holunhungry's Profile

魚蛋呢啲咁低成本既野要加$12同牛腩大腸豬頸肉個啲一樣價但好想食魚蛋 咪試試佢囉點知夠膽死得3粒仲要唔好食 中間仲有細魚骨插口牛柏葉唔入味雞尖有油益味湯底一層油 雖然油麵係會油啲 但曾經食過好食既車仔麵即使係油麵都唔會油淋淋食完勁口渴已blacklist☺️銅鑼灣咁多選擇可以唔洗食佢如果我係遊客 見咁多人比好評而去食 我食完一定會嬲到震🌝🌝Dont make stupid restaurants famous please🙏🏻🙏🏻…Read More

第一次去迪士尼酒店食野，抱住好大期望但係都幾失望。前菜啲叉燒又乾又硬，燒鴨全部都係皮，冇肉食片皮鴨要加錢叫，層皮勁厚，厚到好似食包咁，而且鴨肉唔熱，肉質都有啲鞋。咕嚕肉個汁唔夠酸甜，炸皮厚，冇豬肉香味。荷葉蒸雞冇荷葉味，個雞完全冇味，肉質都明顯係急凍雞肉，食落仲有啲酸酸地🤢🤢流心奶黃包一啲都唔流心，而且唔熱，冇煙出，望層皮都知係蒸完放左係到好耐再返蒸個啲。Overall啲野食都唔好食，中菜嚟講都唔平，人均$550，而且間野都冇乜迪士尼氣氛成餐飯最好食係個楊枝甘露🙃🙃…Read More

旺角通菜街有好多食肆選擇，但成條街得呢間《豐味》有車仔麵食，價錢唔貴，三餸$42，四餸$49。仲有酸辣粉食，幾特別。叫左牛筋、魷魚、豬紅、大腸 配河粉牛筋入味，軟綿；魷魚都係普通街市個啲發水魷魚，硬身唔入味，少啲牙力都唔得；豬紅入味，唔會太鬆散亦唔會太鞋；大腸極多肥膏。餐廳用上幼身河粉，有啲似越南河粉個種質感，都算滑身但好散，之前食過一次油麵，好油，而且鹼味較重，整體嚟講佢既麵底係最主要既敗筆，十分需要改善。另外，食完好口渴，味精味重。但佢價錢唔貴，餸既份量同味道都ok，所以想平平地食下車仔麵，都可以一試既。…Read More

早前經某海鮮關注組推薦，初嚐呢間《極品刺身》買左個刺身生蠔拼盤$598，試一間刺身店質素，最好就係試呢啲咩都有既拼盤，各類型既海產都可以試下。今次呢個拼盤有生蠔（美國、愛爾蘭、法國）翡翠螺，酒煮帆立貝，甘蝦，拖羅，蜜柑鯛，池魚皇，三文魚腩，活赤貝，車厘蜆。價錢方面十分抵食。質素方面，三款生蠔都係偏向礦物味較重既蠔，但我本身比較鐘意輕身甜啲creamy啲既品種，而且其中一隻有啲腥，所以生蠔方面就一般般。值得一讚既係翡翠螺，清潔得好乾淨，而且好大隻，螺味鮮甜。蜜柑鯛同池魚皇係最出色既兩樣野，質地爽口，新鮮，鮮味濃郁。其他野都正常發揮，冇伏但都冇好出色。最差既係車厘蜆，非常腥臭，食唔落口。整體而言不過不失，對得住價錢，魚類比甲殼類海產出色。…Read More

先講個爐，毫無火力可言，與其話係燒肉，不如話係用發熱線烘肉，啲肉完全唔香口，燒牛都仲好啲，燒豬/雞呢類難熟啲既野，真係玩死自己！價錢方面，$168一個牛肉三食餐，絕對一啲都唔平，仲要未計加一，成個餐差唔多$200，有更多更多更好既選擇。肉方面，一試枱就見到啲肉勁度唔新鮮，霉霉黑黑咁，一啲血色都冇，食落就更加差，三款都係完全冇肉味。講真而家有咁多燒肉選擇，就算一人前燒肉都有好多選擇，呢到真係排包尾！…Read More

每日晚市時間呢間《村爺爺》就會排哂長龍，so far都食過5-6次，大部分時間都係食花膠螺片雞，有一次食龍蝦湯，但結論都係食雞就足夠花膠螺片雞轉套餐，有一碗飯，一個菜，一杯野飲，連埋$100都唔洗。湯底方便飲得到好濃郁既雞味，而且唔會一大層油係上面，飲完都唔會有口渴感覺。份量方面有半隻雞，係完整既半隻雞，會附上一對手套比食客撕開隻雞。雞質地嫩滑多汁，配上附送既麻油辣椒豉油，好容易就食到一碗飯！龍蝦湯就比較遜色，唔濃龍蝦味，用既都係急凍海鮮帶子蝦蜆，而且一粒龍蝦肉都冇，大大個龍蝦頭只係裝飾用，唔推薦。所以大家嚟食雞就夠喇！…Read More

荔枝角D2 place附近開左呢間茶餐廳，夜晚9點鐘想食小菜，就入左去食。叫左一份黑椒薯仔牛柳粒，一份風沙蒜香骨，70幾蚊唔包飯/野飲，要另外加$12轉套餐，都幾貴。野食方面，黑椒薯仔牛柳粒一上枱個下，真係即刻望一望返個餐牌，寫住牛柳粒，但嚟既係牛片，好似乾炒牛河個啲牛咁。另外個黑椒汁超級甜，一啲黑椒味都冇，薯仔亦係好淋，明顯冇炸過。風沙蒜香骨，啲炸蒜好油，淋身唔脆口，街買個啲一罐罐即食炸蒜都好食過佢。另外個骨亦係好油膩，唔夠熱，好似冇炸過咁，一啲都唔香口，毫無鑊氣，懷疑佢用電磁爐煮既。味道亦超級咸！又貴又差，唔會有下次。…Read More

大約兩年前係銅鑼灣食過一次《棋哥》既燒鵝，皮脆肉嫩而且木味香濃，點知兩年之間竟然退步到咁。今次叫左個腩叉燒鵝瀨粉，腩叉係特別部位，每日售完即止。一嚟到當然要試左個湯底先，有陣熟悉既感覺…係福字麵湯底味呀！再嚟就係啲燒味，個腩叉基本上成舊都係肥膏，好淋，唔爽口，咬落成口油。燒鵝啲肉極鞋，亦都冇左以前既木香。但佢最大既問題，係佢所有野都係唔熱，只係暖，啲燒味甚至係凍既，要放落啲湯到坐返熱佢，60幾蚊燒味飯嚟講真係好過份，唔會再食！…Read More

《四寶》越開越多分店，今次係旺角分店食左個最出名既蔥油豬扒煎蛋飯，一上枱個下哇左出聲，豬扒超級大塊，成隻碟咁大，而且厚身嫩滑，連骨，啖啖口，唔係用刀拍到佢扁薄個種。我個人麻麻地半生熟蛋，所以略嫌隻煎蛋太生。蔥油味道同燒味舖個種有啲唔同，比較淡，亦都冇薑味，如果鐘意傳統薑蔥油既朋友可能會有啲失望。另外豉油亦略嫌唔夠濃，就算撈埋豉油同蔥油，味道都唔夠香濃。佢份量真係好多，我一個女仔最後都食唔哂塊豬扒，$60連飲品有呢個質素同份量實在值得一讚。…Read More

邊爐關注組好多人都提及過呢間《阿爺》今日同男朋友兩個人嚟食每枱會包一個雞煲，一盤海鮮拼盤，同埋一人一配燉湯因為我地都麻麻地雞煲所以冇要到，直接食火鍋另外加左$488叫左象拔蚌拼三文魚刺身，象拔蚌好新鮮鮮甜，份量都好多，三文魚亦用上腩位，十分不錯雖然話係任食，但佢限左每次只可order六款菜式。以下係幾款比較差既食物肥牛：解凍不足，難夾，肉質差，平價肉生蠔：有啲臭臭地…雞腸：冇清肥膏，要自己慢慢咬走啲肥，食落非常油膩蝦&蟹（海鮮拼盤）：雖然大隻但肉質梅象拔蚌：冇味～好：蟶子皇：每份都好多隻，好大隻，味道都鮮甜龍躉：雖然比好多骨位/魚頭位，但魚味重，肉唔梅，厚肉，唯獨係魚鱗清得唔乾淨花甲：份量多，鮮甜，冇沙整體嚟講不過不失，可能我期望太高所以有啲失望，因為海鮮整體水準一般，肥牛都一般最差既係個煲，中間個窿長期好滾，要係咁加水，但外面唔滾，好難搞…Read More

晚餐時間嚟左呢間《雪山》，因為我唔太肚餓 就叫左個常餐，芝士牛肉漢堡配細肉醬意粉。肉醬意粉酸酸甜甜，味道唔錯，但汁太稀，唔掛麵。另外芝士牛肉漢堡好差，咬落口成口粉，好明顯係粉多過肉，而且冇肉汁冇牛味，十分乾。加$9叫左杯紅豆冰，叫左少冰但都淡到好似飲水咁，紅豆亦太硬唔軟糯，欠缺紅豆味。男朋友叫左焗豬扒飯，味道比起我呢個常餐好食得多，豬扒大塊，軟身唔鞋，汁都唔會太酸，份量多結論：食過一次就算 未必會再食～…Read More

最近係長沙灣新開左呢間小店，離地鐵站大約5分鐘既路程，老闆一腳踢，見到都多人幫襯就試下。今次試左咸牛肉蛋治，$23連一杯野飲，即叫即做。份量大大份，牛肉就冇咩特別都係罐頭咸牛肉質素，炒蛋熟度控制得幾好，而且好厚身，每食一啖都咬到大量蛋。唯一可以改善既係，老闆整完份三文治會立即放入一個密實既三文治盒到，望落去靚靚仔仔，但因為係外賣店，唔能夠即刻食，拎到返屋企個陣水蒸氣會搞到個包濕濕淰淰；另外見到老闆收完錢之後掂麵包其實都驚驚地，就算唔關covid事都始終唔係太衛生，希望可以改善到呢個問題！…Read More

九龍城既呢間《泰金國》日日都大排長龍，晚市排左一個鐘先有得食🥺兩個人叫左一份燒牛肉，泰式鳳爪，皮蛋蝦餅，燒雞翼，椰汁沙冰。燒牛肉生熟度控制得岩岩好，食落有香濃牛肉味，有肉汁，而且大大份，唔怪得係牛扒關注組一直都咁多人討論，絕對係泰金國招牌菜！泰式鳳爪酸辣甜度都岩岩好，唔會有其中一隻味特別突出搶哂味，而且鳳爪好入味，份量都好多，食極都有。皮蛋蝦餅，溏心皮蛋外釀左炸蝦餅係外面，蝦餅彈牙有蝦味，唔粉，皮蛋味濃，好食。燒雞翼就冇咩特別，由於佢係即叫即燒，都等左一段時間先有。椰汁沙冰好好味，好香濃椰汁味，飲到最後都仲好濃味，唔會變哂水就溝淡哂。…Read More

係佐敦既呢間《星星》有兩間連住既舖位，一間做外賣，一間做堂食。今次晚市堂食，兩個人叫左一份雙拼炸雞（原味拼酸辣），一份原味紫菜包飯，一份芝士炒年糕。每枱客人都會包免費一份前菜，都係例牌個啲涼拌芽菜，菠菜，泡菜；前菜略嫌味道較淡。炸雞大大份，但有啲失望，雞肉較乾，冇肉汁，原味炸雞更加係冇味；酸辣味就太甜，完全唔辣，下次唔會再叫。紫菜包飯餡料好多，飯都包得好好，唔會一夾就散哂，調味方面如果多返少少麻油就prefect!最出色係芝士炒年糕，份量非常多，入面仲有麵同魚片糕，芝士味十分濃，基本上每一啖都會食到好濃芝士味。年糕質地都煮得好好，唔粉，好軟糯，好食！…Read More

係荃灣同旺角都有分店既呢間《台風》晏就食沾麵，夜晚食拉麵。今次晚市食，叫左魚介拉麵$78，同鏗魚湯拉麵$83，另外加左份叉燒。麵既份量好多，普通量已經夠飽，男朋友叫左多麵，多到食唔哂。呢到既拉麵係粗身麵，我自己本身鐘意食粗麵，但略嫌呢到既麵質有啲硬，而且掛湯能力一般，湯既份量都有啲少。叉燒質素十分一般，有啲乾，但有肉味既，每塊都大大塊，如果冇乜要求純粹想食多啲肉都可以加既。魚介同鏗魚湯我會比較推薦魚介湯，整體嚟講都應該試過一次就算。…Read More