多留quota吃美食's Profile

慕名而來試「全香港最好食嘅tiramisu」，再一次證明期望越大真係會失望越大😮‍💨件tiramisu好細件，幾啖就食完。優點係cheese部分好軟滑，整體唔太甜，但tiramisu最大嘅特色，即係咖啡味同酒味係低調得幾乎欠奉…50幾蚊嚟講唔伏，但實在唔係太理解如何稱得上香港最好食😐 另外嗌咗杯Americano，用house blend豆，淨係覺得好酸😐 仲有一樣想特別講，冇諗過一間coffee shop嘅格局係好似快餐店咁。要自己搵位霸位，呢度唔夠櫈呀？自己過隔離搬多張過嚟囉🫥啲用完嘅餐盤擺到成枱都係都冇人執㗎🤯話晒都係酒店，呢個快餐店模式真係好大落差，好唔enjoy😮‍💨*****多quota評價：😐Quota正常用(🤮<☹️<😐<😋<🤤)…Read More

呢間coffee shop一到食飯時間就排長龍，要特登揀非繁忙時間嚟先食到。通常啲coffee shop都係得幾樣嘢特別好食，但呢間無論小食、主食、甜品、飲品都好令人滿意😋 🍟松露薯條📝份量超多，2個人唔係好食得晒😂粗身薯條夠脆，黑松露醬好味又夾薯條 🐙炸魷魚鬚配芥末籽蛋黃醬📝炸粉好薄，魷魚肉爽口，個醬好濃 🍝黑松露忌廉雜菌意粉📝個忌廉汁煮得好好！夠味唔過濃，而且做得比其他地方出色嘅係就算擺凍咗都唔會變到一pat pat同膩。另外菌嘅份量同種類都好慷慨 🍰意大利芝士熔岩📝我本身好鍾意食tiramisu，但好耐冇遇過好食嘅，呢個雖然唔係正宗，但口味好啱我心水！餅底浸透晒咖啡酒，cream同chesse嘅部分好香、軟、滑，好味到我諗我可以自己食晒一個🤤🍰榛子、朱古力、焦糖香蕉梳乎厘班戟📝梳乎厘班戟都係呢度好受歡迎嘅甜品，但我覺得相對上就比較普通，個心有啲太濕，好彩蛋味都重 🍹Espresso Tonic📝咖啡都非常唔錯，啡底香濃，啡、tonic、青檸比例平衡 真係好鍾意呢間，食物款式選擇好多，味道有水準，次次食完都好開心🥰無論拍拖定同朋友聚會都好適合，推介👍🏻*****多quota評價：🤤爆quota都食(🤮<☹️<😐<😋<🤤)…Read More

屋企人生日，又有藉口追星。不過實在比米芝蓮2星推到期望太高，有啲覺得不外如是。 今次嚟食午市，呢間中菜廳喺酒店嘅102樓，用落地大玻璃做窗，天氣好都幾靚，不過就算天氣唔好有啲自然光都幾舒服。裝修有中華風但又至於超傳統，環境非常唔錯。 我哋叫點心為主，好幾款都係推介菜式。但食完真係比唔出咩食評，只係可以講唔錯，但冇乜亮點，轉個頭就已經唔記得係咩味。 唯獨炸釀鮮蟹蓋真係值星星，侍應介紹係用咗阿拉斯加蟹同埋越南肉蟹拆肉，蟹肉份量非常非常多，亦都爽口鮮甜，加少少喼汁提味更加正👍🏻😋 另外蜜燒西班牙黑豚肉叉燒都唔錯，唔算好肥但肉好腍，有肉汁，調味亦適中 酥皮蛋撻係最失望，50幾蚊一個，但酥皮同餡都冇任何特別，外面啲餅店有更加多又平又好食嘅選擇！☹️ 有一點唔係好關間餐廳事，但都間接令到我哋食得冇咁enjoy，就係佢好多招牌菜都係煎炸焗類熱氣嘢，食食下就覺得滯，大家叫嘢食可以留意下 最後講埋米芝蓮都好重視嘅服務，都係合格但冇亮點，要做嘅嘢大致做足，但有時加茶都頗慢。結論：呢間中菜廳以星級奢華定位嚟講，各方面都有好多進步空間🤨*****多quota評價：😐Quota正常用(🤮<☹️<😐<😋<🤤)…Read More

之前返工，同事勁雀躍同我分享呢間啲刨冰好好食。我心諗，刨冰咪就係水同糖漿，可以有幾好食呢？點知呢間真係有驚喜🤩 款式唔算好多，水果味就更加少，不過啲配搭聽落都幾吸引 揀咗伯爵奶茶味配白玉，份量超大，大過個頭！最頂有3粒白玉，口感幾煙韌。啲冰唔算綿花咁軟，有冰塊感，但仍然做到入口即溶，一啲都唔硬或者𠝹口。個伯爵奶茶味好濃郁，一啲都唔假，亦都唔甜，份量好夠，唔會食食下溝淡晒，估唔到味道係咁出色😋再加分係佢入面收埋咗其他配料，中層有餅乾碎，底層有牛奶布甸，一路食都有唔同嘅口感味道層次，滿足！（順帶一提：另外加48蚊嘅蕨餅就麻麻地，唔值得加） 呢間刨冰店打破咗我對傳統刨冰嘅冇好感印象，會心思思想再嚟！同事果然冇介紹錯😋*****多quota評價：😋Quota花得值(🤮<☹️<😐<😋<🤤)…Read More

有日同啲朋友好隨意咁話想打冷，見呢間咁多評價就想試下，晏晝臨時臨急先打去訂枱，但應該落場冇人聽，估唔到佢見到missed call竟然打返比我，成功book咗枱，呢個舉動好有人情味🥰 去到門口企滿晒人都有啲意外，但因為book咗成功入座✌🏻環境係好舊式類似大排檔嘅格局 滷水鵝唔錯，少少肥，肉唔鞋 滷水雜錦好正，好多鍾意食嘅款式，例如鵝腸、大腸、墨魚，完全冇食內臟擔心會有嘅怪味，而且肉質好爽口 黃金雞軟骨都比想像中出色，個皮好薄同炸得酥脆，鹹蛋黃香但唔過油 辣酒煮花螺就反而平庸少少，主要淨係鹹，唔算好有辣酒嘅惹味 勝瓜都幾唔錯，唔會過份清淡，啲瓜有甜味 呢間以穩打穩紮唔花功嘅食物同人情味取勝，絕對可以encore😋*****多quota評價：😋Quota花得值(🤮<☹️<😐<😋<🤤)…Read More

睇網媒報道呢間新開嘅咖喱店，好似好吸引，襯夜晚收工就嚟試下喇📝 喺一個少許隱蔽嘅角落小店，都算裝修得幾靚，有少量堂食位置。今日我哋買外賣。 選擇唔算非常多，但叫做照顧咗基本嘅口味。我哋揀咗黑毛豬肉餅同埋鼠尾草烤雞，本身首選茄子，但賣晒。另外再叫咗個怪物炸蠔（雖然唔知點解要叫怪物） 先講重點咖喱，聲稱係加咗牛油同多種配料經過12小時熟成。當然食唔出熟唔熟成同一般咖喱有咩分別🤪但味道係好食嘅👍🏻佢打碎咗好多配料入去，所以有啲碎碎嘅口感，洋蔥同蕃茄味比較突出。整體帶少少蔬果嘅酸甜味，相對清新，辣度幾適中，係一個過癮但唔會食得辛苦嘅程度，非常好送飯😋 豬肉餅都非常唔錯，好juicy，煎過幾香口，口感結實彈牙👍🏻反而雞就幾失色，有啲鞋，切到勁細粒，搞到有啲似下欄咁，亦都冇乜香味☹️ 怪物炸蠔$58一份，打開有啲嚇親，咁貴得2粒？！🤯真係未免太貴，好彩味道係好食，唔腥，多汁，飽滿😋 呢餐味道幾滿意，幾適合做收工後comfort food，少少挑剔係以外賣店定位嚟講價錢有啲進取，份量偏細，如果唔係就可以多啲幫襯🤨 *****多quota評價：😋Quota花得值(🤮<☹️<😐<😋<🤤)…Read More

突然心血來潮好想試下米芝蓮星級餐廳，趁拍拖周年紀念，一嚟就試一間3星級嘅！結局擺前面：一試愛上😍！最深刻嘅感想係食材同配菜/調味都各有個性，但擺埋一齊冇互相搶戲之餘，仲有相得益彰嘅效果。 L’Atelier呢邊係比較休閒輕鬆嘅吧枱setting，佈置用紅黑色做主調，比較摩登啲。坐呢邊可以揀細portion嘅菜式，揀咗幾款自己睇中嘅，再由侍應推介幾款。 📝前菜 - Le Carviar Imperial de Sologne 經典魚子醬配龍蝦果凍及椰菜花忌廉矜貴之選，見識少，冇乜食過魚子醬，唔係好識品評，但覺得佢係鹹香得嚟唔會腥。個龍蝦湯啫喱個樣好清，但食落龍蝦湯味好突出，成個配搭好似食咗啖海洋入口咁 📝前菜 - La Langoustine 脆炸鮮龍蝦配羅勒汁用filo pastry包住炸小龍蝦，另外再配basil汁。炸粉好薄而脆，小龍蝦肉好結實彈牙 📝海鮮 - La Saint-Jacques 香煎原隻帶子伴魚子醬及金柑汁帶子好大隻厚肉，煎得好嫩，醬汁輕微甜甜酸酸，幾清新嘅口味 🌟🌟🌟📝海鮮-Le Black Cod味噌烤鱈魚柳配黑蒜醬及野生蘑菇呢道菜係全晚最驚豔好味！鱈魚肉好細嫩滑溜，魚油好澎湃香濃，但完全唔會覺得膩，用味噌嚟煮令到佢有啲日式風味，但唔會蓋過魚香，純粹加少少鹹鮮，好味到嫌唔夠喉 🌟🌟🌟📝主菜-La Caille 焦糖燒鵪鶉釀鴨肝伴栗子及香草呢道菜都係今晚最喜歡之一，鵪鶉皮嘅部分皮脆肉嫩，胸配鴨肝嘅部分就肉香味同口感都有兩種層次，相輔相乘 📝主菜-L’agneau 鐵板燒法國嫩羊架配新鮮百里香及蔬菜蓉及茄子脆片bb羊主要係食嫩滑嘅肉，羊肉味比較淡，一啲都唔羶 主菜配咗招牌嘅薯蓉，牛油味超濃口感好綿滑 📝甜品-Le Soufflé Chaud 朱古力香蕉梳乎厘配蘭姆酒熱帶水果雪葩梳乎厘部分真係出色，估唔到口感咁輕盈但朱古力味仍然好濃郁，入面仲有脆粒。唯獨是個冧酒雪葩比較差，好藥水 📝甜品-Le Melon 日本蜜瓜配香脆乳酪，白乳酪雪葩及熱情果甘筍醬清新嘅結束，甘筍比較有驚喜，冇草青味又好甜 覺得自己有啲詞窮，唔係好具體咁寫得出食物嘅味道。今次嘅餐飲體驗有大開眼界嘅感覺🤩雖然貴，但絕對換到相應嘅美食同滿足感，好圓滿嘅慶祝！🥳 *****多quota評價：🤤爆quota都食(🤮<☹️<😐<😋<🤤)P.S.第30篇食評，襯米芝蓮3星餐廳！…Read More

有日冇嘢做諗住早啲食晚餐，17:45嚟到門口未開門，兜個圈準時返到嚟已經變咗要排隊，好彩都啱啱好入到座。 首先叫咗個黑龍豚骨拉麵，辣度揀咗正常。配料有叉燒、筍、蔥、洋蔥、紫菜。賣相非常平實，但個湯底非常有驚喜！偏杰身但未至於漿口，豬骨味好濃香之餘好鮮甜，重點係唔會越食越鹹，亦都唔覺得油膩，個辣醬亦都加咗啲層次感，係我近期食過最好味嘅豚骨湯底🥹 另外試咗個山椒辛味噌拉麵，呢個就重口味好多，麻嘅感覺明顯但唔會太辛苦或者搶，呢個就配粗身拉麵，更加有咬口。幾有特色，不過都係鍾意個傳統豬骨湯多啲 最後仲叫咗個明太子飯，同樣係賣相好平平無奇，但食落都幾有趣，啖啖飯都帶住明太子嘅鹹香味，一啲都唔腥，好快就爬晒碗飯😝平實風嘅小店，但出品有實力。絕對會再返嚟食豚骨拉麵！*****多quota評價：🤤爆quota都食(🤮<☹️<😐<😋<🤤)…Read More

又係試人氣食店嘅時候，今次試香港少有嘅關西風壽喜燒專門店。聽朋友講之前要好似搶演唱會飛咁打幾百個電話先book到位，而家容易返好多。 壽喜燒套餐$730一位，主菜係滋賀縣近江A4和牛4片同各式蔬菜，最大特色係廚師會席上烹調。 4片肉分別係肉眼、西冷同2片牛肩。廚師會先加糖喺鍋入面，乾煎一下牛肉，再加少少壽喜燒醬汁煮，整體口味係偏甜。我自己就最鍾意食西冷，牛肉味同油香味最平衡，亦都比較有口感。點咗蛋汁口感順滑啲，又可以中和下醬汁嘅濃味，感覺冇咁膩。 蔬菜都有好多種類，例如冬菇、白菜、豆腐、麵筋，比較特別係蒟蒻麵。 食晒主菜同配菜之後，廚師會整多個滑蛋牛肉蓋飯，肉係啲切頭切尾嘅肉粒，呢個幾出色，飯粒煙韌分明，蛋非常滑👍🏻 整體嚟講，食材本身質素唔錯，但樣樣嘢都係加糖同壽喜燒醬汁煮，全部一樣味，變咗由頭到尾都好似平鋪直敘，比較單調。和牛都雖然睇落好靚，但烹調完唔算好強烈感受到肉同油脂嘅獨特香味。可能個人口味唔係對壽喜燒好大興趣，同埋廚師正常合理服務但冇額外嘅温度，所以連最大特色嘅席前料理都唔係加好多分。唔係唔好食，但冇想像中咁驚艷，試過一次就夠了。*****多quota評價：😐Quota正常用(🤮<☹️<😐<😋<🤤)…Read More

比YouTuber燒著咗，山長水遠走嚟試。當日係閒日晏晝2點幾，完全冇人。 賣嘅嘢淨係得咁多，咁專注做一件事，令到我更加大期望🤔我哋揀咗牡蠣白湯同埋牡蠣沾麵。先講白湯，有一隻蠔同一片叉燒，隻蠔肥美漲卜卜，好鮮甜😍湯底厚身得嚟口感好順滑，味道濃郁但平衡，唔會太咸，蠔味突出，忍唔住要飲晒😋沾麵湯底好杰身，飲落第一啖係幾鹹，但陣蠔味係衝出嚟咁濃郁，好驚艷！入面仲有洋蔥粒同花椒調味，整體所有味道好夾😋麵就比較特別，用嘅係扁身嘅平打麵，官方話會比掛湯，食落都幾滑身彈牙。同埋餐廳好細心用昆布湯浸住，令佢唔會痴住晒，同埋可以溝返淡個沾汁少少，唔會越食越膩。不過因為麵條面積大，令個湯凍得好快，中途加熱咗一次。餸就有兩隻肥美甜蠔、叉燒粒同筍，好豐富，食得好開心🤩 另外仲加咗隻溏心蛋，溏心程度做得好好，調味同煙燻味恰到好處，強烈建議要追加埋👍🏻 以拉麵嚟講呢間好貴，但亦都好好食，有被驚艷到🥹推介大家試！ *****多quota評價：🤤爆quota都食(🤮<☹️<😐<😋<🤤)…Read More

單刀直入，好失望😵 一坐低店員率先推介我哋嗌甜品，話已經有好多份排緊隊要等好耐，叫咗可以後上，又話有網媒介紹過，於是我哋叫咗一份玫瑰草莓麻糬窩夫，後面會再講。鹹食嗌咗三樣嘢，包括XO醬牛肉炒韓式粉絲、炸薯條加黑松露蛋黃醬，同埋一嚿雲下的芝士蘑菇雞柳炒飯。頭兩樣好快就到咗，正常味道，薯條主要靠個醬取勝，粉絲稍為好嘅地方係質感煙靭，但係啲牛肉係類似茶記乾炒牛河嘅鞋口牛。 跟住，就係災難嘅開始🤯個飯喺menu度寫明最少要20分，都有晒心理準備係會耐，等咗半個鐘嘅時候追過一次，到最後真正上枱係足足一個鐘，講真，要搞花臣係咪都應該要諗吓運作上應唔應付到呢？要客人等一個鐘真係合理咩？睇埋個賣相，我同友人嘅感想真係同呢個emoji一樣樣->🤯批兩隻直角就叫雲？咁下面黃色嗰攤液體係乜嚟，舊雲瀨尿？！等咗一個鐘等到個咁嘅賣相，已經好嬲，切開埋…更加如同嘔吐物一般🤮平心而論味道唔算太差，但一啲都唔夠熱，啲芝士”king”晒變到一舊舊咁，好明顯係煮完擺咗好耐就係為咗等整層蛋白… 然後喺仲食緊個飯嘅時候，店員就已經上埋個甜品，原來所謂嘅後上，係佢鍾意幾時上就幾時上，唔會理客人食成點，大佬，個甜品仲要係跟雪糕，咁我食埋個飯先定食咗個甜品先好呀？😒個窩夫成舊都係麻糬，但係好實，絕對唔係好食嘅質感，玫瑰同草莓呢啲配味都只係普通嘢，毫無驚喜😐 其實一間餐廳連基本嘢都做唔好，真係好應該檢討吓係咪要搞咁多無謂花臣，諗住可以吸引客人，反而調返轉成為敗筆位👎🏻兩個人食咗接近600蚊，好食當然唔緊要，但換嚟呢個食物同服務質素真係超級非常勁唔抵，呢間餐廳唯一可取之處，就係真•pet friendly，狗狗可以進入埋室內範圍，但，都係做好食物先啦🤦🏻‍♀️ *****多quota評價：☹️有啲嘥quota(🤮<☹️<😐<😋<🤤)…Read More

食omakase原來係會上癮，而且係會忍唔住越食越貴🤑多手經常㩒下個預約網站，又成功執雞🐣 今次同其他客人八個人坐一間房，圍住一張吧枱，一位師傅主理，兩位師傅協助。佢個餐牌話會因應季節安排時令菜式，所以冇標明有幾多道菜，呢晚最後就食咗21道。 今次嘅體驗係非常滿足，感覺師傅嘅風格都係以突出食材鮮味為主，好少用到花巧嘅調味，前中後段都有唔少菜式有驚喜🤩成餐飯嘅節奏掌握得好好，每道菜之間都有恰當嘅空間，但又唔會拖得太耐。師傅嘅講解好清楚，會更加有概念自己食緊啲咩，同埋應該點樣品嚐。侍應嘅服務亦都非常親切，叫佢推介清酒都會好細心咁了解客人口味，而唔係盲推貴嘢。雖然成餐價錢都有啲可觀🤑但間中奢侈享受就當獎勵下努力工作嘅自己啦😎 多quota評價：🤤爆quota都食(🤮<☹️<😐<😋<🤤)*****（詳細介紹，用餐時為6月底，⭐️為特別喜愛） 海月伴蒓菜伴柚子sparkling tea、白象拔蚌、⭐️豆腐伴白鱘魚魚子醬、汁煮真蠔、煙燻鰹魚、海鮮雞白湯燉煮黑邊鮑📝豆腐係用象拔蚌肝同肉做出嚟，好特別，雖然唔滑但好軟棉，鹹鮮濃味餘味長 春子、池魚、⭐️赤身醬油漬、霜降雪花大拖羅、⭐️魷魚包海膽、⭐️縞蝦📝赤身醬油漬係食過最好味之一，熟成23日，醬油味明顯但唔搶，魚味好突出📝魷魚同海膽非常夾，口感豐富，海膽味鮮甜📝縞蝦加咗用蝦子、蝦頭、蝦殼提煉嘅蝦油，鮮味好濃厚 ⭐️白粟米、水茄子、雞頸伴舞蓉菇、醬油漬蟹、⭐️吉列伊勢海老📝真係少見多怪，冇諗過粟米係可以咁清甜爆汁📝 伊勢海老加咗乾蝦子、龍蝦膏、蝦頭煮成牛油醬，炸到半生熟，又有爽彈口感又保持蝦肉甜味 鯖魚醋醃漬、⭐️赤海膽、煮穴子、⭐️太卷📝海膽好大量，口感好軟滑，完全唔捨得吞📝太卷有啲似睇煙花最後嗰幕咁，好豐富咁爆晒出嚟，不停食到唔同食材嘅味道 海鮮雞白湯、巨峰提子&蜜瓜…Read More

又係試網上爆紅餃子店嘅時候🥟今次係旺角嘅甜記，可惜呢日臨閂門嘅時候先嚟，已經唔可以叫煎餃，同埋好多味都冇，不過照試！ 我哋兩個人嗌咗兩碗雙拼，口味揀咗椰菜冬菇雲耳豬肉、韮菜豬肉、西洋菜豬肉同埋韮黃雞肉。另外加咗小食麻辣雞腎同手拍青瓜。 我揀咗蕃茄薯仔湯底，飲落唔算好濃但甜甜地，一啲味精都冇，有啲家的感覺☺️餃子唔係特別大隻，但粒粒飽滿，皮非常透薄，菜肉比例好適中。個人比較鍾意傳統嘅椰菜同韭菜豬肉味，尤其是椰菜餃有菜嘅清甜味，反而好似特別啲嘅西洋菜同韭黃食落就普普通通。感覺呢度嘅湯餃係行清新路線，食完一啲負擔都冇，但味道仍然滿足又感覺健康😋佢哋都有提供辣菜甫，推介要食，爽口又唔死辣👍🏻 另外加嘅小食質素都唔錯，以佢嘅價錢嚟講份量都唔少，蒜落得超慷慨，少少酸辣惹味，夏天食啱晒😎今次嘅網上爆紅店體驗係成功嘅😁下次一定會嚟試埋煎餃🥟*****多quota評價：😋Quota花得值(🤮<☹️<😐<😋<🤤)…Read More

閒日嚟，唔洗等就有位，但嚟到感覺好古怪，門口唔知點解係冇鋪頭名，又殘舊，唔仔細睇以為係一間丟空咗嘅鋪。鋪入面嘅環境都好麻麻，啲嘢擺到亂七八糟咁，啲櫈又唔一致又污糟又殘，好似喺雜貨攤求其逐張執返嚟咁，以cafe標準嚟講環境完全唔合格❌ 叫咗手撕豬腩肉窩夫三文治，加25蚊變午餐，包餐湯同嘢飲。見到個餐湯呆咗，竟然係中式嘅紫菜魚蛋湯，唔難飲嘅，但成件事真係好唔夾🙃個窩夫ok，做到外脆同有蛋香味，但入面唔係好實在。手撕豬肉嘅味道都唔錯，有少少似肉醬意粉嗰種味，唔油膩，同窩夫都夾👌🏻咖啡就好難飲，一啲香氣同風味都冇，口感稀，都幾失望👎🏻如果好獨立講嘢食唔可以話差，但以整體嘅體驗嚟講我覺得係唔完滿，環境同套餐都好似立立雜雜咁堆砌，質素參差，呢間唔會回頭了。*****多quota評價：😐Quota正常用(🤮<☹️<😐<😋<🤤)…Read More

之前試過幾次omakase都係食午市，終於的起心肝嘗試食夜市，希望可以食多啲唔同種類嘅食物。 呢間餐廳有一排吧枱，有個藍色backdrop做背景，比較光猛，普通枱嘅範圍就深色調為主。佢哋有啲普通日式套餐同唔同價位嘅omakase，今次就揀咗最貴嘅餐，店員推介話會食到唔同款嘅海膽。正，最鍾意食海膽😋 整體嚟講食物有中上水準，食得幾開心，主要正嘅地方有呢啲：😁真係好多海膽，開頭以為淨係食到兩款刺身同迷你丼，但原來佢都分布喺唔同嘅菜式入面😁蝦夷鮑魚配鮑魚肝醬驚喜級好食，食嘅時候比人笑隱藏唔到幸福嘅笑容😂😁 總廚Nic態度親民，其他員工服務都優質，氣氛輕鬆 但始終價錢唔平，要求會高啲，所以都有啲挑剔位：😐人手太短缺，成餐飯拖咗成三個半鐘，中間好多頗長嘅冷場，感覺好唔連貫，亦都降低咗飽足感😐壽司部分頗為失望，醋飯味道嫌過淡，魚料亦都普通，鮮/魚/油香味都唔突出😐料理部分款式相對平庸 多quota評價：😋Quota花得值(🤮<☹️<😐<😋<🤤)*****（詳細介紹，用餐時為2月中）前菜三品：水雲、蟹肉配蛋黃醬、海膽豆腐刺身：長崎蠔、⭐️真鯛薄切配赤海膽、燒帆立貝配馬糞海膽東澤白海膽、富美苑白海膽⭐️清酒蒸岩手縣蝦夷鮑魚配鮑魚肝醬非常好食，鮑魚用清酒煮4個鐘，醬要煮3個鐘，太大火會起沙。鮑魚夠淋但保留口感，醬超濃郁，撈飯一流，配埋海膽都出奇地冇互搶，好回味😋料理：鹽燒松本茸、阿波美雞免治雞肉棒配刺身級太陽蛋壽司：寒鰤、地金目鯛（冇相）、赤貝、銀鱈魚、拖羅 其他：茶碗蒸、四國酸橘啫喱、蝦頭赤麵豉湯、宇治抹茶奶凍…Read More