ngkuowai's Profile

去東大街一般就係食牛腩面，或者係格仔餅。但係呢條街其實全部都係好嘢，就好似呢間泰國嘢食咁。真係抵食夠份量。🍖飲品先到過食物，佢嘅大杯程度，完全可以由頭飲到尾，夏天由咁熱嘅外面行入嚟，無論係泰式茉莉奶茶，菠蘿梳打，定係芒果沙冰，都超級透心涼。而且勁大杯，由頭到尾一路食一路飲，咁先至爽。🍖我哋叫咗燒牛肉同埋燒豬頸肉，炭燒香味都係呢兩種食物嘅一大特點，不過最怕就係燒到燶曬，而佢地冇，所以除咗焦香，兩種肉嘅味道都非常突出，我尤其鍾意豬頸肉嘅爽彈，而且佢採用薄切嘅方法，啱曬女士優雅咁食。🍖西蘭花炒蝦肉，一上台仲係熱辣辣，啲蒸汽狂飆，同台嘅人都鍾意影相，但係一致同意食咗先講，因為實在太吸引。簡單用魚露炒過，味道滲入曬西蘭花嘅窿窿，又帶出蝦肉嘅鮮味，我哋大家都覺得做咗正確嘅選擇。🍖船面又係另一樣我去泰國菜必食嘅嘢。我哋揀嘅係雞肉，不過重點系個湯底，好夠濃，而且面同埋個湯中間夾雜咗好多芽菜，令到食起上嚟非常有口感。小細節有時仲重要過主菜。🍖另一個小細節喺芒果糯米飯，黑白糯米每樣一邊，夾成一個心形，好睇又好味，加上啲芒果超甜，系最佳嘅甜品。🍖意猶未盡，食甜品前，我哋又叫咗燒雞比菇同扇貝，估唔到雞比菇燒完咁好味，但個扇貝先係最正，夠曬厚身，又好濃牛油味。全餐都食得好幸福。…Read More

喺呢個市道，要成為一間紅店，其實已經好難，好多人都唔會出街食飯。仲要開得夠夜，同埋keep住有人排隊。真係唔講得笑。佢係米芝蓮必比登推介，多人排嘅原因自然唔係只係識得市場推廣咁簡單。佢嘅形式係做到好似泰國Thongsmith咁，選用泰國原產地嘅食材，加上出色嘅signature船面同埋蟹肉奄列，再額外加埋一啲街頭小食嘅併配，食物嘅質素先至係佢真正嘅成功之道。🍖講得signature，就證明我哋有叫啦，船面湯底真真係好出色，夠曬濃，但係冇血嘅腥味，又唔會有味精嘅感覺。我哋揀嘅係豬肉同豬肉丸，一次過食到兩種豬嘅口感。豬肉唔會嚡，仲有小小滑身，肉丸就好有泰國風味。加埋下面有大量嘅芽菜，同個粉好夾。🍖蟹肉奄列份量超豐富，懷疑佢入邊有成罐蟹肉。唔單止一絲絲，仲有一舊舊嘅。然後個外皮煎得脆脆地，唔係蕉燶嗰種脆，係雞蛋皮自己本身嗰種脆。裏邊就滑嘟嘟，但係一啲都唔水。本身繫有少少濕身嘅蟹肉喺入邊，要做到呢種效果，其實唔係咁容易。🍖除咗兩樣之外，我哋又叫咗個燒牛肉。佢其實系燒和牛，所以同一般喺出邊食嘅有啲唔同，我口講有啲，其實都幾大唔同。和牛本身肉質就係超好味。而燒牛肉一般系注重炭香，但就會相對變得乾身， 個人覺得普通嘅燒牛肉，唔會將重點放喺肉質，怕會嘥咗舊靚肉。唔試又點會知，有比較有傷害，呢度做到又有炭香，又有juicy口感，可以話係完勝。呢度大家都想排隊嚟食，試完之後，你自然就會知道原因。…Read More

食拉麪先品嚐湯底係唔使講嘅嘢。一般嘅湯底都係豬骨湯，其實亦係我最鍾意嘅味道。 不過如果要喺豬骨湯以上加其他嘅味，原來加上魚介係一個好好嘅選擇。因為豬骨湯系濃厚嘅味道，但係魚介就完全提升鮮味。情況就好似阿媽喺屋企煮個骨湯，加入干瑤柱或者魷魚干咁。 🍖所以我今次點嘅煮干魚介豚肉拉麵一啲都唔會令我失望。湯底真係好飲到不得了，魚干嘅味道將豚骨湯提升得好好，然之後我又發現有少少胡椒碎，同大量嘅生洋蔥，呢兩樣嘢就更加令到鮮上加鮮。增加咗湯底嘅爆發力。面嘅質地我哋揀咗適中，咁就唔會令到啲面太容易滑入喉嚨，由湯底去開路，令到我可以分明咁樣去品嘗面質嘅口感。叉燒方面亦都值得一讚，份量好夠，夠曬厚身，可以話係物超所值。而且質素亦都好高，肥瘦適中，瘦肉部份夠曬淋身，但係保留纖維，所以有咬感又唔會散開。又有少少肥肉增加香口嘅感覺。 🍖我又另外叫咗一個豚肉拉麵。目的就係想睇吓佢單純豚肉湯底嘅味道，當然系一樣濃厚，而且如果唔鍾意魚味嘅人，去食呢個一樣會覺得頂呱呱。 🍖今餐我哋加咗味玉，海苔，炸雞炸餃子，仲有波子汽水同啤酒。小食同飲品都好有水準。啤酒仲要系生啤添。 …Read More

好多時候都係話放題質素都好好，可以媲美自助餐。但係原來喺酒店食放題，係無可媲美咖。 首先係枱面嘅空間。俾平時嘅大好多闊好多，然後菜式嘅擺設同器皿都特別靚仔。最後就係食物嘅質素，每一種都好似比普通嘅高一個級數。 🍖先由魚生講起，薄切蜜柑鯛，我係第一次喺omakase 以外食到。而且肉質同魚嘅鮮甜味絕對就係omakase 嘅水準。跟住就係海膽壽司，同肉身呈粉紅色嘅拖羅刺身，你睇吓啲顏色，唔使講你已經知道佢嘅質素系點。然後如果講矜貴程度，喺放題有原隻龍蝦，同粒粒分明嘅魚子醬，所以話自助餐嘅質素就係咁解。 🍖然後就去熱食，款式好多，所以重點講幾個我最鍾意阮。燒蟶子有啲地方都有，但係連住殼啱啱好啲肉僅僅黐住，就好考師傅功夫。另一個就係豆苗，本身都係一個貴價蔬菜，但係其實要搵鮮嫩唔寡既都唔係咁容易，佢哋嘅處理亦都係值得一讚。我又特別喜歡佢嘅蟹黃粥，食得出好多蟹黃之餘，裏邊仲有一絲絲甚至乎一件件嘅蟹肉，味道非常鮮甜。 🍖頭先講開每樣嘢都矜貴啲，其實連飲品同雪糕都係一樣。佢嘅檸茶，奶茶，咖啡都繫有牌子嘅，仲要系日本牌子。而而家有好多餐廳都有嘅"哈"牌雪糕，佢仲係限定版，即係嗰啲平時去日本旅行要特登走去便利店先買到嗰啲期間限定。 冇比較冇傷害，今次呢餐傷害咗好多餐廳。 …Read More

年尾要清假，就算唔去旅行都要有儀式感。去一個好嘅環境，食一個好嘅午飯，令自己係一個普通嘅休息日，充分咁樣享受休息。🍖簡單嘅一個三色丼飯，其實最唔簡單。用上最甜美嘅材料，配上最好食嘅日本米，粉紅色柔軟嘅吞拿魚蓉，金黃色香滑嘅海膽，仲有粒粒分明鮮橙色嘅三文魚子。三樣嘢真係絕配。因為材料新鮮，全部材料嘅味道都最大化，吞拿魚蓉真係好鮮甜，海膽鮮美唔會腥，魚子粒粒爆開，油份充足。總括嘅評價系顏色超級搶眼，選材一流，味道同口感互相輝映。🍖然後點咗一個口感完全唔一樣嘅一口芝士黑豚卷。佢用炸豚肉球嘅方法處理。外面系脆口嘅炸粉，入面嘅芝士同埋豬肉因為俾熱辣辣嘅外皮包住，出嚟嘅效果特別香，而且芝士因為溫度嘅保存，仲會有拉絲嘅口感。🍖我特別點咗一杯house sake去配搭呢兩個食物。清酒配搭海鮮當然冇得彈，但係配搭脆口嘢一樣系絕配。係一個平日嘅中午，悠悠閒閒咁享受美味嘅日式食物，再由清酒去解放每一個細胞。真係超放鬆。…Read More

最近真係好多內地朋友嚟香港都話要體驗下港式嘅味道，佢哋話要去茶餐廳，又話要試吓篤魚蛋燒賣，又話飲中茶，又要食埋甜品先夠喉，仲要體驗下香港特別又陌生既景點。雖然話推廣下香港文化係唔錯，但係下下要周圍掃街,一樣樣咁去試，都真係會用好多時間。然後居然比我搵到一站式體驗嘅一間餐廳。 重慶大廈，內地朋友聽過又未必想自己去。呢度地庫有一間特色嘅餐廳，竟然可以將上面所有講嘅嘢共冶一爐。而且各樣都做得好出色。 🍖一開始一定係食個菠蘿油，一般人講菠蘿包系冇菠蘿嘅，呢度菠蘿包係有菠蘿。。。嘅裝飾既。真係畫龍點晴，仲要放喺個漢堡包盒，好睇又好食。而且個包真係熱辣辣，菠蘿真係好脆，夾住個鮮牛油好鬼正，就算我哋呢啲本地人食都覺得好味。 🍖跟住就係小食拼盤，魚蛋燒賣腸粉，分開食超好味，但係撈埋一齊，啲醬汁互相混和，一樣咁好味，而且仲可以一次過試到港式獨有嘅咖哩汁，甜醬同埋辣豉油，系盞鬼嘅。 🍖跟住不可不提嘅一定就喺碗仔翅，如果你問一個Gen Z，叫佢地食傳統魚翅，講真，又唔環保又貴，但係碗仔翅就唔同，已經係一個generation X 到 Gen Z都百吃不厭嘅野，加埋麻油胡椒粉，註定係冇人可以抗拒到嘅平民美食。 🍖主食系沙嗲牛肉軍艦包同埋黑椒雞扒飯，後者繫好傳統嘅茶餐廳午餐必食之選之一，前者系變奏咗嘅早餐，但係風味依然實足，尤其系沙嗲超濃郁，雞扒加左黑椒超級惹味，更顯嫩滑。兩種澱粉質更加系提升咗食物嘅層次。 🍖甜品方面，叫咗楊枝甘露同埋芋圓紫米返office繼續嘆，倒出黎真係驚人，楊枝甘露啲芒果畢極都畢唔完，下面又有大量嘅西米，柚子肉。同樣芋圓同紫米都係一樣，而且煲得好淋。同同事一齊分享最開心。 🍖最後梗係唔可以小得飲翻杯港式。我同朋友飲咗原味奶茶同埋紅豆奶茶。講真，港式奶茶一定要係香港飲，喺任何地方都入唔翻呢種風味，真係唔係求其沖，茶葉嘅配搭，沖茶嘅手勢同器具，仲有師傅嘅手法。如果要我揀一樣最代表香港嘅，就係呢杯奶茶。而且奶茶系可以變化無窮，呢度老闆更加好有心咁做好曬五種口味，保證有一樣啱你。 …Read More

Jennie 講得好， it's gonna be f****** hard. 人生真係好難。有一日放工我抬頭望到呢個餐廳，我自然咁產生左共嗚。而且自己加咗個標點，"人生有限，杯"。 🍖賺錢咁辛苦，一定要飲翻杯，啤酒買一送一，再飲白桃烏龍，已經一解千愁。 🍖叫串燒本來係助酒，結果繫好食到變咗欲罷不能，到最後叫到成台係。先從海鮮類講起，蟶子同埋蠔，絕對新鮮，飽滿彈牙，加埋必放嘅蒜蓉，更加系香氣四溢。椒鹽九肚魚，港式嘅名字，日式嘅處理，薄脆嘅天婦羅外皮，包住切開啱啱好一啖一啖嘅九肚魚，同衝擊視角，大大件嘅鰻魚飯糰都係送酒恩物。飯糰嘅紫菜仲係自己可以包，保證最脆嘅時候去食。仲有燒白鱔，個皮燒到超香又脆，肉質爽彈。然後系蝦多士，我鍾意佢保存到傳統嘅蝦多士味道之外，順便加少少炒蛋，所以覺得零舍唔會有油膩感，顏色仲因為咁樣特別提升。 🍖肉類，我哋揀咗五花腩豬肋肉同埋雞腎，兩種豬肉一肥一瘦，各有特色，尤其充滿油香嘅五花腩，同啤酒一齊飲，真係爽皮。雞腎就好有口感，索索聲。 🍖最後系蔬菜，雞油炒番薯葉，啲油突顯到蕃薯葉嘅鮮嫩，但係又唔會太油淋淋。菠菜捲隔住芝士，竟然可以突顯互相嘅味道。最鍾意系燒淮山，點佢個特別秘製醬，零舍驚喜，有清新嘅感覺。 呢度嘅氣氛又好好，餐廳中間就係即燒嘅Bar 枱區域，睇住啲廚師一路咁燒，客人一路咁食，好有氣氛，但係又唔會烏煙瘴氣，好貼心咁喺客人前面都會有玻璃擋住。而我哋坐另外一邊就有無敵街景，所以各有各氣氛。…Read More

想過得好真係唔容易，有屋有樓都未必開心，有時候一個放鬆嘅時空，仲嚟得實際。放工搵一間好嘅咖啡店，喘一口氣，已經算系過得唔錯。呢間cafe地點真係好好，一放工就由煩囂鬧市，直接成為鳥語嘅綠洲，樓底高，空間感好大，而且木系嘅傢俱，令人放鬆身心。🍖食物簡單好味，前菜點咗炸蟹肉球拼薯餅，事實上，晚上食香脆嘅薯餅真係好治癒，有一種唔使俾工作困死，仲可以做到日間本來想做嘅事情嘅感覺，而同樣脆身嘅蟹肉球，入邊仲食到一絲絲蟹肉，而且熱辣辣，系晚上俾一種溫暖擁抱住嘅安全感。🍖香辣蕃茄大蝦波浪粉，波浪粉索住啲汁醬變得非常惹味，個粉系厚身，有咬感，有啲手工面嘅感覺，我冇證實過，但係我當系由家人親手安撫辛勤一日嘅勞累。隻蝦仲要好彈牙添。🍖柚子蜜烤春雞，雞肉好嫩，而且系足足整隻雞，冇多餘脂肪，配合埋烤薯仔唔好，有啲澱粉質，但係又唔太多，更加突顯到雞嘅美味。飲品我哋叫咗有酒又熱嘅whisky snow 同埋好有層次嘅 floating fantasy，酒精帶嚟嘅溫暖，同埋視覺上靚到不得了嘅凍飲，都足以令我放鬆心情。配埋最後嘅 coffee jelly affogato, 兩球大大球嘅雪糕，係晚餐最好嘅結尾。…Read More

講到食嘢要食香味，大概冇一種菜式夠中菜講究。而講到精緻，廣東點心又絕對係佼佼者。今次呢間餐廳，又將色香味同精緻度推高去另一個層次。 🍖佢哋全部嘅顏色都真係太好睇，由一開始橙色嘅芋角，到紅色嘅大根櫻花餃，黑色嘅蝦子海蔘餃，紫色嘅淮山麵，什至個牛肉生煎包下面都鋪滿咗鮮綠色嘅長蔥，全部都係最好嘅視覺享受。 🍖佢嘅香氣亦都非常出眾，芋角上面有魚子，同海蔘餃上面嘅蝦子，系味覺上嘅鹹香，生煎包鋪係底嘅蔥，就充分咁樣帶出青蔥嘅味道，又可以聰明咁避開咗將蔥夾雜喺肉類入邊，非常為我哋呢啲唔食蔥嘅人著想。最勁繫個淮山麵，佢撈咗個松露油，成功為成個麵帶出香氣，但係最緊要系帶出埋上面半肥瘦叉燒嘅肉香。所以食上嚟嘅時候更加系香上加香。 🍖最後講嘅係味道，其實溫度決定味道，蒸籠上嘅餃，當然係熱辣辣。生煎包係用鐵板上，保存溫度之餘，亦都令個皮更加脆，熱辣辣嘅淮山麵先至可以發揮松露油嘅極致。最後不得不提嘅係甜品嘅川貝陳皮燉啤梨，佢地充分暖碟之後先上枱，個雪梨勁腍，而且個梨本身同個汁非常之夠熱，所以感覺更加滋潤，更加香甜。 色香味說易行難，佩服呢度真係可以做到。 …Read More

好多人會"鍾意"街坊老店，因為字號老，有感情。但其實好多人，平日係唔會去幫襯嘅。因為好多呢啲店，環境其實唔係咁好，而且傳到第2，3代，質素好多時都走樣。所以我心目中嘅街坊店，就係住得近嘅街坊，經常會再幫襯嘅店。而食物質素，衞生環境同埋最緊要嘅服務，就係令我呢個油塘街坊重複咁嚟嘅原因。我經常嚟打邊爐，特別鍾意望住個魚缸，同埋一隻隻嘅燒鵝。個魚缸有勁多魚同海鮮，乾淨到不得了，完全冇水漬，絕對媲美，或者係一超越西貢嗰啲大海鮮酒家，甚至乾淨過海洋公園。你見啲魚安安樂樂咁游水，你就知道自己一陣可以安安樂樂咁食。🍖個打邊爐話就話系任食，其實，本身嘅配套已經多到唔使再叫第二round。一開始就有個刺身拼盤，啲刺身新鮮得嚟又肥美，直情好似不計成本，件三文魚厚到冇得再厚。鮑魚鵝掌，兩者都炆得好腍，所以唔會哽胃。🍖個海鮮拼盤交足貨，真係勁多膏喎，打開蟹鉗好實淨就知道唔係水貨，隻蠔好飽滿，咬落系勁多汁，魷魚應該唔係冰鮮貨，先至咁有爽彈嘅口感。仲有隻蝦嘅肉好實淨又鮮甜，全個拼盤都好好味。🍖仲有個碟極級牛頸脊，肉味真係好出，會輕輕喺牙縫之間回彈，我哋叫咗個鴛鴦鍋，沙爹嗰邊就襯曬個牛，芫荽皮蛋就發揮海鮮嘅威力。當然仲有任飲啤酒汽水，如果頭先講開懷舊，佢有即切西瓜，同埋反沙嘅紅豆沙，街坊嘅回頭率高系人之常情。…Read More

大部分人都唔喜歡工作，返工即地獄，理想就係退休。我都係咁諗，但係我希望退休之後，可以由自己決定做翻一啲受尊重嘅，又開心嘅工作。作為油塘之友，我好鍾意嚟呢度食飯，除咗佢嘅味道足以媲美大餐廳之外，每一位員工嘅態度都好親切，佢哋都係長者，但係睇到佢哋嘅服務都好認真，而且發自內心友善地去對待每一位客人。🍖菜式方面，佢哋份量超大，我哋點咗松子海鱸魚，薄薄嘅炸皮，輕盈又足夠載住甜酸醬，入邊的魚肉保持鮮嫩，而且冇細骨，又一啲都唔腥，條魚仲超大條。🍖蒜蓉蒸扇貝，一般粉絲會放喺扇貝面，一啖食完就冇咗，雖然主角系扇貝，就係因為粉絲索曬個汁同蒜蓉，其實好多時都好想食多啖粉絲。呢個就啱曬，粉絲全部鋪喺個底，完全接住所有嘅海鮮汁精華，想食幾多就幾多，扇貝大大粒，新鮮而且彈牙，系簡單又好味既配搭。🍖呢度竟然仲有碌鵝食，碌鵝嘅肥瘦均勻，然後個燒鵝汁系相對多同埋杰身，加埋鵝油同鵝皮真係非常之香。同時鵝肉亦都好鮮嫩，因為有粉絲，我哋就冇叫白飯，但係相信配合埋就更加perfect。🍖我哋又叫咗一個菜心，大大份好新鮮，而且上面有好多腐皮，又有白果，非常清新。食飯嘅都可以享用半自助沙律吧，聽講啲蔬菜都繫自家農場有機種植，更加食得出心思同健康。香港人喜歡北上消費，其中一個原因就係服務比香港好得多，如果每個店家都可以做到呢度咁，俾長者有工作機會之餘，員工又盡心服務客人，仲要大件夾抵食，相信一定可以鼓勵到港人留港消費。 …Read More

有時候研究一下餐廳嘅名都幾得意，呢間以昆蟲命名嘅餐廳，就吸引到我嘅注意，我由經過門口，到坐低食嘅食物，都一直喺度斟酌店名嘅意思。我哋點咗二人餐，包括咗一條烤魚，一個小食，三款配料，同埋加咗任飲特色飲品。🍖我其中一個想法係，因為佢嘅飲品系用一對門神做杯嘅設計，所以餐廳嘅衞生程度，喺安全到烏蠅都飛唔入，不過好快就冇去諗個杯，因為啲飲品真係好好味，好多選擇，你睇吓張單就知我哋無論鮮果茶，定係奶類，我哋都係咁叫，啲質素直情好似去咗茶飲店咁。🍖講翻條魚，我哋叫嘅係清江魚，成日聽人講， 湖北省清江庫區d魚生長環境好好，所以質素都好好，果然真係名不虛傳，條魚因為烤過所以會比較實淨，但係仍然可以保持肉質細嫩，而且有魚味但係唔腥。而今次我哋嘅湯底揀咗傳奇麻辣，個辣味真係不負其名，首先佢辣勁夠足，但係唔會嗆喉，完全食到嚟自於香料嘅味道，而唔係化學辣，所以夠曬原汁原味。除咗條魚，我哋用嚟淥啲配料更加係一流，我哋覺得今次揀嘅配料選擇都唔錯，薯仔片淥到咁上下外面充滿香辣，入面仲係爽爽哋，又粉粉哋，澱粉質特別配合辣味。同樣道理，魚腐表面索曬啲辣汁，入面就係保持嫩滑嘅魚蓉，風味好好。而我最鍾意就係牛板鍵，薄薄咁切，所以成塊都浸滿辣味，食落口特別過癮。🍖當然唔少得講吓前菜同埋甜品，流心白茶奶皇球，雖然入邊系甜，但係就好適合做前菜，因為佢只係微甜，而且系炸過嘅，食一兩粒然之後開始食辣嘢，嗰種味道感覺嘅轉變，同埋反差，係更加容易令你投入進食嘅狀態。而收尾，食返個甜品，芋圓仲有豆腐花，就剛剛好首尾呼應。食完真係好滿足，不過對於餐廳嘅名嘅迷思依然系未解開。…Read More

約咗朋友，佢話一陣到，然後一陣之後又一陣，最後話嚟唔到，坐喺餐廳入邊嘅心情會係點？ 我嘅心情繫為佢感到可惜，而我就悠然自得。事關呢度188蚊清酒任飲，仲非常好質素，我慢慢叫啲送酒嘢食，一個人都可以盡興。 之前聽人講呢度系日本人飯堂，現場又見到有好多日本人，呢度果然唔係浪得虛名。 🍖揀完隻靚杯，再慢慢揀清酒飲，牌子有好多選擇，我就揀咗比較柔和嘅八海山同埋相對辛口既百樂星，其實揀邊種就各有所好，餐廳提供嘅款式之多，總有一款會啱你。你大可以試飲一小杯，揀啱咗先知只要一壺，慢慢自斟自飲。 🍖飲清酒就梗係要配魚生，所以就叫咗刺身拼盤，如果朋友嚟我只係可以每樣食一件，宜家變咗可以食兩round，慢慢食真啲味，同配搭清酒味道。我鍾意由赤身開始食起，脂肪部分唔多，鮮紅結實，充滿魚味，有食肉嘅口感，跟住就喺油香充足嘅三文魚同鰤魚，仲有柔軟嘅帶子同埋海膽，同鮮甜嘅甜蝦。全部都係清酒嘅好朋友。第一round食佢嘅原味，第二round配合清酒，互相輝映。 🍖跟住我梗係叫下佐酒小食，芝麻雞翼同埋流心芝士饅頭，兩者都係炸物，但係唔會過於油膩，而搶走咗清酒嘅味道。仲有芥末八爪魚，鹹鹹地滑溜溜嘅口感，就直頭昇華咗清酒本身。 🍖最後食咗個明太子炒意粉，明太子同紫菜均勻咁佈滿喺意粉之上。意粉特登做到相對硬身，成個味道又係好啱送酒。 雖然好享受今餐自己慢慢品嚐，就係下次都會叫翻朋友，因為佢仲有好多款式揀，如果兩個一齊就可以試吓呢間已經開業咗23年嘅餐廳嘅更多美食。 …Read More

TGIF,無論平日有幾忙，星期五放工之後就應該要輕鬆下。留意翻，我講嘅係輕鬆，唔係放鬆。所以唔係飲酒發泄，complain 老闆，無限放負果種。而係舒舒服服坐喺度，淨化身心。呢間餐廳空間感十足，座位超級寬敞，而且有好多懶洋洋既熊貓公仔，氣氛真係相當輕鬆。再加上食物賣相造型都好靚，令人可以好專心咁專注食物，忘卻煩憂。 🍖我哋叫咗二人餐，前菜嘅沙律，同埋四小碟拼盤，份量適中，而且麻雀雖小，卻有住唔同嘅口感，滑嘟嘟嘅魷魚，脆卜卜嘅炸蝦仲有新鮮柔軟嘅刺身，食開咗個胃，但係又唔會過份，準備迎接主菜。 🍖其中之一系和牛鍋，湯底甜甜哋，加上非常柔軟既和牛，配合日本米嘅白飯一流，感覺食緊壽喜燒，雖然我冇席前燒熟牛肉嘅儀式，但係味道絕對可以媲美。而儀式感相對嚟講，我就喺之後嘅意粉之中尋回，蟹肉蟹膏嘅意大利粉，材料連埋個蟹殼都係另外上，自己撈埋，食落感覺特別濃郁，夠曬層次。 🍖最後梗係唔少得甜品同飲品，其實對我哋嚟講，呢個先係主角。雪糕，紅豆，闕餅，再加一粒顏色鮮艷嘅車厘子，冇味得嚟超啱影相。仲有兩杯綠茶飲品，超滑超濃，我哋特登揀一個軟雪糕，一個硬雪糕，影相靚得黎，又有唔同口感。 總括嚟講真係好鍾意呢度輕鬆嘅環境，醉完之後就係充咗電嘅感覺。 ..…Read More

鍾意食串燒，因為氣氛好好，少少少少咁食，配埋飲酒，同朋友慢慢傾，可以盡情放鬆一個晚上。一般居酒屋，樓底都唔高，燒嘅時候會好多油煙，所以有部分人唔鍾意呢個感覺。今次去嘅呢間好貼心，樓底高，空間十足，而且非常光猛，冇用傳統嘅黄光，改用白光，所以成件事好清新，而且高級咗，但係仍然不失舒適。🍖從鋪頭名就知道我必須要點雞，所以我叫咗雞頸肉，雞大腿，雞翼同雞柳肉。實行食曬成隻雞各個部份既肉。雞頸肉好嫩，雞髀就結實有口感，雞翼外脆內嫩，我最鍾意就係雞柳，佢用咗明太子醬放喺面，所以特別惹味。其他佢哋就除咗海鹽冇特別做醬汁，但係枱面有三種自己選擇嘅醬料，七味粉，山椒柚子同胡椒鹽，都可以出每種材料嘅味道。🍖除咗雞就係海鮮，我點咗燒白鱔，同埋前菜嘅帶子沙律。白鱔材料唔同，但係就同雞翼口感異曲同弓，我尤其鍾意佢嘅結實口感，好有充實嘅感覺。刺身級嘅帶子配合個沙律真係好清新，系前菜嘅必然之選。🍖另外豬肋條同粟米都做得非常香口，前者係嚟自油香，後者就係來至於粟米本身嘅脆脆口感。如果仲未夠飽，不妨可以好似咁點個烤飯糰，或者親子丼，估唔到佢地飯類都做得咁出色。嘢食好食，頭先提及嘅貼心，其實仲可以體現喺唔同嘅地方，佢哋嘅座位上邊有插座，客人嘅袋可以放喺有鎖匙嘅儲物櫃，每件事都希望嚇人可以喺最舒適嘅環境之下進食，抵贊。…Read More