老公仔's Profile

每年女兒生日，都例必要求去食自助餐慶祝，今年當然亦唔會例外。於是喺openrice搵下有咩好野推介？結果搵到呢間位於尖沙咀仕德福山景酒店內，名叫山景閣嘅餐廳試下。選擇呢度前已經了解左，山景閣個場唔算大同座位唔多，但吸引我嘅主要係因為以一個唔貴嘅價錢，就可以享用美味嘅生蠔，所以都想試試。去到現場視察後，真心地方唔大，食品區亦只有兩個部份，但麻雀雖小、五臟俱全。本篇標題都講左蠔食，當然唔少得提及生蠔啦！本來心中有想過，以假日成人398元一位有蠔食，啲生蠔都會比較細奀啲，同埋分分鐘又係排隊攞限量供應，每人每次攞兩隻果種。點知去到完全唔係呢回事，生蠔係放出來俾大家自己選同無限制攞，而最重要係生蠔份量都好重手，幾乎係搵唔到有細奀或營養不良大小嘅蠔出現，呢個真係令我超級驚喜啊！至於其他食品，味道水準都好高，又令我喜出望外。去到接近八點，就係佢地嘅限量甜品“火焰雪山”嘅供應時間。廚師喺雪糕蛋糕表面冧上酒後點火，將表面嘅cream燒焦。成個過程好快完成但就好吸晴，第一時間排頭位攞番件試食，cream好重酒味，但搭配番個雪糕後又中和番哂，都幾有新意同綽頭。去到八點半時，仲加入左人工班戟製作，不過可能選擇口味比較少，唔見太多人去排隊攞。最後特別想講，佢地地方雖然細，但座位安排上就一啲都無壓抑感覺，仲有服務員做野好貼心同勤快，仲非常之有禮。佢地嘅服務亦為餐廳加左不少分數。總括嚟講，山景閣今次嘅buffet體驗真係唔錯，我用驚喜無限四個字形容，都真係絕不為過。…Read More

由於時間緊絀，既想食到價錢平又同居所唔遠嘅自助餐，透過open rice搵到呢間位於葵涌嘅新酒店。以價錢而論，一家三口埋單總數都係500蚊有找，真係認真超值。不過唔好以為價錢平，食物質素都會將貨就價。基本嘅自助餐食物都有，而且味道亦算唔錯，性價比都幾高。唯一遺憾係睇食評話有生蠔食，結果全晚都無供應，確係令人有點失望。不過總括嚟講，論環境、價錢同食物味道，都算係幾抵食嘅。…Read More

母親節正日，同女兒及節日主人翁，一家三口去左呢間位於長沙灣嘅卡莎338食晚飯。地點唔難搵，地鐵A2出口直行十零分鐘就到，餐廳外貌好有bar的感覺。雖然路程唔遠但適逢當日都幾熱，所以一坐低攞餐牌嘅同時，亦要求先放底幾杯水飲下，結果呢三杯水前後要叫左三次，共約十分鐘左右先到，仲要只得半杯？算！食野先係主題，叫野食先。睇下餐牌非常簡潔，我地亦唔囉嗦就點左個二人餐試下。餐湯要左一紅一南瓜湯，紅湯無咩特別，相反個南瓜湯就完全係龍蝦湯嘅味，我估計連侍應自己都記錯左，不過味道係幾好嘅。雖然套餐內已經附有兩隻韓國金蠔，與此同時亦見到檯面上有特價10蚊隻生蠔做緊推廣，所以亦都順便叫左四隻試下。兩款蠔上左檯試食後，其實兩款都唔差，不過食過跟餐果隻後，你會好明白點解推廣果隻會係十蚊隻，因為口感都已有明顯分別了。接住係套餐中嘅咸豬手及小食，咸豬手幾有驚喜，脆口但肉質又保持到唔乾身，口感真係唔錯。至於主菜我地點左個十六安士斧頭扒要六成熟。上檯見到真係大過我家小姐隻手好多，視覺效果就真係贏哂；可惜食落就越食越唔對路，因為每再向扒嘅中心位切割，難度就越嚟越大。點解？因為塊扒除左個邊之外，其餘大部份都無六成熟，而且越近後方有脂肪位置就越生，大家可以睇下以下圖片，到底係六成熟定兩成都掹掹地？基本上塊扒只食到三份一多少少，真係好浪費，於是向侍應反映問題，佢地只表示抱歉並送左5張生蠔劵俾我，但完全唔諗下點樣解決我仲有三份二塊扒食唔到嘅問題。唉！我由反映問題果刻，都唔係打算諗住要R咩著數，只希望佢地處理下點解決我果三份之二塊扒，當然最後都係無處理到，唯有當減肥食少啲。最後，問下女兒食唔食甜品，順便order埋餐茶。女兒想食心太軟雪糕，我就同太太點左杯凍檸茶同熱檸蜜。落完單無耐，侍應又好識做攞哂野嚟叫我埋單，之前要柯打咩都無人或好遲先有人應，我無叫埋單時佢地又咁自動波喎？又算！我就打算起碼都上埋啲甜品餐茶先再埋單，而張單亦間接成為左我時間證人。Last order我喺晚上8點32分落單，個甜品可能要花啲時間，所以耐少少要落單後半個鐘先到；但我同太太嘅飲品，凍檸茶加熱檸蜜，全後要經過三個唔同侍應通傳，再需要合共約廿五分鐘先至出現到，唔知仲以為要等埋檸檬喺樹上熟跌落地後，先至有得我地飲。講番個甜品，做形可以而味道不過不失啦！總括嚟講，感覺佢地食物嘅水準唔係好穩定，但又未至於係差嘅，不過招呼方面，侍應們嘅態度其實唔錯，但人手不足令其他應該有嘅優點，都被呢點掩蓋哂。希望佢地喺呢方面真係好好檢討一下。…Read More

母親節要外出食晚飯, 搵位係一個好重要議題, 而且節日當前人流多, 想有較貼心服務嘅食肆就更難。今次睇左openrice介紹, 事先book好哂位, 位於佐敦嘅寶貝廚房, 俾到我一個極好嘅體驗。我一家book左晚上7點半時間, 去到座位已經安排好, 完全係零等候。職員安排好入座後就奉上餐牌同是日推介。適逢母親節正日, 佢地有母親節套餐, 有頭盆煙三文魚沙律, 黑松露忌廉湯, 主菜及甜品, 兩位起計都係428元, 價錢合理同公道, 問題係食物質素如何喇。當晚點左個二人套餐, 分別係太太至愛德國鹹豬手, 而我就選擇左法國炸春雞。沙律我一向唔多喜歡, 不過今次呢個煙三文魚沙律算唔錯, 搭配嘅水果好新鮮, 不知不覺成碟食哂。而個忌廉湯真係一絕, 唔膩口重好重黑松露味道, 同以往飲嘅忌廉湯, 比對下反而有清新嘅感覺。主菜方面, 兩款都做得好脆好香口, 鹹豬手嘅鹹味非常適中無過位, 肉質亦無死實實感覺; 春雞肉亦保持到嫩口之餘, 仲啖啖肉汁伴隨每一次咬落去時嘅口感。甜品方面, 選擇左藍莓芝士餅同沙加餅。食完咁多肉再食呢啲甜品, 理應係隨意咬一口就算, 因為兩款餅眼望都應該屬於重甜系列。不過睇同感受始終係兩回事, 估唔到兩款餅嘅甜度都好恰當, 真係令我有點意外。至於服務, 佢地職員好細心咁介紹每款美食, 仲推介我地邊幾款可以一試, 感覺好舒服但又唔hard sell, 全個過程佢地嘅態度好親切, 我第一次幫襯, 但單係呢點已經令我有再嚟幫襯嘅意慾了。埋單時配上openrice提供嘅九折優惠, 400蚊仲有找。一間食品同服務都咁出眾嘅食肆, 相信我會好快再嚟幫襯。…Read More

為左同太太慶生及結婚周年, 特意上openrice搵下有咩好推介, 見到呢度食評都唔錯, 縱使價錢稍高但仍然一試。結果亦無令我失望, 無論環境及食品質素都相當有水準, 唯一美中不足係海鮮類無我至愛熟蝦供應。訂位時希望酒店方面提供一塊生日牌, 佢地好貼心已經準備好哂, 到我奉上蛋糕及生日牌同太太慶祝時, 太太都感到有驚喜。總結係非常滿意啦！…Read More