dinodragon's Profile

呢排封關. 少左好多人黎香港. 成個尖沙嘴好多商鋪都唔開. 只有食肆.莎莎卓悅等店係有開.去到食肆都係好疏落. 今日係紀念日所以都出去揾下野食. 首先去左THE ONE. 成個二樓化妝品都無開.去到四樓食肆都幾多人. 尤其日式牛鍋個間. 我地揾唔到野想食就行去I-Square.I-Square一樣水盡鵝飛. Log-on都無開.去到三樓D食肆完全無咩人. 見到Panash有特別餐-牛扒餐$88就入去試下. 入面只有一檯客. (好過隔離意大利PIZZA鋪一個客都無).$88有湯.麵包同牛扒.如果要野飲另加$10. 另外叫多個黑松露雞胸意大利飯套餐.呢個無特價要$138但包野飲.牛扒上到黎係唔太夠厚. 味道OK. 薯條炸得都OK. 意大利飯反而有驚喜.通常意大利飯都係做到好淋. 不過呢度可能就番香港人口味唔太淋身. 好多磨菇好香. 另加$10要左個橙汁都OK.起碼係鮮搾. 考慮到而家大家樂食牛扒都要$70.茶餐廳要$98.我覺得係I-Square$88食到牛扒餐係超值. 服務方面.可能係太少客所以都好好.…Read More

今日大除夕. 年年都係去食中餐. 今年試下搞搞新意思. 大除夕食西餐. 就去Frites啦. 上次去好黑.尤其係坐中間位置. 真係要開電話先望到個餐牌. 成日比隔離檯話. 今次坐邊位. 燈光好好多. 當然仍然係好黑.但係起碼可以唔使開電話囉.呢間Frites都去左最少七年.每次都係有揀靑口. 有麵包同埋薯條. 今次揀埋最後一隻冬蔭公汁. 其實唔算太辣. 唔太有味. 然後叫個生牛肉tata. 唔錯. 重有雞肉沙律. 當然有叫牛扒. 個牛扒都好食. 12OZ都可以食飽人. 因為又係有薯條. 重有叫左risotto. 反而呢個唔太出色. 我覺得太濕. 好似食糊仔咁. 最驚喜反而係個啤酒. 唸住叫黎玩下.但係加左玫瑰味反而更易入口.環境好好. 因為大除夕D人都走曬. 唔太嘈. 而且好快有位. 幾乎次次夜晚黎都唔使等位. 食物有一定水準. 下次會繼續黎. 不過唔會再叫risotto囉.…Read More

好耐無食過PIZZA. 近近地去樓下PIZZA EXPRESS叫個外賣PIZZA食下先.但見禮拜日好多人.唔想等位.於是就叫外賣.打定電話落去.叫做個PIZZA. 千層麵.沙律等等.15分鐘可以落去攞.15分鐘後落到去.午餐時段爆滿.拿拿林攞番屋企食. 沙律都正常. 然後PIZZA.都幾細個. 仲有雞翼. D雞翼普普通通.無咩味. 如果係辣雞翼就好啦. 一試千層麵就出事了.全部系番茄醬. 千層麵??得兩層.完全系食緊醬. PIZZA又細又無特別.都系無下次啦.而且都唔平.…Read More

大除夕黎食飯. 其實呢度已經幫襯左九年. 終於都肯寫下第一個食評. 次次都係叫個幾樣野. 兩面黃. 潮州翅. 蝦球. 滷水豆腐.  開始幾年覺得好食. 但係呢幾年水準開始下降.  唯一係潮州翅得. 好杰. 唔似出面D所謂翅其實同街邊碗仔翅差唔多. 不過都偏貴. 要兩舊水. 兩面黃脆. 太古城中心而家連FOOD COURT都拆埋. 丼丼屋都無埋. 全部變曬D貴價餐廳. 遲D可能跨區去第二度食野了.  …Read More

無啦啦唔會行經呢度. 通常黎開黃金商場至會黎呢間野食飯. 西九個邊間間餐廳都多人到爆.見到禮拜六12點幾唔使等位就即管試下. 有午餐仲有自由配搭餐. 就每樣一個. 午餐要左個牛扒飯. 牛扒午餐黎講係OK. 不會好似出面茶餐廳或者大咩咩個D咁硬. 個D直情咬唔爛. 最後一塊牛扒咬剩半塊.然後要左個59蚊兩送自由配搭. 我就要左個三文魚同炸蝦天使麵. 好多配菜. 天使麵都係無中伏. 煙三文魚合格. 炸蝦都唔會太過多炸粉. 蝦有蝦味. 兩個湯要左羅宋湯同埋南瓜湯. 都係無出事.咁既價錢. 食咁既午餐. 堅係唔錯. 不過一點過後開始就好多人. 都係快快脆脆埋單走人.…Read More

屋企人生日. 就試下呢間廣東fusion菜. 不過位置比較隔涉. 中環同上環站兩頭唔到岸.上到去好多人. 一定要叫招牌乳鴿. 正!  又香又美味. 次次黎親一定幫襯呢味野. 其它菜式相形之下無咁突出. 見到隔離檯有一味火燒波羅. 於是我又叫一個. 原來波羅入面系牛肉. 唔. 都夠淋. 不過點黎主要系想望下侍應點樣火燒波羅.其它腸粉. 包等中規中矩. 比較好既係好肥同好邪惡既東坡肉. 嘩. 呢鋪唔理咁多. 肥都唔理. 食佐先講.臨走仲系對乳鴿依依不捨. 叫多兩隻行街先 …Read More

去開油尖旺. 揾間餐廳食個飯先.  今次去佐Kitchen One. 禮拜六都頗多人. 於是入去等位. 都仲有位. 於是就叫佐一個牛扒一個三文魚天使麵.先黎一個沙律.湯.同麵包. 沙律OK. 忌廉湯可以. 不過個羅宋湯就偏酸.然後就黎左個天使麵. 三文魚OK. 但係個白汁毫無味道. 曬佐三文魚.  然後就係個牛扒. 嘩. 完全唔得. 唔係話好似連鎖快餐店個種牛扒. 咬都咬唔開. 而係落佐太多粉. 完全唔似一塊肉. 軟林林. 無咬口.最後黎左個果凍. 不過不失. 呢度環境服務都OK.  但係D主菜就真係失色. 下次都唔會再黎.…Read More

食得火鍋多. 今次生日試下蒸氣石鍋先. 因為聽落健康D.七點半去到. 都有七成滿. 上一樓點菜. 見到有任食. 咁就最好了. 因為真係懶得再揀. 首先師兄師姊都話要點排骨粥. 其它海鮮可以揀五款. 就蟶子. 龍蠆. 元貝.鮑魚.蠔. 不過最先上既係個西洋菜唐排. 然後係貝殼盛宴. 一上黎個貝殼好鮮甜. 唔點醬都得. 呢鋪得啊.然後再黎個南非龍蝦. 同樣都有水準. 唔會話套餐就差D.龍蠆. 元貝.鮑魚.中中庭庭. 蟶子都唔錯. 去到蠔就出事了. 好多沙. 要減分.個人都係覺得生蠔好食D.海鮮只能揀五款. 不過右手邊既餐牌可以任食. 就試下烏糟雞. 馬拉糕. 紅棗糕.勝瓜. 涼瓜. 南瓜. 其中馬拉糕非常得. 好鬆軟. 如果唔係好飽真係想食多幾件. 其它就普普通通.最後食左兩個鐘. 當然要試埋個個讚到天上有既粥啦. 唔. 個排骨好淋. 但係我覺得個粥就名過其實. 味道普普通通. 並不突出. 唔係話難食. 但好好食又未輪到.仲有叫佐甘蔗水. 好飲.整體野食OK.服務就更好. 全程有人跟. 真係替D員工辛苦. 要一眼關七. 每樣菜都要替客人開爐熄爐分菜. 好在而家只係七成滿. 如果爆滿真係會漏.廁所衛生OK. 不過要經過個後樓梯走廊. 始終係舊樓. 個走廊就差D.…Read More

唔使開工既日子. 可以慢慢揾地方食個BRUNCH. 好耐無去過飲茶. 就揾個地方去啦. 陶源去得太多. 又唔想去酒樓.於是唸下去中環. 可以趁D人未食下晝飯去. 平時12點去永遠咁多人. 今次11點去. 果然唔使訂位都可以即刻有位.聽講呢度D乳豬好好食. 於是叫碟黎試下. 果然好脆. 一流. 不過真係好肥. 唔緊要. 至多今晚番去跳多次鄭多燕啦.相中都可以見到. 皮炸得好脆. 而底下基本上係好幼一條瘦肉. 中間大大層就係肥肉. 所以要旁邊要加多碟菜中和番. 值得推介.除左乳豬. 叫左炸豆腐. 好香口. 外面脆. 入面鬆化. 都係可以推介. 反而另外兩個送係牛肉同埋餃子. 就不國不失. 並不比其它餐廳出色.本來仲叫左個雞翼. 可惜部長話無貨. 咁就轉左個芝麻雞. 個雞都可以. 好香口.有芝麻香味. 最後叫多個豆腐花. 今日比較遜色. 唔係好凝結. 可能因為多人所以未夠時間做到最好.上次黎好好多. 一桶桶上可以自己招呼自己.食落都唔錯. 好軟滑. 係水左D唔夠傑遮. 已經12點半. 開始超爆了. 我地本來仲想叫多個炒飯. 不過唔使了. 個脆皮已經撐到好飽. 連雞都食唔曬. 決定打包番去當油雞飯食.…Read More

今日係紀念日. 不過唸好耐都未決定食咩. 既然去左尖沙嘴.嘗試去下新港中心既鼎泰豐同埋RUBY TUESDAY碰下運氣. 不過仍然好鬼多人. 行到腳仔軟.我只係想揾間西餐廳食下野. 吹下水遮. 唔通係尖沙嘴都咁難???行到去PIZZA HUT. 望下餐廳外既餐牌. 價錢都OK. 落去啦. 我地兩個人梗係揀2人套餐. 套餐都有好多種. 有某D信用卡(東亞/渣打/CITIBANK等)有優惠. 我見而家個推廣係黃金芝脆紐紋批. 就叫呢個試下啦.首先上左兩個餐湯. 我一向鍾意同老婆一人一種湯. 咁就可以試曬唔同味. 但好奇怪. PIZZA HUT既白湯永遠都係熱D. 而個雜菜湯永遠都係涼D. 無論邊間都係唔夠熱??????試左咁多年都無變過.邊間都係唔夠熱!!!!雜菜湯偏酸. 而白湯就好味D. 起碼無出邊咁稀. 同埋熱D.個餐有兩樣野揀. 除左黃金芝脆紐紋批就揀左個吞拿魚煙肉長通粉. 其它可揀既係三文魚沙律. 葡國雞飯同埋肉醬意粉. 葡國雞飯同埋肉醬意粉出面茶記食得太多. 唔想今日再食. 沙律就唔夠飽. 個長通粉OK. 好香口. 除左煙肉同吞拿魚外仲有菠菜絲. 呢個配搭唔錯.紐紋批先係主角. 不過我好懷疑有幾多對情侶可以食得曬. 次次同老婆食PIZZA都起碼包走1/4個. 今次更誇張包走半個!而隔離臺對情侶好似都係食左半碟乍.  個批好好味. 雖然初頭我都唸個批有桃. 有帶子會唔會好騎呢. 原來我唸多左了. 桃同菠蘿一樣都好襯個PIZZA. 個批邊仲好多芝士. 好啱中意多多芝士既人.買單3舊水. 平過RUBY TUESDAY. 而且聽聞尖嘴RUBY TUESDAY而家差左好多. 都係自由行所累. 好懷念十年前間TRENDYLAND餐廳..........…Read More

今日去開尖沙嘴. 無咩想食. 於是走上I-SQUARE. 都係毫無頭緒. 以前食開個間日本野執佐. 因為間野50-60蚊有套餐. 食過兩次OK. 點知今次再去唔見左.呢間係類似快餐店. 得幾個選擇. 唔係豬軟骨烏冬就係咖哩飯. 咁我就兩個都叫佐. 食完覺得咁既價錢. 當食快餐OK. 份量足夠. 而咖哩辣度又夠. 本來無咩挑剔.最差都係服務. 唔知係咪怕人霸住張臺唔走. 死都要人買完野至準入去坐低. 如果人地攞好多野咪好唔方便囉. 我食野個日已經有人鬧D職員. 真係想多D人食野好心靈活D啦. 你將D未買野既潛在客人趕走曬係咪好過癮?…Read More

大角嘴好多平價野食. 不過呢幾年樣樣都加. 大家樂都就黎加到40蚊. 係大角嘴要揾40蚊晚餐都越來越難. 除非日日麥當勞. 今次就係街外見到MENU. 見仲有40零蚊既野. 於是入去試下.入到去先發現呢間野原來主打甜品. 不過頭先外面MENU見有晚餐. 咁就即管試下啦. 餐廳係要自己出去收銀處ORDER. 我要左個葡國雞飯. 另外仲有一個三文魚意粉. 大概10分鐘到. 見到真係嚇一跳. 碟就好大個. 個意粉得個兩"柱". 好在個葡國雞份量都有一碗飯咁大.味道OK. 但如果一個大男人真係千祈唔好叫意粉. 食唔飽架!!! 我剩係行左個圈望下D甜品. 外表OK. 不過一樣係細細款. 但要40蚊以上. 一句講曬. 呢間野唔抵食. …Read More

趕住夜班船翻香港. 所以都費事出去外面食. 係賭場入面求其揀間快餐店食. 不過不看尤自可. 一看把幾火. 隨便一個飯餐都要75蚊. 最平既兩送飯 (我覺得即係雜碎) 先至48. 所以行好耐都未揀到. 落去賭兩鋪再上翻黎.再次上黎. 唸起今次黎澳門都無咩試過澳門地道野 所以想試下豬扒包. 呢度大利來要48一個. 而呢間新口岸只需38. 趕夜班船之下好好醜醜買個黎試下. 之前已經好多食評話而家大利來唔好食. 所以我對呢間都無咩期望. 可能因為咁所以又唔覺得難食. 但亦唔等於好食囉.然後加多個葡式椰汁雞湯麵. 48蚊. 都係不過不失. 有好重椰香. 雞都算OK. 最要緊無其它鋪頭咁掠水. 至於飽唔飽就見仁見智了.呢個FOOD COURT唔知點解晚飯時刻都唔滿. 好易揾位. 雖然威尼斯人其它地方都好多人…Read More

好耐無去過澳門. 今次趁佛誕去玩. 主要都係去賭下.食飯上網爬過文. 心入面都無咩特別心水. 總之唔去劣評如潮個D就得. 於是揀左呢間加路. 我無訂位. 去到有三個人等緊. 個好似老細既人叫我同個三個人等. 話執緊臺. 不過都執佐好耐. 我要等10分鐘. 隔離三個人仲耐. 都係香港人做野快手快腳D.坐低. 因為唔知揀咩. 於是就叫左最大路既馬介休同非洲雞. 非洲雞好快上. 食到很重蒜茸味.幾好食. 可惜老細話我地唔慣都係少辣最好. 其實如果再辣D應該仲好味.然後等佐好耐至有馬介休. 呢個就無咩特別. 我覺得只系加左薯仔既炸魚囉咁高興. 叫左支SANGARIA飲下. $75細JAR. 兩個人剛好.味道就普普通通.總結. 麵包係送既. 不過水要收錢. 最好係非洲雞. 冷氣無香港開到咁衡. 有D熱. 跟住要去賭場涼吓.…Read More