu比想像中普通，酒味欠奉。頂層的朱古力粉太多，入口涸喉。訂檯時備註在甜品碟邊寫字最後亦不了了之。…Read More