油麻地葉問's Profile

見fb有人賣廣告sell 下午茶放題 點知中哂伏！星期日食1:30 個round $98 難食到嘔！$48 都比多佢首先，環境唔得! 成間鋪都超油煙，冷氣不足，地點偏遠。服務方面，上菜速度 巨 慢 ！等左一個鐘都未黎齊第一張單既order!! 等左半個鐘先黎第一樣野食。侍應態度不好。味道方面，簡直係地獄！九成食物都係無味！所有食物無釀過，真係鹽都同你慳番！真心除左咖喱魚蛋，燒賣，芝士腸，西多，煎釀三寶，其他都全部唔好叫！！！自己煮都無咁難食。 大家可以叫你既ex 過黎食！：）…Read More

每個月總要同朋友食翻至少一次放題，喪點食物，開懷大吃，今次朋友推介食極尚大瀛喜，book左夜晚九點半果round, 一到餐廳門口，好多人等緊啊，好彩唔洗等好耐，五分鐘到就入得了，我地三個女仔安排左張好闊既四人枱比我地，坐得好舒服。一坐低就開始點野食啦，呢度既食物種類應有盡有，刺身壽司手卷天婦羅串燒......多到講唔嗮，不過我最欣賞係呢度個自助區，前菜，小食，甜品，飲品咩都有，好吸引。落紙點既食物都黎得好快，首先梗係我既摯愛---刺身啦，超大盤，上既時候好有氣勢，識噴煙既，所有魚生望落都好新鮮，三文魚紋理好靚，食落油香四溢，夠肥美，赤蝦好大隻，肉質夠黏，味道夠鮮，食得好過癮，另外鮑片同帶子我都好中意，十分鮮甜，整體黎講呢度既刺身無得輸，當然如果全部魚生都可以厚切就更加perfect中意食日本野既我除左刺身，唔可以唔點既仲有壽司，當晚最滿意既係芝士蟹棒壽司同埋黑松露火炙三文魚壽司，自己一個encore左兩次，壽司size偏細，可以一口一件，咁就食多幾件都唔怕飽啦，芝士蟹棒壽司上面條蟹棒係舊飯就兩倍，啖啖肉，配埋香味濃郁既芝士我真係覺得好夾，因為我咁岩中意食蟹棒同芝士，另外黑松露火炙三文魚壽司又係勁正 燒過既三文魚油香四溢，配埋濃郁既黑松露，味道絕配。試完呢度既壽司，就要試下手卷，點左海膽同龍蝦沙律手卷，手卷既size好迷你，唔驚食完一件就食唔落其他野，好貼心，海膽好新鮮，唔腥，入口即溶，而且分量唔少，當然如果多D就更好啦，而龍蝦沙律手卷既飯同餡就分量岩岩好，蝦肉紮實，味道鮮甜。之後點左個牛油粟米，間間放題都有得食，我亦每次都會點黎食，牛油味好夠，粟米香甜，食極唔厭。呢度既甜品亦比到驚喜我，竟然有macaroon食，仲有唔同味道選擇，朱古力味，檸檬味，芝麻味等等，色彩繽紛，我至愛朱古力味，甜度適中，朱古力味突出，岩曬我呢個朱古力迷。另外個奶凍都好正，食落好滑溜，奶味濃郁，我自己食左兩個!整體黎講，呢度價錢唔貴，選擇又多，下次會同朋友再黎。…Read More

工廈附近多數是茶餐廳居多，但觀塘裹頭有著一間獨一的cafe。我當然走入去試下。一開始飲個湯，佢係一個好似羅宋湯味道既海鮮湯，入面有好多肉碎同蜆肉，飲下去啖啖肉，味道好甜，帶有啲酸，十分醒胃。之後黎有個前菜，忌廉煮蜆，蜆肉帶有清酒味道，加上忌廉既甜，中和左清酒既澀，食起來味道好夾。之後就係羊架，羊架煮到五六成熟，唔會韌，食落又唔會太生，唔會咬唔開，味道方面，因為羊架煎過，食落去好香口，加上酸酸既配菜一齊食，原本食唔到羊既羶味，口感、味道都一流。最後係個白汁意大利飯，佢飯煮到好企身，食落去唔會因為好多汁令到軟哂，但汁既分數控制得岩岩好，唔令因為太多白汁而食到好（制），但每粒飯都有汁包住，味道好濃，重口味既朋友可以試下。整體而言，食物質素好，環境十分舒適，寬敞，可能就係工廈既特色，優勢。…Read More

一個寒冷既晚上走在尖沙咀的街頭，同三五之己想搵到地方食下野，飲下酒，我推介大家可以試下日式居酒屋，和亭。一來個前菜就是凍食水晶菜，水晶菜特別之處係表面有好多水珠，一咬落去口腔充滿住水，係食正餐之前濕潤下口腔。今次我地黎飲酒為主，主要介紹送酒小菜，先來是白子配魚肝，味道上帶有酸味，十分醒胃，入口融化既白子配有咬口既魚肝，有不同的口感。之後來了一個雜錦天婦羅，有蝦，有魚，有南瓜等，最深刻有苦瓜，整體佢表面唔會太厚粉，裹面仲保持到嫩，唔會乾哂，個苦瓜炸完之後好香口之後仲無左苦瓜既澀。係天婦羅既旁邊有炸左既蝦頭，店主會呢個可以當薯條咁食，送酒是非常夾，食落十分香口，好脆，送酒一流。最後推介一個清酒煮蜆，出面好多都會出現既情況係有酒味無蜆味，或有蜆味無酒味，呢個好在入口時一陣陣既清酒香味停在口腔一會，隔會蜆既鮮甜隨之跟上。…Read More

在樓上店搵到一間好有家既感覺既日式料理，入到去環境十分舒適，好似彷彿處身日本當地人既家中進食。一開始當然試下D刺生先，佢有好多選擇既，咁我個套餐入面就可以選擇5款，當中有北海道帶子、油甘魚、劍魚、海膽同埋北寄貝，刺生都幾新鮮，食落去都好有口感，唔會食落去散哂咁，味道方面都好鮮甜，唔會有腥味。之後叫有個牛肉煲，牛既份量幾乎係全個煲咁多，肉質似肥牛，但又唔係好似肥牛咁煮耐左會韌，口感十分嫩滑，入面仲有豆腐同窩蛋，配埋牛肉食更加嫩滑，加上湯底係似壽喜燒既湯，甜甜地，十分可口。燒物方面，有呢個燒牛肉，同上面個個牛肉唔用既係佢用一D較實既部位去做呢個燒物。佢燒到大約5-6成熟，外面只係加左黑椒去做一個調味，完全食得出牛既鮮味，黑椒又能夠更帶出牛既味道，咬落去又十分有口感，5成熟剛剛好，唔會破壞左肉既質感。最後，一個貌似好普遍既炒拉麵，佢用左小丸子用既木耳一齊炒，好香口，又似食緊炒麵同時又似食緊小丸子一樣，最重要既係佢既材料好一般，但炒出黎好似食緊日本當地食緊少拉麵，令我當時緊加懷疑我係咪身處日本。總括而言，環境十分舒適好有家既感覺，食品款式多，各式各樣都有，最緊要係價錢都好合理。…Read More

今次慕名而來嚐嚐鉄人旨花的鮮，餐廳主張由廚師發板以當時最新鮮既食材做出料理。一坐低，師傅已經呈上很新鮮的日本真蠔。先講下佢既大小，隻蠔足足有一隻男人手掌咁大隻，口感方面當然入口即溶，係口腔停留既只有蠔既鮮味，加陣陣既海水味到。之後黎左個視覺感觀好好既白子，白子既口感都係好溶化，好似食緊豆腐花，味道好似食緊魚肝咁，加上醋做個調味，中和左內臟既腥味，作為前菜好開胃。到刺生啦，先係食呢個鏗魚刺生，口感好實，類似吞拿魚腩，味道上好重魚香味，但佢本身脂肪比例較低無拖羅咁香，但食落去好似食緊腩肉緊，好有口感。之後到我至愛既海膽軍艦，呢個海膽新鮮到不行了，食落去一D苦澀味都無，入口即溶，溶化後仲會係口裹面停留陣陣鮮味，可以稱得上係口中迴腸盪氣。燒物方面，呢個燒帶子最深印象，佢既大小係一個拳頭咁大到，師傅燒到外面好香口帶有少少脆，入面仲要好嫩滑，外面再加多一塊紫菜包住黎食，感覺好似食緊小食一樣，十分香口。最後推介既係鰤魚，呢一種魚係其他餐廳好少食到，佢既脂肪比例比較高，食落去好重油香味，當中又帶點甘甜，口感方面，較軟化，入口即溶，魚味比鏗魚更儂。總括而言，份量雖少，但係新鮮程度，廚師既專業都是比較高級，完全方便我呢種懶人又唔想諗食咩又食到好新鮮既食材，好有質素既料理，一切交給師傅!…Read More

上水呢個地方除左水貨出名，原來野食都多。今次就搵到呢間漁匠日式料理。咁今次我就兩個一去，一於試下店鋪推介既二人盛套餐，光睇個價錢都覺得吸引，咁既價錢食日本野？先試下呢個頭盤黑醋凍蕃茄，先係佢服務好好幫你去哂皮，超方便，凍食感覺好特別，蕃茄本身酸酸甜甜，加上黑醋完全凸出酸甜感覺，味道口感一流。之後食個鵝肝，不過呢個唔同，佢係夾住蘿蔔冬菇一齊食，鵝肝入口即溶，但又有蘿蔔冬菇比你咬下，唔會食落去空溜溜。鵝肝本身農味，但加埋蘿蔔冬菇口味清新，中和左個味道。最後介紹埋呢個金菇肥牛卷，呢個最難之處係煮太耐肥牛會老無哂牛味，煮太短時間又怕金菇唔熟。呢個個火喉、時間都捉得好好，肥牛仲嫩口，金菇爽口唔怕韌，肥牛既牛汁入哂金菇到，一個字：正！套餐仲有活魚刺身、壽司等不能盡錄，總括而言咁既價錢食到咁高質既日本料理，真係買少見少。 …Read More

三五知己去到旺角諗食咩，見到有間火鍋店好似幾好，又岩一班人去食就走左入去試下。入到去見到呢個涮涮鍋推介，又有得打下邊爐，又有得食下長腳蟹，仲有得食下刺生，幾過癮就叫左呢個。黎到之後見到哇左一聲，除左長腳蟹之外，仲有青口、扇貝、蝦等等各式各樣海鮮配搭呢隻蟹，湯底份外鮮甜，海鮮樣樣新鮮鮮甜，好似係海一釣就食咁。食完哂啲海鮮就可以劃紙仔點其他野食，款式好多，丸、蔬菜、其他海鮮，包羅萬有，廚房仲會按你地人數安排食物份數比你，唔會浪費之如，仲可以比你留肚試更多食物，十份體貼。今次我想重點推介兩種食物，1、鵝腸，呢到啲鵝腸肥瘦均衡，燙二下水就食得，爽口彈牙，睇得出清洗得好乾淨，食得放心。2、就係肥牛，呢到啲肥牛偏少脂肪，但食落去好好肉感，燙耐左都唔怕韌，同埋好重牛味，食多兩碟都唔怕超標。總括而言，食物質素好，價錢合理，食物款式多，唯一差少少係環境比較逼少少，爐與爐之間都有啲近，食落會越黎越熱，不過佢啲冷氣都足夠，所以都唔會食到出哂汗。…Read More

放題真系食極都唔厭，因為好多唔同野食可以選擇，今次試呢間韓日屋，又有韓國食物又有日本食物，啱嗮我。一坐低我地就叫左魚生，甜蝦就普普通通，不過果兩隻好大隻既虎蝦先系重點，好爽甜，而且肉質彈牙，好想食多幾隻 ！之後再encore叫多盤其他刺身，全部都好厚切，特別系三文魚，好新鮮，入口充滿魚油香。另外，我地仲叫左呢間舖既特色壽司。個presentation好鬼靚，師傅好有心思咁系碟度畫野，而其中烏卒卒最有驚喜！雖然系有D似school food，不過一樣好食，墨魚彈牙，亦食到墨魚汁香味 ，同舊壽司飯好夾呢個人參雞湯亦都好足料，大大條人參，而且雞湯鮮甜，帶有少少人參既苦甘味，重點系熱辣辣， 飲落心都暖埋。到左重點韓式燒肉，所有肉類都好新鮮，肉質唔散，調味亦好足夠，就咁燒完就食，唔點特別醬料都好夠味，仲有好多款式部分揀添！最中意雞肉，因為好滑，肉質完全唔鞋。當然仲有好多甜點選擇，食左cheese cake同泡芙，兩樣都唔錯，前者有濃郁芝士味，後者就奶油香滑，食到好飽，如果個胃大D，我真系想試嗮咁多甜品！…Read More

路經天后見到一間意大利餐廳，心諗小巷入面竟然有意大利菜食，不如試試佢。入到裹面環境寬敞，加上燈光配合，好有氣氛。牆上仲掛滿明星來光顧既相，格外期待。坐低左之後，我叫左個焗田螺，薯容又香又滑，佢除左配薯容焗之外，仲加入大量蒜蓉，味道濃得黎又唔會太重口味，田螺都好鮮甜。主菜叫個三文魚意粉配牛油白酒汁，佢用檻欖油黎煮，健康得黎又份外香口。加上佢用水瓜豆做個配菜，鹹鹹地中和返三文魚既油膩感。三文魚我好怕食煎既，因為好驚佢啲肉唔滑鞋身同乾身，但佢呢個煎到香得黎又滑，外脆內暖，肉汁仲保留到係入面，意粉亦做到al dente口感。GOOD！最後係一個咖啡味既Tiramisu，佢好重咖啡味，好似飲緊杯咖啡一樣，口味方面好滑口好creamy ，侍應同返我講原來呢款甜品係自創，連霆鋒食過都話好味。呢間餐廳好好味，好正宗，價錢方面亦合理，位置又容易搵，值得一試。…Read More

好耐無放肆大吃 所以走左黎宮崎食燒肉放題 首先呢個八色燒肉幾特別 有芭蕉 千島 紅酒等等既味道 我每款都試左少少 雖然每款味道唔太特別出 但肉質鮮嫩 都幾好食另外叫左唔同種類既肉 牛肉豬肉雞肉羊肉咩都有 最鍾意就係個牛舌 雖然唔係厚切 但薄薄地燒出黎另一種風味 燒到個邊脆脆地 而且調味適中 佢提供既醬汁我幾乎無點過 另外個羊架都值得一試 肉質鮮嫩 無咩so味 好想encore 不過要留胃呢 粟米同魚柳我都超鍾意 粟米加左牛油一齊燒 更加香甜 食左三次 魚柳肉質好滑 而且食魚健康d嘛 除左燒肉 仲有好多熟食可以選擇 我最鍾意天婦羅蝦 超大隻蝦 炸漿唔厚 熱辣辣 好好食跟住叫個青瓜蟹籽沙律 解下膩 再接再厲 叫左刺身 壽司 同泡菜 刺身都幾新鮮爽甜 壽司我好欣賞 因為夠細件 食多幾件都唔怕飽 泡菜我又係好鍾意 辣得黎好爽脆 有韓國地道既感覺…Read More

一入到間餐廳已經好似變身特首一樣,裝修高貴華麗，坐係入面已經係一種享受。一開始係個冷盤，海哲食落去好爽口，但又一陣陣海水或者腥味，用香辣去走腥味但又唔怕好辣。之後到燉湯，好鮮甜既雞湯，加入螺頭同瑤柱，令個湯更甜但又唔會好農，足材料但又唔怕互搶味。呢個大良炒鮮奶好考功夫，佢呢個時間岩岩好唔怕太老，又唔怕短時間令到唔能企身，呢個好嫩滑好企身，好似食緊炒滑蛋，好香。呢個酥炸牛腩，炸得好好，外脆內軟，食牛腩好怕太韌，佢食落好鬆化，但又好有口感，加上佢個咖哩汁唔辣，甜甜地一流。食呢個千層豆腐好似食緊肉咁，好多層豆腐令同食落好似要雞肉咁一絲絲，中間又帶出一陣陣豆香味，底部用芥蘭托底，吸哂啲湯好juicy，好冧。最後一個好似成日係酒樓食到既伊麵，呢個首先用鮑汁整，佢有汁之餘，仲食落去好乾身，唔似去面食個啲一堆野，食到個口黏住咁。總括而言，平民菜色，高級煮法，一個字 享受。…Read More

一路都好想燒下野食，但又懶得自己燒，咁就去下呢一間食燒烤，串燒既川燒啦。呢張係佢個菜單，呢到只係其中一面，可想而知佢有幾咁多選擇。燒烤最正係燒海鮮，呢個係燒聖子皇，唔講味道，佢個size足足有隻手掌咁大，口感方面就好爽口又唔怕腥，十分鮮甜。呢個係黃金蝦，首先佢招呼好周到，剪好省返脫殼時間，好有肉感，大大只仲要有蛋黃包住，風味十足。佢都有好多特色小食，呢個係用腐皮包住炸既餡餅，食落去超似食緊肉，好新奇。整體黎講，食物夠新鮮，夠創意，味道不錯，價錢合理。…Read More

自己本身好中意食車仔麵, 所以都食到變專家咁濟。一聽到呢間野好出名, 就令到我好期待!!一望個餐牌, 咁貴既, 不過算啦, 好食既話都值既。聽朋友講, 呢到既豬最出名, 於是叫左豬紅, 豬腸, 豬頸肉, 配油麵, 再加一支可樂。豬紅的確同出面好唔同!! 有驚喜! 中意食豬紅既唔可以錯過! 因為呢到既豬紅好滑! 滑到好像豆腐咁! 但可惜, 無咩豬血味。覺得似食緊豆腐多啲。豬腸佢比得勁少, 而且!! 一半都唔係豬大腸黎既!! 係好薄果隻直腸定小腸(我唔識分), 但叫得豬腸, 緊係食厚厚既大腸果隻口感同味道, 呢隻薄腸完全無大腸果隻臭臭地但又幾香豬味, 吸引你去食既味道, 連口感都好差, 好NUM又薄, 又食唔出豬味。豬頸肉, 一般, 肉質較實, 又無燒過, 所以無酥脆既感覺, 一樣, 無咩豬味。唔明點解出面點整都好食既野, 呢到會整得咁差。以豬出名既車仔麵食唔出豬味, 其中好大原因係因為個湯底, 食過好多間車仔麵, 無論無牌小販定小店, 都無呢間咁差, 因為呢間個湯真係濃到你咩味都食唔出! 但唔重牛腩味, 一味得個咸字。可能因為我地成十點先去, 所以啲湯咁濃, 但真係感覺好差。唔通唔識沖淡啲咩?個人認為, 車仔麵緊係清清地既湯底, 加腩汁, 有淡淡既牛既鮮味, 又唔會濃到蓋左配菜味道先係上乘。呢間簡直太差! 你話平平地我都算, 仲收我咁貴, 唔會再去!…Read More

咁我朋友就想同我慶祝生日專登帶我黎食素，一食就伏到不得了。首先因為熱到不得了就飲啖茶先啦，其實幾好飲既，有少少玄米茶feel, 夠香口既，雖然冇得自己嗌飲咩茶仲要收我茶介呢點令我有被屈既感覺，不過去到酒樓就預左嫁啦，我忍。第一碟就係侍應姐姐推介既黑松露炒飯，份量的確係十足既，但味道認真麻麻，同一般炒飯冇乜分別，只係更加油，松露味坦白講真係咩都食唔出。第二碟就係甜酸魚啦，值得欣賞既係堅持素食既決心，呢碟魚一食就食到係面粉整嫁啦，基本上冇口感可言，只有終極重口味、典型功高蓋主既甜酸醬覆蓋左個d「魚」味，撈飯食都仲嫌佢重味得制。第三個都係最火既，稻庭烏冬。一擺低即刻想叫佢回水，稻庭烏冬佢整到米線咁既樣，不倫不類。我地諗住算啦可能食落好好食，一食落去個湯底就好似有陣粟味，唔係真係粟左既，但陣味真係好唔討好囉，面質係幾彈牙既，但係湯底唔好已經直接謀殺左呢碟稻庭米線仲要乜餸都冇。D侍應服務態度又差，都唔知點解可以係尖沙咀呢d地段撐咁耐…Read More