堅記素來鐘意喺荃灣搵食，皆因地方近、選擇多，呢日咁啱身處荃灣，咁啱路過呢間銘陽車仔麵，又咁啱下午茶時間，咁就梗係唔好諗咁多，車個麵先再講🍜😎。傳統車仔麵店都係自己拎張點餐紙圈圈畫畫咁樣樣，店員安排入座之後，當然第一時間睇下有咩好嘢食先。餸同麵類嘅選擇都算多款，俾我到佢有個招牌鮮切麵，話到明係招牌嘢，我就諗都唔諗一嘢圈落去，而餸方面，我就揀咗豬紅豬皮牛筋。而嘢飲方面，都有好多選擇，有好多台式飲品，珍珠或者水果茶，果然係下午茶嘅好地方，堅記鐘情抹茶，就揀咗杯抹茶奶茶試試佢。因疫情關係，堂食嘅客人比較小，於是乎呢頭落完單，唔使幾耐果頭就上餐。麵一上，識食嘅當然係第一時間整啖湯先，而我為咗試真佢嘅湯，我特意冇order加任何腩汁或辣汁之類。首先湯頭比較重，濃香，但又唔係死咸，可接受，如果食開重味嘅朋友會覺得超正。之後到個麵，望落去好似淋patpat，堅記最怕食淋過毛巾嘅麵，但係唔嚟都嚟咗，唔好諗咁多啦，拎起筷子一嘢夾落去，咦？又幾實淨喎，唔會係一夾就斷嘅朋友。一啖啪落去，非常彈牙，口感有啲似日式手打烏冬，煙煙韌韌咁樣樣，果然係招牌，厲害厲害，驚喜驚喜！而餸方面，首先牛筋同豬紅係非常入味，牛筋燜得夠哂林，非常軟滑，但係又唔會話燜到爛哂咁樣，豬紅亦都冇話一夾就散，好食！再嚟就係豬皮，非常爽口，唔會話硬邦邦，非常乾淨冇豬毛，索一索啲湯然後一嘢啪入口………嘩！爽呀！最後就係杯抹茶奶茶，由於台式飲品一般都係偏甜嘅，而堅記又唔飲得太甜，於是乎就揀咗少甜，味道調校得幾好，正是我心目中想要的甜度，不錯不錯。總括而言，呢間車仔麵可以話係抵食得嚟又好食，同相類似嘅車仔麵店，價錢大同小異，但係佢份量就多多。今次就試住咁多先，下次一定會再去試埋其他麵類或者小食😋👍👍…Read More
。
